ᑍᑑᓯᒧᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᒃᐱᕐᓂᐅᑉ ᑐᓐᖓᕕᖏᑦ ᓱᓕᔪᑦ

¹ ᐃᕝᕕᓪᓕ ᐊᔪᕆᕐᑐᐃᖃᑦᑕᕆᐊᖅᑲᕐᐳᑎᑦ ᓇᓛᒍᑦ.

² ᐃᒃᓇᐅᓂᕐᓴᐅᓕᕐᑐᑦ ᐅᑦᔨᕈᓱᑦᓯᐊᖁᓗᒋᑦ ᐊᔪᕆᕐᑐᒃᑭᑦ, ᐅᐱᓐᓇᕐᑑᑦᓯᐊᕐᓗᑎᒃ, ᐃᒻᒥᖕᓂᒃ ᐱᓯᒪᑦᓯᐊᕈᓐᓇᕐᓗᑎᒃ, ᐅᒃᐱᕐᓂᕐᒦᑦᓯᐊᕐᓗᑎᒃ, ᓇᒡᓕᖕᓂᖃᕐᓗᑎᒃ, ᕿᓄᐃᓵᕐᓂᖃᑦᓯᐊᕐᓗᑎᒡᓗ ᐱᖁᓪᓗᒋᑦ.

³ ᑍᒫᒃᑕᐅᖅ ᐊᕐᓁᑦ ᐃᓐᓇᐅᓂᕐᓮᑦ ᐊᔪᕆᕐᑐᒃᑭᑦ ᐃᑦᔪᕐᓁᑦᑐᒥᒃ ᐃᓅᓯᖃᖁᓗᒋᑦ, ᓱᓕᖏᑦᑐᒥᒃ ᐃᓅᖃᑎᒥᖕᓂᒃ ᐅᖃᐅᓯᖃᖃᑦᑕᖁᓇᒋᑦ ᐃᒥᐊᓗᐃᓐᓇᖁᓇᒋᓪᓗ; ᐱᐅᔪᒥᒡᓕ ᐊᔪᕆᕐᑐᐃᖁᓗᒋᑦ.

⁴ ᐊᕐᓇᓂᒡᓗ ᐃᓅᓱᖕᓂᕐᓴᐅᔪᓂᒃ ᐊᔪᕆᕐᑐᐃᖁᓪᓗᒋᑦ ᐅᐃᒥᖕᓂᒃ ᓇᒡᓕᒍᓱᑦᓯᐊᖁᓪᓗᒋᑦ ᕿᑐᕐᖓᒥᖕᓂᒡᓗ.

⁵ ᐃᒻᒥᖕᓂᒃ ᐱᓯᒪᑦᓯᐊᕈᓐᓇᕐᓗᑎᒃ, ᐃᑦᔪᕐᓁᓪᓗᑎᒃ, ᐃᒡᓗᒥᐅᖃᑎᒥᖕᓂᒃ ᑲᒪᑦᓯᐊᕐᓗᑎᒃ, ᐱᑦᓯᐊᕐᓗᑎᒃ, ᐃᒻᒥᖕᓂᒡᓗ ᑐᓂᓯᒪᑦᓯᐊᖁᓪᓗᒋᑦ ᐅᐃᒥᖕᓄᑦ, ᒎᑎᐅᑉ ᐅᖃᐅᓯᖏᑦ ᐅᖃᕐᓂᕐᓘᑕᐅᖁᓇᒋᑦ.

⁶ ᑍᒫᒃᑕᐅᖅ ᐊᖑᑏᑦ ᐃᓅᓱᒃᑐᑦ ᐊᔪᕆᕐᑐᒃᑭᑦ ᐃᒻᒥᖕᓂᒃ ᐱᓯᒪᑦᓯᐊᕈᓐᓇᖁᓗᒋᑦ.

⁷ ᐃᕝᕕᓪᓕ ᓇᖕᒥᓂᖅ ᑖᒃᑯᓄᖓᓕᒫᖅ ᒪᓕᒐᒃᓴᑦᓯᐊᖑᔪᒃᓴᐅᕗᑎᑦ ᐃᓅᑦᓯᐊᕐᓂᒃᑯᑦ, ᐊᔪᕆᕐᑐᐃᓕᕌᖓᕕᑦ ᓱᓕᑦᓯᐊᕐᓗᑎᑦ ᐱᓪᓚᕆᒃᑐᒥᒃ ᐊᔪᕆᕐᑐᐃᖃᑦᑕᕐᓗᑎᑦ,

⁸ ᐅᖃᐅᓯᕐᓂᒃ ᓱᓕᔪᓂᒃ ᐊᑐᖃᑦᑕᕐᓗᑎᑦ ᐊᑭᕋᕐᑐᕐᑕᐅᔪᓐᓇᖏᑦᑐᓂᒃ, ᐊᑭᕋᕐᑐᕐᑎᑎᑦ ᑲᓐᖑᓱᒃᑎᑕᐅᖁᓪᓗᒋᑦ, ᐱᑦᔪᑎᒃᓴᖃᖁᓇᒋᓪᓗ ᐅᖃᐅᓯᕆᓂᕐᓗᒡᓗᑕ.

⁹ ᐱᔩᑦ ᐃᒻᒥᖕᓂᒃ ᑐᓂᓯᒪᑦᓯᐊᕆᐊᖃᕐᐳᑦ ᐊᖓᔪᖅᑳᒥᖕᓄᑦ ᓈᓚᑦᓯᐊᕐᓗᑎᒃ ᖁᕕᐊᒋᔭᖏᓐᓂᒡᓗ ᐱᓇᓱᐊᑦᓯᐊᕐᓗᑎᒃ; ᐊᖓᔪᖅᑳᒥᖕᓂᒃ ᑭᐅᓗᒃᑍᓕᓗᑎᒃ.

¹⁰ ᑎᒡᓕᒐᕐᕕᖃᖏᓪᓗᑎᒡᓗ, ᓴᖅᑭᑎᑦᓯᖔᕐᑐᒃᓴᐅᕗᓪᓕ ᐱᓂᐊᑦᓯᐊᕐᓂᕐᒥᒃ ᑲᔪᓯᑦᓯᐊᕐᓂᕐᒥᒡᓗ, ᒎᑎᐅᑉ ᐱᐅᓕᔨᑦᑕ ᐊᔪᕆᕐᑑᑖᓂᒃ ᓂᕐᑐᕐᓇᕐᑎᑦᓯᖁᓪᓗᒋᑦ ᖃᓄᓕᒫᖅ ᐱᓂᐊᕐᓂᕐᒥᒃᑎᒍᑦ.

¹¹ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᓂ ᓴᖅᑭᑎᓯᒪᖕᒪᒍ ᐃᓄᓕᒫᑦ ᐱᐅᓕᔭᐅᖁᓪᓗᒋᑦ.

¹² ᑖᑦᓱᒪ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᒥᒍᑦ ᐃᓕᓐᓂᐊᕐᑎᑉᐹᑎᒍᑦ ᕿᒤᖁᓪᓗᑕ ᒎᑎᖃᖏᑦᑐᑦ ᐃᓕᖅᑯᓯᖏᓐᓂᒃ ᓯᓚᕐᔪᐊᕐᒥᐅᓪᓗ ᐃᒃᖠᒎᕐᓂᖏᓐᓂᒃ, ᐃᓅᖁᓪᓗᑕᓗ ᐅᕙᑦᑎᓐᓂᒃ ᐱᓯᒪᑦᓯᐊᕈᓐᓇᕐᓗᑕ, ᐃᓅᑦᓯᐊᕐᓗᑕᓗ, ᒎᑎᒥᒡᓗ ᒪᓕᑦᓯᐊᕐᓗᑕ ᐃᓅᖁᓪᓗᑕ ᑕᒫᓂ ᓯᓚᕐᔪᐊᕐᒦᑎᓪᓗᑕ,

¹³ ᓂᕆᐅᒋᔭᒃᓴᕗᑦ ᐅᓪᓗᖅ ᐱᕕᐊᕐᓇᕐᑐᕐᔪᐊᖅ ᐅᑕᖅᑭᓗᒍ, ᒎᑎᐅᑉ ᐊᖏᓂᕐᐹᖑᔫᑉ ᐱᐅᓕᔨᑦᑕᓗ ᔩᓱᓯ ᙭ᔅᑑᓯᐅᑉ ᓂᕐᑐᕐᓇᕐᓂᕐᔪᐊᖓ ᓴᖅᑭᑦᓯᐊᕆᓗᒍ.

¹⁴ ᑖᓐᓇ ᐃᒻᒥᓂᒃ ᑐᓂᓚᐅᕐᒪᑦ ᐅᕙᑦᑎᓐᓄᑦ ᐱᐅᓕᔪᒪᓪᓗᑕ ᐱᐅᖏᑦᑐᓂᑦ ᑕᒤᓐᓂᑦ ᐃᑦᔪᕐᓁᑦᑐᓐᖑᕐᑎᑦᓱᒪᓪᓗᑕᓗ ᓇᖕᒥᓂᖅ ᐃᓄᖁᑎᑖᕆᓗᓂᑎᒍᑦ ᐱᐅᔪᒥᒃ ᐃᓅᓯᖃᕈᒪᑦᓯᐊᖁᓪᓗᑕ.

¹⁵ ᑕᒪᒃᑯᓂᖓ ᐊᔪᕆᕐᑐᐃᒋᑦ; ᑲᔪᖏᕐᓮᓗᑎᒃ ᐃᓂᕐᑎᕆᓗᑎᓪᓗ ᐱᔪᓐᓇᕐᑎᑕᐅᓂᕆᔧᑦ ᐊᑐᕐᓗᒍ. ᑭᓇᒧᓪᓘᓐᓃᑦ ᓇᕐᕈᒋᔭᐅᑦᑍᓕᓗᑎᑦ.