ᓴᑲᕅᐊᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦᓄᓇᖃᑎᒌᒡᔪᐊᑦ ᔫᑎᑦ ᓄᓇᖓᑕ ᓯᓚᑖᓃᑦᑐᑦ ᐃᖅᑲᕐᑐᕐᑕᐅᓂᖏᑦ 1 ᐊᑕᓂᐅᑉ ᐅᖃᐅᓯᖓᑕ ᕼᐊᑦᕌᒃᒥ ᓄᓇᖃᕐᑐᑦ ᐊᑭᕋᕐᑐᕐᐰᑦ ᑕᒫᓯᑰᓯᒥᓗ ᓄᓇᖃᕐᑐᑦ ᐊᑭᕋᕐᑐᕐᓂᖓᑕ ᓵᓐᖓᔪᒫᕐᐰᑦ: ᐃᓄᐃᑦ ᐃᓴᕆᐊᓕᒥᐅᓕᒫᓪᓗ ᐊᑕᓂᐅᑉ ᑕᑯᓐᓈᕐᒪᒋᑦ. 2 ᕼᐊᒫᑎᒥᐅᓪᓗ ᐊᑭᕋᕐᑐᕈᒫᕆᕔᑦ ᓯᓚᑖᓂᑦᑐᓪᓗ ᑍᕆ ᓮᑐᓂᓗ, ᐃᓄᖏᑦ ᓯᓚᑐᔫᒐᓗᐊᕐᑎᓪᓗᒋᑦ. 3 ᑍᕆᒥ ᓄᓇᖃᕐᑐᑦ ᐊᕙᓗᓕᐅᕈᑎᓯᒪᔫᒐᓗᐊᑦ ᓴᓐᖏᔪᒥᒃ, ᓯᐅᓪᕕᕆᒥ ᑲᑎᕐᓯᓯᒪᔫᒐᓗᐊᑦ ᐳᔪᕐᓗᒃᑎᑐᑦ ᐊᖏᑎᒋᔪᒥᒃ, ᒎᓗᖁᑎᖃᕐᓗᑎᒡᓗ ᐱᐅᑦᓯᐊᕐᑐᒥᒃ ᒪᕐᕋᕐᑎᑐᑦ ᐊᖅᑯᑎᒦᑦᑐᑎᑐᑦ. 4 ᐊᑕᓂᐅᓪᓕ ᐱᖁᑎᖏᓐᓂᒃ ᐊᕐᓵᕈᒫᕐᐰᑦ, ᐱᔪᓐᓇᕐᓂᖓᓪᓗ ᐃᒋᓪᓗᒍ ᐃᒫᓄᑦ; ᐃᑯᒪᒧᓪᓗ ᓄᖑᑕᐅᔪᒫᕐᐳᑦ. 5 ᐊᓯᑭᓗᓂᒥ ᓄᓇᖃᕐᑐᑦ ᑕᑯᓗᑎᒃ ᑲᑉᐱᐊᓱᒍᒫᕐᐳᑦ; ᒑᓴᒥᐅᑦᑕᐅᖅ ᑕᑯᔪᒫᕆᕗᑦ ᑐᖁᔨᐊᖃᕐᑐᑐᓪᓗ ᕿᒃᓵᒍᒫᕐᐳᑦ, ᐃᑯᕋᓂᒥᓗ ᓄᓇᖃᕐᑐᑦ ᕿᒃᓵᒍᒫᕆᕗᑦ; ᓂᕆᐅᒋᔭᒃᓴᖃᕈᓐᓁᕈᒫᕐᒪᑕ; ᒑᓴᒥᐅᑦ ᐊᖓᔪᖅᑳᕐᔪᐊᖓ ᑐᖁᔪᒫᕐᐳᖅ, ᐋᔅᑭᓛᓂ ᐃᓄᖃᕈᓁᕈᒫᕐᐳᖅ. 6 ᐃᓅᖃᑎᒌᒃᓴᔭᐅᖏᑦᑐᓂᒃ ᐊᑖᑕᖃᕐᑐᑦ ᐊᓈᓇᖃᕐᑐᓪᓗ ᓄᓇᖃᕈᒫᕐᐳᑦ ᐋᔅᑖᑦᒥ, ᐱᓕᔅᑍᓂᒥᐅᓪᓗ ᐱᐅᔪᕆᓂᖓᑦ ᑭᐱᔪᒫᕐᐸᕋ. 7 ᐊᐅᓕᖕᒥᒃ ᓂᕆᖃᑦᑕᕐᓂᖓᑦ ᐲᕈᒫᕐᐸᕋ ᖃᓂᖏᓐᓂᑦ, ᐱᖁᔭᐅᖏᑦᑐᓂᒡᓗ ᓂᕆᖃᑦᑕᕐᓂᖏᑦ. ᐊᒥᐊᒃᑰᔪᓪᓕ ᒎᑎᐅᑉ ᐱᒋᓕᕈᒫᕐᐰᑦ ᔫᑕᒥᐅᑎᑐᑦ, ᐃᑯᕋᓂᒥ ᓄᓇᖃᕐᑐᑦ ᐃᓄᖁᑎᑦᑐᑦ ᔨᐳᓮᑎᑐᑦ ᑍᒤᓕᕈᒫᕐᐳᑦ. 8 ᐃᒡᓗᒐ ᓴᐳᑎᓯᒪᔪᒫᕐᐸᕋ ᐅᓇᑕᕐᑐᒃᓴᓂᑦ ᓵᓚᖃᕈᒪᔪᓂᑦ, ᑕᕝᕘᓇ ᐊᖅᑯᓵᕐᐸᒃᑐᓂᑦ ᑖᕗᖓ ᐅᑎᒧᓪᓗ; ᐊᑭᕋᕐᑐᕐᑐᑦ ᓵᓚᖃᕈᒪᔪᑦ ᑕᕝᕘᓇ ᐊᖅᑯᓵᖃᑦᑕᕈᓐᓁᕈᒫᕐᐳᑦ: ᒫᓐᓇᒥᑦ ᖃᐅᔨᓴᕐᑎᐅᔪᒪᕗᖓ. ᐊᖓᔪᖅᑳᕐᔪᐊᖑᔪᒫᕐᑐᖅ ᓯᕗᓂᒃᓴᒥ 9 ᖁᕕᐊᓱᕕᒡᔪᐊᕆᑦᓯ, ᓮᐅᓂᐅᑉ ᐸᓂᐊ! ᕾᒐᓛᕆᑦ ᔨᕉᓴᓕᐅᑉ ᐸᓂᐊ! ᑕᑯᒋᑦ, ᐊᖓᔪᖅᑳᕐᔪᐊᓯ ᑎᑭᓕᕐᒪᑦ ᐃᓕᑦᓯᓐᓄᑦ! ᑖᓐᓇ ᐱᓂᐊᕐᓂᒥᒍᑦ ᐊᑦᔨᒌᒃᑎᑦᓯᔪᖅ, ᐱᐅᓕᔭᐅᓂᕐᒥᒡᓗ ᐱᖃᕐᓗᓂ; ᒥᑭᒡᓕᑎᕐᓯᒪᕗᖅ, ᓯᐅᑎᖅᑯᕐᑐᔪᒥ ᐃᑭᒪᓪᓗᓂ, ᓯᐅᑎᖅᑯᕐᑐᔫᑉ ᓄᕐᕋᖓᓂ. 10 ᐅᓇᑕᐅᑏᑦ ᐊᒃᓴᓗᐊᓖᑦ ᐱᑕᖃᕈᓐᓁᕐᑎᑦᓱᒪᕙᒃᑲ ᐃᕗᕅᒥᑦ, ᕿᒻᒥᕐᔪᐊᓪᓗ ᔨᕉᓴᓕᒥᑦ, ᐱᑎᒃᓰᑦ ᐅᓇᑕᐅᑏᑦ ᓇᑲᑎᕈᒫᕐᐳᑦ: ᓮᓕᓂᕐᒥᒡᓗ ᐅᖃᐅᓯᖃᕈᒫᕐᐳᖅ ᐃᓅᖃᑎᒌᒡᔪᐊᓄᑦ; ᐊᖓᔪᖅᑲᐅᕕᖓ ᑭᒡᓕᖃᕈᒫᕐᐳᖅ ᐃᒪᐅᑉ ᓯᓈᓂᑦ ᐃᒡᓗᐊ ᐃᒤᑉ ᓯᓈ ᑎᑭᓪᓗᒍ, ᑰᖕᒥᑦ ᓄᓇᕐᔪᐊᑉ ᐃᓱᐊ ᑎᑭᓪᓗᒍ. ᒎᑎᐅᑉ ᐃᓄᖁᑎᖏᑕ ᐃᓂᒋᓚᐅᕐᑕᒥᖕᓄᑦ ᐅᑎᕐᑎᑕᐅᓂᖓᑦ 11 ᐃᓕᑦᓯᓕ, ᐊᐅᒃᑯᑦ ᐊᖏᖃᑎᒌᖕᓂᒃᑯᑦ ᑎᒍᔭᐅᓯᒪᔪᖁᑎᓯ ᐊᓂᑎᑦᓱᒪᕙᒃᑲ ᐃᑎᕐᓴᒥᑦ ᐃᒪᖃᖏᑦᑐᒥᑦ. 12 ᐅᑎᓕᕆᑦᓯ ᐊᕙᓗᖃᕐᑐᒧᑦ ᓴᓐᖏᔪᒥᒃ ᓴᐳᑦᔭᐅᕕᖕᒧᑦ, ᓂᕆᐅᒋᔭᒃᓴᖃᓕᕐᑐᓯ: ᐅᓪᓗᒥ ᓇᓗᓁᕐᓯᕕᒋᕙᑦᓯ ᒪᕐᕈᐃᕐᑑᑎᓪᓗᐊᒥᒃ ᐅᑎᕐᑎᓯᕕᒋᔪᒪᕙᑦᓯ. 13 ᔫᑕ ᓂᐅᖓᒃᑎᑦᓱᒪᕙᕋ ᐱᑎᒃᓯᑐᑦ, ᐃᕗᕅᒥ ᖃᕐᔪᑎᑐᑦ ᑕᕝᕗᖓ ᐃᓕᔪᒪᕙᕋ, ᓮᐅᓂᐅᓪᓗ ᐃᕐᓂᖏᑦ ᒪᑭᑎᑦᓱᒪᕙᒃᑲ, ᒍᕇᓯᒥ ᓄᓇᖃᕐᑐᑦ ᐃᕐᓂᖏᓐᓂᒃ ᐊᑭᕌᕐᑐᖁᓪᓗᒋᑦ, ᐅᓇᑕᕐᑐᒃᓴᐅᑉ ᐊᔪᖏᑦᑑᑉ ᓴᕕᒡᔪᐊᖓᑐᑦ ᑍᒤᖁᓪᓗᒋᑦ. 14 ᐊᑕᓂᖅ ᑖᒃᑯᐊ ᖁᓛᓂ ᓴᖅᑭᕈᒫᕐᐳᖅ, ᖃᕐᔪᖓᓗ ᐃᖏᕐᕋᔪᒫᕐᐳᖅ ᖃᐅᒻᒪᓪᓚᒃᑎᑐᑦ ᑕᕝᕙᓐᖓᑦ, ᐊᑕᓂᐅᑉ ᒎᑎᐅᑉ ᑎᑦᑐᓚᐅᑦ ᓂᓪᓕᕐᑎᑦᓱᒫᕐᐹ, ᐊᓄᕆ ᓯᓚᕈᔪᒃ ᓯᕿᓂᐅᑉ ᓇᓛᓂᑦ ᐱᔪᖅ ᐊᑐᕐᓗᒍ ᐃᖏᕐᕋᔪᒫᕐᐳᖅ. 15 ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐃᓄᖁᑎᓂ ᓴᐳᑎᔪᒫᕐᐰᑦ; ᑖᒃᑯᐊ ᐊᑭᕋᒥᖕᓂᒃ ᓄᖒᑦᓯᓗᑎᒃ ᓵᓚᖃᕈᒫᕐᐳᑦ, ᐅᔭᖅᑲᓄᑦ ᐃᓪᓘᕐᐸᒡᓗᒋᑦ; ᐃᒥᕈᒫᕐᐳᑦ, ᓂᓪᓕᐊᓗᑎᒡᓗ ᐋᖓᔮᕐᑐᑎᑐᑦ, ᑕᑕᑦᓱᒫᕐᐳᑦ ᐅᐊᓴᕐᕕᒃᑎᑐᑦ, ᑯᕕᓗᑎᒡᓗ ᐆᒪᔪᓂᒃ ᑐᓂᕐᕈᓯᕐᕕᐅᑉ ᑎᕆᖅᑯᖏᑎᑐᑦ. 16 ᐊᑕᓂᐅᑉ ᒎᑎᖓᑦᑕ ᓴᐳᑎᔪᒫᕐᐰᑦ ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ, ᑍᒫᑦᓮᓐᓇᖅ ᓰᐱᓕᕆᔨᐅᑉ ᓰᐱᖁᑎᓂ ᓴᐳᑎᓲᕆᖕᒪᒋᑦ ᐃᕐᓯᓇᕐᑐᓂᑦ: ᐅᔭᕋᒃᑎᑐᑦ ᑕᑯᒥᓇᕐᑐᑎᑐᑦ ᑍᒤᑦᓱᒫᕐᐳᑦ ᓂᐊᖂᑎᖓᓂ, ᑕᑯᒃᓴᐅᑦᓯᐊᕐᓗᑎᒡᓗ ᓄᓇᖁᑎᖓᓂ. 17 ᑖᒃᑯᐊ ᐱᐅᔪᒻᒪᕆᐊᓘᔪᒫᕐᐳᑦ ᑕᑯᒥᓇᕐᑐᒻᒪᕆᐊᓘᓗᑎᒡᓗ! ᓂᐊᖂᔭᓮᑦ ᐃᓅᓱᒃᑐᓂᒃ ᐊᖑᑎᓂᒃ ᖁᕕᐊᓱᒃᑎᑦᓯᔪᒫᕐᐳᑦ, ᕔᓂᓗ ᓄᑖᖅ ᐊᕐᓇᓂᒃ ᐃᓅᓱᒃᑐᓂᒃ ᖁᕕᐊᓱᒃᑎᑦᓯᔪᒫᕐᐳᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society