ᔪᐊᓇᓯᐅᑉ ᐊᒡᓚᖏᑦ 16 - Aglait Ijjurnaittut

¹ “Tamakkuninga uqautivassi paallaqunasi.

² Juutit ukpirnirmut katimavinginnit anititaujumaaqpusi; nalliutijumaaqpuq nalliat ilissinnik tuqutsilutik Guutimik pijitsirasugijumaarningat.

³ Taimailiurviujumaaqpusi Ataatagalu uvaguk qaujimannginnamitikkuk.

^4a Tamakkuningali uqautilauqpassi, tamanna piviksangat nalliutikpat iqqailiqullusi taakkuninga uqausiqalaurninnik ilissinnut.”

Anirniup Ijjurnaittuup Pinasuarninga

^4b “Tamakkuninga pigiarninganit uqautilaunngilassi, najulaurassi.

⁵ Maannali tilijinnut ainiaqpunga; apirijuqanngilasili namungarniarmangaarma.

⁶ Tamakkuningali uqautigassi, uummatissigut qiksaaliqpusi.

⁷ Sulijumik uqautivassi: ilissinnut pivallirnarniqsauvuq aullaruma, aullanngikkuma, ikajuqtiup tikinnianngimmasi; aullarumali, ilissinnut tililaaqpara.

⁸ Tikigunilu, silarjuarmiut tukisitilaaqpait ajurnirmik nalaaguurnirmiglu iqqaqtuqtaunirmiglu.

⁹ Ajurniq pijjutigillugu, uvannut ukpinngimmata;

¹⁰ nalaaguurniq pijjutigillugu, Ataatamuarniaqpunga, takuniarunniiqpassinngalu;

¹¹ iqqaqtuiniq pijjutigillugu, silarjuap matuma aulatsijinga iqqaqtuqtaungmat.

¹² “Suli amisunik uqausiksaqaraluaqpunga ilissinnut, maannali tusarussiuk nalunaluaqput ilissinnut.

¹³ Sulijuulli Anirninga tikikkuni, sulinirnut tamainnut tasiulaaqpaasi; nangminiq pijunnarnini maliglugu uqallalaanngimmat, tusaqtaminigli uqaujjijumaaqpuq, nalliutijumaaqtuniglu uqautijumaaqpaasi.

¹⁴ Taassuma niqturnaqtittumaaqpaanga, taanna uqausinnik uqausiqarniarmat ilissinnut.

¹⁵ Ataatama pingit pigivakka; taimaimmat uqaqpunga taanna uqausinnik uqausiqarumaaqpuq ilissinnut.”

Qiksaaktitauniq Quviasuktitaunirlu

¹⁶ “Akuniunngittuq takuqattarniarunniiqpassinnga; akuniunngitturlu takuniarivassinnga.”

¹⁷ Tavva ilinniaqtingita ilangit immingnut uqaqattautiliqput, “Qanurnguna tukilingnik uqallaliqtuq, uqautingmatigut, ‘Akuniunngittuq takuqattarniarunniiqpassinnga akuniunngitturlu takuniarivassinnga’; uqarillunilu, ‘Ataatamut ainiarama.’

¹⁸ Qanurnguna tukilik ‘Akuniunngittuq’? Qanuq uqarasuarmangaat tukisinngilavut.”

¹⁹ Jiisusiulli qaujimagamigit apiqsurumaningit; uqautivait, “Uqarama, ‘Akuniunngittuq takuqattarniarunniiqpassinnga, akuniunngitturlu takuniarivassinnga’ tamanna tavva ilissinnut apiqsuutigijasi?

²⁰ Sulijumik uqautivassi, qialusilu uggualaaqpusi, silarjuarmiulli quviasulaaqput; ilissili qiksaagumaaqpusi, qiksaangnisili quviasuninguqtitaulaarivuq.

²¹ Arnaq nutaraqtaarasukkuni qiksaaliqpuq, nalliunninga nalliutingmat; nutarakulugli irniarijariiruniuk, ilungiqsurniriqqaujani puiguqpaa, quviasuliqpuq nutarakuluk irniangungmat silarjuarmut.

²² Taimainnivusittauq maanna qiksaakpusi, takulaarivassili uummatissigut quviasummarililaaqpusi, quviasungnirijasilu kinamulluunniit piiqtaunianngilaq ilissinnit.

²³ “Ulluq nalliutikpat uvannik apiqsuurunniirumaaqpusi. Sulijumik uqautivassi, Ataata tuksiarvigigussiuk sunatuinnarmik, taassuma tunisiviginiaqpaasi Atinni.

²⁴ Maannamut tikillugu tuksialaunngilasi sunatuinnarmik Atinni; tuksiarissi, tunisiviuniaqpusi tavva, quviasungnisi naammaksitsiaqullugu.”

Silarjuarmik Saalaqarniq

²⁵ “Ajjiujunik aturlunga tamakkuninga uqautiqattalauqpassi; nalliutijumaaqpurli ajjiujunik aturlunga ilissinnut uqaqattarunniirviksara tukisinatsiaqtunigli uqarvigiqattalaaqpassi Ataatamik.

²⁶ Tamanna ulluq nalliutikpat tuksiarumaaqpusi atinni; uqanngilangali Ataata tuksiarvigijumanirarlugu pijjutigilusi;

²⁷ Ataataup nangminiq nagligingmasi, nagligigassinnga ukpirlusilu Guutimit pilaurama.

²⁸ Ataatamit pisimavunga silarjuarmuarlungalu; maannali silarjuaq qimangniaqpara Ataatamut ailunga.”

²⁹ Ilinniaqtingita uqautivaat, “Maanna tukisinatsiaqtunik uqausiqaliqputit, ajjiujuniglu uqausiqarnatit.

³⁰ Maanna tukisivugut sunalimaat qaujimagavigit, apirijaujariaqanngilatillu; tamanna pijjutigillugu ukpirusukpugut Guutimit pisimanirnik.”

³¹ Jiisusiup kiuvait, “Maannaa ukpiliqpisi?

³² Nalliuttuksaq nalliutijumaaqpuq, maannalu atuliqpavut, namutuinnaq siammaqtitauviksasi, atunit angirrassinnuarlusi, uvangalu inutuutillunga qimaktaulaaqpunga; kisianili inutuunngilanga, Ataataup najurmanga.

³³ Tamakkuninga uqautilauqpassi, uvanniillusi isumajaaqunasi. Silarjuarmi uqumaiksarnaqtumiippusi; sivuuranasili, silarjuaq saalagisimagakku.”