ᕉᑎᐅᑉ ᐅᓂᒃᑲᐅᓯᓂᖓ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐳᐊᓯᐅᑉ ᓄᓕᐊᓂᖕᓂᖓ ᕉᑎᒥᒃ

¹ ᐳᐊᓯᓕ ᑲᑎᕕᐅᖃᑦᑕᕐᑐᒧᐊᕐᓗᓂ ᐃᒃᓯᕙᓕᕐᐳᖅ ᓄᓇᓕᑦ ᐃᑎᕐᑕᕐᕕᖓᓐᓂ; ᑕᕝᕙ ᐃᓔᒥᓕᑭᐅᑉ ᐃᓚᒋᔭᖏᑕ ᖃᓂᒋᓂᕐᐹᖓᑦ ᑕᕝᕗᓐᖓᕐᐳᖅ ᐳᐊᓯᐅᑉ ᐅᖃᐅᓯᕆᓚᐅᕐᑕᖓ ᑖᓐᓇ ᕉᑎᒧᑦ. ᐳᐊᓯᐅᑉ ᐅᖃᐅᑎᕚ, “ᕾᓚᐅᕆᑦ ᐃᖏᓪᓗᑎᑦ ᐅᖃᖃᑎᒌᓚᐅᕐᓗᒃ.” ᑕᕝᕙ ᐳᐊᓯᒧᐊᕐᐳᖅ ᐃᒃᓯᕙᖃᑎᒋᓕᕐᓗᒍᓗ.

² ᑕᕝᕙ ᐳᐊᓯ ᑕᕝᕙᓂ ᓄᓇᓕᖕᓂ ᐊᖓᔪᖅᑳᓂᒃ ᕾᖁᔨᕗᖅ 10ᓂᒃ ᐅᖃᖃᑎᒋᔪᒪᓪᓗᒋᑦ ᐃᒃᓯᕙᖁᕔᑦ, ᑕᕝᕙᓂ ᐃᒃᓯᕙᓕᕐᒪᑕ.

³ ᐳᐊᓯᐅᑉ ᑭᖑᕚᖑᖃᑎᒥᒍᑦ ᐃᓚᒋᔭᓂ ᐅᖃᐅᑎᕚ, “ᓁᐅᒥ ᐅᑎᕐᓯᒪᓕᕋᒥ ᒧᐊᐱᒥᐅᓂᑦ, ᐃᓚᒋᓚᐅᕐᑕᑦᑕ ᐃᓔᒥᓕᑭᐅᑉ ᐱᕈᕐᓰᕕᖁᑎᖓᓂᒃ ᓂᐅᕐᕈᑎᖃᕈᒪᓕᕐᒪᑦ.

⁴ ᑕᒪᓐᓇ ᐃᓕᖕᓄᑦ ᖃᐅᔨᔭᐅᔭᕆᐊᖃᕋᓱᒋᒐᒃᑯ, ᐱᔪᒪᑐᐊᕈᕕᐅᒃ ᓂᐅᕕᐊᕆᔪᓐᓇᕋᕕᐅᒃ ᐅᑯᐊ ᓄᓇᓕᖕᓂ ᐊᖓᔪᖅᑳᑦ ᑕᒃᑯᐊᓐᓂ. ᓂᐅᕕᐊᕆᔪᓐᓇᖏᒃᑯᕕᐅᒡᓕ ᐅᖃᑦᓯᐊᖁᕙᒋᑦ ᐱᐅᓯᕗᑦ ᒪᓕᒡᓗᒋᑦ ᐃᕝᕕᑦ ᓯᕗᓪᓕᐅᔭᕆᐊᖃᕋᕕᑦ, ᐱᔪᓐᓇᖏᒃᑯᕕᓪᓕ ᐅᕙᖓ ᓂᐅᕕᐊᕆᔭᕆᐊᖃᕋᔭᕋᒃᑯ.” ᑖᓐᓇ ᐊᖑᑦ ᐅᖃᕐᐳᖅ, “ᓂᐅᕕᐊᕆᓂᐊᓕᕐᐸᕋ.”

⁵ ᑕᕝᕙ ᐳᐊᓯ ᐅᖃᕐᐳᖅ, “ᑕᒪᓐᓇ ᓈᒻᒪᑦᓯᐊᕐᐳᖅ ᑖᓐᓇ ᐱᕈᕐᓰᕕᒃ ᓂᐅᕕᐊᕆᒍᕕᐅᒃ ᓁᐅᒥᒥᑦ, ᖃᐅᔨᒪᖁᕙᒋᑦ ᕉᑎ ᐅᐃᒡᒐᕐᓂᐅᔪᖅ ᐱᖃᓯᐅᑎᔭᕆᐊᖃᕐᓂᐊᕋᕕᐅᒃ ᒧᐊᐱᒥᐅᑕᖅ, ᐃᓚᒋᓚᐅᕐᑕᑦᑕ ᓄᓕᐊᕕᓂᖓ, ᑖᓐᓇ ᐱᕈᕐᓰᕕᒃ ᐃᓚᒋᓚᐅᕐᑕᖏᓐᓂᑦ ᐊᑎᖏᓐᓄᓪᓗ ᑭᖑᕐᖑᑎᔭᐅᑦᓯᐊᖁᓪᓗᒍ.”

⁶ ᐊᖑᑎᐅᑉ ᑭᐅᕚ, “ᑍᒤᓕᖓᓂᐊᑐᐊᕐᐸᑦ ᓯᕗᓪᓕᐅᔭᕆᐊᖃᕐᓂᕋ ᐂᑑᑎᒋᖔᕐᐸᕋ ᐃᓕᖕᓄᑦ, ᓂᐅᕕᐊᕆᑐᐊᕈᒃᑯ ᕿᑐᕐᖓᒃᑲ ᑭᖑᕚᒃᑲᓗ ᑖᑦᓱᒥᖓ ᐱᕈᕐᓰᕕᖕᒥᒃ ᑭᖑᕐᖑᑦᔨᔪᓐᓇᑦᔮᖏᒻᒪᑕ, ᐃᕝᕕᑦ ᓂᐅᕕᐊᕆᓕᕈᒃ, ᓂᐅᕕᐊᕆᔪᓐᓇᖏᓐᓇᒃᑯ.”

⁷ ᑍᑦᓱᒪᓂᐅᑎᓪᓗᒍ ᐱᐅᓯᖃᕐᐸᓚᐅᕐᒪᑕ ᓂᐅᕕᖃᑦᑕᐅᑎᑐᐊᕈᑎᒃ ᐅᕝᕙᓘᓐᓃᑦ ᓱᓇᑐᐃᓐᓇᒥᒃ ᑕᐅᕐᓰᖃᑦᑕᐅᑎᓪᓗᑎᒃ ᓇᓗᓁᑯᑦᓯᕐᓯᕙᓚᐅᕐᐳᑦ ᐃᒫᒃ: ᑖᓐᓇ ᓂᐅᕕᕐᑎᑦᓯᔪᖅ ᑕᐅᕐᓰᔪᕐᓘᓐᓃᑦ ᐃᑎᒐᒍᑎᒥᓂᒃ ᐲᕐᓯᓪᓗᓂ ᓂᐅᕕᕐᑐᒧᑦ ᑐᓂᓯᔭᕆᐊᖃᕐᐸᒡᓗᑎᒃ, ᑍᒤᓕᑐᐊᕌᖓᑕ ᑕᕝᕙ ᐃᓴᕆᐊᓕᒥᐅᑦ ᓇᓗᓁᕐᓯᕙᓚᐅᕐᐳᑦ ᑕᒪᓐᓇ ᐋᖅᑭᒐᓱᐊᕐᑕᖓᑦ ᐊᖏᖃᑎᒌᒍᑕᐅᔭᕇᕐᓂᖓᓂᒃ.

⁸ ᑖᓐᓇᓕ ᐊᖑᑦ ᐳᐊᓯᒧᑦ ᐅᖃᕋᒥ, “ᐃᕝᕕᑦ ᓂᐅᕕᐊᕆᓕᕈᒃ.” ᐃᑎᒐᒍᑎᓂ ᐲᕐᐹ ᑐᓂᓪᓗᓂᐅᒡᓗ.

⁹ ᐳᐊᓯᓗ ᑖᒃᑯᓄᖓ ᑲᑎᒪᖃᑕᐅᔪᓄᑦ ᐊᖓᔪᖅᑳᓄᑦ ᐃᓚᖏᓐᓄᓪᓗ ᐅᖃᕐᐳᖅ, “ᐃᓕᑦᓯ ᖃᐅᔨᒪᓂᐊᓕᕐᐳᓯ ᐅᓪᓗᒥ ᓁᐅᒥᒥᑦ ᓂᐅᕕᕋᒪ ᐃᓔᒥᓕᑭᒧᑦ ᑐᕌᖓᓚᐅᕐᑐᓕᒫᓂᒃ, ᐃᕐᓂᖏᓐᓄᓪᓗ ᓯᓕᐅᓂᒧᑦ ᒪᕼᐊᓚᓂᒧᓪᓗ.

¹⁰ ᐊᒻᒪᓗ, ᕉᑎ ᐱᖃᓯᐅᑎᓪᓗᒍ ᒧᐊᐱᒥᐅᑕᖅ ᒪᕼᐊᓚᓂᐅᑉ ᓄᓕᐊᕆᓚᐅᕐᑕᖓ ᓄᓕᐊᕐᑖᕆᔭᕆᐊᖃᓕᕋᒃᑯ, ᑍᒤᑐᐊᕐᐸᑦ ᑖᓐᓇ ᐱᕈᕐᓰᕕᒃ ᑍᒃᑯᓄᖓ ᐃᓚᒋᓚᐅᕐᑕᑦᑎᓐᓄᑦ ᑐᕌᖎᓐᓇᕐᓂᐊᕐᒪᑦ, ᐊᑎᖓᑕᓗ ᐃᓚᒌᖕᓂᖏᑕ ᑭᖑᕚᕇᖕᓂᖓᓂ ᑲᔪᓰᓐᓇᕈᓐᓇᕐᓂᐊᕐᒪᑦ ᓄᓇᑐᖃᖏᓪᓗ. ᑕᒪᑐᒥᖓ ᐃᓕᑦᓯ ᐅᓪᓗᒥ ᖃᐅᔨᒪᑦᔪᑕᐅᓂᐊᕐᐳᓯ.”

¹¹ ᑖᒃᑯᐊ ᐊᖓᔪᖅᑳᑦ ᐊᓯᖏᓪᓗ ᐅᖃᕐᐳᑦ, “ᐃᓛᒃ ᑕᒪᑐᒥᖓ ᖃᐅᔨᓯᒪᓂᐊᕐᐳᒍᑦ, ᑐᒃᓯᐊᕐᐳᒍᓪᓗ ᐊᑕᓂᕐᒧᑦ ᑖᓐᓇ ᓄᓕᐊᑖᕆᓂᐊᕐᑍᑦ ᓲᕐᓗ ᕅᒋᓕᑐᑦ ᓕᐊᑐᓪᓗ ᐱᖁᓪᓗᒍ, ᑖᒃᑯᐊᒃ ᕿᑐᕐᖏᐅᓚᐅᕐᒪᑎᒃ ᔧᑯᒃᑯᑦ; ᐊᔪᕐᓴᖏᑦᓯᐊᖁᕙᑦᑎᒋᑦ ᐃᐸᕋᑕᐅᑉ ᑭᖑᕚᕇᖑᖃᑎᒌᖏᓐᓂ ᐃᖅᑲᐅᒪᔭᐅᑦᓯᐊᖁᓪᓗᑎᓪᓗ ᐱᑦᓕᐊᒥ.

¹² ᕿᑐᕐᖓᑎᓪᓗ ᐊᑕᓂᐅᑉ ᑐᓂᓂᐊᕐᑕᖏᑦ ᐃᓕᖕᓄᑦ ᑖᑦᓱᒨᓇ ᐊᕐᓇᒃᑯᑦ ᑍᑦᓱᑐᓇᐅᓚᐅᕐᑐᖅ ᐱᕆᔨᐅᑉ ᕿᑐᕐᖓᖃᕐᓂᖏᑎᑐᑦ ᐱᖁᕙᑦᑎᒋᑦ ᔫᑕᐅᑉ ᑕᒫᕆᐅᓪᓗ ᐃᕐᓂᖓᑎᑐᑦ.”

ᐳᐊᓯᐅᑉ ᑭᖑᕚᖏᓪᓗ ᑍᕕᑎᒧᑦ ᑎᑭᓪᓗᒍ

¹³ ᑕᕝᕙ ᐳᐊᓯᐅᑉ ᕉᑎ ᐊᖏᕐᕋᐅᑎᕚ ᓄᓕᐊᕐᑖᕆᓪᓗᓂᐅᒃ; ᐱᖃᑎᒋᓕᕐᒪᒍᓗ, ᐊᑕᓂᐅᑉ ᓮᒻᒪᕐᑎᐹᒃ ᕉᑎ ᓄᑕᕋᒃᓴᕐᑖᓚᐅᕐᒪᑦ, ᐃᕐᓂᕐᑖᕐᓗᓂᓗ.

¹⁴ ᐊᕐᓁᓪᓗ ᐱᑦᓕᐊᒥᐅᑦ ᓁᐅᒥ ᐅᖃᐅᑎᕚᑦ, “ᐊᑕᓂᖅ ᓂᕐᑐᓚᐅᕐᓚᕗᑦ ᐅᓪᓗᒥ ᐃᕐᖑᑕᕐᑖᕐᑎᒻᒪᑎᑦ ᐊᖑᑎᑯᓗᖕᒥᒃ ᐃᑲᔪᕐᑎᒋᓂᐊᕐᑕᕐᓂᒃ, ᑖᓐᓇᓗ ᐊᖑᑎᑯᓗᒃ ᐃᖅᑲᐅᒪᔭᐅᓂᖃᑦᓯᐊᖁᕙᕗᑦ ᐃᓴᕆᐊᓕᒥᐅᓄᑦ.

¹⁵ ᐅᑯᐊᕕᑦ ᓇᒡᓕᒋᒐᒥᑎᑦ, ᐊᒡᓛᑦ ᐃᕐᓂᖃᕋᔭᕈᕕᑦ 7ᓂᒃ ᐃᑲᔪᕐᓂᕐᓴᕆᕚᑎᑦ, ᒫᓐᓇᓕ ᐃᕐᖑᑕᕐᑖᕐᑎᒻᒪᑎᑦ ᐊᖑᑎᑯᓗᖕᒥᒃ, ᐃᓕᖕᓂᒃ ᐋᖅᑭᒃᓯᒃᑲᓐᓂᕐᓂᐊᕐᑐᒥᒃ ᐃᓄᑐᖃᐅᓕᕐᑎᓪᓗᑎᓪᓗ ᐰᕆᔨᒋᓂᐊᕐᑕᕐᓂᒃ.”

¹⁶ ᓁᐅᒥᐅᓪᓗ ᐃᕐᖑᑕᓂ ᑎᒍᓪᓗᒍ ᓴᕐᓕᐊᓕᕐᐹ, ᐃᕿᓪᓗᒍᓗ ᐰᕆᓕᕐᐹ.

¹⁷ ᐊᕐᓇᐅᖃᑎᖏᓐᓂᓪᓗ ᐊᑎᕐᑖᕐᑎᑕᐅᕗᖅ ᐅᐱᑎᒥᒃ, ᐅᖃᐅᑦᔨᓕᕐᓗᑎᒡᓗ, “ᓁᐅᒥ ᐊᖑᑎᑯᓗᖕᒥᒃ ᐃᕐᖑᑕᖃᓕᕐᒪᑦ.” ᑖᓐᓇ ᐅᐱᑎ ᐃᕐᓂᕐᑖᓚᐅᕐᐳᖅ ᔨᓯᒥᒃ, ᑍᕕᑎᐅᑉ ᐊᑖᑕᒋᓚᐅᕐᑕᖓᓂᒃ.

¹⁸ ᑖᒃᑯᐊ ᑕᕝᕙ ᐱᕆᔾᒥᑦ ᑍᕕᑎᒧᑦ ᑎᑭᓪᓗᒋᑦ ᑭᖑᕚᕇᑦ ᐃᒤᓕᖓᕗᑦ: ᐱᕆᔾ ᐃᕐᓂᖃᓚᐅᕐᐳᖅ ᕼᐃᔅᕋᓐᒥᒃ;

¹⁹ ᕼᐃᔅᕋᓐᓗ ᐃᕐᓂᕐᑖᕐᐳᖅ ᕌᒥᒥᒃ, ᕌᒥᓗ ᐃᕐᓂᕐᑖᕐᐳᖅ ᐊᒥᓇᑕᐱᒥᒃ;

²⁰ ᐊᒥᓇᑕᐱᓗ ᐃᕐᓂᕐᑖᕐᐳᖅ ᓈᓲᓐᒥᒃ, ᓈᓱᓐᓗ ᐃᕐᓂᕐᑖᕐᐳᖅ ᓵᓪᒪᓂᒥᒃ;

²¹ ᓵᓪᒧᓂᓗ ᐃᕐᓂᕐᑖᕐᐳᖅ ᐳᐊᓯᒥᒃ, ᐳᐊᓯᓗ ᐃᕐᓂᕐᑖᕐᐳᖅ ᐅᐱᑎᒥᒃ;

²² ᐅᐱᑎᓗ ᐃᕐᓂᕐᑖᕐᐳᖅ ᔨᓯᒥᒃ, ᔨᓯᓗ ᐃᕐᓂᕐᑖᕐᐳᖅ ᑍᕕᑎᒥᒃ.