ᔪᐊᓇᓯᐅᑉ ᐊᒡᓚᖏᑦ 18 - Aglait Ijjurnaittut

Jiisusiup Tigujauninga

¹ Jiisusi tuksiariirami, ilinniaqtini ilagillugit tavvanngat nuupput, kuuk Kitturaani ikaaqpaat, tavvani piruqsiiviktaqarmat, ilinniaqtini ilagillugit tavvunngaqput.

² Juutasiulli, taassuma pijautitsijingata, taanna piruqsiivik qaujimavaa; Jiisusi ilinniaqtini ilagillugit tavvani katiqattaqsimangmata.

³ Taimaimmat, Juutasi tavvunga piruqsiivingmualiqpuq, unataqtuksanik tuksiarvigjuallu qaujisaqtinginnik ilaqarluni tunirrusiqtitsijiit angajuqqaangita Paarisillu tilisimajanginnik, naniruutiqarlutik nanirualijarlutiglu sugiutsijarlutiglu.

⁴ Jiisusili, tamainnik qaujimagami piniarviuniarnirminik, parriarlugit uqautivait, “Kinamik qiniqpisi?”

⁵ Taakkua kiuvaat, “Jiisusi Naasariitimiuq.” Jiisusiup uqautivait, “Taannauvunga.” Juutasiup pijautitsijuup inuit taakkua nangiqatigivait.

⁶ Jiisusiulli uqautingmagit, “Taannauvunga,” kinguppiaramik niviqput nunamut.

⁷ Tavva Jiisusiup apirikkanniqpait, “Kinamik qiniqpisi?” Taakkua uqaqput, “Jiisusi Naasariitimiuq.”

⁸ Jiisusiup kiuvait, “Uqautijariiqpassi taannauvunga; uvangatuaq qinirussinnga, ukua ilagijakka kamaginagit aullarlit.”

⁹ Uqausirilauqtangit nalautsiqullugit imailijut, “Uvannut tunilauqtarnik atausirmigluunniit asiujuqanngilaq.”

¹⁰ Tavva Saimuuni Piitturuusi, savigjuaqarami, amulluniuk tunirrusiqtitsijiit angajuqqaangatta pijinga ulimarlugu siutingata taliqpia nakappaa. Taannalu piji atiqaqpuq Maulkasmik.

¹¹ Jiisusiup Piitturuusi uqautivaa, “Savigjuat kiinailitanganut puuliruk; tiitutiup imanga Ataatama uvannut qaitanga imiriaqanngilara?”

Jiisusiup Aanasimuarujjauninga

¹² Tavva unataqtuksait angajuqqaangatta Juutillu tuksiarvigjuarmi qaujisaqtingita Jiisusi tiguvaat qilaksurlugu.

¹³ Sivullirmiglu Aanasimuarutivaat; Kaiapaasiup sakinganut, arraagumi tamatumani tunirrusiqtitsijinut angajuqqaangujuup.

¹⁴ Kaiapaasi taannauvuq Juutit angajuqqaanginnik isumataaqtitsilauqtuq inuk atausiq tuqutaukpat piuniqsaugajarnirarluniuk inuuqatigiilimaat pijjutigilugit.

Piitturuusiup Misiarutiqarninga Jiisusimik

¹⁵ Saimuunili Piitturuusi ilinniaqtiuqatingalu Jiisusimik malikpuuk. Ilinniaqtilu Piitturuusiup asia qaujimajaugami tunirrusiqtitsijiit angajuqqaangannut, tunirrusiqtitsijiit angajuqqaangatta iglungata silataanut avaluliuqsimajuumut itiqatauvuq Jiisusi ilagillugu,

¹⁶ Piitturuusili itiqtarviup ukkuangata silataani nangiqpuq. Ilinniaqtilu asia qaujimajaujuq tunirrusiqtitsijiit angajuqqaangannut, anigami arnamik itiqtarviup ukkuangani kamajimik uqaqatiqalaurluni, Piitturuusi itiqtippaa.

¹⁷ Tavva arnaq itiqtarviup ukkuangani kamaji Piitturuusimut uqaqpuq, “Taassuma ilinniaqtinginnut ilagijaunngilatit?” Piitturuusiup kiuvaa, “Ilagijaunngilanga.”

¹⁸ Sila niglasulirmat, pijiit tuksiarvigjuarmilu qaujisaqtiit qijuksanik ikitsilauqput avataanilu nangirlutik, uqquusittirasuaqput; tavva Piitturuusi nangiqataulirivuq, ikumajuup saniani imminik uqquusittirasuarilluni.

Tunirrusiqtitsijiit Angajuqqaangatta Apiqsurninga Jiisusimik

¹⁹ Tunirrusiqtitsijiilli angajuqqaangatta Jiisusi apiqsuqpaa ilinniaqtingita miksaanut ajuriqtuiqattarninganiglu.

²⁰ Jiisusiup kiuvaa, “Taimanngat ijiqsimananga inulimaanut uqallaqattalauqpunga; ajuriqtuiqattalauqpungalu Juutit ukpirnirmut katimavinginni Tuksiarvigjuamilu, Juutilimaat kativigivaktanginni; ijiraqturlunga uqallalauqsimananga.

²¹ Sunamik tukisivigijumavinga? Inuit apiqsulaukkit uvannik tusaaqaqtalauqtut uqausiriqattalauqtannik; qaujimangmata qanuq uqausiqaqattalaurmangaarma.”

²² Jiisusi taimaak uqarmat, qaujisaqtiit ilangatta uluangagut patigluniuk uqautivaa, “Tunirrusiqtitsijiit angajuqqaangat taimaak kiumajaksariviuk?”

²³ Jiisusiup kiuvaa, “Naammanngittumik uqaruma, nalunaiqsijuqalaurli qanuq sulinngimmangaarma; suligumali uqausirijannik, sungmat patikpinga?”

²⁴ Tavva Aanasiup aniquliqpaa qilaktausimatillugu Kaiapaasimut aatauquva tunirrusiqtitsijiit angajuqqaangannut.

Piitturuusiup Saglutiqakkannirninga Jiisusimik

²⁵ Saimuuni Piitturuusi suli ikualatitaujuup saniani nangiqpuq uqquusittirasuarluni. Tavva uqautivaat, “Taassuma ilinniaqtingita ilaginngilaatit?” Piitturuusi suligani uqaqpuq, “Ilagijaunngilanga.”

²⁶ Tunirrusiqtitsijiilli angajuqqaangatta pijingita ilangat, piruqsiivingmi Piitturuusiup siutingagut nakaqqaujangata ilangat, uqaqpuq. “Takuqqaunngilagit taassuminga ilaqaqtillutit piruqsiivingmi?”

²⁷ Tavva Piitturuusi suligani kiugivuq; tavvainnarlu angutiviaq nilliqpuq.

Jiisusiup Aatauninga Pailaatuusimut

²⁸ Tavva Jiisusi Kaiapaasiup iglunganit aataulirivuq Ruumamiut aulatsijingatta iglurjuanganut. Ullaammariuliqtillugu. Juutilli angajuqqaangit tavvunga itiqataunngilat, ukpirrusirijatik malilugit salumailitirumannginnamik, Qaangiqtauviksiurutiup nalliunnisiuqtauninganik nirijunnaqataujumagamik.

²⁹ Tavva Pailaatuusiup anivigillugit uqautivait, “Sunamik pasiksirutiqaqpisi angummut uumunga?”

³⁰ Taakkua kiuvut, “Una piunngittulijiunngippat, ilingnuarutigajanngitavut.”

³¹ Pailaatuusiup uqautivait, “Nangminiq tiguliqsiuk iqqaqturlugu nangminiq piqujasi maliglugit.” Tavva Juutit uqautivaat, “Tuqutsijuksaunngilagut kinamigluunniit.”

³² Tamanna piniarniulauqpuq Jiisusiup uqausirilauqtangita nalautsiningit saqqititauqullugit qanuiliuqtauluni tuqutitaulaarmangaarmi.

³³ Pailaatuusili iglurjuarmut itirmigami Jiisusi qaiquvaa, uqautillugulu, “Juutit angajuqqaarjuarivaatit?”

³⁴ Jiisusiup kiuvaa, “Imminik taimaak tamatuminga uqaqpit uvvalu asingnit tamatuminga uqaujjaunniqpit qanuittuungmangaarma?”

³⁵ Pailaatuusiup kiuvaa, “Juutiunasugivinga? Nangminiq inuuqatingnut tunirrusiqtitsijiillu angajuqqaanginnut tigujaullutit uvannuaqtauvutit; qanuiliulauravit?”

³⁶ Jiisusi kiuvuq, “Angajuqqauviga silarjuarmit tamatumangat pinngilaq; angajuqqauviga silarjuarmit tamatumangat pikpat, maliktinnit unatarujjaugajaqpuq, tigujauqunanga Juutit angajuqqaanginnut; taimaimmat, angajuqqauviga silarjuarmit tamatumangat pinngilaq.”

³⁷ Tavva Pailaatuusiup apirivaa, “Tavvaa angajuqqaarjuanguvit?” Jiisusiup kiuvaa, “Ivvit angajuqqaarjuanguniraqparma. Tamanna pijjutigillugu inuulauqpunga, silarjuarmullu tikillunga, sulijumik nalunaiqsijaqturlunga. Sulijumiittulimaat tusaqpaanga.”

^38a Tavva Pailaatuusiup uqautivaa, “Sunauvaa sulijuq?”

Jiisusiup Tuqutaksaruqtitauninga

^38b Pailaatuusi taimaak uqariirami, anilluni Juutinut uqaqpuq, “Sugiaqtaujjutiksanganik taassuma nanisinngilanga.

³⁹ Piusisili maliglugit tigujausimajut ilangannik pijumajassinnik atausirmik anititsisuunguvunga Qaangiqtauvingmik nalliunniqsiuliraangassi; Juutit angajuqqaarjuangannik anititsiquvisinnga?”

⁴⁰ Tavva qaigalaaliqput, “Taassumingaunngittuq, Parapaasimigli!” (Parapaasili pirajauvuq.)