ᔪᐊᓇᓯᐅᑉ ᐊᒡᓚᖏᑦ 19 - Aglait Ijjurnaittut

¹ Tavva Pailaatuusiup Jiisusi tigujauquvaa, tiigaqtuqtauqullugulu.

² Unataqtuksait niaquutiksaliuqput kakillautilingnik uqpiujaaqtunik pirraillutik, Jiisusiullu niaquanut ilivaat, annuraamiglu aupallariktumik atitillugu;

³ upaglugulu uqautivaat, “Niqtuqtauli, Juutit angajuqqaarjuangat!” Kiinangagullu patikpaat.

⁴ Pailaatuusi aningmigami, inugasagjuanut uqaqpuq, “Takugit, una anitippara, takuqullusi taassuma sugiaqtaujjutiksanganik nanisinnginnama.”

⁵ Tavva Jiisusi anivuq, niaquusijarluni kakillautilingnik uligjuaqarlunilu aupallariktumik. Pailaatuusi inungnut uqaqpuq, “Takuliqsiuk angut una!”

⁶ Tunirrusiqtitsijiilli angajuqqaangit tuksiarvigjuallu qaujisaqtingit takugamik Jiisusimik qaigalaaliqput, “Kikiaktuqtauli! Kikiaktuqtauli!” Tavva Pailaatuusiup uqautivait, “Nangminiq piliqsiuk, kikiakturlugulu, uvangali sugiaqtaujjutiksanganik nanisinngilanga.”

⁷ Tavva Juutit kiuvaat, “Piqujaqaqpugut, piqujait maliglugit taanna tuqutaujuksauvuq, imminik Irniutimmat Guutimut.”

⁸ Pailaatuusiulli uqausiit tamakkua tusaramigit, sivuuraniqsauliqpuq.

⁹ Iglurjuarmullu itirmigami Jiisusi apirivaa, “Nakinngaaqsimavit?” Jiisusili kiunngilaq.

¹⁰ Tavva Pailaatuusiup uqautivaa, “Uvannut kiuttailimavit? Qaujimanngilatit pijunnarniqarama anitittunnarlutit, kikiaktuqtautillutilluunniit?”

¹¹ Jiisusiup kiuvaa, “Uvannut pijunnarniqarajanngilatit tunisiviunngikkuvit tappaanngat; taimaimmat uvannik pijautitsijuq ilingnut ajurniqarniqsauvuq ilingnit.”

¹² Pailaatuusili qinirasuaraluaqpuq Jiisusiup anititaujjutiksanganik, Juutilli qaigalaaliqput, “Una anitinniaruviuk, angajuqqaarjuap Siisariup ilannaarinianngilaatit; imminik angajuqqaarjuanguniraqtuq akiraqturmat angajuqqaajuarmik Siisarimik.”

¹³ Pailaatuusiulli uqausiit tamakkua tusaramigit, Jiisusi anitippaa ingilluni iqqaqtuiviup iksivautanganut taijaujumut Ujarangnik Natiliuqsimajumik, Iipruutitut atiqaqtumut Gapatamik.

¹⁴ Taimailiuqtillugit tavvani ulluq qitiralikasaliqpuq; Qaangiqtauvingmik nalliunniqsiurviup upalungaijarvinga nalliutitillugu. Tavva Juutinut uqaqpuq, “Takugit tavva angajuqqaarjuasi!”

¹⁵ Qaigalaaliqpulli, “Tamaaniinani, tamaaniinani, kikiaktuqtauli!” Pailaatuusiup uqautivait, “Angajuqqaarjuasi kikiaktugaksarivara?” Tavva tunirrusiqtitsijiit angajuqqaangit kiuvut, “Angajuqqaarjuaqanngilagut Siisariup asianik!”

^16a Tavva Pailaatuusiup Jiisusi aittuutigiliqpaa taakkununga kikiaktuqtauqullugu.

Jiisusiup Kikiaktuqtauninga

^16b Jiisusi tavva tiguvaat,

¹⁷ Jiisusi anivuq, sanningajuliksanilu iqsukpaa, Niaquviniqtalingmut, Iipruutitut atiqaqtumut Guulgaatamik.

¹⁸ Tavvani Jiisusi kikiaktuqpaat sanningajulingmut, asingingniktauq marruungnik kikiaktuigivut, avataanuarlugik saumianut taliqpianullu, Jiisusili akulliqpaullugu.

¹⁹ Pailaatuusi titiqqanik niaquata qulaaniittuksanik titiraqpuq ilillugillu sanningajulingmut; imaak uqaqsimajunik: “Jiisusi Naasariitimiuq, Juutit angajuqqaarjuangat.”

²⁰ Juutit amisut taakkua titiraqsimajut uqalimaaqpait, Jiisusiup kikiaktuqtauvigijanga ungasingimmat iglugasangnit; taakkua titiraqsimavut Iipruutitut, Laatinititullu, Guriikititullu.

²¹ Tavva tunirrusiqtitsijiit angajuqqaangit Pailaatuusimut uqaqput, “Titiraqsimajariaqanngilaq ‘Juutit angajuqqaarjuangannik,’ imaagli: ‘Angut una uqalauqtuq, Juutit angajuqqaarjuarivaanga.’”

²² Pailaatuusiup kiuvait, “Titiraqtakka taimaak titiraqsimainnarniaqput.”

²³ Unataqtuksait Jiisusimik kikiaktuijariiramik annuraanginnik agguivut sitamaulillugit, atunit atausirmik pitaarlutik; uligjuangali tigugivaat, taanna kiluqarani sanasimalauqpuq.

²⁴ Tavva unataqtuksait immingnut uqaqattautivut, “Taanna avigunnairlavut; nalautsaarlutali makitsigiaqattaliqta nalliatta piniarmangaagu.” Tamanna atuqtaulauqpuq aglait nalautsiqullugit imailijut, “Annuraakka immingnut atunit aggulauqpait, Uligjuaralu nalautsaarutigilauqpaat.” Tavva unataqtuksait taimailiulauqput.

²⁵ Jiisusiup sanningajulingata qanigijaani ukua nangilauqput, Jiisusiup Anaananga, Anaanangatalu qatanngutaa, Miarilu Klupaasiup nulianga, Miarilu Maaktaliini.

²⁶ Jiisusiulli Anaanani takugamiuk, ilinniaqtilu nagligijani tavvani nangiqataujuq; Anaanaminut uqaqpuq, “Arnaq, takugit, tavva Irniit!”

²⁷ Tavva ilinniaqti uqautivaa, “Takugit, tavva Anaanait!” Ullumit tavvanngat pigiarluni ilinniaqtiup najuqtigiliqpaa angirramini.

Jiisusiup Tuquninga

²⁸ Jiisusi qaujimalirami sunalimaat pijariirmata, aglait nalautsiqullugit, uqaqpuq, “Qiiliqpunga.”

²⁹ Tavvani imiqautitaqaqpuq qasilinaqtumik imalingmik; taakkuali puvaujamik qasilinaqtumut misuqqaarlugu piruqtuvinirlu hisapmik atiliit kapummitaarlugu Jiisusiup qaninganut manivaat.

³⁰ Jiisusi qasilinaqtumik imirami uqaqpuq, “Pijariiqpuq”; ukullunilu anirnangiqpuq.

Jiisusiup Kapijauninga Sanirangagut

³¹ Ulluq upalungaijarviungmat, Sapatiutillugu timinik nivingaqujinatik sanningajulingmi, ulluq taanna ijjurnaimmat, Juutit angajuqqaangit Pailaatuusimut apirijaqtuqput kikiaktuqtausimajut niungit nakatiqtauqullugit, sanningajulingmit piiqtaujunnaqsiqullugit.

³² Tavva unataqtuksait tavvunngaramik sanningajulingmiittuup sivulliqpaangatta niungik nagguqpait, aippangatalu niungik naggurivait.

³³ Jiisusimulli tikinnamik takugamik tuqujariirmat, niungik naggunngilaak.

³⁴ Unataqtuksailli ilangatta qalugiarjuarmut Jiisusi sanirangagut kapivaa, tavvainnarlu auk imirlu kuviliqpuuk.

³⁵ Jiisusi taimailijautillugu takunnaalauqtuup taanna uqautigivaa, uqausirijangalu sulivuq, qaujimallunilu sulijumik uqarami, ilissittauq ukpiliqullusi.

³⁶ Tamakkua piniarniulauqput aglait nalautsiqullugit imailijut, “Taassuma sauningit nagguqtaujuksaunngilat.”

³⁷ Aglaittauq asingit uqaqsimakkannirivut, “Takujumaaqput kapilauqtamingnik.”

Jiisusiup Iluviqtauninga

³⁸ Tamatumali kingurngagut Juusipi Arimatiamiuq, Jiisusimut ilinniaqtiugami qaujijauttaililluni, Juutinik sivuuragami, Pailaatuusimut apirijaqtuqpuq Jiisusiup timinganik pijunnaqtitaujumalluni, Pailaatuusiup pijunnaqtippaa. Tavva Juusipiup Jiisusiup timinga upaglugu aqqaqtippaa.

³⁹ Nikutimuusittauq, tavvunngarivuq unnuangutillugu Jiisusimualauqsimajuq, naksarluni tipitsiariktumik marmik aalusmiglu katisimajumik, uqumainniqaqtumik 100-paun qanigijaani.

⁴⁰ Tavva Jiisusiup timinga tiguvaak, immusirlugulu qallunaaqtamik saattumik immutiksajamik tipitsiariktumullu minguaqpaak, Juutit iluviqsillutik piusirivaktangatut.

⁴¹ Jiisusiup kikiaktuqtauvigijangani piruqsiiviktaqaqpuq, tavvani piruqsiivingmi iluviksaqtaqaqpuq nutaamik ilisiviulauqsimanngittumik suli.

⁴² Ulluq Juutit upalungaijarvigingmagu, tavvani qanittumi iluviksaqtaqarmat, tavvunga Jiisusiup timinga ilivaat.