ᔪᐊᓇᓯᐅᑉ ᐊᒡᓚᖏᑦ 20 - Aglait Ijjurnaittut

Iluviup Inuqarunniirninga

¹ Ullaamarikkut pinasuarusiup ullungita sivulliqpaangani, suli taaqtillugu, Miari Maaktaliini iluvirmuaqpuq, takullunilu ujaraaluk iluviup paanganit piiqtausimaninganik.

² Tavva ullaksivuq Saimuuni Piitturuusimut ilinniaqtimullu ailluni, Jiisusiup nagligijanganut, uqautillugik, “Ataniq annijjaunnirmat iluvirmit, qaujimanngilavut namunngaqtaunnirmangaat.”

³ Tavva Piitturuusi ilinniaqtilu anivuuk, iluvirmut ailirlutik.

⁴ Ullaglutik iluvirmut, ilinniaqtili Piitturuusimit sukkaniqsaugami sivulliulluni iluvirmut tikippuq;

⁵ iluanut ittuarami, takuvuq qallunaaqtanik saattunik tamaaniirrijunik, itiranili iluanut.

⁶ Saimuuni Piitturuusili kingulliulluni tikinnami, katturani iluvirmut itiqpuq; takullunilu qallunaaqtanik saattunik tamaaniirrijunik.

⁷ Qallunaaqtaq Jiisusiup niaquanut immutiulauqtuq, taakkununga qallunaaqtanut immutivinirnut ilagijaunani, immigulli imusimavuq katimajaunani.

⁸ Tavva ilinniaqti, iluvirmut tikiqqaalauqtuq, itirivuq; takullunilu ukpiqpuq;

⁹ aglait suli qaujimannginnamigit uqaqtut, tuqungajunit makittariaqarninganik.

¹⁰ Tavva ilinniaqtiik utirlutik angirraqpuuk.

Jiisusiup Saqqinninga Miari Maaktaliinimut

¹¹ Miari iluviup silataani nangirluni qiavuq, sulili qialluni, iluvirmut ittuaqpuq.

¹² Takullunilu aingiliingnik marruungnik qakuqtaangnik annuraaqsimajuungnik, Jiisusiup timingata inigilauqtangani iksivajuungnik, aippaa niaquata nalaaniittuq, aippangalu itigangita nalaaniilluni.

¹³ Taakkuak Miari apirivaak, “Arnaq sungmat qiavit?” Miari kiuvuq, “Atanira annijjaunnirmat, qaujimanngilangalu namunngaqtaunnirmangaat.”

¹⁴ Taimaaglu uqariirami tunummut qiviaqpuq; Jiisusi takuvaa nangiqtuq, qaujimanngilaa Jiisusiungmangaat.

¹⁵ Jiisusiup apirivaa, “Arnaq sungmat qiavit? Kinamiglu qiniqpit?” Miariup piruqsiivilirijiunasugigamiuk, uqautivaa, “Tavvanngat annisinniruviuk, uqautilaunnga namunngarnirmangaaqpiuk, ainiarakku.”

¹⁶ Jiisusiup uqautivaa, “Miari.” Qiviarluniuglu uqaqpuq Iipruutitut, “Raapunai!” Tukilik: “Ajuriqtuijii!”

¹⁷ Jiisusiup uqautivaa, “Akturniarnanga, suli tappaunngalaumnginnama Ataatannut; inuuqatikkali upalikkit uqautilugit, tappaunngarniaqpunga Ataatannut Ataatassinnullu, Guutinnut Guutissinnullu.”

¹⁸ Tavva Miari Maaktaliini utiliqpuq; ilinniaqtiillu uqautivait, “Ataniq takulauqpara”; uqautillugit uqausirilauqtanginnik.

Jiisusi Saqqinninga Ilinniaqtiminut

¹⁹ Ullumi tavvani unnuliqtillugu, pinasuarusiup sivulliqpaangani, ilinniaqtiit katimallutik ukkuat attungiqsimalauqput, Juutinik sivuuragamik, Jiisusi saqqippuq akurngannilu nangirluni, uqaqpuq, “Saimaniup ilagilisi.”

²⁰ Taimaagli uqariirami, aggani saniranilu takujautippait taakkununga. Ilinniaqtiillu quviasuliqput Ataniq takugamijjuk.

²¹ Jiisusiup uqautikkanniqpait, “Saimaniup ilagilisi. Suurlu Ataataup tililaurmanga, taimaaktauq tiligivassi.”

²² Taimaaglu uqariirami, supuurvigivait, uqautillugillu, “Anirniq Ijjurnaittuq pigiliqsiuk.

²³ Nalliatta ajurningit isumagijunnaiqtasi, taakkua isumagijunnaiqtauvut; nalliattali ajurningit isumagijunnainngitasi, taakkua isumagijunnaiqtaunngilat.”

Jiisusi Tuumasilu

²⁴ Tuumasiulli 12 ilangatta, Marruliavinirmik taijaujuup ilagilaunngilait Jiisusi tikitillugu.

²⁵ Tavva ilinniaqtiit Tuumasi uqautivaat, “Ataniq takulauqpavut.” Tuumasiulli uqautivait, “Agganginni kikiaktuqtauningit takunngikkukkit, tikiralu kikiaktuqtauninginnut ilinngikkukku, sanirangalu aktunngikkukku upirusulijjaanngilanga.”

²⁶ Ulluit sitamaujuqtut aniguqtillugit, ilinniaqtiit katimalirivut iglumi, Tuumasiup ilagivait. Ukkuat attunngiqsimatillugit, Jiisusi najuqtangannuaqpuq akurnganilu nangirluni uqaqpuq, “Saimaniup ilagilisi.”

²⁷ Tavva Tuumasimut uqaqpuq, “Tikiit uvunga iliguk, aggakkalu takulikkit; aggatillu isaglugit sanirara aktuliruk; ukpinngiituujunnarlutit, ukpirilli.”

²⁸ Tuumasiup kiuvaa, “Atanira, Guutigalu!”

²⁹ Jiisusiup uqautivaa, “Ukpiliqpit takugavinga kisiani? Saimanaqtumiipput takulauratik ukpiqtut.”

Titiraqtaujjutigijangit Taakkua Aglaksimajut

³⁰ Ilinniaqtingitali takkuani Jiisusi suli amisunik nalunaikkutarnik pinasuaqattalauqpuq, ukunani aglangni titiraqsimanngittunik.

³¹ Taakkua titiraqsimavut ukpiliqullusi Jiisusi Christuusiungmat, Guutiup Irninga. Ukpirnissigut inuusiqaqullusi taassumuuna.