ᓴᑲᕅᐊᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᑎᑎᖅᑲᓂᒃ ᐃᒧᓲᓂᒃ ᖃᖓᑕᔪᓂᒃ ᑕᑯᑎᑕᐅᓂᖅ

¹ ᓱᓕ ᖁᒻᒧᑦ ᑕᑯᒋᐊᕐᒥᒐᒪ, ᑕᑯᓕᕆᕗᖓ ᑎᑎᖅᑲᓂᒃ ᐃᒧᓲᓂ ᓯᓚᒃᑯᑦ ᐃᖏᕐᕋᔪᓂᒃ.

² ᐂᖏᓕᐅᓪᓗ “ᐊᐱᕆᕚᖓ ᓱᓇᒥᒃ ᑕᑯᕕᑦ?” ᑭᐅᕙᕋᓗ “ᑕᑯᕗᖓ ᑎᑎᖅᑲᓂᒃ ᐃᒧᓲᓂᒃ ᓯᓚᒃᑯᑦ ᖃᖓᑕᔪᓂᒃ; 30ᓂᒃ ᐃᑎᒐᓂᒃ ᑕᑭᓂᖃᕐᑐᓂᒃ 15ᓂᒡᓗ ᐃᑎᒐᓂᒃ ᓴᓂᒧᑐᑎᒋᔪᓂᒃ.”

³ ᐅᖃᐅᑎᕚᖓᓗ, “ᑖᒃᑯᓇᓂ ᓱᒋᐊᕐᑕᐅᑦᔪᑎᒃᓮᑦ ᑕᒫᓂ ᓄᓇᖃᕐᑐᓕᒫᓄᑦ ᑎᑎᕋᕐᓯᒪᕗᑦ; ᐃᒫᒃ ᑎᑎᖅᑲᑦ ᐃᒡᓗᐊᓂ ᑎᑎᕋᕐᓯᒪᖕᒪᑦ, ᑎᒡᓕᒃᐸᒃᑐᑦ ᓄᓇᒥᑦ ᐊᐅᓪᓚᕐᑎᑕᐅᔪᒫᕐᐳᑦ; ᑎᑎᖅᑲᓪᓗ ᑖᒃᑯᐊ ᑐᓄᐊᓂ ᐃᒤᓕᖓᒋᕗᑦ; ᐅᖃᕕᒃᓯᒪᓪᓗᑎᒃ ᓴᒡᓗᕙᒃᑐᑦ ᐊᐅᓪᓚᕐᑎᑕᐅᔪᒫᕆᕗᑦ.

⁴ ᐊᑕᓂᖅ ᐊᔪᒐᖃᖏᑦᑐᖅ ᐅᖃᕐᒪᑦ, ᓱᒋᐊᕐᑕᐅᑦᔪᑎᒃᓮᑦ ᑖᒃᑯᐊ ᐊᐅᓪᓚᕐᑎᓐᓂᐊᕐᓂᕋᕐᓗᒋᑦ, ᐃᑎᕐᓂᐊᕐᐳᓪᓗ ᑎᒡᓕᒃᐸᒃᑐᓕᒫᑦ ᐃᒡᓗᖏᓐᓄᑦ, ᐅᖃᕕᒃᓯᒪᓪᓗᑎᒃ ᓴᒡᓗᕙᒃᑐᓪᓗ ᐃᒡᓗᖏᓐᓄᑦ. ᐅᐸᒃᑕᒥᓂᓗ ᐃᒡᓗᒥ ᑕᕝᕙᓃᖏᓐᓇᕐᓂᐊᕐᐳᖅ ᓯᖁᒥᓐᓂᐊᕐᐹᓗ, ᕿᔪᐃᓪᓗ ᐅᔭᕋᖏᓪᓗ.”

ᐊᕐᓇᒥᒃ ᐃᕕᐅᔭᐅᑉ ᐃᓗᐊᓃᑐᒥᒃ ᑕᑯᑎᑕᐅᓂᖅ

⁵ ᐂᖏᓕ ᐅᕙᓐᓄᑦ ᐅᖃᓚᐅᕐᑐᖅ ᓴᖅᑭᒻᒥᒐᒥ ᐅᖃᐅᑎᒋᕚᖓ, “ᖁᒻᒧᑦ ᑕᑯᓴᕆᑦ, ᓴᖅᑭᓕᕐᑐᒥᒃ ᑕᑯᖁᓪᓗᑎᑦ.”

⁶ ᐊᐱᕆᕙᕋ, “ᓱᓇᐅᖕᒪᑦ?” ᑭᐅᕚᖓ, “ᐃᕕᐅᔭᖅ ᓴᓇᓯᒪᔪᖅ ᓴᕿᑉᐳᖅ,” ᐅᖃᕆᓪᓗᓂ, “ᑖᓐᓇ ᑐᑭᖃᕐᑐᖅ ᓄᓇᒦᑦᑐᓕᒫᑦ ᐱᐅᖏᑦᑐᓕᓂᖏᓐᓂᒃ.”

⁷ ᐃᕕᐅᔭᖅ ᒪᑐᖃᕐᐳᖅ ᑯᓯᕐᓯᐊᒥᒃ, ᒪᑐᐃᕐᑕᐅᖕᒪᓪᓗ, ᐊᕐᓇᖅ ᐃᓗᐊᓂ ᐃᒃᓯᕚᕐᐳᖅ!

⁸ ᐂᓐᖏᓕᐅᑉ ᐅᖃᐅᑎᕚᖓ, “ᑖᓐᓇ ᑕᕝᕙ ᐱᐅᖏᑦᑐᓕᓂᕐᔪᐊᖅ.” ᐂᓐᖏᓕᐅᑉ ᐃᓗᐊᓄᑦ ᐊᒡᔭᕐᓗᒍ ᐃᕕᐅᔭᖅ ᒪᑐᕚ.

⁹ ᖁᒻᒧᑦ ᑕᑯᓴᕋᒪ, ᐊᕐᓈᖕᓂᒃ ᒪᕐᕉᖕᓂᒃ ᑕᑯᕗᖓ ᖃᖓᑕᓪᓗᑎᒃ ᕾᔫᖕᓂᒃ ᐅᕙᓐᓄᑦ ᐃᓴᕈᖏᑦ ᐱᔪᓐᓇᕐᓂᖃᕐᐳᑦ ᑎᖕᒥᐊᑎᑐᑦ ᓯᑐᐊᕆᒃᒥᒃ ᑍᔭᐅᔪᑎᑐᑦ, ᑖᒃᑯᐊᒃ ᐃᕕᐅᔭᖅ ᑎᒍᕚᒃ ᑎᖏᑦᔪᑎᓪᓗᒍᓗ.

¹⁰ ᐂᖏᓕ ᐊᐱᕆᕙᕋ, “ᐃᕕᐅᔭᖅ ᓇᒧᓐᖓᐅᑦᔭᐅᓕᕐᐹ?”

¹¹ ᑭᐅᕚᖓ, “ᓄᓇᒧᑦ ᓯᓇᕆᒧᑦ ᑍᑲᓂ ᑐᒃᓯᐊᕐᕕᖕᒥᒃ ᐃᒡᓗᓕᐅᕐᑕᐅᖁᓪᓗᒍ; ᐃᒡᓗ ᐱᔭᕇᕐᐸᑦ, ᐃᕕᐅᔭᖅ ᑕᕝᕙᓂ ᐃᓂᖃᕈᒫᕐᒪᑦ ᑐᒃᓯᐊᕐᕕᐅᖁᓪᓗᒍ.”