ᓴᑲᕅᐊᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐃᓄᖁᑎᒥᓂᒃ ᕾᖁᔨᓂᖓ ᐃᒻᒥᓄᑦ ᐅᑎᖁᓪᓗᒋᑦ

¹ ᑍᕉᓯ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒎᖕᓂᒃ ᒪᕐᕉᖕᓂᒃ, ᑕᖅᑭᓂᒡᓗ ᓯᑕᒪᐅᔪᕐᑐᓂᒃ, ᐊᑕᓂᖅ ᐅᖃᕐᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᒍᑦ ᓴᑲᕅᐊᒃᑯᑦ ᐱᕆᑬᐊᐅᑉ ᐃᕐᓂᖓᒍᑦ, ᐃᑑᑉ ᐃᕐᖑᑕᖓᒍᑦ, ᐅᖃᕐᓗᓂ,

² ᐊᑕᓂᖅ ᓯᕗᓕᕕᓂᑦᓯᓐᓄᑦ ᓂᓐᖓᐅᒪᕕᒡᔪᐊᓚᐅᕐᐳᖅ.

³ ᑕᒪᓐᓇ ᐱᓪᓗᒍ ᐃᓄᐃᑦ ᐅᖃᐅᑎᒃᑭᑦ ᐃᒫᒃ: “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ; ᐅᕙᓐᓄᑦ ᐅᑎᓕᕆᑦᓯ, ᑕᕝᕙ ᐃᓕᑦᓯᓐᓄᑦ ᐅᑎᕐᓂᐊᕆᕗᖓ.” ᑍᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ,

⁴ “ᓯᕗᓕᕕᓂᑦᓯᑐᑦ ᐱᖁᓐᖏᓚᑦᓯ, ᑍᒃᑯᐊ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᓐᓄᑦ ᐅᖃᕐᕕᐅᕙᓚᐅᕐᐳᑦ ᐃᒫᒃ, ‘ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᐊᑐᕐᓂᕐᓗᒃᑕᑦᓯᓐᓂᑦ ᖃᕿᐊᓕᕆᑦᓯ ᐱᐅᖏᑦᑐᓕᓂᕆᕙᒃᑕᑦᓯᓐᓂᓪᓗ.’ ᑍᒫᒃ ᑐᓴᕋᓗᐊᕋᒥᒃ ᓈᓚᓚᐅᓐᖏᓚᑦ ᒪᓕᒍᒪᓚᐅᓐᖏᓚᓪᓘᓐᓃᑦ.

⁵ ᓇᐅᒡᓕ ᑍᒪ ᓯᕗᓕᕕᓂᕐᓯ? ᓇᐅᒡᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᕕᓂᖏ? ᑍᒃᑯᐊ ᐃᓱᖃᖏᑦᑐᒧᑦ ᐃᓅᕚᑦ?

⁶ ᐱᔨᒋᔭᒃᑯᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑎᒍᑦ, ᐅᖃᐅᑎᕙᓚᐅᕐᐸᒃᑲ, ᒪᓕᒐᒃᓴᓂᒃ ᐃᓂᕐᑎᕆᑦᔪᑎᓂᒡᓗ, ᑭᓯᐊᓂᓕ ᓈᓚᒍᒪᓚᐅᓐᖏᓚᑦ ᑍᒤᒻᒪᑦ ᐊᒃᓱᕈᕐᓇᕐᑐᒧᑦ ᑎᑭᖃᑦᑕᓚᐅᕐᐳᑦ, ᑭᖑᓂᖓᒍᓪᓕ ᖃᕿᐊᓕᓚᐅᕐᐳᑦ ᐅᖃᓕᕐᓗᑎᒡᓗ ᐃᒫᒃ: ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᓱᒋᐊᓚᐅᕐᐹᑎᒍᑦ ᓱᒋᐊᕐᑕᐅᔭᕆᐊᖃᕐᓂᕗᑦ ᒪᓕᒡᓗᒋᑦ, ᑍᒫᒃ ᐱᓂᐊᕐᓂᕋᕐᓗᓂ ᐅᖃᕐᓯᒪᒐᒥ.”

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑕᑯᑎᑕᐅᓂᖓ ᕿᒧᒃᓯᐅᑎᒥᒃ

⁷ ᑍᕉᓯᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖓᑕ ᐂᑉᐸᖓᓂ, ᑕᕿᖓᑕᓗ 11ᖓᓂ, (ᑕᖅᑭᖅ ᓯᐹᑎᒥᒃ ᑍᔭᐅᔪᖅ) ᐅᓪᓗᖓᑕᓗ 24ᖓᓂ, ᐊᑕᓂᖅ ᐅᖃᕐᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᒍᑦ ᓴᑲᕅᐊᒃᑯᑦ, ᐱᕆᑬᐊᐅᑉ ᐃᕐᓂᖓᒍᑦ ᐃᑑᓪᓗ ᐃᕐᖑᑕᖓᒍᑦ.

⁸ ᐅᓐᓄᐊᒃᑯᑦ ᑕᑯᑎᑕᐅᓪᓗᖓ, ᑕᑯᕗᖓ ᐂᖏᓕᒥᒃ ᕿᒻᒥᕐᔪᐊᒥ ᐊᐅᐸᕐᑐᒥ ᐃᑭᒪᔪᒥᒃ, ᓄᖅᑲᖓᓪᓗᓂᓗ ᓇᐹᕐᑐᐃᑦ ᒨᕐᑐᓂᒃ ᐊᑎᖃᕐᑐᑦ ᓇᕐᓴᒦᑐᑦ ᐊᑯᓐᓂᖓᓐᓂ, ᑐᓄᐊᓃᑦᑐᖃᕆᕗᖅ ᕿᒻᒥᕐᔪᐊᓂᒃ ᐊᓯᖏᓐᓂᒃ, ᕿᒻᒥᕐᔪᐊᓂᒃ ᐊᐅᐸᕐᑐᓂᒃ, ᕿᒻᒥᕐᔪᐊᓂᒡᓗ ᖁᑦᔪᕐᓂᒃ, ᕿᒻᒥᕐᔪᐊᓂᒡᓗ ᐅᑭᓕᕆᐊᓂᒃ.

⁹ ᐊᐱᕆᕗᖓᓗ, “ᐊᑕᓃᖅ, ᓱᓁᓄᑯᐊ?” ᐂᖏᓪᓕᐅᑉᓗ ᐅᖃᓪᓚᖃᑎᒋᔭᒪ ᑭᐅᕚᖓ “ᓱᓇᒥᒃ ᑐᑭᖃᕐᒪᖔᑕ ᖃᐅᔨᑎᓐᓂᐊᕐᐸᒋᑦ.”

¹⁰ ᐊᖑᓪᓗ ᓇᐹᕐᑐᑦ ᒨᕐᑐᐃᑦ ᐊᑯᓐᓂᖓᓃᑦᑐᖅ ᐃᒫᒃ ᓇᓗᓁᕐᓯᕗᖅ “ᐅᑯᐊ ᐊᑕᓂᐅᑉ ᓄᓇᕐᔪᐊᓕᒫᒧᑦ ᑎᓕᓯᒪᔭᖏᑦ ᖃᐅᔨᓴᕆᐊᕐᑐᖁᓪᓗᒋᑦ.”

¹¹ ᑖᒃᑯᐊᓗ ᕿᒻᒥᕐᔪᐊᒦᑦᑐᑦ ᐅᓂᒃᑳᕐᐳᑦ ᐊᑕᓂᐅᑉ ᐂᖏᓕᖓᓄᑦ, ᓇᐹᕐᑐᑦ ᒨᕐᑐᓂᒃ ᑍᔭᐅᔪᑦ ᐊᑯᓐᓂᖓᓃᑦᑐᒧᑦ, ᐅᖃᕐᓗᑎᒃ, “ᓄᓇᕐᔪᐊᕐᒥᒃ ᓈᔧᔭᕇᕐᐳᒍᑦ, ᖃᐅᔨᓪᓗᑕᓗ ᓄᓇᕐᔪᐊᕐᒥᐅᑦ ᓄᖅᑲᖓᖕᒪᑕ ᓮᓕᑦᓯᐊᕐᒪᑕᓗ.”

¹² ᐊᑕᓂᐅᑉ ᐂᖏᓕᖓ ᐅᖃᕐᐳᖅ, “ᐊᔪᒐᖃᖏᑦᑐᑎᑦ ᐊᑕᓃᖅ, ᖃᓄᖅ ᐊᑯᓂᐅᑎᒋᔪᒥᒃ? ᓂᑲᒍᓱᖕᓂᐊᓐᖏᓚᑎ ᔨᕉᓴᓕᒻᒥᒃ, ᔫᑕᒥᓗ ᓄᓇᖃᕐᑐᓂᒃ, ᑖᒃᑯᐊ ᐊᕐᕌᒍᓂᒃ 70ᓂᒃ ᓂᓐᖓᒡᕕᒋᓯᒪᒐᕕᒋᑦ.”

¹³ ᑍᒤᒻᒪᑦ ᐊᑕᓂᖅ ᐅᖃᕐᐳᖅ ᐂᖏᓕᒧᑦ ᐅᖃᖃᑎᒋᔭᓐᓄᑦ, ᐱᑦᓯᐊᕐᑐᓂᒃ ᓮᒪᓇᕐᑐᓂᒡᓗ ᐅᖃᐅᓯᖃᕐᓗᓂ.

¹⁴ ᐂᖏᓕᓗ ᐅᕙᓐᓂᒃ ᐅᖃᖃᑎᖃᕐᑐᖅ ᐃᒫᒃ ᐅᖃᕐᐳᖅ, “ᐃᒫᒃ ᓂᓪᓕᐊᑦᔪᑎᖃᕆᑦ: ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ‘ᔨᕉᓴᓕᒻ ᓮᐅᓂᓗ ᐊᒃᓱᐊᓗᒃ ᓯᖕᓇᒋᕚᒃᑲᒃ.

¹⁵ ᐊᒃᓱᒻᒪᕆᐊᓗᒃ ᓂᓐᖓᐅᒪᕕᖃᕐᐳᖓ ᐃᓅᖃᑎᒌᒡᔪᐊᓂᒃ ᓄᓇᓂ ᓮᓕᓇᕐᑐᒦᑦᑐᓂᒃ. ᓂᓐᖓᐅᒪᓗᐊᓚᐅᓐᖏᒃᑲᓗᐊᕐᐳᖓ ᐃᓄᖁᑎᓐᓄᑦ, ᔫᑎᐅᖏᑦᑐᓪᓕ ᐅᖁᒤᒃᓴᕐᑎᑦᓯᕙᓪᓕᐊᓚᐅᕐᐳᑦ ᑖᒃᑯᓂᖓ.

¹⁶ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑍᒤᒻᒪᑦ ᔨᕉᓴᓕᒧᑦ ᐅᑎᓕᕐᐳᖓ ᑕᕝᕙᓂ ᓄᓇᖃᕐᑐᑦ ᓂᑲᒍᓱᖕᓂᓐᓂᒃ ᑕᑯᖁᓪᓗᒋᑦ, ᑐᒃᓯᐊᕐᕕᒡᔪᐊᖁᑎᒐ ᓴᓇᔭᐅᒃᑲᓐᓂᕐᓂᐊᕐᐳᖅ ᐃᒡᓗᒐᓴᒡᔪᐊᓪᓗ ᓴᓇᔭᐅᖕᒥᓗᑎᒃ.

¹⁷ “‘ᐂᖏᓕᐅᓪᓗ ᑖᑦᓱᒪ ᐅᖃᐅᑎᕚᖓ ᐅᖃᖁᓪᓗᖓ ᐃᒫᒃ: ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᐊᑕᓂᐅᑉ ᐃᒡᓗᒐᓴᒡᔪᐊᖁᑎᖓ ᐊᔪᕐᓴᕈᓐᓁᕈᒫᕆᕗᖅ ᐊᑕᓂᐅᓪᓗ ᓮᐅᓂ ᓮᒻᒪᕐᑎᓕᕈᒫᕆᕚ ᔨᕉᓴᓕᒻᓗ ᓇᖕᒥᓂᕆᓂᕋᓕᕐᓗᓂᒋᑦ.’”

ᓇᒡᔪᖕᓂᒃ ᑕᑯᑎᑕᐅᓂᖅ ᖃᓄᖅ ᑐᑭᖃᕐᒪᖔᑦ

¹⁸ ᖁᒻᒧᑦ ᑕᑯᓴᕋᒪ ᑕᑯᕗᖓ ᓇᒡᔪᖕᓂᒃ ᓯᑕᒪᓂᒃ.

¹⁹ ᐊᐱᕆᕗᖓᓗ ᐂᖏᓕᒧᑦ ᐅᖃᓪᓚᒡᕕᒋᔨᓐᓄᑦ, “ᐅᑯᐊ ᓇᒡᔪᐃᑦ ᓱᓇᒥᒃ ᑐᑭᖃᕐᐸᑦ?” ᑖᓐᓇᓗ ᑭᐅᕗᖅ, “ᐅᑯᐊ ᑐᑭᖃᕐᑐᑦ ᓯᓚᕐᔪᐊᕐᒥᐅᑦ ᐱᔪᓐᓇᕐᓂᖏᓐᓂᒃ, ᓯᐊᒻᒪᒃᑎᑦᓯᓯᒪᓂᖏᓐᓂᒡᓗ ᐃᓄᖕᓂᒃ ᔫᑕᒥ ᓄᓇᖃᕐᑐᓂᒃ, ᐃᓴᕆᐊᓕᒥᓗ ᓄᓇᖃᕐᑐᓂᒃ, ᔨᕉᓴᓕᒥᐅᓂᒡᓗ.”

²⁰ ᐊᒻᒪ ᓱᓕ ᐊᑕᓂᐅᑉ ᑕᑯᑎᒃᑭᕚᖓ ᓯᑕᒪᓂᒃ ᐃᒡᓗᓕᐅᕐᑎᓂᒃ.

²¹ ᐊᐱᕆᕗᖓᓗ, “ᐊᖑᑎᑦ ᐅᑯᐊ ᓱᓇᒥ ᑕᒪᐅᖓ ᓴᓇᔭᕐᑐᕐᓯᒪᕙᑦ?” ᑭᐅᕚᖓ, “ᐅᑯᐊ ᑕᕝᕙ ᑲᑉᐱᐊᓱᒃᑎᑦᓯᔭᕐᑐᕐᑐᑦ ᓵᓚᖃᕆᐊᑐᕐᓗᑎᒡᓗ ᐃᓅᖃᑎᒌᒡᔪᐊᓂᒃ ᓵᓚᖃᕐᓯᒪᔪᓂᒃ ᓯᐊᒻᒪᒃᑎᑦᓯᓯᒪᔪᓂᒃ ᔫᑕᒥ ᓄᓇᖃᕐᑐᓂᒃ.”