ᔪᐊᓇᓯᐅᑉ ᐊᒡᓚᖏᑦ 21 - Aglait Ijjurnaittut

Jiisusiup Saqqinninga Ilinniaqtinut 7-nut

¹ Tamatuma kingurngagut Jiisusi saqqikkannilaurivuq ilinniaqtiminut Taipiuriasiup tasirjuangata saniani; imaak piniarniqarluni saqqilauqpuq.

² Katinngalauqput ukua Saimuuni Piitturuusi, Tuumasilu Marruliavinirmik taijaq, Naatanailu Kainamit Galiliamiittumit pisimajuq, Sipitiullu irningik marruuk, asingiglu marruuk Jiisusiup ilinniaqtingik.

³ Saimuuni Piitturuusiup ilani uqautivait, “Iqallialirama.” Taakkua uqautivaat, “Ilaginiaqpattigit.” Anigamiglu umiamuaqput; unnuamili tamatumani iqalulaunngilat.

⁴ Ullaakkut qaummaliqtillugu, Jiisusi tasiup sinaani nangiqpuq; ilinniaqtit qaujimanngilat Jiisusiuninganik.

⁵ Jiisusiup apirivait, “Qiturngait, iqalulaunngilasi?” Taakkua kiuvaat, “Iqalulaunngilagut.”

⁶ Tavva uqautivait, “Nuluasi ningitilauqsiuk umiap taliqpianut, tavva iqalungniaqpusi.” Tavva nuluatik ningitippait, amuarunnarunnairlugit, iqaluit unurninginnut.

⁷ Tavva ilinniaqtiup Jiisusiup nagligijangata Piitturuusi uqautivaa, “Ataniuvuq!” Saimuunili Piitturuusi tusarami Ataniungmat, annuraani silalliq ativaa piiqsimalauramiuk pinasuarluni, imaanullu misikpuq.

⁸ Ilinniaqtilli nunaliaqput umiakkut, nuluamingnik kalittlutik iqalungnik tatattunik, nunamut ungasinginnamik, uuktutinik 100-nik ungasingniqaramik nunamut.

⁹ Nunamut niugamik, takuvut qijuksanik ikumajunik, iqalungniglu igajaujunik, niaquujaniglu.

¹⁰ Jiisusiup uqautivait, “Iqalurataaqtassinnik tamaunngaigissi.”

¹¹ Tavva Saimuuni Piitturuusi umiamut ikilluni nuluat nunamut uniaqpait, iqalungnik angijuutinik tatattut, 153-nik; iqaluit taimaak unuqtigigaluarmata, nuluat aliktaunngilat.

¹² Jiisusiup uqautivait, “Qailusi nirilirissi.” Ilinniaqtillu nalliattaluunniit apirijumanngilaa, “Kinauvit” qaujimagamik Ataniungmat.

¹³ Jiisusi qaigami niaquujaq tiguvaa taakkununga tunillugu, taimailiurivuqtauq iqalungnik.

¹⁴ Tamajja Jiisusiup pingajungannik saqqinnirilauqtanga ilinniaqtiminut tuqungajunit makinningata kingurngani.

Jiisusiup Piitturuusiullu Uqaqatigiingningak

¹⁵ Nirijariiramigli, Jiisusi uqaqpuq Saimuuni Piitturuusimut, “Saimuuni Juanasiup irninga, ukunangaat pinnariniqsarivinga?” Piitturuusiup kiuvaa, “Ilaak Ataniq; qaujimavutit nagligigakkit.” Jiisusiup uqautivaa, “Siipilaaqutikka niritinniakkit.”

¹⁶ Aippanganik Jiisusiup uqautivaa, “Saimuuni Juanasiup irninga, pinnaarivinga?” Taassuma kiuvaa, “Ilaak Ataniq, qaujimavutit nagligigakkit.” Jiisusiup uqautivaa, “Siipiqutikka pairiniakkit.”

¹⁷ Pingajuannik Jiisusiup uqautivaa, “Saimuuni, Juanasiup irninga, nagligivinga?” Piitturuusili qiksaaliqpuq pingajuannik uqautingmagu, “Nagligivinga?” Tavva uqautiliqpaa, “Ataniq, sunalimaanik qaujimavutit; qaujimavarma nagligigakkit.” Jiisusiup uqautivaa, “Siipiqutikka niritinniakkit.

¹⁸ Sulijumik uqautivagit, inuusuktuutillutit, ilingnik tattirusirlutit aivalauqputit aivigijumajarnut; ittuuliruvilli taliikkik isagumaaqpaakkik, asivillu tattirusirumaaqpaatit aitillutit aivigijumanngitarnut.”

¹⁹ Jiisusi tamatuminga uqalauqpuq, Piitturuusiup tuqutauluni Guutiup niqturnaqtitaunirilaaqtanganik uqausiqarluni. Tamatuma kingurngagut Jiisusiup uqautivaa, “Malinnga.”

Jiisusi Ilinniaqtilu

²⁰ Piitturuusili tunummut qiviarami tunuminiittumik takuvuq ilinniaqtimik Jiisusiup nagligijanganik, taanna unnuksiutimik nirillutik Jiisusimut iigangalauqtuq apirilauqturlu, “Ataniq, nalliatta pijautinniaqpaatit?”

²¹ Piitturuusiup takugamiuk, Jiisusi uqautivaa, “Ataniq unali angut qanuilinganiaqpaa?”

²² Jiisusiup uqautivaa, “Inuunginnaqugukku tikilaunnginninni, isumananngilaq ilingnut, ivvilli malinnga!”

²³ Tavva Jiisusiup maliktingit uqaqattautiliqput una ilinniaqti tuqunianngilaq; Jiisusi uqalaunngilaq tuquniannginnirarluniuk; uqalauqpurli, “Inuunginnaqugukku tikilaunnginninni, isumananngilaq ilingnut.”

²⁴ Taannauvuq ilinniaqti tamakkuninga uqausiqaqtuq, tamakkua titiralauqpait; qaujimavugullu uqausirijangit sulingmata.

Uqausiit Kingulliqpaat

²⁵ Asinginniktauq Jiisusi amisunik piniarniqalauqpuq; piniarnirilauqtangilli atangirlutik titiraqtaugajaqpata kinguliriiktarningit maliglugit, silarjuarmiut taakkuninga titiraqsimajunik pisimajunnarasuginngilakka.