ᔨᐸᓁᐊᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᐅᑉ ᐅᖃᐅᓯᖓ ᔨᐸᓁᐊᒧᑦ ᑎᑭᑉᐳᑦ ᑯᓯᐅᑉ ᐃᕐᓂᖓᓄᑦ, ᑯᔅ ᐊᑖᑕᖃᕐᐳᖅ ᒋᑕᓔᐊᒥᒃ, ᒋᑎᓔᐊᓗ ᐊᑖᑕᖃᕐᐳᖅ ᐊᒪᕅᔭᒥᒃ, ᐊᒪᕅᐊᓗ ᐊᑖᑕᖃᕐᐳᖅ ᕼᐃᓯᑬᐊᒥᒃ, ᑍᑦᓱᒪᓂ ᔫᓮᐊ ᐋᒪᓐᓇᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥ.

ᐅᓪᓗᖅ ᐊᑕᓂᐅᑉ ᐃᖅᑲᕐᑐᐃᓂᖓ

² ᐊᑕᓂᖅ ᐅᖃᕐᐳᖅ, “ᐃᓘᓐᓇᑦᓯᐊᑎᒃ ᓄᖑᓪᓗᒋᑦ ᓄᓇᒦᑦᑐᑦ ᐊᓯᕈᕈᒫᕐᐸᒃᑲ.

³ ᐃᓄᓕᒫᑦ ᐆᒪᔪᓕᒫᓪᓗ ᓄᖑᑦᓱᒫᕐᐸᒃᑲ; ᑎᖕᒥᐊᑉ ᕿᓚᐅᑉ ᐊᑖᓃᑦᑐᑦ, ᐃᖃᓗᐃᓪᓗ ᑕᕆᐅᕐᒦᑦᑐᑦ ᓄᖑᑦᓱᒫᕆᕙᒃᑲ. ᐊᔪᕐᑐᓕᔪᖅ ᓵᓚᒋᔪᒫᕐᐸᒃᑲ; ᐃᓄᐃᑦ ᓄᓇᕐᔪᐊᕐᒦᑦᑐᓕᒫᑦ ᓄᖑᑦᓱᒫᕐᐸᒃᑲ.” ᐊᑕᓂᖅ ᐅᖃᕐᐳᖅ.

⁴ “ᐊᒡᒐᓐᓄ ᓱᒋᐊᕈᒫᕐᐸᒃᑲ ᔫᑕᒥᐅᑦ, ᔨᕉᓴᓕᒥᐅᓕᒫᓪᓗ; ᐰᓕᐅᓪᓗ ᐊᒥᐊᒃᑯᓕᒫᖏᑦ ᓄᖑᑦᓱᒫᕐᐸᒃᑲ ᑕᒫᓐᖓᑦ, ᒎᑎᓐᖑᐊᓖᓪᓗ ᑐᓂᕐᕈᓯᕐᑎᑦᓯᖏᑦ ᐊᑎᖏᑦ ᓄᖑᑎᑦᓱᒫᕐᐸᒃᑲ.

⁵ ᑐᒃᓯᐊᕐᐸᒃᑐᓪᓗ ᕿᓚᐅᑉ ᐊᑖᓃᑦᑐᓄᑦ ᐃᒡᓗᒥᑦᑕ ᖄᖏᓐᓂ; ᐹᒻᒪᒃᑎᕐᐸᒃᑐᓪᓗ ᐅᖃᕕᒃᓗᑎᒃ ᐊᑕᓂᕐᒧᑦ ᒧᓛᒃᒥᒃ ᒎᑎᓐᖑᐊᒥᒃ ᐱᖃᓯᐅᑦᔨᓪᓗᑎᒃ.

⁶ ᐊᑕᓂᖕᒥᒡᓗ ᕿᒤᓯᒪᔪᑦ ᒪᓕᒃᑐᕕᓂᐅᒐᓗᐊᕐᓗᑎᒃ, ᐊᑕᓂᕐᒥᒡᓗ ᕿᓂᖏᑦᑐᑦ ᖃᐅᔨᓇᓱᐊᖏᑦᑐᓪᓗ.”

⁷ ᓂᐰᓕᕆᑦᓯ ᐊᑕᓂᐅᑉ ᒎᑎᐅᑉ ᓵᖓᓂ! ᐊᑕᓂᐅᑉ ᐅᓪᓗᖓ ᑎᑭᓕᕐᒪᑦ; ᐊᑕᓂᖅ ᑐᓂᕐᕈᑎᒃᓴᒥᓂᒃ ᐊᑐᐃᓐᓇᕈᐃᓯᒪᓕᕐᒪᑦ ᕾᖁᓯᒪᔭᓂᓗ ᐃᑦᔪᕐᓁᑎᑉᐰᑦ.

⁸ “ᐅᓪᓗᕐᓗ ᓇᓪᓕᐅᑎᒃᐸᑦ ᐊᑕᓂᐅᑉ ᑐᓂᕐᕈᓯᕐᕕᐊ, ᐊᖓᔪᖅᑳᑦ ᐊᖓᔪᖅᑳᕐᔪᐊᓪᓗ ᐃᕐᓂᖏᑦ ᓱᒋᐊᕈᒫᕐᐸᒃᑲ, ᐊᑐᕐᑐᓪᓗ ᐃᓅᖃᑎᒃᓴᔭᕆᓐᖏᑕᖏᑕ ᒎᑎᓐᖑᐊᓖᑦ ᐊᓐᓄᕌᖏᓐᓂᒃ.

⁹ ᐅᓪᓗᖅ ᓇᓪᓕᐅᑎᒃᐸᑦ ᐃᑎᕐᑕᕐᕕᒃᑯᑦ ᐊᓪᓗᕐᑐᓕᒫᑦ ᓱᒋᐊᕈᒫᕐᐸᒃᑲ, ᐊᖓᔪᖅᑳᒥᓗ ᐃᒡᓗᖓᓄᐊᖅᑬᔪᑦ ᐱᕋᔭᖕᓂᕐᒥᒃ ᐅᐃᕕᕆᒃᓯᓂᕐᒥᒡᓗ.

¹⁰ “ᐅᓪᓗᖅ ᓇᓪᓕᐅᑎᒃᐸᑦ,” ᐊᑕᓂᖅ ᐅᖃᕐᐳᖅ, “ᕿᐊᓂᖅ ᑐᓴᕐᓴᐅᔪᒫᕐᐳᖅ ᐃᑎᕐᑕᕐᕕᖕᒥᑦ ᐃᖃᓗᖕᒥᒃ ᐊᑎᓕᖕᒥᑦ, ᐅᒡᒍᐊᕐᓂᕐᒧᓪᓗ ᕿᐊᓂᖅ ᑐᓴᕐᓴᐅᔪᒫᕐᐳᖅ ᐃᒡᓗᒐᓮᑦ ᓄᑖᕕᓂᐅᓂᖓᓂᑦ, ᑲᑕᒐᕐᕙᓗᐃᓪᓗ ᐱᖑᕐᓂᑦ ᓂᐱᖅᑯᑐᔪᐊᓘᔪᒫᕐᐳᑦ.

¹¹ ᐅᒡᒍᐊᕐᓂᕐᒧᑦ ᕿᐊᓕᕆᑦᓯ ᒧᐊᕐᑖᒥᐅᖑᔪᓯ, ᑕᐅᕐᓯᔨᓕᒫᑦ ᓄᖑᑕᐅᖕᒪᑕ; ᓯᐅᓪᕙᓂᒡᓗ ᐅᖁᒤᓐᓂᕐᓯᐅᕐᑎᓕᒫᑦ ᓄᖑᑕᐅᖕᒪᑕ.

¹² “ᑕᒪᓐᓇ ᐊᑐᓕᕐᐸᑦ ᔨᕉᓴᓕᒻ ᕿᓂᕐᕕᒋᔪᒫᕐᐸᕋ ᓇᓂᕈᐊᓄᑦ, ᓱᒋᐊᕈᒫᕐᐸᒃᑲᓗ ᐃᒻᒥᖕᓂᒃ ᓈᒻᒪᒐᓱᒋᔪᑦ ᐱᔪᓐᓇᕋᓱᒋᔪᓪᓗ, ᐆᒻᒪᑎᒥᒍᓪᓗ ᐃᓱᒪᔪᑦ, ‘ᐊᑕᓂᖅ ᐱᐅᔪᓂᒃ ᐱᐅᖏᑦᑐᓂᒡᓘᓐᓃᑦ ᐱᓇᓱᐊᕐᓂᐊᓐᖏᓚᖅ.’

¹³ ᑍᒤᒻᒪᑦ ᐱᖁᑎᖏᑦ ᐊᕐᓵᕐᓂᒐᐅᔪᒫᕐᐳᑦ, ᐃᒡᓗᖏᓪᓗ ᓯᖁᑦᑎᕐᑕᐅᔪᒫᕐᐳᑦ ᓱᓇᐅᔪᓐᓁᕐᓗᑎᒃ. ᐃᒡᓗᓕᐅᕈᒫᕐᐳᑦ ᐃᓂᒋᓂᐊᓐᖏᑕᒥᖕᓂᒃ; ᕔᓂᒃᓴᓕᐅᕈᒫᕐᐳᑦ ᐃᒥᕐᓂᐊᓐᖏᑕᒥᖕᓂᒃ.”

¹⁴ ᐊᑕᓂᐅᑉ ᐅᓪᓗᕐᔪᐊᖓ ᖃᒡᓕᓕᕐᐳᖅ, ᖃᓪᓕᕗᖅ ᑎᑭᑦᓴᐅᑎᒋᓕᕐᓗᓂᓗ; ᐊᑕᓂᐅᑉ ᐅᓪᓗᖓᑕ ᓂᐱᖓ ᖃᓯᓕᓇᕐᐳᖅ, ᑕᕝᕙᓂ ᐊᖑᑏᑦ ᐊᔪᖏᑦᑐᐊᓗᐃᑦ ᓂᐱᓕᐊᓘᔪᒫᕐᐳᑦ.

¹⁵ ᐅᓪᓗᖅ ᓂᓐᖓᐅᓯᕐᒧᑦ ᐅᓪᓗᕆᔭᐅᔪᒫᕐᐳᖅ, ᐅᖁᒤᑦᑑᓗᓂ ᐃᓱᒪᔮᕐᓇᕐᓗᓂᓗ, ᓯᖁᑦᑎᕐᑕᐅᓂᕐᑕᖃᕈᒫᕐᐳᖅ ᓄᖑᕈᑦᔭᐅᓂᕐᑕᖃᕐᓗᓂᓗ, ᑖᕐᑑᔪᒫᕐᐳᖅ ᖁᕕᐊᓇᖏᓪᓗᓂᓗ, ᓄᕗᔭᖃᕈᒫᕐᐳᖅ ᑖᕐᔪᖓᓗᓂᓗ.

¹⁶ ᐅᓪᓘᔪᒫᕐᐳᖅ ᓂᓪᓕᐊᕕᐅᓗᓂ ᑎᑦᑐᓚᐅᑎᓄᑦ ᐅᓇᑕᕐᑐᓪᓗ ᓂᐱᖏᓐᓄᑦ, ᐅᓇᑕᕐᓂᐅᔪᒫᕐᐳᖅ ᐃᒡᓗᒐᓴᖕᓂᒃ ᐊᕙᓗᕐᔪᐊᓕᖕᓂᒃ ᐳᕐᑐᔪᓂᒡᓗ ᓇᐸᔪᓂᒃ.

¹⁷ ᐃᓄᐃᑦ ᐃᓱᒪᔮᕐᓇᕐᑐᓄᑦ ᑎᑭᑕᐅᑎᑦᓱᒫᕐᐸᒃᑲ, ᐱᓱᓕᕈᒫᕐᐳᑦ ᑕᐅᑐᖏᑦᑐᑎᑐᑦ, ᐊᔪᕐᑐᓕᓚᐅᕐᒪᑕ ᐊᑕᓂᕐᒧᑦ; ᐊᐅᖏᑦ ᑯᕕᔭᐅᔪᒫᕐᐳᑦ ᐃᒥᕐᑎᑐᑦ, ᑎᒥᖏᓪᓗ ᐊᓇᕐᑎᑐᑦ ᑍᒤᓕᕈᒫᕐᐳᑦ.

¹⁸ ᓯᐅᓪᕕᕆᖁᑎᖏᑕ ᒎᓗᖁᑎᖏᑕᓘᓐᓃᑦ ᐱᐅᓕᔭᐅᔪᓐᓇᕈᒫᓐᖏᓔᑦ ᐊᑕᓂᐅᑉ ᓂᓐᖓᐅᓯᖓᑕ ᐅᓪᓗᖓᓂ. ᓄᓇᕐᔪᐊᓕᒫᖅ ᓄᖑᑕᐅᔪᒫᕐᐳᖅ ᓯᒡᒐᑦᔨᓂᕐᒥᓄᑦ ᓂᓐᖓᐅᒪᓂᖓᑕ ᐃᑯᐊᓚᓂᖓᓄᑦ; ᑲᑉᐱᐊᓇᒃᑲᓐᓂᕐᕕᖃᖏᑦᑐᒧᑦ ᑕᕝᕔᓐᓇᖅ ᓄᖑᑦᓱᒫᕐᐰᑦ ᓄᓇᕐᔪᐊᕐᒥᐅᓕᒫᑦ.