ᓲᓗᒨᓂᐅᑉ ᐃᓐᖏᕈᓯᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖑᑦ

¹ ᑕᑯᒋᑦ ᐃᓂᖁᓇᕐᑐᐊᓘᕗᑎᑦ ᓇᒡᓕᒋᔮᒃ! ᐱᐅᒋᐊᓗᑦᓴᕐᐸᒋᑦ! ᐃᔩᒃᑭᒃ ᑑᕕᑎᑐᑦ ᐱᐅᑎᒋᕘᒃ ᒪᑐᐊᕐᐱᑦ ᖁᓛᒍᑦ. ᓄᔭᕐᑎᑦ ᒎᑦᓯᑎᑐᑦ ᕿᕐᓂᕐᑕᑎᑐᑦ ᑕᑯᒥᓇᕐᑎᒋᕗᑦ, ᖃᖅᑲᒥᑦ ᒋᓕᐊᑎᒥᑦ ᐊᖅᑲᕐᑎᕐᑐᑎᑐᑦ.

² ᑭᒍᑎᑎᑦ ᓰᐲᑦ ᐊᕐᓇᓪᓗᖏᑎᑐᑦ ᓴᓕᓯᒪᔪᑎᑐᑦ ᑍᒤᑉᐳᑦ ᐅᐊᓴᕐᑕᐅᕕᖕᒥᑦ ᖃᑭᕋᑖᕐᑐᑎᑐᑦ, ᐃᒡᓗᒌᒃᓗᑎᒃ ᐊᑭᓕᕇᑦᓯᐊᕐᐳᑦ, ᑭᓐᖏᖃᕋᑎᒡᓗ.

³ ᖃᓂᕐᐱᑦ ᓯᓈ ᓄᕕᕐᓵᒃᓴᑎᑐᑦ ᐊᐅᑉᐸᕆᒃᑐᑐᑦ ᑍᒤᑉᐳᖅ, ᖃᓃᓪᓗ ᑕᑯᓪᓗᒍ ᓇᒡᓕᖕᓇᕐᐳᖅ. ᐅᓗᐊᒃᑭᒃ ᐸᒪᒍᕌᓐᑎᑐᑦ ᐊᕕᒃᓯᒪᔪᑎᑐᑦ ᐊᐅᐸᕐᑎᒋᕘᒃ, ᒪᑐᐊᕐᓄᑦ ᑕᓕᓯᒪᔫᒃ.

⁴ ᖁᖓᓰᑦ ᑍᕕᑎᐅᑉ ᖃᐅᔨᓴᕐᕕᖁᑎᖓᑐᑦ ᐳᕐᑐᔪᑐᑦ ᑍᒤᑉᐳᖅ, ᐅᓇᑕᐅᑎᒃᑯᕕᖁᑎᖓᑐᑦ, ᑕᕝᕙᓂ ᐅᓇᑕᕐᑐᒃᓮᑦ ᓴᐴᓗᑕᖏᑦ 1,000ᐃᑦ ᓂᕕᖓᕗᑦ, ᐅᓇᑕᕐᑐᒃᓮᑦ ᐊᔪᖏᑦᑐᑦ ᓴᐴᓗᑕᖏᑦ.

⁵ ᐃᕕᐊᖐᑭᒃ ᓄᕐᕌᖕᓂᒃ ᒪᕐᕈᖕᓂᒃ ᒥᒃᓯᖃᕐᐴᒃ, ᒐᔨᐊᓕᐅᑉ ᒪᕐᕈᓕᐊᖏᖕᓂᒃ, ᐱᕈᕐᑐᐃᑦ ᓕᓖᑦ ᐊᑯᕐᖓᓐᓂ ᓂᕆᓇᓱᒃᑑᖕᓂᒃ.

⁶ ᖃᐅᒻᒪᒃᐸᓪᓕᐊᓕᕐᐸᑦ, ᑖᕐᓂᕐᓗ ᓄᖑᓕᕐᓗᓂ, ᖃᖅᑲᒧᑦ ᐂᔪᒪᕗᖓ ᒨᕆᖃᕐᑐᒧᑦ, ᐱᖑᖕᒧᓪᓗ ᕗᕌᑭᓐᓯᓐᓯᖃᕐᑐᒧᑦ.

⁷ ᓇᒡᓕᒋᔮᒃ, ᐊᒃᓱᐊᓗᒃ ᐃᓂᖁᓇᕋᕕᑦ, ᓇᐅᒃᑯᑐᐃᓇᖅ ᓇᕐᕈᓇᕐᓂᖃᓐᖏᓚᑎᑦ!

⁸ ᓄᓕᐊᒃᓵᒃ, ᓕᐸᓈᓂᒥᑦ ᐊᐅᓪᓚᖃᑎᒋᓚᐅᓐᖓ, ᓕᐸᓇᓂᒥᑦ ᐊᐅᓪᓚᖃᑎᒋᓗᖓ. ᐊᒫᓇᐅᑉ ᖄᖓᓂᑦ ᐊᐅᓪᓚᕐᓗᓄᒃ, ᓯᓂᐊᕆᐅᑉ ᖄᖓᓂᑦ ᕼᐊᕐᒪᓂᐅᓪᓗ ᖄᖓᓂᑦ, ᓛᔧᓪᓗ ᓯᑎᖏᓐᓂᑦ, ᓕᐸᕐᑦᓗ ᐃᓂᖏᓐᓂᑦ ᖃᖅᑲᓂᑦ.

⁹ ᐆᒻᒪᑎᒐ ᐊᐅᓚᑦᔭᒃᓯᒪᒐᕕᐅᒃ, ᓇᔮᒃ, ᓄᓕᐊᒃᓵᒃ; ᐆᒻᒪᑎᒐ ᐊᐅᓚᑦᔭᒃᑎᓯᒪᒐᕕᐅᒃ ᑕᑯᓴᕐᓂᑐᐃᓐᓇᕐᓄᑦ, ᐅᔭᒥᒃᐱᓪᓗ ᐱᐅᓴᐅᑎᖓᑕ ᐃᓚᖓᓐᓄᑦ.

¹⁰ ᓇᒡᓕᖕᓃᑦ ᒪᒪᕐᑐᐊᓘᖕᒪᑦ, ᓇᔮᒃ, ᓄᓕᐊᒃᓵᒃ! ᓇᒡᓕᖕᓃᑦ ᒪᒪᕐᓂᕐᓴᐅᕗᖅ ᕔᓂᒥᑦ, ᐅᕐᓱᕐᑎᕈᑎᕕᓪᓗ ᑎᐱᖓ ᒪᒪᕐᓂᕐᓴᐅᕗᖅ ᑎᐱᑦᓯᐊᕆᒃᑐᓂᑦ ᑕᒤᓐᓂᑦ!

¹¹ ᓄᓕᐊᒃᓵᒃ, ᖃᓃᑦ ᑯᓯᕐᐳᖅ ᓰᕐᓇᕐᑐᒥᒃ, ᕼᐊᓂ ᐃᒻᒧᒡᓗ ᐅᖃᕐᐱᑦ ᐊᑖᓃᑉᐴᒃ; ᐊᓐᓄᕌᕕᑦ ᑎᐱᖓ ᓕᐸᓇᓂᐅᑉ ᑎᐱᖓᑐᑦ ᑍᒤᑉᐳᖅ.

¹² ᐱᕈᕐᓰᕕᒃᑐᑦ ᐊᑦᑐᖏᕐᓯᒪᔪᑎᑐᑦ ᑍᒤᑉᐳᖅ, ᓇᔭᒐ, ᓄᓕᐊᒃᓴᕋ, ᐱᕈᕐᓰᕕᒃᑐᑦ ᐊᑦᑐᖏᕐᓯᒪᔪᑐᑦ, ᐳᐂᓚᕕᒃᑐᑦ ᓯᒥᒃᓯᒪᔪᑐᑦ.

¹³ ᓇᐹᕐᑐᖁᑎᑎᑦ ᑐᑭᓕᕇᑦ ᐸᐅᕐᖓᓖᑦ ᐹᒪᒍᕌᓂᒃ ᐱᐅᓂᕐᐹᓂᒃ ᐸᐅᕐᖓᖃᕐᐳᑦ, ᑎᐱᑦᓯᐊᕆᒃᑐᓂᒃ ᕼᐃᓇᓂᒃ ᓈᕐᑎᓂᒡᓗ,

¹⁴ ᓈᕐᑎᓪᓗ, ᓵᕗᕌᓃᓪᓗ, ᑳᓚᒨᓰᓪᓗ, ᓯᓇᒤᓪᓗ, ᓇᐹᕐᑐᓕᒫᓪᓗ ᕗᕌᖕᑭᓐᓯᓐᓯᓂᒃ ᐱᕈᕐᕕᐅᕙᒃᑐᑦ, ᒧᕇᓪᓗ, ᐋᓘᐃᓪᓗ, ᓂᕿᒧᓪᓗ ᐃᓚᒃᓮᑦ ᒪᒪᕐᑐᓕᒫᑦ, ᐃᓕᖕᓂ ᐱᕈᕐᐳᑦ.

¹⁵ ᐱᕈᕐᓰᕕᖕᒥ ᐳᐂᓚᕗᑎᑦ, ᐃᒥᕐᑕᕐᕕᒃ ᐆᒪᔪᒥᒃ ᐃᒪᓕᒃ, ᑰᒃᑐᖅ ᓕᐸᓇᓂᐅᑉ ᑰᖏᓐᓂᑦ.

ᐊᕐᓇᖅ

¹⁶ ᑐᐸᓕᕆᑦ, ᐊᓄᕇ ᐅᓐᓄᐊᓪᓗᐊᒥᑦ ᐱᔪᑎᑦ, ᐊᓄᕇᓗ ᐅᓪᓗᓪᓗᐊᑉ ᓇᓛᓂᑦ ᐱᔪᑎᑦ, ᐱᕈᕐᓰᕕᖁᑎᒐ ᓱᐴᓕᕈᒃ, ᑎᐱᑦᓯᐊᖓ ᓯᐊᒻᒪᖁᓪᓗᒍ ᐅᖓᓯᒃᑐᒧᑦ. ᓇᒡᓕᒋᔭᕋ ᐱᕈᕐᓰᕕᖁᑎᒥᓄᑦ ᕾᓂᐊᕐᒪᑦ, ᐸᐅᕐᖓᖏᓐᓂᒡᓗ ᒪᒪᕐᓂᕐᐹᓂᒃ ᓂᕆᓗᓂ.