ᓴᑲᕅᐊᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᑕᑯᑎᑕᐅᓂᖅ ᓇᓂᕈᐊᕐᕕᐅᑉ ᐃᓂᖓᓂᒃ

¹ ᐂᖏᓕᓗ ᐅᕙᓐᓄᑦ ᐅᖃᓪᓚᓚᐅᕐᑐᖅ ᕾᒋᕗᖅ, ᑐᐹᕐᐸᖓᓗ ᓯᓂᒃᑐᕕᓂᐅᔮᕐᑎᓪᓗᖓ.

² ᐅᖃᐅᑎᕚᖓᓗ, “ᓱᓇᒥᒃ ᑕᑯᕕᑦ?” ᑭᐅᕙᕋᓗ, “ᑕᑯᕗᖓ ᓇᓂᕈᐊᑉ ᐃᓂᖓᓂᒃ ᒎᓗᒥᒃ ᓴᓇᓯᒪᔪᒥᒃ, ᖄᖓᓂ ᐊᓪᓕᕋᐅᔭᕐᑕᓕᒃ ᐅᕐᓱᖃᕐᕕᖕᒥᒃ. ᓇᓂᕈᐊᓪᓗ ᐊᑐᓂᑦ ᐃᓂᖏᓐᓂᒃ 7ᓂᒃ ᓇᓂᕈᐊᕐᑕᖃᕐᐳᖅ, ᐊᑐᓂᓪᓗ ᑖᒃᑯᐊ 7ᓂᒃ ᐃᑯᐊᓚᒍᑎᖃᕐᐳᑦ.

³ ᑕᕝᕙᓂᓗ ᒪᕐᕉᖕᓂᒃ ᓇᐹᕐᑐᖃᕐᐳᖅ ᐅᕐᓱᒃᓴᓕᖕᓂᒃ ᓇᓂᕈᐊᖃᕐᕕᐅᑉ ᐊᕙᑖᓃᑦᑐᓂᒃ.”

⁴ ᐂᖏᓕᓗ ᐊᐱᕆᕙᕋ, “ᐅᑯᐊ ᖃᓄᖅ ᑐᑭᖃᕐᐸ, ᐊᑕᓂᕋ?”

⁵ ᐂᖏᓕᐅᑉ ᑭᐅᕚᖓ, “ᑐᑭᖓᓂᒃ ᖃᐅᔨᒪᖏᓐᓇᕖᑦ?” ᐅᖃᕐᐳᖓᓗ, “ᐊᑕᓃᖅ ᑐᑭᖓᓂᒃ ᖃᐅᔨᒪᓐᖏᓚᖓ.”

ᒎᑎᐅᑉ ᐊᖏᕐᓂᖓ ᔨᕈᐸᐱᐅᓪᒧᑦ

⁶ ᐂᖏᓕᐅᓪᓗ ᐅᖃᐅᑎᕚᖓ ᔨᕈᐸᐱᐅᓪ ᑐᓴᕐᑎᑕᐅᖁᓪᓗᒍ ᑐᓴᕆᐊᖃᕐᑕᖓᓂᒃ ᐊᑕᓂᕐᒥᑦ ᐱᔪᒥᒃ ᐃᒫᒃ, “ᐱᔪᓐᓇᕐᓂᕐᓅᖏᑦᑐᖅ, ᑎᒥᕕᓪᓗ ᓄᑭᖓᓅᖏᑐᖅ, ᐅᕙᖓᓕ ᐊᓂᕐᓂᓐᓄᑦ, ᑍᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ.

⁷ ᐊᒡᕕᐊᕐᑐᑦ ᖃᖅᑳᓗᒃᑎᑐᑦ ᐊᖏᑎᒋᔪᑦ ᔨᕈᐸᐱᐅᓕᐅᑉ ᓵᖓᓂ ᐊᓯᐅᓂᐊᕐᐳᑦ. ᑐᒃᓯᐊᕐᕕᒡᔪᐊᖅ ᓴᓇᒃᑲᓐᓂᕐᓂᐊᕐᐸᑦ, ᐅᔭᕋᒃ ᑭᖑᓪᓕᕐᐹᖅ ᐃᓕᒍᕕᐅᒃ, ᐃᓄᐃᑦ ᓂᐱᖅᑯᕐᑐᓗᑎᒃ ᓂᓪᓕᐊᔪᒫᕐᐳᑦ, ‘ᐱᐅᔪᐊᓗᒃ, ᐱᐅᔪᐊᓗᒃ!’”

⁸ ᓱᓕᒃᑲᓐᓂᖅ ᐊᑕᓂᐅᑉ ᐅᖃᕐᕕᒋᕚᖓ, ᐅᖃᕐᓗᓂ,

⁹ “ᔨᕈᐸᐱᐅᓕᐅᑉ ᑐᒃᓯᐊᕐᕕᒡᔪᐊᑉ ᑐᓐᖓᕕᐊ ᐃᓕᓚᐅᕐᐹ, ᑐᒃᓯᐊᕐᕕᒡᔪᐊᕐᓗ ᑖᓐᓇ ᐱᔭᕇᕐᓂᐊᕆᕚ. ᑕᒪᓐᓇᓗ ᑍᒫᒃ ᐱᒃᐸᑦ, ᖃᐅᔨᓂᐊᕐᐳᓯ ᕿᓚᖕᒥᐅᑦ ᐊᑕᓂᖓᑦᑕ ᑎᓕᓚᐅᕐᒪᖓ ᐃᓕᑦᓯᓐᓄᑦ.

¹⁰ “ᑖᒃᑯᐊᓕ ᖁᕕᐊᒋᓐᖏᑕᖃᕐᐳᑦ, ᓴᓇᔭᐅᔫᑉ ᓱᒃᑬᓗᐊᕐᓂᖓᓂᒃ ᔨᕈᐸᐱᐅᓕ ᓴᓇᕙᓪᓕᐊᔪᖅ ᑕᑯᒍᓂᑦᔪᒃ ᖁᕕᐊᓱᖕᓂᐊᕐᐳᑦ.” ᐂᖏᓕᐅᑉ ᐅᖃᐅᑎᕚᖓ, “ᓇᓂᕈᐊᖃᕐᕖᑦ ᐅᑯᐊ 7ᐅᔪᑦ ᑐᑭᖃᕐᐳᑦ ᐊᑕᓂᐅᑉ ᐃᔨᖏᓐᓂᒃ ᓄᓇᕐᔪᐊᕐᒦᑦᑐᓕᒫᓂᒃ ᑕᐅᑐᒃᑐᑦ.”

¹¹ ᐊᐱᕆᕙᕋᓗ, “ᐅᑯᐊᒡᓕ ᓇᐹᕐᑑᒃ ᒪᕐᕉᒃ ᐅᕐᓱᒃᓴᓕᖕᓂᒃ ᐸᐅᕐᖓᖃᓲᒃ, ᓇᓂᕈᐊᖃᕐᕕᐅᑉ ᐊᕙᑖᓃᑦᑑᒃ ᖃᓄᖅ ᑐᑭᖃᕐᐸᒃ?”

¹² ᐂᖏᓕᓗ ᐊᐱᕆᒃᑲᓐᓂᕆᕙᕋ, “ᓇᐹᕐᑑᓪᓗ ᐊᕙᓚᖓᔪᖏᒃ ᐅᑯᐊᒃ ᓇᐹᕐᑑᑉ ᐸᐅᕐᖓᖏᑕ ᐅᕐᓱᐊᓂᒃ ᑯᕕᕝᕕᖏᑕ ᒪᕐᕉ ᒎᓘᒃ ᐊᕙᑖᓃᑦᑑᒃ ᖃᓄᖅ ᑐᑭᖃᕆᕚᒃ?”

¹³ ᑭᐅᕚᖓᓗ, “ᖃᐅᔨᒪᖏᓐᓇᕖᑦ ᖃᓄᖅ ᑐᑭᖃᕐᒪᖔᑕ?” ᐅᖃᐅᑎᕙᕋ, “ᐊᑕᓃᖅ ᑐᑭᓯᓐᖏᓚᒃᑲ.”

¹⁴ ᐃᒫᒃ ᐅᖃᐅᑎᕚᖓ, “ᐅᑯᐊ ᑕᕝᕙ ᐊᖑᑏᒃ ᒪᕐᕉᒃ ᓂᕈᐊᕐᑕᐅᓯᒪᓪᓗᑎᒃ ᐅᕐᓱᒧ ᓂᐊᖁᖓᒍᑦ ᑯᕝᕕᕆᔭᐅᓯᒪᔫᒃ ᐊᑕᓂᕐᒥᒃ ᐱᔨᑦᓯᕐᑎᐅᖁᓪᓗᒋᑦ ᓄᓇᕐᔪᐊᓕᒫᒥ.”