ᔪᐊᓇᓯᐅᑉ ᐊᒡᓚᖏᑦ 12 - Aglait Ijjurnaittut

Jiisusiup Uqsuqtiqtauninga Pitanimi

¹ Ullut pingasuujuqtut Qaangiqtauvingmik nalliunniqsiurviup sivuningani, Jiisusi Pitanimuaqpuq, Laasaruusiup tuqungajunit uummaqtilauqtangata nunanganut.

² Tavvani unnugummitarniaqtanganik niqiksaliuqpaat; Maata ikajuqpuq aaqqiksuiqataulluni; Laasaruusi iksivaqatauvuq saami niriviginiaqtanganni.

³ Tavva Miari tipitsiariksaummik akitujumik tigusilluni atausirmik uqumainniqaqtumik, piruqtuvinirnit pisimajumik ilasimanngittumik, Jiisusiup itiganginnut kuvisilluni nujarminut allaqtiqpait; tipitsiariksautiup tipitsiaringninganut iglulimaaq tippakpuq.

⁴ Juutasili Iskariat, ilinniaqtingita ilangat, Jiisusimik pijautitsilaaqtuq; uqaqpuq:

⁵ “Sungmanuna tipitsiariksaut niurrutigijaunngilaq siulvirinut 300-nut kiinaujaqtaarutaugajaqtuq, taakkualu ajuqsaqtunut tunijaungaarlutik?”

⁶ Taimaak uqaqpuq, ajuqsaqtunik ikajurumanirmuunngittuq tigligasuungunirminulli; kiinaujaqautimik ikpiarjungmik pisimajiugami, tavvanngat nangminiq aturniaqtaminik tigusituinnaqpakkami.

⁷ Jiisusi uqaqpuq, “Una arnaq kamaginngilauqsiuk, taimailiurutiqarmat ullumut iluviqtauniksannut.

⁸ Ajuqsaqtunik inuuqatiqainnarniaqpusi, uvannigli najuqtiqainnanianngilasi.”

Laasaruusiup Tuqutaksauqujauninga

⁹ Tavva Juutit amisut qaujimaliramik Jiisusiup Pitanimiinninganik, tavvunngaqput, Jiisusimituaq pijjutiqaratik Laasaruusimiglittauq takujumallutik, Jiisusiup tuqungajunit makitilauqtanganik.

¹⁰ Tunirrusiqtitsijiit angajuqqaangit isumaqaliqput Laasaruusi tuquqasiutijumallugu,

¹¹ Laasaruusi pijjutigillugu Juutit amisut kamaluarunniirmata tunirrusiqtitsijinik, ukpirijaqarniqsaulirmata Jiisusimik.

Jiisusiup Niqtuqtauninga Jiruusalimmut Itiliqtillugu

¹² Qautillugu inugiakturjuat Qaangiqtauvingmik nalliunniqsiuriaqsimajut tusaqput Jiisusiup Jiruusalimmualirninganik.

¹³ Tavva napaaqtut paamiit avalangajunginnik nakatsillutik parrialiqput, qaigalaarlutik, “Huusaana! Niqtuqtauli Ataniup atingani tikittuq, Angajuqqaarjuaq Isarialimi!”

¹⁴ Jiisusi siutiqquqtujuup nurranganik tigusilluni qaanganut ikivuq; aglangni titiraqsimangmat,

¹⁵ “Sivuuraniarasi, Saiuniup paningit; Takugit, angajuqqaarjuasi tikiliqpuq, Siutiqquqtujuup nurrangata qaangani ikimalluni!”

¹⁶ Ilinniaqtingitali tamanna tukisilaunngilaat atuqtillugu; Jiisusi niqturnarnirjuarmut makisimalirmat, iqqailauqput aglangni titiraqsimajuqarninganik taassuminga qanuq piniarviujumaarninganik.

¹⁷ Inugasait Laasaruusimik tuqungajunit uummaqtitsitillugu najuutilauqtut unikkaaqpalliatuinnalauqput.

¹⁸ Taimaimmat inugiakturjuat parrialauqpaat tusaqsimagamik tamatuminga nalunaikkutarmik pinasualaurninganik.

¹⁹ Tavva Paarisit immingnut uqaqattautiliqput, “Takugit qanuiliurnivut pivalliisimanngitsiaqpuq; takugit, inulimaat maliliqput Jiisusimik.”

Guriikit Ilangita Qinirningat Jiisusimik

²⁰ Guriikilli ilangit ilagijaulaurivut nalliunniqsiuriaqtuqtunut Jiruusalimmut.

²¹ Taakkualu Pilippuusimuaqput, taanna Pitsaitamit Galiliamiittumit pisimangmat, uqautillugu, “Jiisusimik takujumavugut.”

²² Pilippuusiup Aanturuu uqautijaqtuqpaa; taakkuak marruullutik Jiisusimut uqariaqtuqpuuk.

²³ Jiisusiup kiuvaak, “Inuup Irningata niqturnaqtitauvia nalliutisimavuq.

²⁴ Sulijumik uqautivassik: niaquujaksaup kanngaqsuutiksaqtanga taannatuugajaqpuq nunamuaqtauluni tuqunngikkuni, tuqugunili, niaquujaksanik amisunik piruqtitsigajaqpuq.

²⁵ Inuusirminik annirusuktuq asiujijumaaqpuq, inuusirminigli annirusunngittuq uvani silarjuarmi inuusirmut nungusuittumut pigiinnarniaqpaa.

²⁶ Nalliat uvannik pijitsiqtuq, uvannik maliktuksauvuq; najugannilu, najuutijuksauvuq; uvannik pijitsirniaqtuq, Ataatama niqturnaqtittumaaqpaa.”

Jiisusiup Uqausiqarninga Tuqutauniksaminik

²⁷ “Maannali uummatikkut uqumaitumiippunga. Qanuq uqausirijarianga naluvara? Uqarunnaraluaqtunga, ‘Ataatak, iqarraq tamanna nalliutitittailiguk.’ kisianili tamanna tikijjutigisimavara, ikarraq tamanna atuutijariaqarakku.

²⁸ Ataatak, Atiit niqturnaqtiliruk.” Tavva nipimik qilangmit nilliqtuqaqpuq, “Niqturnaqtilauqpara, sulilu niqturnaqtikkannirniaqpara.”

²⁹ Inugiakturjuat tavvani nangiqtut nipimik tusaramik uqaqput, “Kalliliqpuq.” Ilangilli uqaqput, “Aingiliup uqaqatigivaa.”

³⁰ Jiisusiup kiuvait, “Nipi tusaqtasi tusaqsauvuq ilissi pijjutigillusi, uvanga pijjutiginanga.

³¹ Maanna silarjuarmiut iqqaqtuqtauviat nalliutivuq, maannalu silarjuap tamatuma aulatsijinga saalauluni anititaunialiqpuq;

³² uvangalu, qangattaqtitauniaruma nunamit, inuqatigiigjuangujulimaat uvannuarumaliqtinniaqpakka.”

³³ Tamatuminga uqaqpuq tukisititsilluni tuqutaunirmut qanuittumut tuqutauniarmangaarmi.

³⁴ Inugiakturjuat kiuvaat, “Piqujattinnit tusaqsimavugut Christuusiguuq isuqanngittumut inuujumaarmat. Qanuimmalli uqaqpit Inuup Irninga nappaqtitaujariaqaqpuq; kinainna Inuup Irninga?”

³⁵ Jiisusiup uqautivait, “Qaumajuup suli sivikittumik najurniaqpaasi. Kajusitsiarissi pinasuaqtassinnik najuqtiqarnissinni qaumajumik, taaqturjuarmut tikitauqunasi; taaqtumi pinasuaqtuq qaujimanngimmat namunngaungmangaarmi.

^36a Qaumajumik najuqtiqarnissinni, qaumajuq ukpirisiuk, qiturngauliqullusi qaumajumut.”

Juutit Ukpilirunnannginningit

^36b Jiisusili tamakkuninga uqariirami, taakkunanngat qimaruutivuq ijirluni.

³⁷ Jiisusili nalunaikkutarnik amisunik pinasuaqattaraluarmat taakkunani, Jiisusimut ukpililaunngilat;

³⁸ nalauttaijuup Aisaiasiup uqausingit nalautsiqullugit uqaqsimajut: “Ataniq, kia uqausirijavut ukpirivait? Kikkunnullu Ataniup pijunnarnini saqqitippauk?”

³⁹ Taimaimmat ukpilirunnanngilat. Amma Aisaiasi uqaqsimangmingmat,

⁴⁰ “Guutiup ijingit takpiitilauqpait uummatingillu sititippait, Ijimingnut takuqunagit uummatimingnullu tukisiqunagit, Uvannullu saagiaqunagit, aaqqiktauqunagillu.”

⁴¹ Aisaiasi taimaak uqalauqpuq Jiisusiup niqturnarninga takulauramiuk uqautigigamiuglu.

⁴² Sulili Juutit angajuqqaangit amisut Jiisusi ukpirigaluaqpaat, Paarisilli pillugit saqqijaaqtumik uqausiqanngilat, Juutit ukpirnirmut katimavingannut itirunnaillititaujumanatik:

⁴³ inungnut naammagijauniq pijumaniqsarigamijjuk Guutimut naammagijaunirmit.

Jiisusiup Uqausinginnut Iqqaqtuqtauniq

⁴⁴ Jiisusi nipiqquqtulluni uqaqpuq, “Uvannut ukpiqtuq, uvannuinnaq ukpinngilaq taassumungali uvannik tilisijumut.

⁴⁵ Uvanniglu tautuktuup uvannik tilisijuq tautukkivaa.

⁴⁶ Qaumajuullunga silarjuarmut tikippunga, uvannut ukpiqtuq taaqtumiinginnaqunagu.

⁴⁷ Uqausinnik tusaqtuq maliganilu, iqqaqturnianngilara; tikilaunnginnama silarjuarmiut iqqaqturiaqturlugit, silarjuarmiulli piulijaqturlugit.

⁴⁸ Uvannik narrujuq ilaliuqsinanilu uqausinnik najuqtiqaliqpuq iqqaqtuqtaujjutiksaminik; uqausirnut uqausirilauqtannut iqqaqtuqtaujumaaqpuq ulluit naggataani.

⁴⁹ Uvannik pijunnarniqarlunga uqalaunnginnama; Ataataulli tilijima piqujaminik tunisivigilauqpaanga uqausirijaksannik, qanurlu uqaqtuksaungmangaarma.

⁵⁰ Qaujimavungalu taassuma piqujininga inuusiqtaarnarmat nungusuittumik. Taimaimmat uqausirijakka, uqausirivakka Ataataup taimaak uqaqulaurmanga.”