ᔪᐊᓇᓯᐅᑉ ᐊᒡᓚᖏᑦ 11 - Aglait Ijjurnaittut

Laasaruusiup Tuquninga

¹ Angummik qanimajuqaqpuq, Laasaruusimik Pitanimi nunalingmik, Miariup Maataullu nukariik nunangani.

² Miari taannauvuq Ataniup itiganginnik minguaqsilauqtuq tipitsiariksaummut nujarminullu allaqtiqtlugit, taassuma aninga Laasaruusi qanimavuq.

³ Tavva najangik tilisivuuk Jiisusimut, uqaujjauqullugu, “Ataniq, nagligijait qanimmakpuq.”

⁴ Jiisusi tamatuminga tusarami uqaqpuq, “Tamanna qanimmasiq tuqumut ilinganngilaq; Guutiulli niqtuqtauniksanganut, Guutiup Irninga tamatumuuna niqturnaqtitauqullugu.”

⁵ Jiisusiup taakkua ilagiit nagligivait Maata, Miarilu, aningallu Laasaruusi.

⁶ Laasaruusiup qanimaninganik tusaqsimalirluni, najuqtaminiilauqpuq suli ulluungnik marruungnik.

⁷ Kingurngagut ilinniaqtinut uqaqpuq, “Juutiamut ailaurmita.”

⁸ Ilinniaqtingita kiuvaat, “Raappai, Juutit ujaqqanut taikani millurumalauqpaatit; taikunga utirumalirivit?”

⁹ Jiisusiup kiuvait, “Ulluq 12-nik ikarraqanngilaq? Nalliat ullukkut qaumatillugu pisuktuq paallangnianngilaq, silarjuup tamatuma qaumaninganut tautuktitaugami.

¹⁰ Unnuangutilluguli pisuktuq paallangniaqpuq, qaumasiunnginnami.”

¹¹ Taimaak uqariirami, uqautikkanniqpait, “Ilannarijavut Laasaruusi siniliqpuq, upangniaqparali tupaariaqturlugu.”

¹² Tavva ilinniaqtingita uqautivaat, “Ataniq, sinikkuni piusivallianiaqpuq.”

¹³ Jiisusili uqausiqaqpuq Laasaruusiup tuquninganik, taakkuali isumaqaqput sinituinnaqturiksillutik.

¹⁴ Tavva Jiisusiup tukisitiliqpait uqautillugit, “Laasaruusi tuquvuq;

¹⁵ pijjutigillusili quviasukpunga najulaunnginnakku, ukpiliqullusi. Maanna upalaurlavut.”

¹⁶ Tuumasi, Marruliavinirmik taijauvaktuq, ilinniaqtiuqatiminut uqaqpuq, “Tamatta malilirlavut, tuquqatiginiarattigu.”

Jiisusiup Makijjutiksauninga Inuujjutiksauningalu

¹⁷ Jiisusi tavvunga tikinnami, qaujivuq Laasaruusi ulluni sitamanik iluviqtausimaliriirmat.

¹⁸ Pitani Jiruusaliup qanigijaaniippuq, 2-mailiup qanigijaani ungasingniqarluni,

¹⁹ Juutillu amisut upagutisimalauqput Maatamik Miarimiglu ikajuqsiriaqturumallutik aningatta inuujunniirninga pijjutigillugu.

²⁰ Maata tusarami Jiisusiup qailirninganik, anilluni parriaqpaa, Miarili iglumi nuulaunngilaq.

²¹ Maataup Jiisusi uqautivaa, “Ataniq, uvaniilauruvit, aniga tuqugajalaunngilaq.

²² Sulilu maanna qaujimagivunga sunatuinnarmik Guutimut tuksiaruvit, Guutiup tunisiviginiarmatit.”

²³ Jiisusiup uqautivaa, “Aniit makinniarivuq.”

²⁴ Maataup uqautivaa, “Qaujimavunga, makittumaarmat makivviksami ulluit kingulliqpaanganni.”

²⁵ Jiisusiup uqautivaa, “Uvanga makijjutiksaullungalu inuujjutiksauvunga; nalliat uvannut ukpiqtuq, tuqugaluaruni, suli inuujumaaqpuq,

²⁶ inuujurlu, uvannut ukpirluni tuqulauqsimanianngilaq. Tamanna ukpiriviuk?”

²⁷ Taassuma uqautivaa, “Ataniq, ilaak ukpiqpunga Christuusiugavit, Guutiup Irninga, silarjuarmut tikisimajuq.”

Jiisusiup Quvviurninga

²⁸ Maatali taimaak uqariirami, angirraulluni nukani Miari inutuuqatigilluniuk uqautivaa, “Ilisaiji tikimmat taassuma qaiquvaatit.”

²⁹ Miari tamatuminga tusarami, tuavirluni taassumunga upagutivuq.

³⁰ Jiisusi iglugasangnut suli tikisimanngimmat, nuulaunngilarli suli Maatamut upaktauvigiqqaujamini.

³¹ Juutilli iglumiittut, ikajuriaqsimajut taassuminga, Miari takugamijjuk tuavirluni aningmat, maliksaqpaat, qiajaqturasugillugu iluvirmut.

³² Miari Jiisusimut tikiutigami takugamiuglu itigangita saanganut paammakpuq, uqarlunilu, “Ataniq, uvaniilauruvit, aniga tuqugajalaunngilaq.”

³³ Jiisusiullu qiajuq takugamiuk, Juutillu qaiqatigijangit qiangmingmata, aktuqtaummarikpuq anirnirmigut saimajunniirluni;

³⁴ uqarlunilu, “Namut iluvilauqpisiuk?” Uqautivaat, “Ataniq, qailutit takujaqturuk.”

³⁵ Jiisusilu qiavuq.

³⁶ Tavva Juutit uqaqput, “Takugit angijumik nagliginniqpaa!”

³⁷ Ilangilli uqaqput, “Tautunngittumik tautuliqtitsijunnarluni, taassuminga tuquttailititsijunnalaunngilaq?”

Laasaruusiup Makititauninga Tuqungajunit

³⁸ Jiisusi, angijumik aktuqtaukkannirivuq, iluvirmut tikinnamik; iluviq qaiqtumi iluliuqsimalauqpuq, itiqtarvingalu ujarangmik matusimalluni.

³⁹ Jiisusi uqaqpuq, “Ujarak piiqsiuk.” Maata, tuqungajuup najanga uqaqpuq, “Ataniq tipiluliriiqpuq, ullunik sitamanik iluviqsimalirami.”

⁴⁰ Jiisusiup uqautivaa, “Uqautilaunngilagit ukpiruvit Guutiup niqturnarnirjuanga takujunnaraviuk?”

⁴¹ Tavva ujarak piiqpaat iluvirmit. Jiisusi qummut takusarluni, uqaqpuq, “Ataatak, qujagivagit tusalauravinga.

⁴² Qaujimavungali tusatsainnaravinga, taimaagli uqaqpunga ukua uvaniittut pijjutigillugit, ukpiliqullugit tililauravinga.”

⁴³ Jiisusi taimaak uqariirami, nipiqquqtulluni uqaqpuq, “Laasaruusi, anigit.”

⁴⁴ Laasaruusi anivuq, aggangit itigangillu tuqujumut immutigijausuunik nimiqsimallutik, kiinangalu qallunaaqtamik nimiqsimagilluni. Jiisusiup uqautivait, “Immutingit piijaqsiuk, pisulirli.”

Jiisusiup Tuqutaksauqujauninga

⁴⁵ Juutit amisut Miarimut pulaariaqsimajut Jiisusiup piniarnirijanganik takujut, Jiisusi ukpiriliqpaat.

⁴⁶ Ilangilli Paarisinut utirlutik unikkaaqput Jiisusiup piniarnirijanganik.

⁴⁷ Tavva Paarisit tunirrusiqtitsijiillu angajuqqaangit katimajinik katimaqatiqarlutik uqaqput, “Qanuiliuriaqaliqpita? Taanna amisunik nalunaikkutarnik pinasuaqattarmat.

⁴⁸ Kamaginngillugu isumaqsuqtinniaruttigu, tavva inulimaat ukpilirniaqput taassumunga, Ruumamiullu uvattinnut qailutik asiruijumaaqput Tuksiarvigjuattinnik inuqutittinniglu.”

⁴⁹ Taakkua ilangat, Kaiapaasimik atilik, arraagumi tamatumani tunirrusiqtitsijinut Angajuqqaammariujuup, uqautivait, “Suli qaujimanngilasi;

⁵⁰ tukisinnginnassi ilissinnut piuniqsaugajarmat inuk atausiq tuqukpat inuuqatigiit pijjutigilugit, inuuqatigiit asiruqtaugajarninginnit?”

⁵¹ Tamatuminga imminik uqalaunngilaq; arraagumili tamatumani tunirrusiqtitsijinut Angajuqqaammarigijaugami Guutiup uqaqtauqujanganik uqausiqalauqpuq Jiisusi tuqutaujuksaungmat inuuqatigiigjuat pillugit,

⁵² inuuqatigiigjualli taakkuatuaq pinagit, Guutiulli qiturngangit namutuinnaq siammaqsimajut katiqsuqtauqullugit atausirmut.

⁵³ Ullumit tavvanngat pigiarlutik isumaksaqsiuqatigiiliqput Jiisusimik qanuiliurlutik tuqutsigajarmangaarmik.

⁵⁴ Taimaimmat Jiisusi qaujimajauluni ingirraqattarunniiqpuq Juutit nunangagut, inuqanngittuulli qanigijaani iniqaliqpuq, nunalingni Ivuraimmik atilingni; tavvaniililauqpuq ilinniaqtini ilagillugit.

⁵⁵ Juutit nalliunniqsiurvingat Qaangiqtauvingmik qaglilirmat, inugasagjuat nanituinnaq nunaliit Jiruusalimmuaqpallialiqput Qaangiqtauviup sivuningani, salummaqsaqtaunirmik aturumallutik.

⁵⁶ Jiisusimik qinilauramik, uqaqatigiililauqput katillutik Tuksiarvigjuami, “Qanurli isumavisi? nalliunniqsiutunut qainiaquunngimmat.”

⁵⁷ Tunirrusiqtitsijiilli angajuqqaangit Paarisillu piqujilauqput nalliatuinnaq Jiisusiup naniinninganik qaujijuq, qaujititsiquvat, tigujauniarmat.