ᑍᑑᓯᒧᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒋᐊᕈᑎᖏᑦ

¹ ᐸᐅᓗᓯᒥᑦ, ᒎᑎᐅᑉ ᐱᔨᖓᓂᑦ ᔩᓱᓯᐅᓪᓗ ᙭ᔅᑑᓯᐅᑉ ᐋᐴᓯᑕᓕᖓᓂᑦ, ᒎᑎᐅᑉ ᓂᕈᐊᕐᓯᒪᔭᖏᓐᓄᑦ ᓱᓕᔪᒥᒡᓗ ᖃᐅᔨᓯᒪᔪᓄᑦ ᐊᑕᐅᓯᐅᓕᖓᑎᑦᓯᔪᒧᑦ ᐅᒃᐱᕐᓂᑦᑎᓐᓄᓪᓗ.

² ᑕᒪᓐᓇ ᑐᓐᖓᕕᖃᕐᑐᖅ ᓂᕆᐅᒋᔭᒃᓴᖃᕐᑎᑎᓗᓂ ᐃᓅᓯᕐᒥᒃ ᓄᖑᓱᐃᑦᑐᒥᒃ; ᒎᑎᐅᑉ ᓴᒡᓗᓚᐅᕐᓯᒪᖏᑦᑑᑉ, ᐊᖏᕐᕕᒋᓯᒪᕚᑎᒍᑦ ᑕᒪᑐᒥᖓ ᓯᓚᕐᔪᐊᖅ ᐱᒋᐊᓚᐅᖅᑳᕐᑎᓐᓇᒍ,

³ ᓇᓪᓕᐅᓐᓂᕐᒥᓗ ᓈᒻᒪᓈᑦᓯᐊᓕᕐᑎᓪᓗᒍ ᓇᓗᓁᓚᐅᕐᐹ ᐅᖃᐅᓯᕐᒥᒍᑦ ᑕᒪᑐᒥᖓᓗ ᐱᖁᔭᐅᕗᖓ ᐊᔪᕆᕐᑐᐃᖁᓪᓗᖓ ᒎᑎᐅᑉ ᐱᐅᓕᔨᑦᑕ ᐱᖁᔨᓂᖓᒍᑦ.

⁴ ᑍᑑᓯᒧᑦ, ᐅᒃᐱᕐᓂᑯᑦ ᓱᓕᔪᒥᒃ ᐃᕐᓂᓐᓄᑦ ᑕᒪᑐᒧᖓ ᐊᑕᐅᓯᐅᑦᔪᑎᒋᔭᑦᑎᓐᓄᑦ. ᒎᑎᐅᑉ ᐊᑖᑕᐅᑉ ᔩᓱᓯᐅᓪᓗ ᙭ᔅᑑᓯᐅᑉ ᐱᐅᓕᔨᑦᑕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᓮᒻᒪᕐᑎᑦᓯᓂᖓᓂᒡᓗ ᑐᓂᓯᕕᐅᖁᕙᒋᑦ.

ᑍᑑᓯᐅᑉ ᐱᓇᓱᐊᕐᓂᖓ ᕿᑭᕐᑕᒥ ᑯᕇᑦᒥ

⁵ ᑍᒤᒻᒪᑦ ᕿᑭᕐᑕᒥᐅᓄᑦ ᑯᕇᑎᒧᑦ ᕿᒪᓚᐅᕐᐸᒋᑦ, ᐱᓇᓱᐊᒃᑲᓐᓂᕆᐊᓕᖕᓂᒃ ᐋᖅᑭᒃᓱᐃᖁᓪᓗᑎᑦ, ᐅᒃᐱᕐᑑᖃᑎᒌᒃᑐᓂᓗ ᓯᕗᓕᕐᑎᐅᓂᐊᕐᑐᓂᒃ ᑎᓕᓯᖁᓪᓗᑎᑦ ᓄᓇᓕᓕᒫᓂ ᑍᒫᒃ ᐱᖁᓚᐅᕋᒃᑭᑦ,

⁶ ᐅᒃᐱᕐᑑᖃᑎᒌᓂ ᓯᕗᓕᕐᑎ ᐸᓯᔭᒃᓴᐅᓂᖃᕐᑐᒃᓴᐅᓐᖏᓚᖅ, ᐊᑕᐅᓯᕐᒥᒃ ᓄᓕᐊᖃᕐᓗᓂ, ᕿᑐᕐᖓᖏᓪᓗ ᐅᒃᐱᕐᑑᓗᑎᒃ ᓇᒻᒪᓐᖏᑦᑐᓂᒃ ᐱᓇᓱᐊᕐᑐᓂᒃ ᐱᖃᑕᐅᕙᓐᖏᑦᑐᓂᒃ ᓈᓚᑦᓯᐊᕈᓐᓇᕐᓗᑎᒡᓗ.

⁷ ᐅᒃᐱᕐᑑᖃᑎᒌᓂ ᓯᕗᓕᕐᑎᐅᔪᖅ ᑲᒪᔨᐅᒐᒥ ᒎᑎᐅᑉ ᐱᓇᓱᐊᕐᓂᖓᓄᑦ, ᐸᓯᔭᒃᓴᐅᓂᖃᕐᑐᒃᓴᐅᓐᖏᓚᖅ; ᐱᔪᒪᔭᑐᐃᓐᓇᕐᒥᓂᒃ ᐱᓇᓱᐊᕐᑐᒃᓴᐅᒃᖏᓚ ᓂᓐᖓᒃᓴᕅᑦᑐᒃᓴᐅᓇᓂᓗ, ᐋᖓᔮᕐᑎᐅᔪᒃᓴᐅᓐᖏᓚᖅ, ᐃᓕᕋᓇᕋᓱᐊᕐᑎᐅᓇᓂᓗ ᐱᔪᒪᓗᐊᕐᓂᕐᒧᑦ ᑮᓇᐅᔭᕐᓂᐊᕐᑐᒃᓴᐅᓐᖏᓚᖅ.

⁸ ᓯᓂᒃᑕᕐᕕᐅᔪᓐᓇᕐᓗᓂ, ᐱᐅᔪᒥᒃ ᖁᕕᐊᒋᔭᖃᕐᓗᓂ, ᐃᒻᒥᓂᒃ ᐊᐅᓚᑦᓯᐊᕈᓐᓇᕐᓗᓂ, ᐃᓅᓯᕐᒥᒍᑦ ᒪᑭᑕᑦᓯᐊᕐᓗᓂ, ᐃᑦᔪᕐᓁᓪᓗᓂ, ᐃᓅᓯᕐᒥᓂᒃ ᐱᓯᒪᑦᓯᐊᕈᓐᓇᕐᓗᓂ;

⁹ ᐅᖃᐅᓰᑦ ᐊᔪᕆᕐᑑᑕᐅᕙᒃᑐᖅ ᑐᑭᓯᐅᒪᑦᓯᐊᕐᓗᒋᑦ ᐱᔭᕆᐊᖃᕐᐳᖅ, ᑕᕝᕙ ᑍᒤᓕᐅᕐᓗᓂ ᐃᓅᖃᑎᒥᓂᒃ ᑲᔪᖏᕐᓮᑦᓯᐊᕈᓐᓇᕋᔭᕐᐳᖅ ᐊᔪᕆᕐᑐᐃᓂᕐᒧᑦ ᓱᓕᔪᒧᑦ ᓇᓗᓁᕐᓯᔪᓐᓇᕐᓗᓂᓗ ᑕᒪᑐᒥᖓ ᐊᑭᕋᕐᑐᕐᑐᑦ ᑕᒻᒪᕐᓂᖏᓐᓂᒃ.

¹⁰ ᐅᓄᕐᒪᑕ ᐊᑭᕋᕐᑐᕐᑐᑦ ᑕᒪᑐᒥᖓ, ᐊᓯᒥᖕᓂᒃ ᓱᓕᒐᑎᒃ ᐅᖃᐅᓯᕐᓄᑦ ᑕᒻᒪᕐᑎᑦᓯᔪᑦ, ᑭᐱᓯᒪᔪᑦ ᐱᓗᐊᕐᓗᒋᑦ;

¹¹ ᐅᖃᓪᓚᖃᑦᑕᕐᓂᖏᑦ ᓄᖅᑲᕐᑎᑕᐅᔭᕆᐊᖃᕐᐳᑦ, ᐃᒡᓗᒥᐅᖃᑎᒌᓂᒃ ᐃᓚᒌᑦᓯᐊᕈᓐᓃᕐᑎᑦᓯᖕᒪᑕ ᐊᔪᕆᕐᑐᐃᓂᕐᒥᖕᓄᑦ ᑮᓇᐅᔭᓕᐅᕈᑎᖃᕋᓱᐊᕐᑐᑦ ᐊᔪᕆᕐᑐᐃᑦᔪᑎᒃᓴᐅᖏᑦᑐᓂᒃ ᐱᓇᓱᐊᕐᓗᑎᒃ.

¹² ᑖᒃᑯᐊ ᑯᕇᑕᒥᐅᑦ ᐃᓚᖓᑦ, ᓇᖕᒥᓂᖅ ᓇᓚᐅᑦᑍᔪᖁᑎᖓᑦ ᓱᓕᓪᓗᓂ ᐅᖃᓚᐅᕐᐳᖅ, “ᑯᕇᑕᒥᐅᑦ ᓴᒡᓗᑐᔪᕗᑦ, ᓇᒡᓕᖕᓂᖃᕋᑎᒃ, ᐃᕿᐊᑕᐅᓪᓗᑎᒡᓗ, ᓂᕆᔪᐊᓗᑐᐃᓐᓁᑦ.”

¹³ ᑍᒤᒻᒪᑦ ᐊᒃᓱᕉᑎᓗᒋᑦ ᐃᓂᕐᑎᒻᒪᕆᒋᐊᖃᕐᐸᑎᑦ, ᓱᓕᔪᒥᒃ ᐅᒃᐱᕐᓂᖃᑦᓯᐊᖁᓪᓗᒋᑦ.

¹⁴ ᔫᑎᑦ ᐅᓂᒃᑳᕐᑐᐊᖏᓐᓂᒃ ᑐᓐᖓᕕᖃᕈᓐᓃᕐᓗᑎᒃ, ᐃᓄᑐᐃᓐᓁᓪᓗ ᐋᖅᑭᒃᓯᒪᔭᖏᓐᓂᒃ ᓱᓕᓂᕐᒥᒃ ᖁᔭᓈᕐᓯᓯᒪᔪᓂᒃ.

¹⁵ ᓱᓇᓕᒫᑦ ᐃᑦᔪᕐᓁᑉᐳᑦ ᐃᒻᒥᖕᓂᒃ ᐃᑦᔪᕐᓁᑎᑦᑐᓄᑦ, ᓇᕐᕈᓇᕐᑐᓕᔪᓄᓪᓕ ᐅᒃᐱᖏᑦᑐᓄᓪᓗ ᓱᓇᓕᒫᑦ ᐃᑦᔪᕐᓁᑦᑐᖃᓐᖏᓚᑦ; ᐃᓱᒪᖏᑦ ᐃᒃᐱᒋᓂᖏᓪᓗ ᓱᒃᑯᑕᐅᓯᒪᖕᒪᑕ.

¹⁶ ᒎᑎᒥᒃ ᖃᐅᔨᒪᓂᕋᕋᓗᐊᕐᐳᑦ, ᐱᓂᐊᕐᓂᖏᓪᓕ ᓴᖅᑭᑎᑦᓯᕗᑦ ᓱᓕᖏᓐᓂᕐᒥᖕᓂᒃ; ᐆᒥᓱᒃᑎᐅᕗᑦ ᓈᓚᒍᓐᓇᕋᑎᒡᓗ, ᐱᐅᔪᒥᒡᓗ ᐱᓇᓱᐊᕐᕈᓐᓇᓐᖏᓚᑦ.