ᓴᑲᕅᐊᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᑕᑯᑎᑕᐅᓂᖅ ᐊᒃᓴᓗᐊᖃᕐᑐᓂᒃ ᕿᒧᒃᓯᐅᑎᓂᒃ ᐅᓂᐊᕐᑕᐅᔪᓂᒃ ᓯᑕᒤᓂᒃ

¹ ᖁᒻᒧᑦ ᑕᑯᓴᕐᒥᒐᒪ, ᑕᑯᒋᕗᖓ ᐊᒃᓴᓗᐊᓕᖕᓂᒃ ᕿᒧᒃᓯᐅᑎᓂᑦ ᐅᓂᐊᕐᑕᐅᔪᓂᒃ ᓯᑕᒤᓂᒃ, ᓄᐃᓕᕐᑐᓂᒃ ᖃᖄᒃ ᒪᕐᕈᒃ ᐊᑯᓐᓂᖓᓂᑦ, ᖃᖄᓗ ᑖᒃᑯᐊᒃ ᑲᓐᓄᔭᐅᕗᒃ.

² ᐊᒃᓴᓗᐊᓕᒃ ᓯᕗᓪᓕᕐᐸᖅ ᕿᒻᒥᕐᔪᐊᖃᕐᐳᖅ ᐊᐅᐸᕐᑐᓂᒃ, ᑭᖑᓂᖓᓃᑦᑐᖅ ᕿᕐᓂᕐᑕᓂᒃ ᕿᒻᒥᕐᔪᐊᖃᕐᐳᖅ.

³ ᐱᖓᔪᖓᑦ ᖃᑯᕐᑕᓂᒃ ᕿᒻᒥᕐᔪᐊᖃᕐᐳᖅ, ᓯᑕᒪᖓᓪᓗ ᐅᑭᓕᕆᐊᓂᒃ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᖃᕐᐳᖅ, ᑖᒃᑯᐊᓕᒫᓪᓗ ᐱᔪᓐᓇᕐᓂᖃᕐᐳᑦ.

⁴ ᐂᖏᓕ ᐅᕙᓐᓂᒃ ᑕᑯᑎᑦᓯᔪᖅ ᐊᐱᕆᕙᕋ, “ᐊᑕᓃᖅ ᐅᑯᐊ ᖃᓄᖅ ᑐᑭᓖᑦ?”

⁵ ᐂᖏᓕᐅᑉ ᑭᐅᕚᖓ, “ᐅᑯᐊ ᐊᓂᕐᓃᑦ ᕿᓚᖕᒥᑦ ᐱᔪᑦ, ᓄᓇᕐᔪᐊᓕᒫᑉ ᐊᑕᓂᖓᑦᑕ ᓇᔪᒐᖓᓂᑦ ᑕᒪᐅᓐᖓᕐᑐᑦ.

⁶ “ᐊᒃᓴᓗᐊᓕᖕᓂᒃ ᕿᕐᓂᕐᑕᓂᒃ ᕿᒻᒥᕐᔪᐊᖃᕐᑐᑦ ᐅᓐᓄᐊᑉ ᓇᓛᓄᑦ ᐊᐅᓪᓚᕐᐳᑦ, ᖃᑯᕐᑕᓂᒃᓗ ᕿᒻᒥᕐᔪᐊᖃᕐᑐᑦ ᓯᕿᓂᐅᑉ ᓂᐱᕕᐊᑕ ᓇᓛᓄᑦ ᐊᐅᓪᓚᕐᐳᑦ, ᐅᑭᓕᕆᐊᓂᒡᓗ ᕿᒻᒥᕐᔪᐊᖃᕐᑐᑦ ᐅᓪᓘᑉ ᓇᓛᓄᑦ ᐊᐅᓪᓚᕐᐳᑦ.”

⁷ ᕿᒻᒥᕐᔪᐊᓖᑦ ᐊᐅᓪᓚᕐᒪᑕ, ᑲᔪᖏᕐᐳᑦ ᓄᓇᕐᔪᐊᖅ ᓈᓗᒍ ᐃᖏᕐᕋᕕᒋᑲᐅᕐᑐᕈᒪᓪᓗᒍ. ᐂᓐᖏᓕᓗ ᐅᖃᕐᐳᖅ, “ᐊᑏ ᓄᓇᕐᔪᐊᖅ ᐃᖏᕐᕋᕕᒋᔭᕐᑐᓕᕐᓯᐅᒃ!” ᑖᒃᑯᐊ ᓄᓇᕐᔪᐊᖅ ᓈᓪᓗᒍ ᐃᖏᕐᕋᓕᕐᐳᑦ.

⁸ ᑕᕝᕙ ᐂᓐᖏᓕ ᓂᓪᓕᕐᐳᖅ ᐅᕙᓐᓄᑦ, “ᑕᑯᒋᑦ ᐅᑯᐊ ᐅᓐᓄᐊᑉ ᓇᓛᓄᑦ ᐊᐅᓪᓚᕐᑐᑦ ᐊᑕᓂᐅᑉ ᐊᓂᕐᓂᖓᑕ ᓂᓐᖓᐅᒪᓂᖓ ᐃᑯᓪᓚᐅᒥᑎᑉᐹ.”

ᐱᖁᔨᓂᖅ ᔮᓱᐊ ᐊᖓᔪᖅᑳᕐᔪᐊᕐᓯᐅᑎᒥᒃ ᓇᓴᕐᑕᐅᖁᓪᓗᒍ

⁹ ᐊᑕᓂᐅᑉ ᐃᒫᒃ ᐅᖃᕐᕕᒋᕚᖓ,

¹⁰ “ᑐᓂᕐᕈᑎᑦ ᐱᔭᕐᑐᒃᑭᑦ ᑎᒍᔭᐅᓯᒪᔪᕕᓂᕐᓂᑦ ᐅᑎᕋᑖᕐᑐᓂᑦ ᐹᐱᓘᓂᒥᑦ, ᐅᑯᐊ ᕼᐃᐅᓪᑍ, ᑐᐱᐊ, ᔨᑍᐊᐅᓪᓗ ᑐᓂᕐᕈᑎᖏᑦ. ᐅᓪᓗᒥᓗ ᑕᕝᕙᓂᑦᓮᓐᓇᖅ ᐂᓗᑎᑦ ᔫᓮᐊᐅᑉ ᐃᒡᓗᖓᓄᑦ ᔨᐸᓁᐊᐅᑉ ᐃᕐᓂᖓᓄᑦ. ᑖᒃᑯᐊᓕᒫᑦ ᐅᑎᕐᓯᒪᖕᒪᑕ ᐹᐱᓘᓂᒧᑦ ᐊᐅᓪᓚᕐᑎᑕᐅᓯᒪᓂᕐᒥᑦ.

¹¹ ᑖᒃᑯᐊ ᑐᓂᕐᕈᑎᖏᓐᓂᒃ ᓯᐅᓪᕕᕆᓂᒃ ᒎᓗᓂᒡᓗ ᓂᐊᖂᑎᓕᐅᕆᑦ, ᐃᓕᓗᒍᓗ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ ᔮᓱᐊᒧᑦ ᔨᕼᐅᔭᑕᐅᑉ ᐃᕐᓂᖓᓄᑦ.

¹² ᐅᖃᐅᑎᒍᒃ, ‘ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᒪᑦ, “ᐅᓇ ᐊᖑᑦ ᓇᐹᕐᑑᑉ ᐊᕙᓚᖓᔪᐊᓂᒃ ᐊᑎᖃᕐᐳᖅ, ᐃᓂᒋᔭᒥᓂᑦ ᐱᕈᕐᐸᓪᓕᐊᔪᒫᕐᒪᑦ ᑐᒃᓯᐊᕐᕕᒡᔪᐊᓕᐅᕐᓗᓂᓗ ᐊᑕᓂᕐᒧᑦ.

¹³ ᑖᓐᓇ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᓂᒃ ᓴᓇᔪᒫᕐᐳᖅ, ᐊᖓᔪᖅᑳᕐᔪᐊᕐᓯᐅᑎᓂᒡᓗ ᐅᐱᒋᔭᐅᑦᔪᑎᓂᒃ ᐊᑐᕈᒫᕐᐳᖅ ᐃᒃᓯᕙᐅᑕᕐᔪᐊᕐᒥᓗ ᐃᒃᓯᕚᕐᓗᓂ. ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᔪᒫᕐᐳᖅ ᐃᒃᓯᕙᐅᑕᕐᔪᐊᕐᒥ ᐃᒃᓯᕚᕐᓗᓂ. ᐃᓂᒋᔭᖏᒡᓗ ᑖᒃᑯᐊᒃ ᒪᕐᕉᒃ ᐱᓇᓱᐊᖃᑎᒌᑦᓯᐊᕈᒫᕐᐴᒃ.”’

¹⁴ ᐊᖓᔪᖅᑳᕐᔪᐊᕐᓯᐅᑦ ᓇᓴᖅ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓃᓪᓗᓂ ᐃᖅᑲᐅᒪᑦᔪᑎᒃᓴᐅᓂᐊᕐᐳᖅ ᕼᐄᓪᑍᒧᑦ, ᑐᐱᐊᒧᑦ, ᔨᑍᐊᒧᓪᓗ, ᔪᓮᐊᒧᓪᓗ ᔨᐸᓁᐊᐅᑉ ᐃᕐᓂᖓᓄᑦ.”

¹⁵ ᐅᖓᓯᒃᑐᒥᑦ ᐱᓯᒪᔪᑦ ᐃᑲᔪᕆᐊᕈᒫᕐᐳᑦ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓂᒃ ᓴᓇᒃᑲᓐᓂᖃᑕᐅᔭᕐᑐᕐᓗᑎᒃ, ᑕᒪᓐᓇᓗ ᖃᐅᔨᒃᑲᓐᓂᕈᑎᒋᔪᒫᕐᐸᓯ ᐊᑕᓂᐅᑉ ᐊᔪᒐᖃᖏᑦᑑᑉ ᑎᓕᓚᐅᕐᒪᖓ ᐃᓕᑦᓯᓐᓄᑦ. ᑍᒤᑦᓱᒫᕐᐳᖅ ᓈᓚᑦᓯᐊᕈᑦᓯ ᐊᑕᓂᐅᑉ ᐱᖁᔭᖏᓐᓂᒃ.