ᔪᐊᓇᓯᐅᑉ ᐊᒡᓚᖏᑦ 2 - Aglait Ijjurnaittut

Kainami Katititaujuqarninga

¹ Ulluit pingajunganni Kainami Galiliamiittumi katititaujuqalauqpuq, Jiisusiup anaananga tavvaniippuq;

² Jiisusittauq qaiqujausimagivut katititaujuungnut, ilinniaqtingillu.

³ Uainiit nungummata, anaanangata Jiisusi uqautivaa, “Uainimik nungurutivut.”

⁴ Jiisusiup uqautivaa, “Arnaaq, qanuiliuqulunga uqariaqanngilatit, piviksara suli nalliutisimanngimmat.”

⁵ Tavva Jiisusiup anaanangata pijiit uqautivait, “Qanutuinnaq piqujikpat malingniaqpasi.”

⁶ Juutit maligaqarmata ukpirusituqarmiktigut sunatuinnait salummaqsataugiaqarninginnik, taimaimmat pingasuujuqtunik imiqautinik tavvaniittuqaqpuq, atunit imaqarunnaqtunik atausiq 20-mit 30-mut qallutinik.

⁷ Jiisusiup pijiit uqautivait, “Ukua imiqautiit imirmik immiqsiuk.” Tavva immiqpait tatallugit.

⁸ Uqautivait, “Tavvanngat qalusilusi, nirivigjuaqtut angajuqqaangannut aatsilirissi.” Tavva aatsivut taassumunga,

⁹ nirivigjuaqtut angajuqqaangatta imiq uukturamiuk uainiuliqtuq, qaujimalaunngilaq nakit pingmangaat pijilli imirmik qalusiqqaujut qaujimavut, nirivigjuaqtut angajuqqaangatta uiksaq qaiquvaa

¹⁰ uqautillugu, “Piusirijausuunguvuq uaini mamarniqpaaq sivulliutillugu; nirijaqtuqsimajulli imiriiqsimaliqpata, kinguliutillugu uaini mamannginniqsaq atuinnaruqtausuunguvuq; ivvilli uaini mamarniqpaaq kingulliutingaaqpat.”

¹¹ Tamajja Jiisusiup nalunaikkutangita sivulliqpaangat, piniarnirilauqtanga Kainami Galiliamiittumi, tavvani niqturnarnirjuani saqqitilauqpaa; ilinniaqtingitalu ukpirivaat.

¹² Tamatuma kinguningagut Jiisusi, anaanangalu, qatanngutingillu ilinniaqtingillu Kapiirniamuaqput; tavvaniippullu ullunik ununngittunik.

Jiisusiup Tuksiarvigjuarmuarninga

¹³ Juutit Qaangiqtauvingmik nalliunniqsiurvingat qaglilirmat, Jiisusi Jiruusalimmuaqpuq.

¹⁴ Tuksiarvigjuarmilu inungnik takuvuq immuksiugait pangninginnik siipiniglu aqiggiujaaqtuniglu niurrutiqaqtunik, kiinaujaniglu tauqsiijiit pinasuaqtillugit pinasuagarmingnik.

¹⁵ Aktlunaamik tiigarutiliurami, tavvaniittulimaat anitippait, siipiillu immuksiugaillu pangningit, tuksiarvigjuamit; kiinaujaniglu tauqsiijiit saangit urrutippait kiinaujaillu naavillutik namutuinnaq.

¹⁶ Aqiggiujaniglu niurrutiliit uqautivait, “Ukua tavvanngat anitilauqsiuk; Ataatama iglunga niuvirviutitaksarinngilasi.”

¹⁷ Tavva ilinniaqtingit iqqaivut titiraqsimajuqarmat, “Iglungnut ilungiqsuutiqarnirma aksuruqtiliqpaanga.”

¹⁸ Tavva Juutit angajuqqaangita uqautivaat, “Qanuq nalunaikkutarmik saqqititsijunnaqpit uvattinnut taimailiurunnarnirnut?”

¹⁹ Jiisusiut kiuvait, “Una tuksiarvigjuaq asirurussiuk, ulluniglu pingasunik nappaqtittumaaqpara.”

²⁰ Tavva Juutit uqaqput, “Unaa tuksiarvigjuaq sanajausimajuq arraagunik 46-nik, nappaqtittunnaqpiuk ullunik pingasunik?”

²¹ Jiisusili tuksiarvigjuarmik uqausiqaqpuq timiminik.

²² Taimaimmat tuqungajunit makisimalirmat, ilinniaqtingita Jiisusiup uqausirilauqtangit iqqalauqpait; Aglait ukpirivait Jiisusiullu uqausirilauqtangit.

Jiisusiup Qaujimaninga Inuup Piusinganik

²³ Jiisusi Jiruusalimmiitillugu Qaangiqtauvingmik nalliunniqsiuqtillugit, amisut ukpiliqput taassumunga nalunaikkutarnik takugamik pinasuaqtanginnik.

²⁴ Jiisusili nangminiq ilaliutimmarilaunngilaq inungnut,

²⁵ inulimaat qaujimatsiaramigit inungnut nalliannulluunniit nalunaiqsiviujariaqalaunngilaq; qaujimatsiarami inuup ilumiutarijanginnik.