ᔪᐊᓇᓯᐅᑉ ᐊᒡᓚᖏᑦ 15 - Aglait Ijjurnaittut

Jiisusiup Imminik Ajjiutinninga Napaaqtumut

¹ “Uvanga sulijumik napaaqtuuvunga uainiksalik, Ataatagalu paurngaliksanik piruqsiivilirijiuvuq.

² Avalangajulimaallu uvanniittut paurngaqarunnanngittut, piijarniaqpait, paurngaqaqattaqtulimaallu salummaqsarlungit piijaiviginiaqpait, salumatsiarlutik paurnganit pirurviukkanniqullugit.

³ Ilissili salummaqsaqtaujariiqpusi ilissinnut uqausirijakka pillugit.

⁴ Ilunniitsainnarissi, uvangalu ilussinniillunga. Suurlu napaaqtup avalangajua imminiinnaq paurngaqarunnanngimmat, napaaqtumiikkuni kisiani piruqtitsijunnaqpuq, taimaikkivusittauq uvanniillusi kisiani.

⁵ “Uvanga napaaqtuuvunga paurngaliksaq, ilissi avalangajuuvusi. Uvanniittuq, uvangalu taassumaniillunga, paurngaqarniaqpuq amisunik, piginanga sunamigluunniit pinasuarunnannginnassi.

⁶ Uvanniinginnanngittuq, igitauniaqpuq napaaqtuup avalangajunngititut paniqtutitut; avalangajut katitaullutik, igitauvangmata ikumamut, ikuallaktaullutik.

⁷ Uvanniinnginarussi, uqausikkalu ilussinniinginnaqpata, pijumajassinnik sunatuinnamik tuksiarussi, tavva tunisiviuniaqpusi.

⁸ Tamakkutiguunaq Ataataga niqturnaqtitauniaqpuq, paurngaqalirussi amisunik; ilinniaqtiunisilu uvannut nalunairluni.

⁹ Ataataup uvannik nagligusungningatut, taimaak nagligivassi; naglingninniitsainnarissi.

¹⁰ Piqujakka malikkussigit, naglinninniitsainnarniaqpusi; Ataatamattauq piqujangit malilaurakkit, naglingninganiitsainnarlungalu.

¹¹ “Tamakkuninga uqarvigivassi, quviasungnira ilissinniiqullugu, quviasungnisi naammaksitsiaqullugu.

¹² Una tavva piqujara, nagligiqattautiqullusi suurlu nagligigassi.

¹³ Nagligusungniqsaujuqanngilaq imaittumik, inuusirminik tunisijumik ilannarijani pillugit.

¹⁴ Ilannarivassi piqujannik malikkussi.

¹⁵ Matuma kingurngani pijimik tainiarunniiqpassi, piji qaujimanngimmat angajuqqaangata piniarninginnik; ilissili ilannarijannik tailauqpassi, Ataatannit tusalauqtalimaannik nalunaiqsivigilaurassi.

¹⁶ Nirualaunngilassinnga, nirualauqpassili tilillusilu paurngakariaqtuqullusi paurngaqarnisi kajusiqullugu; sunatuinnarmik Ataata tuksiarvigigussiuk atinni, tunisiniaqpuq ilissinnut.

¹⁷ Matuminga piquvassi, nagligiqattautiqullusi.”

Silarjuarmiut Uumisungningat

¹⁸ “Silarjuarmiut uumigikpasi, qaujimagissi uumigiqqaarmanga ilissinnit.

¹⁹ Silarjuarmiutaunnginnassi, silarjuarmiut nangminirmingnik nagligusukkajaqput; silarjuarmiulli ilaginnginnassigik, silarjuarmiunit nirualauqpassi, taimaimmat silarjuarmiut uumigivaasi.

²⁰ Ilissinnut uqausirilauqtakka iqqaumasigik, ‘Piji anginiqsaunngilaq angajuqqaaminit.’ Akiraqturuninga, tavva akiraqturniarivaasi; uqausikka malikkunigit uqausisittauq malingniarivait.

²¹ Tamakkuningalimaaq piniarvigijumaaqpaasi uvannik pijjutiqarlutik, uvannik tilisijuq qaujimannginnamijjuk.

²² Tikilaunngikkuma uqautijaqturlugit, ajurniqarajanngilat; maannali pasijaksaujunniirunnanngilat ajurnirmingnut.

²³ Uvannik uumisuktuup Ataatagattauq uumigigivaa.

²⁴ Piniarniqalaunngikkuma piniarnirijaulauqsimanngittumik taakkununga, ajurniqarajanngilat; maannali takusimavut Ataatagalu tamannuk uumigivaatikkuk.

²⁵ Tamannali taimaippuq piqujanginni uqaqsimajut nalautsiqullugit imailijut: ‘Pijjutiksaqaratik uumigivaanga.’

²⁶ “Ikajuqtiksarli tikiguni, Ataatannit tilijumaaqtara ilissinnut, sulijuup Anirninga Ataataminngaaqtuq, taanna uvannik nalunaiqsijumaaqpuq;

²⁷ ilissilu nalunaiqsijumaarivusi, pigiarnirmit najuqsimagassinnga.”