ᔪᐊᓇᓯᐅᑉ ᐊᒡᓚᖏᑦ 10 - Aglait Ijjurnaittut

Paiqsijiup Ajjiutitauninga

¹ “Sulijumik uqautivassi, nalliat itiqtarvikkut itinngittuq siipikkuvingmut asiagulli isiqtarviunngittukkut avalu majurlugu isiqtuq tigliktiulluni tiguuraijiuvuq piginngitaminik.

² Itiqtarvikkulli itiqtuq taanna siipiit paiqsijigivaa.

³ Taanna itiqtarviup kamajingata ukkuirutivaa; siipiit nipinga tusaqpaat siipiqutiminik qaiqujilirmat atingit taillugit tavvanngallu sivulirluni aniqatigivait.

⁴ Aniqatigijariiramigit sivuliqpait, sipiillu malikpaat, nipinga ilitariumagamijjuk.

⁵ Qaujimanngitamingnigli malingnianngilat; qimaangaaqpulli taassumanngat, qaujimanngitami nipinganik ilitaqsinnginnamik.”

⁶ Ajjiujumik tamatuminga Jiisusiup uqarvigivait, tukisinngilalli qanuq tukilingmik uqaujjaungmangaarmik.

Jiisusi Paiqsijitsianguvuq

⁷ Tavva Jiisusiup uqarvigikkanniliqpait, “Sulijumik uqautivassi, uvanga siipiit itiqtarvigivaanga.

⁸ Sivuninni tikilauqtut tigliktiullutiglu tiguuraijiulauqput; siipiit naalalaunngilait.

⁹ Itiqtarviuvunga; nalliat uvakkut itituq, taanna piulijauniaqpuq, itirluni anilunilu niqiksalingmik nanisiniaqpuq.

¹⁰ Tiglikti qaivakpuq tigligariaqturumalluni tuquraijumallunilu; uvangali tikippunga, inuusirmiglu ajuqsarnanngittumik piqaliqullungit.

¹¹ “Uvanga paiqsijitsianguvunga. Paiqsijitsiaq inuusirminik tunisivuq siipiit pillugit.

¹² Tilijausimatuinnaqturli paiqsijiunngittuq, nangminiqanngitturlu siipinik, amarurmik qailiqtumik takugami siipiit qimainnarlugit qimaavuq; amaruup siipiit angullugit siammaktippait.

¹³ Tilijausimatuinnaqtuq qimaavuq tilijausimatuinnarami siipinik annirusunnginnami.

¹⁴ Uvanga paiqsijitsianguvunga; nangminikka ilitarivakka ilitarijaullungalu taakkununga.

¹⁵ Suurlu Ataataup ilitaringmanga uvangalu Ataata ilitarigakku; inuusiralu tunivara siipiit pillugit.

¹⁶ Asinginnik suli siipiqutiqaqpunga, tavvanngat siipikkuvingmik pisimanngittunik; taakkuattauq tavvunga itiqtitsariaqaqpakka; nipinnik tusarumaaqput. Atausiuqatigiigumaaqput, atausirmiglu paiqsijiqarlutik.

¹⁷ “Tamanna pillugu Ataataup nagligivaanga, inuusinnik tunisininnut, amma utiqtitsijunnaqullunga inuusinnik.

¹⁸ Inuusinnik aqsaaqtaujunnanngilanga kinamulluunniit, nangminirli isumaqsurlunga tunirrutigivara. Pijunnarniqaqpunga tunirrutigilugu, pijunnarniqarivungalu amma utiqtillugu; tamatuminga taimaak Ataatama piqulauqpaanga pinasuaqullunga.”

¹⁹ Tavva Juutit angiqatigiigunniirivut uqausiit tamakkua pillugit.

²⁰ Amisut tavvaniittut uqaqput, “Anirnirlungmik ilummiqtausimagami, isumairutisimavuq; sungmanuna naalakpisiuk?”

²¹ Asingit uqaqput, “Anirnirlungmik ilummiqtausimajuq taimaak uqallagunnanngilaq. Qanuq anirnirluk tautunngittunik tautuliqtitsijunnaqpaa?”

Jiisusiup Narrugijauninga Juutinit

²² Ukiungulauqpuq Tuksiarvigjuap atuqtaujunnarningata ukkuiqtauningani nalliunniqsiutillugit Jiruusalimmi;

²³ Jiisusi pisuktillugu Tuksiarvigjuarmi, Suulumuuniup Tuqsuunganik taijaujukkut.

²⁴ Juutit Jiisusi avaluvaat uqautillugu, “Qanuq akuniutigijuq uvattinnut uqaqtailimaniaqpit? Uqautitsialauqtigut sulitsiarlutit Christuusiungmangaaqpit.”

²⁵ Jiisusiup kiuvait, “Uqautilauqpassi, ukpilaunngilasili. Piniarniit piniarnirijakka Ataatama atingani, tamakkua nalunaiqsivut uvannik;

²⁶ ukpinngilasili, siipiqutinnut ilagijaunnginnassi.

²⁷ Siipiqutima nipiga tusaqpaat, qaujimagakkit, malikpaanga.

²⁸ Inuusirmik nungusuittumik tunisivigivakka, asiujuqarnianngilat, nalliannigluunniit aqsaaqtaunianngilanga taakkuninga pisimajanni.

²⁹ Ataataga tunisisimajuq uvannut taamakuninga, tamainnit anginiqpauvuq, kinamulluunniit Ataataga aqsaaqtaujunnanngilaq taakkuninga tigumiarninganik.

³⁰ Uvangalu Ataatalu atausiuvuguk.”

³¹ Tavva Juutit ujaqqanik tigusigivut Jiisusi millurumallugu.

³² Jiisusiup uqautivait, “Piniatsiarnirnik amisunik ilissinnut pinasualauqpunga Ataatamit pijunik; piniarniit tamakkua nalliat pillugit millurumavisinnga?”

³³ Juutit kiuvaat, “Piniatsiarnirilauqtatit pillugit millurumanngilattigit Guutimigli uqarnirluutiqarniit pillugu; inutuinnaullutit, ilingnik Guutinnguqtinnavit.”

³⁴ Jiisusiup kiuvait, “Piqujassinni titiraqsimajuqaqpuq, ‘Uqautivassi, ilissi Guutiuvusi.’

³⁵ Guutiup inuit tailauqpagit guutinik inungnut uqallaktillugu taissumani, qaujimavugut aglait akiraqtuqtaujunnanngimmata,

³⁶ Guutiup ijjurnaitilauqtanganut tililauqtanganullu nunarjuarmut uqarunnaqpisi ‘Guutimik uqarnirluutiqaqputit,’ uqalaurnira pillugu, ‘Guutiup Irnirivaanga’?

³⁷ Ataatama piniaqtauqujanginnik pinasuanngikkuma, ukpirittailisinnga;

³⁸ pinasuarukkilli, ukpirinngikkaluarussinnga, piniarniit ukpirisigik, ilitaqsiliqullusi qaujilirlusilu Ataata uvanniimmat uvangalu Ataatanniinnama.”

³⁹ Tavva Jiisusi tigunasuaraluaqpaat, qimaksivurli taakkunanngat.

⁴⁰ Utilirivuq Juartaniup Kuungata akianut Juanasiup paaptitsivigiqattalauqtanganut, tavvaniilirluni.

⁴¹ Amisut upakpaat; uqarlutik, “Juanasi nalunaikkutarnik pinasualaunngilaq, uqausirilauqtalimaangilli taanna pillugu sulitsiaqput.”

⁴² Tavvaniittut amisut Jiisusimut ukpiliqput.