ᓴᑲᕅᐊᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᒪᑐᐃᕐᓯᔪᖃᕈᒫᕐᐳᖅ ᐃᒥᕐᒥᒃ ᐳᐊᓚᔪᒥᒃ ᑍᕕᑎᐅᑉ ᑭᖑᕚᖏᓐᓄᑦ, ᔨᕉᓴᓕᒥᓗ ᓄᓇᖃᕐᑐᓕᒫᓄᑦ, ᑖᒃᑯᐊ ᐊᔪᕐᓂᖏᑕ ᓴᓗᒤᑦᑐᓪᓗ ᓴᓗᒻᒪᕐᓴᕐᑕᐅᕕᒃᓴᖓᓂᒃ.

² ᐅᓪᓗᖅ ᓇᓪᓕᐅᑎᒃᐸᑦ ᐱᔪᖃᕈᒫᕐᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, ᒎᑎᓐᖑᐊᑦ ᐊᑎᖏᑦ ᓄᖑᑎᑦᓱᒫᕐᐸᒃᑲ ᑕᒫᖓᑦ ᓄᓇᒥᑦ, ᐃᖅᑲᕐᑕᐅᖃᑦᑕᕈᓐᓁᕈᒫᕐᐳᓪᓗ, ᓇᓚᐅᑦᑍᔪᑦ ᓄᓇᒥᑦ ᓄᖅᑲᕐᑎᑦᓱᒫᕐᐸᒃᑲ ᐊᓂᕐᓃᓪᓗ ᐱᐅᖏᑦᑐᑦ ᓄᓇᒥᑦ ᐊᐅᓪᓚᕐᑎᑦᓱᒫᕐᐸᒃᑲ.

³ ᐃᒫ ᐱᔪᖃᕈᒫᕐᐳᖅ, ᓇᓚᐅᑦᑍᔪᖃᒃᑲᓐᓂᕋᓱᐊᕐᐸᑦ, ᓇᖕᒥᓂᖅ ᐊᑖᑕᖓᑕ ᐊᓈᓇᖓᑕᓗ ᐊᓂᕕᒋᓚᐅᕐᑕᖏᑕ ᐅᖃᐅᑎᔪᒫᕐᐹ, ‘ᐆᒪᔭᕆᐊᖃᓐᖏᓚᑎᑦ, ᐊᑕᓂᐅᑉ ᐊᑎᖓᓂ ᓱᓕᖏᑦᑐᓂᒃ ᐅᖃᐅᓯᖃᕋᕕᑦ’; ᐊᖓᔪᖅᑳᖏᒃᑕᓗ ᑲᐱᔪᒫᕐᐹ ᓇᓚᐅᑦᑍᑎᓪᓗᒍ.

⁴ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᓇᓚᐅᑦᑍᔨᓕᒫᑦ ᑲᓐᖑᓲᑎᖃᓕᕈᒫᕐᐳᑦ ᓇᓚᐅᑦᑍᓂᒃᑯᑦ ᑕᑯᓯᒪᔭᒥᖕᓂᒃ. ᓇᓚᐅᑦᑍᔩᓪᓗ ᐊᓐᓄᕌᖏᓐᓂᒃ ᐆᒪᔪᐃᑦ ᒥᖁᖏᓐᓂᒃ ᓂᕈᒥᖏᑦᑐᓂᒃ ᐊᑐᕈᒪᔪᓐᓁᕈᒫᕐᐳᑦ, ᐅᐃᕕᕆᒃᓯᑦᔪᑎᒥᖕᓂᒃ.

⁵ ᐃᒫᒃ ᐅᖃᖃᑦᑕᓕᕐᓗᑎᒃ, ‘ᓇᓚᐅᑦᑍᔨᐅᓐᖏᓚᖓ, ᓄᓇᒥᒃ ᐱᕈᕐᓰᕕᓕᕆᔨᐅᕗᖓ; ᓄᓇ ᐃᓅᓱᖕᓂᓐᓂᑦ ᑍᒪᓐᖓᑦ ᐃᓅᓇᓱᐊᕈᑎᒋᕙᕋ.’

⁶ ᐊᐱᕆᔭᐅᒍᓂᓗ ᐃᒫᒃ, ‘ᓱᔪᓄᒃᑯᐊ ᕿᓕᕈᐃᑦ ᐊᒡᒐᖕᓂ?’ ᑖᓐᓇᓗ ᑭᐅᒐᔭᕐᐳᖅ, ‘ᐃᓚᓐᓇᕆᔭᒪ ᐃᒡᓗᖓᓂ ᑭᓪᓕᐊᔭᐅᓚᐅᕐᑐᑦ.’”

ᒎᑎᐅᑉ ᓰᐱᓕᕆᔨᖁᑎᖓᓂᒃ ᑐᖁᑦᓯᖁᔨᓂᖅ

⁷ “ᑐᐸᓕᕆᑦ, ᓴᕕᒡᔪᐊᖅ, ᐱᒋᐊᕐᓗᒍᓗ ᓰᐱᓕᕆᔨᖁᑎᒐ, ᐊᖑᑦ ᐱᓇᓱᐊᖃᑎᒐ!” ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ: “ᓰᐱᓕᕆᔨ ᑲᐱᓕᕈᒃ, ᓰᐲᑦ ᑕᕝᕙ ᓯᐊᒻᒪᖕᓂᐊᕐᐳᑦ, ᓰᐱᑯᓗᐃᓪᓗ ᓱᒋᐊᕈᒪᕙᒃᑲ.

⁸ ᓄᓇᒥ ᑕᒫᓂ ᓄᓇᖃᕐᑐᓕᒫᑦ, ᐊᑕᓂᖅ ᐅᖃᕐᐳᖅ, ᐱᖓᓱᐃᓕᓗᒋᑦ, ᒪᕐᕉᒃ ᐊᓇᐅᔭᐅᕘᒃ ᑐᖁᓪᓗᑎᒡᓗ; ᐱᖓᔪᖓᓪᓕ ᐊᒥᐊᒃᑰᔪᒫᕐᐳᖅ.

⁹ ᑖᒃᑯᐊ ᐱᖓᔪᖏᑦ ᐃᑯᒪᒃᑰᕐᑎᓱᒪᕙᒃᑲ, ᓯᐅᓪᕕᕆᑎᑐᓪᓗ ᐊᐅᒃᑎᓪᓗᒋᑦ ᓴᓗᒻᒪᕐᓴᕈᒪᕙᒃᑲ, ᐆᒃᑐᕐᓗᒋᓪᓗ ᒎᓗᐃᑦ ᐆᒃᑐᕐᑕᐅᑦᔪᓯᖏᑎᑐᑦ: ᐊᑎᓐᓄᓪᓗ ᓂᓪᓕᐊᔪᒫᕐᐳᑦ ᑭᐅᔪᒫᕐᐸᒃᑲᓗ, ᐅᖃᓕᕐᓗᖓᓗ, ‘ᐅᑯᐊ ᑕᕝᕙ ᐃᓄᖁᑎᒃᑲ,’ ᑖᒃᑯᐊᓗ ᐅᖃᓕᕐᓗᑎᒃ, ‘ᐊᑕᓂᖅ ᒎᑎᒋᕙᕗᑦ.’”