ᓴᑲᕅᐊᐅᑉ ᐊᒡᓚᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᒥᐅᑦ ᐊᓯᖏᓪᓗ ᐃᓅᖃᑎᒌᒡᔪᐊᑦ

¹ ᐊᑕᓂᐅᑉ ᐅᓪᓗᖓ ᓇᓪᓕᐅᑎᔪᒫᕐᐳᖅ, ᐅᓇᑕᕐᓂᕐᒧᑦ ᓵᓚᖃᓚᐅᕐᓗᓯ ᐱᖁᑎᑦ ᐱᔭᐅᔪᑦ ᐃᓕᑦᓯᓐᓄᑦ ᐊᒡᒍᕐᑕᐅᔪᒫᕐᒪᑕ.

² ᐃᓅᖃᑎᒌᒡᔪᐊᑦ ᑲᑎᑎᑦᓱᒫᕐᐸᒃᑲ ᐅᓇᑕᕆᐊᕐᑐᖁᓗᒋᑦ ᔨᕉᓴᓕᒥᒃ; ᓄᓇᓖᑦ ᓵᓚᒋᔭᐅᔪᒫᕐᐳᑦ, ᐃᒡᓗᐃᑦ ᐱᖁᑎᖏᑦ ᓱᕋᑦᑎᔭᐅᓗᑎᒃ ᑎᒡᓕᒐᕐᕕᐅᓗᑎᒡᓗ, ᐊᕐᓁᓪᓗ ᖁᓄᔪᕐᓂᐊᕐᑕᐅᓗᑎᒃ. ᓄᓇᓖᑦ ᐊᕝᕙᓪᓗᐊᖏᑦ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ, ᐃᓚᖏᓪᓕ ᐊᒥᐊᒃᑯᑦ ᐃᒡᓗᒐᓴᒡᔪᐊᕐᓃᖏᓐᓇᕈᒫᕐᐳᑦ.

³ ᐊᑕᓂᐅᓪᓕ ᐃᓅᖃᑎᒌᒡᔪᐊᑦ ᐅᓇᑕᕆᐊᕐᑐᕐᓯᒪᔪᑦ ᐅᓇᑕᕐᕕᒋᓕᕈᒫᕐᐰᑦ, ᐅᓇᑕᕐᓂᕐᒥ ᐅᓇᑕᐅᑦᔨᖃᑦᑕᕐᓯᒪᒐᒥ.

⁴ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᓇᖏᕈᒫᕐᐳᖅ ᐃᑎᒐᖏᑦ ᑐᖕᒪᕐᓗᑎᒃ ᖃᖅᑲᒥ ᐅᕐᓱᒃᓴᓕᖕᓂᒃ ᓇᐹᕐᑐᓕᖕᒥ, ᔨᕉᓴᓕᒥᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥ, ᖃᖅᑲᖅ ᐅᕐᓱᒃᓴᓕᖕᓂᒃ ᓇᐹᕐᑐᓕᒃ ᐊᕕᒍᒫᕐᐳᖅ ᒪᕐᕉᓕᓗᓂ ᓯᕿᓂᐅᑉ ᓄᐃᕕᐊᑕ ᓇᓛᓂᑦ, ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᓇᕐᓴᕐᔪᐊᖃᓕᕐᓗᓂ ᐊᑯᓐᓂᖓᓂ, ᖃᖅᑲᐅᑉ ᐊᕝᕙᖓ ᐅᓐᓄᐊᑉ ᓇᓛᓄᑦ ᐃᖏᕐᕋᓯᔪᒫᕐᐳᖅ, ᐊᕝᕙᖓᓗ ᓯᕿᓂᐅᑉ ᓇᓛᓄᑦ ᐃᖏᕐᕋᓯᓗᓂ.

⁵ ᐃᓕᑦᓯᓗ ᕿᒫᔪᒫᕐᐳᓯ ᖃᖅᑲᐅᑉ ᓇᕐᓴᕐᔪᐊᖓᒍᑦ, ᓇᕐᓴᔪᐊᖅ ᑎᑭᓯᒪᔪᒫᕐᒪᑦ ᐊᔨᐅᓪᒧᑦ: ᕿᒫᔪᒫᕐᐳᓯ ᕿᒫᓚᐅᕋᑦᓯᑐᑦ ᓄᓇ ᓴᔪᒃᐱᓗᒃᑎᓪᓗᒍ ᐊᖓᔪᖅᑳᕐᔪᐊᖅ ᐅᓮᐊ ᔫᑕᒥ ᐊᖓᔪᖅᑳᕐᔪᐊᖑᑎᓪᓗᒍ. ᐊᑕᓂᖅ ᑕᕝᕙ ᒎᑎᒐ ᑎᑭᑦᓱᒫᕐᐳᖅ, ᐃᑦᔪᕐᓁᑦᑐᖁᑎᓂ ᐃᓚᒋᓗᒋᑦ.

⁶ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᖃᐅᒪᔪᖃᕈᒫᓐᖏᓚᖅ, ᑖᕐᑐᖃᕈᒫᕋᓂᓗ.

⁷ ᐅᓪᓗᖅ ᑍᓐᓇ ᐊᑦᔨᐅᔪᒫᖏᒻᒪᑦ, ᐊᑕᓂᐅᑉ ᖃᐅᔨᒪᔪᒫᕐᐹ, ᑕᒪᓐᓇ ᓇᓪᓕᐅᑎᒃᐸᑦ ᐅᓪᓗᑐᑦ ᖃᐅᒪᓂᖃᕈᒫᓐᖏᓚᖅ ᐅᓐᓄᐊᑐᓪᓗ ᑖᕐᓂᖃᕈᒫᕋᓂ. ᑕᒪᓐᓇ ᓇᓪᓕᐅᑎᒃᐸᑦ ᐅᓐᓄᒃᐸᑦ ᖃᐅᒪᔪᒫᕆᕗᖅ.

⁸ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᒥᖅ ᐃᓅᓯᖃᕐᓇᕐᑐᒥᒃ ᐃᒪᓕᒃ, ᔨᕉᓴᓕᒥᑦ ᑰᓕᕈᒫᕐᐳᖅ, ᐊᕝᕙᖓ ᑰᒡᓗᓂ ᐃᒪᕐᔪᐊᕐᒧᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦᑐᒧᑦ, ᐊᕝᕙᖓᓗ ᑰᒡᓗᓂ ᐃᒪᕐᔪᐊᕐᒧᑦ ᐃᑎᕕᐊᓃᑦᑐᒧᑦ, ᑰᒍᒫᕐᐳᖅ ᐊᐅᔭᒃᑯᑦ ᐅᑭᐅᒥᓗ.

⁹ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᖅ ᐊᖓᔪᖅᑳᕐᔪᐊᖑᔪᒫᕐᐳᖅ ᓄᓇᕐᔪᐊᓕᒫᒧᑦ: ᑍᑦᓱᒪᓂᓗ ᐊᑕᓂᖃᕈᒫᕐᐳᖅ ᐊᑕᐅᓯᕐᒥᒃ, ᐊᑎᖓᓗ ᐃᑦᔪᕐᓁᑦᑑᓗᓂ.

¹⁰ ᓄᓇᓕᒫᖅ, ᒋᐸᒥᑦ ᕆᒪᓐ ᑎᑭᓪᓗᒍ, ᔨᕉᓴᓕᒥᑦ ᓯᕿᓂᐅᑉ ᓇᓛᓂᑦᑐᒧᑦ, ᑕᒪᓐᓇ ᓄᓇ ᒪᓂᕋᐅᓕᕈᒫᕐᐳᖅ. ᔨᕉᓴᓕᓕ ᐳᕐᑐᓯᒃᑲᓐᓂᕈᒫᕐᐳᖅ, ᐃᓂᒥᓃᓪᓗᓂ ᓱᓕ, ᐱᓐᔭᒥᓂᐅᑉ ᑭᖑᕚᖏᑕ ᐃᑎᕐᑕᕐᕕᖓᓂᑦ, ᐃᑎᕐᑕᕐᕕᒃ ᓯᕗᓪᓕᕐᐹᒥᒃ ᑍᔭᐅᔪᖅ ᑎᑭᓪᓗᒍ, ᖃᐅᔨᓴᕐᕕᖕᒥᑦ ᓇᐸᔪᒥᑦ ᕼᐊᓇᓂᐅᓪᒥᑦ ᐱᒋᐊᕐᓗᒍ ᐊᖓᔪᖅᑳᕐᔪᐊᑉ ᕔᓂᒃᓴᓕᐅᕐᕕᖓ ᑎᑭᓪᓗᒍ.

¹¹ ᑕᒪᓐᓇ ᐃᓄᖏᓐᓂᒃ ᐃᓄᖃᕈᒫᕐᐳᖅ, ᓱᕋᑦᑎᔭᐅᒃᑲᓐᓂᕐᓂᐊᕈᓐᓁᕐᓗᓂ; ᔨᕉᓴᓕᒥ ᑲᑉᐱᐊᓇᕐᑐᖃᒃᑲᓐᓂᕈᒫᓐᖏᓚᖅ.

¹² ᑕᕝᕙ ᔨᕉᓴᓕᒥᒃ ᐊᑭᕋᕐᑐᕋᓱᒃᑐᑦ ᓄᓇᐅᑉ ᐊᓯᖏᓐᓂᑦ ᐱᓯᒪᔪᑦ ᐊᑕᓂᐅᑉ ᐃᒫᒃ ᐋᓐᓂᐊᓇᕐᑐᖃᕐᑎᑦᓱᒫᕐᐰᑦ; ᐅᕕᓂᖏᑦ ᓄᖑᔪᒫᕐᐳᑦ ᓂᑯᕕᖓᑎᓪᓗᒋᑦ ᓱᓕ, ᐃᔨᖏᓪᓗ ᓄᖑᔪᒫᕐᐳᑦ ᐃᔨᓕᕐᕕᖏᓐᓂᑦ, ᐅᖃᖏᓪᓗ ᓄᖑᓪᓗᑎᒃ ᖃᓂᖏᓐᓂᑦ.

¹³ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᐅᑉ ᐃᓄᐃᑦ ᐊᖏᔪᒥᒃ ᐅᐃᒪᔮᕐᑎᑦᓱᒫᕐᐰᑦ; ᐃᓅᖃᑎᒥᖕᓂᒃ ᐊᒡᒐᖏᑎᒍᑦ ᑎᒍᓯᓗᑎᒃ, ᑐᖁᕋᐅᑎᓇᓱᐊᕈᒫᕐᐳᑦ.

¹⁴ ᔫᑕᒥᓗ ᓄᓇᖃᕐᑐᑦ ᔨᕉᓴᓕᒥᐅᓂᒃ ᑕᐱᖃᕈᒫᕐᐳᑦ ᐅᓇᑕᖃᑎᒌᒡᓗᑎᒃ; ᐃᓅᖃᑎᒌᒡᔪᐊᑦ ᔨᕉᓴᓕᐅᑉ ᓯᓚᑖᓃᑦᑐᑦ ᐊᔪᕐᓴᖏᑦᔪᑎᖏᑦ ᐃᒤᑦᑐᑦ ᑲᑎᕐᓱᕐᑕᐅᔪᒫᕐᐳᑦ; ᒎᓗᑦ ᓯᐅᓪᕕᕆᓪᓗ ᐊᖏᔪᐊᓗᐃᑦ, ᐊᓐᓄᕌᓪᓗ ᐅᓄᕐᑐᐊᓗᐃᑦ.

¹⁵ ᐊᑦᔨᐸᓗᐊᓂᒃᑕᐅᖅ ᕿᒻᒥᕐᔪᐊᑦ, ᓯᐅᑎᖅᑯᕐᑐᔪᓪᓗ ᕿᒻᒥᕐᔪᐊᓪᓗ ᕿᑐᕐᖓᖏᑦ ᐱᔭᐅᔪᒫᕆᕗᑦ, ᑳᒥᓖᓪᓗ ᓯᐅᑎᖁᕐᑐᔪᓪᓗ, ᓄᓇᓕᖕᓂᓗ ᐆᒪᔪᖁᑎᒋᔭᐅᔪᓕᒫᑦ.

¹⁶ ᔨᕉᓴᓕᒥᒡᓕ ᐅᓇᑕᕋᓱᐊᓚᐅᕐᑐᑦ ᐃᓅᖃᑎᒌᒡᔪᐊᓂᑦ ᐊᒥᐊᒃᑯᖏᑦ, ᐊᕐᕌᒍᑕᒫᑦ ᔨᕉᓴᓕᒧᑦ ᒪᔪᐊᖃᑦᑕᕈᒫᕐᐳᑦ ᐊᖓᔪᖅᑳᕐᔪᐊᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑐᒃᓯᐊᕐᕕᒋᔭᕐᑐᕐᓗᒍ, ᓇᓪᓕᐅᓐᓂᕐᓯᐅᕆᐊᕐᑐᕐᓗᑎᒃ ᓇᓪᓕᐅᓂᕐᒥᒃ ᑐᐱᕐᓯᒪᕕᖕᒥᒃ.

¹⁷ ᐃᓄᐃᑦ ᓄᓇᒦᑦᑐᑦ ᓇᓪᓕᐊᑐᐃᓐᓇᖅ ᔨᕉᓴᓕᒨᖏᑉᐸᑕ ᐊᖓᔪᖅᑳᕐᔪᐊᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑐᒃᓯᐊᕐᕕᒋᔭᕐᑐᕐᓗᒍ, ᕾᖏᑦᑐᑦ ᓯᓚᓗᒡᕕᐅᖃᑦᑕᕈᒫᓐᖏᓚᑦ.

¹⁸ ᐄᑦᔨᑉᑎᒥᐅᑦ ᓇᓪᓕᐅᓐᓂᕐᓯᐅᕆᐊᑐᖏᑉᐸᑕ, ᑖᒃᑯᐊ ᓯᓚᓗᒡᕕᐅᓂᐊᓐᖏᓚᑦ. ᐊᑕᓂᐅᑉ ᐋᓐᓂᐊᓇᕐᑐᒥᒃ ᑎᑭᕝᕕᐅᑎᑦᓱᒫᐰᑦ ᐃᓅᖃᑎᒌᒡᔪᐊᑦ ᓇᓪᓕᐅᓐᓂᕐᓯᐅᕆᐊᖏᑦᑐᑦ ᓇᓪᓕᐅᓐᓂᕐᒥᒃ ᑐᐱᕐᓯᒪᕕᖕᒥᒃ ᐋᓐᓂᐊᕐᑎᑕᐅᑦᔪᓯᖏᑎᑐᑦ.

¹⁹ ᑕᒪᓐᓇ ᓱᒋᐊᕐᑕᐅᓂᐅᔪᒫᕐᐳᖅ ᐄᑦᔨᑉᑎᒥᐅᓄᑦ ᐃᓅᖃᑎᒌᒡᔪᐊᓄᓪᓗ ᐊᓯᖏᓐᓄᑦ ᓇᓪᓕᐅᓐᓂᕐᒥ ᑐᐱᕐᓯᒪᕕᖕᒥᒃ ᓇᓪᓕᐅᓐᓂᕐᓯᐅᕆᐊᖏᑦᑐᓄᑦ.

²⁰ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᒻᒥᕐᔪᐊᑦ ᓯᕙᓂᐅᑎᖏᓐᓂ ᑎᑎᕋᕐᓯᒪᔪᒫᕐᐳᑦ ᐃᒫᒃ, “ᐊᑕᓂᖅ ᐃᑦᔪᕐᓁᐳᖅ.” ᓂᕿᓕᐅᕈᑎᓕᒫᓪᓗ ᐊᑕᓂᐅᑉ ᐃᒡᓗᖓᓃᑐᑦ ᐅᐊᓴᕐᕖᑦ ᑐᓂᕐᕈᓯᕐᕕᐅᑉ ᓵᖓᓃᑦᑐᑦ ᐃᑦᔪᕐᓁᖃᑕᐅᔪᒫᕐᐳᑦ.

²¹ ᖃᑦᑍᑦ ᓂᕿᓕᐅᕈᑎᓕᒫᑦ ᔨᕉᓴᓕᒥ ᔫᑕᒥᓗ ᐃᑦᔪᕐᓁᑦᑑᔪᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓄᑦ, ᑐᓂᕐᕈᓯᕆᐊᕐᑐᕐᑐᓕᒫᑦ ᖃᑦᑕᕐᓂᑦ ᑖᒃᑯᓇᓂ ᓂᕿᓕᐅᕈᒫᕐᐳᑦ, ᐅᓪᓗᓂ ᑍᒃᑯᓇᓂ ᓂᐅᕕᕋᓱᐊᕐᑐᖃᕈᓐᓁᕈᒫᕐᐳᖅ ᐊᑕᓂᐅᑉ ᐃᒡᓗᖓᓂ.