ᓴᑲᕅᐊᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑕᑯᑎᑕᐅᓂᖓ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓂᒃ

¹ ᓱᓕ ᑕᑯᑎᑦᔪᑎᐅᑉ ᐊᓯᐊᓂᒃ ᐊᑕᓂᐅᑉ ᑕᑯᑎᒃᑭᕚᖓ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓂᒃ ᔮᓱᐊᒥᒃ ᓇᖏᕐᑐᒥᒃ ᐊᑕᓂᐅᑉ ᐂᖏᓕᖓᑕ ᓵᖓᓂ. ᔮᓱᐊᓪᓗ ᑕᓕᕐᐱᐊᓂ ᓵᑖᓇᓯ ᓇᖏᕆᕗᖅ, ᑖᑦᓱᒥᖓ ᐸᓯᒃᓯᕈᒪᓪᓗᓂ

² ᑕᕝᕙ ᐊᑕᓂᐅᑉ ᐂᖏᓕᖓ ᐅᖃᕐᐳᖅ ᓵᑖᓇᓯᒧᑦ, “ᓵᑖᓇᓰ ᐊᑕᓂᐅᑉ ᓱᒋᐊᕐᓕᑎᑦ, ᐊᑕᓂᐅᑉ ᔨᕉᓴᓕᒥᒃ ᓂᕈᐊᕐᓯᒪᔫᑉ, ᓱᒋᐊᕐᓕᑎᑦ ᐅᓇ ᐊᖑᑦ ᐊᑦᔨᖃᕐᒪᑦ ᕿᔪᖕᒥᒃ ᓇᐹᕐᑐᕕᓂᐅᑉ ᐃᓚᖓᓂᒃ ᐃᑯᐊᓚᔪᒥᑦ ᑎᒍᔭᐅᓯᒪᔪᑐᑦ.”

³ ᔮᓱᐊᓗ ᑕᕝᕙᓂ ᓇᖏᕐᐳᖅ ᐊᓐᓄᕌᕐᓯᒪᓪᓗᓂ ᓴᓗᒤᑦᑐᓂᒃ ᐊᑕᓂᐅᑉ ᐂᖏᓕᖓᑕ ᓵᖓᓂ.

⁴ ᐂᖏᓕᓗ ᕿᓚᖕᒥᐅᖑᖃᑎᒥᓄᑦ ᑕᕝᕙᓃᑦᑐᓄᑦ ᐅᖃᕐᐳᖅ, “ᐆᒪ ᐊᓐᓄᕌᑦ ᓴᓗᒤᑦᑐᑦ ᐊᑐᕐᑕᖏᑦ ᐲᕐᓯᐅᒃ.” ᔮᓱᐊᒧᓪᓗ ᐅᖃᕆᕗᖅ, “ᑕᑯᒋᑦ ᐊᔪᕐᓂᑎᑦ ᐲᕐᐸᒃᑲ ᓄᑖᓂᒡᓗ ᐊᓐᓄᕌᓂᒃ ᐊᑎᓯᑎᑦᓱᒪᕙᒋᑦ.”

⁵ ᐂᖏᓕᐅᓪᓗ ᕿᓚᖕᒥᐅᖑᖃᑎᓂ ᑕᕝᕙᓃᑦᑐᑦ ᐱᖁᕔᑦ ᔮᓱᐊ ᓇᓴᕐᑕᐅᖁᓪᓗᒍ ᖃᓪᓗᓈᕐᑕᒥᒃ ᓴᓗᒪᔪᒥᒃ ᓂᐊᖁᕐᒧᑦ ᓂᒻᒪᐅᑎᓯᒪᔪᒥᒃ. ᑍᒫᒡᓗ ᐱᕗᑦ, ᓄᑖᓂᒡᓗ ᐊᓐᓄᕌᕐᑎᑉᐹᑦ, ᐂᖏᓕ ᑕᕝᕙᓂ ᓇᖏᕐᑎᓪᓗᒍ.

⁶ ᐂᖏᓕᐅᓪᓗ ᔮᓱᐊ ᐅᖃᐅᑎᓕᕐᐹ ᐅᖃᕐᓗᓂ,

⁷ “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ; ᐱᖁᔭᒃᑲ ᒪᓕᑦᓯᐊᕈᕕᒋᑦ ᐱᔭᕆᐊᖃᕐᑕᑎᓪᓗ ᑎᓕᓯᑦᔪᑎᒃᑲ ᐃᓕᖕᓄᑦ ᐊᑐᑦᓯᐊᕈᕕᒋᑦ, ᑕᕝᕙ ᐃᒡᓗᓐᓂ ᐊᐅᓚᑦᓯᔨᐅᓂᐊᕐᐳᑎᑦ ᐃᒡᓗᕈᓯᖏᓐᓄᓪᓗ, ᐊᑦᔨᒋᔭᐅᑎᓐᓂᐊᕐᐸᒋᓪᓗ ᐅᕙᓂ ᐃᓂᖃᕐᑐᓄᑦ.

⁸ ᔮᓱᐊ ᓈᓚᑦᓯᐊᕆᑦ, ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᔪᑎᑦ; ᐃᓕᑦᓯᓗ ᑐᓂᕐᕈᓯᕐᑎᑦᓯᔨᐅᔪᓯ ᑖᑦᓱᒥᖓ ᐊᖓᔪᖅᑳᖃᕐᑐᓯ ᓈᓚᑦᓯᐊᕆᓯ, ᓯᕗᓂᒃᓴᒧᑦ ᑕᑯᔭᒃᓴᑦᓯᐊᕙᐅᔪᓯ: ᐱᔨᒐ ᓴᖅᑭᑎᑦᓱᒪᒐᒃᑯ ᑍᔭᐅᔪᖅ ᓇᐹᕐᑑᑉ ᐊᕙᓚᖓᔪᐊᓂᒃ.

⁹ ᐃᓕᓯᓂᐊᕋᒪ ᐅᔭᕋᖕᒥᒃ ᐊᑕᐅᓯᕐᒥᒃ, ᔮᓱᐊᑉ ᓵᖓᓄᑦ, 7ᓂᒃ ᑮᓇᖃᕐᑐᓂᒃ, ᑎᑎᕋᕐᕕᒋᓯᒪᓂᐊᕐᐳᖅ ᐃᒫᒃ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, ᓄᓇᖃᕐᑐᑦ ᑕᕝᕙᓂ ᐊᔪᕐᓂᖏᑦ ᐲᕐᓂᐊᕐᐸᒃᑲ ᐅᓪᓗᒥ ᐊᑕᐅᓯᕐᒥ.

¹⁰ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, ᐅᓪᓗᖅ ᑍᓐᓇ ᓇᓪᓕᐅᑎᒃᐸᑦ, ᐃᓕᑦᓯ ᐊᑐᓂᑦ ᓄᓇᖅᑲᑎᑦᓯᓐᓂᒃ ᕾᖁᔨᔪᒫᕐᐳᓯ ᖃᓄᐃᖏᑦᓯᐊᕐᓂᕐᒥ ᖁᕕᐊᓱᖃᑎᒋᓗᒋᑦ ᐃᒃᓯᕙᖃᑎᒋᓗᒋᑦ ᐱᕈᕐᑐᒃᑯᕕᖕᒥ ᕔᓂᓕᒃᓮᓪᓗ ᐱᒋᓕᒃᓮᓪᓗ ᓇᐹᕐᑐᑦ ᐊᑖᓐᓂ.”