ᔨᐸᓁᐊᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᖃᕿᐊᓕᖁᔨᓂᖅ

¹ ᑲᑎᓪᓗᓯ ᑲᑎᒪᓕᕆᑦᓯ, ᑲᓐᖑᑦᑎᑦᑐᓐᓁᓪᓕᔪᓯ ᐃᓅᖃᑎᒌᒡᔪᐊᑦ.

² ᐊᐅᓪᓚᕐᑎᑕᐅᓚᐅᖏᓐᓂᑦᓯᓐᓂ ᓂᐊᖂᔭᒃᓴᐅᑉ ᓴᓂᖓᑕ ᑎᒃᑕᐅᓂᖓᑐᑦ, ᐊᑕᓂᐅᑉ ᓂᓐᖓᐅᓯᖓᑕ ᑲᑉᐱᐊᓇᕐᓂᖓᓄᑦ ᑎᑭᑕᐅᓚᐅᖏᓐᓂᑦᓯᓐᓂ, ᐅᓪᓗᕐᒧᑦ ᐊᑕᓂᐅᑉ ᓂᓐᖓᐅᓯᖓᓄᑦ ᑎᑭᑕᐅᓚᐅᖏᓐᓂᑦᓯᓐᓂ.

³ ᐊᑕᓂᕐᒥᒃ ᕿᓂᓕᕆᑦᓯ, ᐃᓘᓐᓇᓯ ᐱᐅᔪᕆᖏᑦᑐᓯ ᓄᓇᒥ, ᐱᖁᔭᖏᓐᓂᒡᓗ ᓈᓚᒃᑐᓯ; ᓇᓛᒎᕐᓂᖅ ᕿᓂᕐᓯᐅᒃ, ᒥᑭᒡᓕᑎᕐᓂᕐᓗ ᕿᓂᕐᒥᓗᒍ; ᓴᐳᑎᔭᐅᖁᓪᓗᓯ ᐊᑕᓂᐅᑉ ᓂᓐᖓᐅᓯᖓᑕ ᐅᓪᓗᖓᓂ.

ᐃᓅᖃᑎᒌᒡᔪᐊᑦ ᐃᓴᕆᐊᓕᒥᐅᑉ ᓴᓂᐊᓃᑦᑐᑦ ᐊᓯᕈᕐᑕᐅᓂᖏᑦ

⁴ ᒑᓴ ᕿᒪᒃᑕᐅᔪᒫᕐᐳᖅ, ᐊᓯᑭᓗᓂᓗ ᓱᓇᖃᕈᓐᓃᕈᒫᕐᐳᖅ; ᐅᓪᓘᓪᓗ ᕿᑎᕋᕐᓂᖓᓂ ᐋᔅᑖᑦᒥᐅᑦ ᐊᐅᓪᓚᕐᑎᑕᐅᔪᒫᕐᐳᖅ, ᐃᑯᕋᓂᓗ ᓄᓱᒃᑕᐅᔪᒫᕐᐳᖅ ᐊᒫᖏᑎᒍᑦ.

⁵ ᑲᑉᐱᐊᓐᓇᒦᖑᔪᓯ ᑕᕆᐅᑉ ᓯᓈᓂ ᓄᓇᖃᕐᑐᓯ, ᐃᓅᖃᑎᒌᖑᔪᓯᓗ ᓯᕆᑍᑎᓄᑦ ᐊᑕᓂᐅᑉ ᐅᖃᐅᓯᖓᑕ ᐊᑭᕋᕐᑐᕐᒪᓯ, ᑬᓇᓁᒥᐅᖑᔪᓯ ᐱᓕᔅᑍᓂᒦᑦᑐᓯ; ᐊᓯᕈᕈᒪᕙᑦᓯ ᓄᓇᖃᕐᑐᓕᒫᑦ ᐊᒥᐊᒃᑯᖏᓪᓗᒋᑦ.

⁶ ᑕᒪᓐᓇ ᓯᒡᔭᖅ ᐃᕕᖕᓂᒃ ᓂᕿᒃᓴᖃᑦᓯᐊᕈᒫᕐᐳᖅ ᓰᐱᓕᕆᔩᓪᓗ ᓯᓂᒃᑕᕐᕕᖃᕈᒫᕐᐳᑦ ᓰᐱᒃᑯᕕᖃᕐᓗᑎᒡᓗ.

⁷ ᑕᒪᓐᓇ ᓯᒡᔭᖅ ᔫᑕᐅᑉ ᑭᖑᕚᖏᑕ ᐊᒥᐊᒃᑯᖏᓐᓄᑦ ᐃᓂᒋᔭᐅᔪᒫᕐᐳᖅ, ᑕᒫᓂᓗ ᐆᒪᔪᖁᑎᑎᒃ ᓂᕆᑎᑦᓱᒫᕐᐰᑦ, ᐅᓐᓄᒃᑯᓪᓗ ᓯᓂᒃᑕᖃᑦᑕᕈᒫᕐᐳᑦ ᐊᓯᑭᓗᓂᒥᐅᑦ ᐃᒡᓗᖏᓐᓂ. ᐊᑕᓂᐅᑉ ᑖᒃᑯᐊ ᒎᑎᖏᑦᑕ ᐳᐃᒍᕈᒫᓐᖏᓔᑦ ᐊᔪᕐᓴᖏᓐᓂᕕᓂᖏᓐᓄᓪᓗ ᐅᑎᕐᑎᓪᓗᒋᑦ.

⁸ ᑐᓴᕐᓯᒪᕗᖓ ᒧᐊᐱᒥᐅᑦ ᑲᑉᐱᐊᓵᕆᓂᖏᓐᓂᒃ ᐊᒧᓁᑎᓪᓗ ᓯᕘᕋᓵᕆᓂᖏᓐᓂᒃ, ᐃᓄᖁᑎᓐᓂᒡᓗ ᑲᑉᐱᐊᓱᒃᑎᑦᓯᓂᖏᓐᓂᒃ ᓄᓇᖓᓂᒡᓗ ᓄᓇᖁᑎᑖᕋᓱᐊᕐᓂᖏᓐᓂᒃ.

⁹ ᑍᒤᒻᒪᑦ ᐃᓅᑎᓪᓗᖓ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, “ᓱᓕᓪᓚᕆᒃᓗᖓ ᒧᐊᐱᒥᐅᑦ ᓱᑑᒪᒥᐅᑎᑑᕈᒫᕐᐳᑦ, ᐊᒧᓁᑎᒥᐅᓪᓗ ᒍᒨᕋᒥᐅᑎᑑᕈᒫᕐᐳᑦ ᐱᕈᕐᕕᐅᔪᒫᕐᐳᑦ ᐅᕐᐱᖕᓄᑦ ᐃᒪᕐᓱᖕᓄᓪᓗ ᑕᕆᐅᒧᑦ, ᓄᓇᖓ ᐊᑑᑎᖃᕈᓐᓁᕈᒫᕐᐳᖅ ᐃᓱᖃᖏᑦᑐᒧᑦ. ᐃᓄᖁᑎᒪ ᓇᒃᕚᕐᑕᕐᕕᒋᔪᒫᕐᐰᑦ, ᐃᓅᖃᑎᒌᒡᔪᐊᖁᑎᒪᓗ ᐊᒥᐊᒃᑯᖏᑕ ᐱᑖᕆᔪᒫᕐᐹ.”

¹⁰ ᐱᐅᔪᕆᓂᖏᑕ ᐱᓂᐊᕐᓂᕆᓚᐅᕐᑕᖏᑦ ᐱᓪᓗᒋᑦ ᑍᒤᑕᐅᔪᒫᕐᐳᑦ, ᐅᖃᕐᓂᕐᓘᑎᖃᓚᐅᕐᓂᖏᑦ ᒥᑕᐅᑎᖃᓚᐅᕐᓂᖏᓪᓗ ᐱᓪᓗᒋᑦ, ᐃᓄᖁᑎᓐᓂᒃ ᐊᑭᕋᕐᑐᓚᐅᕐᓂᖏᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᐃᓄᖁᑎᖏᓐᓂᒃ.

¹¹ ᐊᑕᓂᖅ ᑲᒪᓇᕐᑐᒃᑯᑦ ᐱᓂᐊᕐᓂᖃᕈᒫᕐᐳᖅ ᑖᒃᑯᓄᖓ, ᓄᖑᑎᑦᓱᒫᕐᒪᒋᑦ ᒎᑎᓐᖑᐊᑦ ᓄᓇᕐᔪᐊᒦᑦᑐᑦ. ᐃᓄᓕᒫᑦ ᑐᒃᓯᐊᕐᕕᒋᔪᒫᕐᐹᑦ ᐊᖏᕐᕋᒥᖕᓂ, ᐃᓛᒃ ᓯᒡᔭᒥ ᓄᓇᖃᕐᑐᓕᒫᑦ ᐃᓅᖃᑎᒌᒡᔪᐊᑦ ᑐᒃᓯᐊᕐᕕᒋᔪᒫᕐᐹᑦ.

¹² ᐃᓕᑦᓯ ᐃᑎᐅᐱᐊᒥᐅᖑᔪᓯ ᑐᖁᑕᐅᔪᒫᕐᐳᓯ ᓴᕕᒡᔪᐊᓐᓄᑦ.

¹³ ᐊᒡᒐᓂᓗ ᓱᒋᐊᕈᑎᒋᔪᒫᕐᐰᑦ ᓯᕿᓂᐅᑉ ᑕᕐᕋᖓᓃᑦᑐᑦ ᐊᓯᕈᕐᓗᒋᑦ ᐊᓯᕆᐊᒥᐅᑦ. ᓂᓂᕕᒥᐅᓪᓗ ᓄᖑᑦᓱᒫᕐᐰᑦ ᓄᓇᖓ ᐸᓂᕐᑑᓕᕐᓗᓂ ᓱᓇᖃᔪᐃᑦᑑᔪᒫᕐᐳᖅ.

¹⁴ ᐆᒪᔪᐃᓪᓗ ᐊᖁᐱᔪᒫᕐᐳᑦ ᑍᑲᓂ ᐆᒪᔪᓕᒫᑦ ᐃᓅᖃᑎᒋᒡᔪᐊᓂᑦ ᐱᔪᑦ. ᑎᖕᒥᐊᓪᓗ ᓱᕋᒃᓯᒪᓂᖏᓐᓂ ᐃᓂᑖᕈᒫᕐᐳᑦ. ᓂᓪᓕᐊᓂᖏᓪᓗ ᐊᑭᐅᕈᒫᕐᐳᑦ ᐃᒐᓛᖏᑎᒍᑦ, ᐃᑎᕆᐊᕐᕕᖏᓪᓗ ᑕᑕᑦᓱᒫᕐᐳᑦ ᓱᕈᕐᓂᒃ. ᐃᒡᓘᓪᓗ ᓴᐅᓂᖏᑦ ᕿᔪᐃᑦ ᓯᑎᔪᔧᑦ ᓴᖅᑭᑦᓱᒫᕐᐳᑦ.

¹⁵ ᑖᓐᓇ ᐃᒡᓗᒐᓴᒃ ᖁᕕᐊᓱᒃᐳᖅ ᐃᓄᖏᓪᓗ ᐃᓂᓪᓚᖓᑦᓯᐊᕐᐳᑦ, ᐆᒻᒪᑎᒥᒍᑦ ᐅᖃᕐᑐᒧᑦ, “ᑖᓐᓇᐅᕗᖓ, ᐊᓯᓐᓂᒃ ᐱᑕᖃᓐᖏᓚᖅ.” ᖃᓄᐃᒻᒪᓖ ᕿᒪᒃᑕᐅᓯᒪᕚ? ᐆᒪᔪᓕᒫᓄᑦ ᐊᖁᐱᕕᐅᑐᐃᓐᓇᓕᕐᑐᖅ! ᑕᕝᕘᓇ ᐊᖅᑯᓵᕐᑐᓕᒫᑦ ᐅᖃᕐᓂᕐᓘᑎᖃᕈᒫᕐᐳᑦ ᐃᓵᒡᓗᑎᒡᓗ ᐅᕐᓕᕈᒫᕐᐳᑦ.