ᔪᐊᓇᓯᐅᑉ ᐊᒡᓚᖏᑦ 14 - Aglait Ijjurnaittut

Jiisusiup Aqqutauninga Ataatamut

¹ “Uummatikkut qiksaangniarasi; Guuti ukpirisiuk, uvangalu ukpirilunga.

² Ataatama iglungani iniksaqaqpuq amisunik; ainiaqpunga iniksaliuriaqturlusi, taimainngippat tamatuminga uqautigajanngilassi.

³ Ainiarumali iniksaliuriaqturlusi, utirumaarivunga ailusi uvanniiqullusi, najuganni.

⁴ Aqqut qaujimavasi aiviginiaqtannut turaangajuq.”

⁵ Tuumasiup uqautivaa, “Ataniq qaujimanngilagut namut ainiarmangaaqpit; qanurli aqqummik qaujimajunnaqpita?”

⁶ Jiisusiup uqautivaa, “Aqqutauvunga, sulijuullunga, inuusiuvunga; kinamigluunniit Ataatamuaqtuqarunnanngilaq, uvakkuurluni kisiani.

⁷ Qaujimagussinnga, Ataataga qaujimagajarivasi; maannali qaujimaliqpasi takusimavasilu.”

⁸ Pilippuusiup uqautivaa, “Ataniq, Ataata takujautiguk uvattinnut; naammaksiniaqpugut tavva.”

⁹ Jiisusiup uqautivaa, “Akunialuk najuliqpassi, suli qaujimanngilarma Pilippuusi? Uvannik takusimajuup Ataata takusimagivaa; sungmalli uqaqpit, ‘Ataata takujautiguk uvattinnut’?

¹⁰ Ukpirusunngilatit Ataatamiinnama, Ataatalu uvanniimmat? Uqausiit uqausirijakka ilissinnut uvannit nangmininnit pisimanngilat; Ataataulli uvanniittuup piniarniit piniarnirivait.

¹¹ Ukpirisinnga Ataatanniinnama, Ataatalu uvanniimmat; ajurussili, piniarnirijakka pillugit ukpirisinnga.

¹² Sulijumik uqautivassi, uvannut ukpiqtuup piniarniit piniarnirijakka piniarutiginiarivait; anginiqsaniglu taakkunangat pinasuarumaaqpuq, Ataatamut ainiarama.

¹³ Sunamigluunniit tuksiarniarussi atinni, pinasuarniaqpunga, Ataata niqturnaqtitauqullugu Irnirmigut;

¹⁴ tuksiarussi sunatuinnarmik atinni, pinasuarniaqpunga.”

Anirniup Ijjurnaittuup Tunijaujumaarninga

¹⁵ “Nagligigussinnga, piqujakka malingniaqpasi.

¹⁶ Ataatalu tuksiarviginiaqpara, Ikajuqtigikannirniaqtassinnik tunisiqullugu ilissinnut, ilissinniitsainnarniaqtumik isuqanngittumut,

¹⁷ taannauvuq Anirniq sulijumit pijuq, silarjuarmiut pijunnanngitangat, takujunnannginnamijjuk qaujimannginnamijjuglu; ilissili qaujimavasi, ilissinniimmat, ilusinniinniarmallu.

¹⁸ “Iliarjuktitut qimangnianngilassi; utilaarivungali ilissinnut.

¹⁹ Akuniunngittuq silarjuarmiut takuqattarniarunniiqpaanga, ilissili takulaarivassinnga; inuugama, ilissittauq inuuniarivusi.

²⁰ Ulluq taanna nalliutikpat qaujijumaaqpusi Ataatanniinnama, ilissilu uvanniinnassi, uvangalu ilussinniinnama.

²¹ “Piqujannik pisimajuq maliglugillu, taannauvuq uvannik nagligusuktuq; Ataatamalu nagliginiaqpaa uvannik nagligusuktuq, uvangattauq nagliginiaqpara uvanniglu qaujijautillunga taassumunga.”

²² Juutasiup uqautivaa (Iskariatiunngittuup), “Ataniq, sungmat ilingnik qaujijautittumavit uvattinnut, silarjuarmiunullu qaujijautittumanak?”

²³ Jiisusiup kiuvaa, “Uvannik nagligusuktuup, uqausikka malingniaqpait, Ataatamalu nagliginiaqpaa, Ataatagalu uvaguk tikilaaqpavuuk tavvanilu angirraqalirlunuk.

²⁴ Uvannigli nagligusunngittuup uqausikka malinngilait; uqausiit tusaqtasi piginngilakka Ataatamilli tilijinnit pivut.

²⁵ “Tamakkuninga uqallagvigivassi suli ilissinni najuutininni.

²⁶ Ikajuqtiksarli, Anirniq Ijjurnaittuq, Ataataup tililaaqtangata atinni, taassuma ajuriqturumaaqpaasi sunalimaanik, iqqaitillusilu uqausirilauqtalimaannik ilissinnut.

²⁷ “Isumajaarnanngittumik qimaivigivassi; uvanga nangminiq isumajaannginnirijannik tunisivigivassi; tunisinngilanga silarjuarmiut tunisijjusinngititut. Uummatikkut qiksaangniarasi, sivuuraniarasilu.

²⁸ Tusaqpusi uqautigassi, ‘Aullarniarama, utirumaarivungali ilissinnut.’ Nagligigussinnga, tavva quviasukkajaqpusi, Ataatamut ainiarnira pillugu; Ataata anginiqsaungmat uvannit.

²⁹ Tamanna ilissinnut uqausirivara nalliutiqqaaqtinnagu, tamanna nalliutikpat ukpiliqullusi.

³⁰ Akuni uqallaviginiarunniiqpassi, silarjuup tamatuma aulatsijinga qailirmat. Uvannullu pijunnarniqarani;

³¹ silarjuarmiut tukisiliqullugit Ataata nagligigakku; taimaimmat pinasuaqpunga Ataatama pinasuaqtauqulauqtanginnik. “Makillusi, tamaanngat nuuliqta.”