ᔪᐊᓇᓯᐅᑉ ᐊᒡᓚᖏᑦ 17 - Aglait Ijjurnaittut

Jiisusiup Tuksiujjininga Ilinniaqtiminik

¹ Jiisusi tamakkuninga uqariirami, qilangmut takusarluni uqaqpuq, “Ataatak, ikarraq nalliutivuq; Irniit niqturnaqsitiliruk, niqturnaqtitauqullutittauq Irnirnut.

² Irniit tunisivigisimagaviuk pijunnarnirmik inulimaanut, inuusirmik nungusuittumik tunisiqullugu tunisimajalimaarnut taassumunga.

³ Inuusiq nungusuittuq imailingavuq, ilingnik qaujiluni nalaagut sulijumik Guutituangunirnik, tililauqtarniglu Jiisusi Christuusimik.

⁴ Niqturnaqtilauqpagit nunarjuarmi, piniarniillu pinasuaqtauqulauqtalimaatit uvannut pijariilauqpakka;

⁵ maanna, Ataatak niqturnaqtilaunnga nangminiq najuutinirnut pigilauqtannut ilingni najuutitillunga silarjuaq sanajaulauqaaqtinnagu.

⁶ “Qaujijautilauqpagit inungnut uvannut tunilauqtarnut silarjuarmiunit; taakkua pigilauravigit, uvannut tunilauqpatit, uqausiqtit naalalauqpait.

⁷ Maannalu qaujivut uvannut tunilauqtalimaatit ilingnit pisimangmata;

⁸ uqausiit tunilauqtatit uvannut taakkununga uqausirilauqpakka, taakkualu ilaliulauqpait sulijumik qaujillutik ilingnit pisimaninnik; ukpilirlutiglu tililauravinga.

⁹ “Taakkua tuksiutivakka; silarjuarmiut tuksiutinnagit taakkuali kisimi tunilauqtatit uvannut tuksiutivakka, taakkua pigigavigit.

¹⁰ Pigijalimaakka pigivatit, pigijatillu pigivakka, niqturnaqsititauvungalu tamakkutiguunaq.

¹¹ Silarjuarmiittunniiqpunga, taakkuali suli silarjuarmiipput, maanna ilingnut qaivunga. Ataatak Ijjurnaittutit, saputisimalaukkit pijunnarnirnut, taakkua tunilauqtatit uvannut atausiuqullugit, suurlu uvaguk atausiugannuk.

¹² Taakkunani najuutininni, saputisimalauqpakka pijunnarnirnut, taakkua tunilauqtatit uvannut; saputisimalauqpakka, atausirmigluunniit asiujuqanngilaq taanna kisimi asiujuksausimajuq asiujutuuvuq, aglait nalautsiqullugit.

¹³ Maannali ilingnut qaivunga; taimaaglu uqaqpunga silarjuarmiitillunga, quviasungnira taakkunanngat ilumiutarijauluni naammaksitsiaqullugu.

¹⁴ Uqausiqtit tusaqtautilauqpakka taakkununga; silarjuarmiunit uumigijauvut silarjuarmiunit pigijaunnginnamik, uvangattauq silarjuarmiut piginngimmanga.

¹⁵ Tuksianngilanga taakkuninga silarjuarmit piiqtauqujilunga, sapujjisimaqullutilli taakkuninga piunngittumit Saataanasimit.

¹⁶ Silarjuarmiut taakkua piginngimmagit, uvangattauq silarjuarmiut piginngimmanga.

¹⁷ Ijjurnaitikkit sulinirnut; uqausiqtit sulingmata.

¹⁸ Silarjuarmut tililauravinga, taimaaktauq silarjuarmut tilivakka.

¹⁹ Taakkua pijjutigillugit ilingnut tunivunga, taakkuattauq sulijumik tuniqullugit ilingnut.

²⁰ “Taakkuatuarli tuksiutinngilakka, taikkualittauq uqausinginnut ukpilirumaaqtut uvannut tuksiutivakka.

²¹ Tuksiaqpunga taakkualimaat atausiuqullugit; ivvittauq Ataatak, ilunniinnavit, uvangalu ilungniinnama, taakkuattauq iluttinniiqullugit, silarjuarmiut ukpiliqullugit tililauravinga.

²² Niqturnarniq uvannut tunilauqtait tunilauqpara taakkununga, taakkua atausiuqullugit uvattitut,

²³ taakkunaniillunga ivvillu uvanniillutit, atausillariuliqullugit, silarjuarmiut qaujiliqullugit tililauravinga nagligigavigillu uvannik nagligusungniqtut.

²⁴ “Ataatak, pijumavunga taakkua uvannut tunilauqtatit, uvanniiqullugit najuqtanni, niqturnarnirmiglu uvannut tunilauqtarnik takuqullugit; uvannik nagligusungnirnut silarjuaq pinnguqtitaulauqqaaqtinnagu.

²⁵ Naalaaguuqtutit Ataatak, silarjuarmiut qaujimanngimmata ilingnik, uvangali qaujimavagit; taakkualu qaujivut tililauravinga.

²⁶ Taakkununga qaujijautippagit, suli qaujitippalliajumavakka, naglingniq naglingnirijait uvannut ilunginniiqullugu, uvangalu ilunginniillunga.”