ᕉᑎᐅᑉ ᐅᓂᒃᑲᐅᓯᓂᖓ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᕉᑎᐅᑉ ᑲᑎᕐᓱᐃᓂᖓ ᓂᕿᒃᓴᒥᓂᒃ ᐳᐊᓯᐅᑉ ᐱᕈᕐᓰᕕᖁᑎᖓᓂ

¹ ᓁᐅᒥᓕ ᐃᓚᖃᓚᐅᕐᐳᖅ ᐊᖑᒻᒥᒃ ᐊᔪᕐᓴᖏᑦᑑᓪᓗᓂᓗ ᐅᐱᒋᔭᐅᔪᒥᒃ ᐃᓔᒥᓕᑭᒃᑯᑦ ᐃᓚᒋᔭᖓᓐᓂᒃ. ᑖᓐᓇᓗ ᐊᑎᖃᕐᐳᖅ ᐳᐊᓯᒥᒃ.

² ᑍᑦᓱᒪᓂ ᕉᑎ ᒧᐊᐱᒥᐅᑕᖅ ᐅᖃᕐᐳᖅ ᓁᐅᒥᒧᑦ, “ᐱᕈᕐᓰᕕᖕᒥᑦ ᑲᑎᑦᓯᔭᕐᑐᕈᒪᒐᒪ ᓂᕿᒃᓴᑦᑎᓐᓂᒃ ᑲᑎᕐᓱᐃᔪᑦ ᐱᖏᓐᓂᑯᖏᓐᓂᒃ, ᓇᓗᓇᓐᖏᓚᖅ ᑲᑎᕐᓱᐃᔪᑦ ᓇᓪᓕᐊᓐᓂᑦ ᖁᕕᐊᒋᔭᐅᓗᖓ ᑲᑎᑦᓯᑎᑕᐅᔪᓐᓇᕐᓂᐊᕐᑐᖓ.” ᓁᐅᒥᐅᑉ ᑭᐅᕚ, “ᐊᑏ ᐱᕈᕐᓰᕕᖕᒧᐊᓕᕆᑦ.”

³ ᑕᕝᕙ ᕉᑎ ᐂᓕᕐᐳᖅ, ᐱᕈᕐᓰᕕᖕᒧᐊᕋᒥ ᑲᑎᕐᓱᐃᔪᑦ ᑭᖑᓂᖓᓐᓂ ᒪᓕᒡᓗᓂ ᑲᑎᕐᓱᐃᓕᕐᐳᖅ ᐱᔭᐅᖏᑦᑐᓂᒃ. ᖃᐅᔨᒪᓇᓂᓕ ᐳᐊᓯᐅᑉ ᐱᕈᕐᓰᕕᖓ ᓇᓚᐅᓐᓂᕐᓗᓂᐅᒃ, ᐃᓔᒥᓕᑭᐅᑉ ᐃᓚᒋᔭᖓᑕ.

⁴ ᑕᒪᑐᒪ ᑭᖑᓂᖓᒍᑦ ᑕᑯᒋᑦ ᐳᐊᓯ ᐱᑦᓕᐊᒥᖔᕐᐳᖅ, ᐅᖃᕐᓗᓂᓗ ᑲᑎᕐᓱᐃᔨᖁᑎᒥᓄᑦ, “ᐊᑕᓂᐅᑉ ᐃᓚᒋᓕᓯ.” ᑖᒃᑯᐊᓗ ᑭᐅᕗᑦ, “ᐊᑕᓂᐅᑉ ᓮᒻᒪᕐᑎᓪᓕᑎᑦ!”

⁵ ᑕᕝᕙ ᐳᐊᓯ ᐊᐱᕆᓕᕐᐳᖅ ᑲᑎᕐᓱᐃᔪᓄᑦ ᐊᖓᔪᖅᑳᕆᔭᐅᑎᑕᒥᓄᑦ, “ᐊᕐᓇᕐᖑᓇ ᐅᕕᒃᑲᖅ ᑭᓇᒃᑯᓐᓂᓐᖔᕐᓯᒪᔪᖅ?”

⁶ ᐊᖓᔪᖅᑳᕆᔭᐅᑎᑕᖓᑕ ᑭᐅᕚ, “ᐅᓇ ᓄᓇᖃᑎᒋᓐᖏᑕᕗᑦ ᒧᐊᐱᒥᐅᑕᖅ ᓁᐅᒥᐅᑉ ᑎᑭᖃᑎᒋᓚᐅᕐᑕᖓ ᓄᓇᒥᑦ ᒧᐊᐱᒥᑦ.

⁷ ᐊᐱᕆᖅᑲᐅᖕᒪᖓ ᑭᖑᓂᑦᑎᓐᓂ ᒪᓕᒍᓐᓇᕐᒪᖔᕐᒥ ᑲᑎᕐᓱᐃᓗᓂ ᓂᕿᒃᓴᒥᓂᒃ, ᐅᓪᓛᓂᓄᓇ ᒫᓐᓇᒧᑦ ᓄᖅᑲᓚᐅᖏᑦᑐᖅ, ᒫᓐᓇ ᑭᓯᐊᓂ ᑕᕾᕐᓯᓕᑍᓐᓇᕐᑐᖅ.”

⁸ ᑕᕝᕙ ᐳᐊᓯᐅᑉ ᕉᑎ ᐅᐸᒡᓗᒍ ᐅᖃᐅᑎᕚ, “ᖃᐅᔨᒪᖁᕙᒋᑦ ᐅᕙᓐᖓᑦ ᐱᕈᕐᓰᕕᖕᒥᑦ ᓅᑦᑍᓕᒋᑦ ᐊᓯᐊᓄᑦ, ᐅᑯᐊᓕ ᐊᕐᓁᑦ ᑭᖑᓂᖓᓂ ᑲᑎᕐᓱᐃᓕᕆᑦ ᓇᖕᒥᓂᖅ ᓂᕿᒃᓴᕐᓂᒃ.

⁹ ᖃᐅᔨᓴᕐᓗᒋᓪᓗ ᓇᓂ ᑲᑎᕐᓱᐃᖕᒪᖔᑕ ᒪᓖᓐᓇᕐᓂᐊᕐᐸᑎᑦ, ᑭᓪᓗᐃᔨᖁᑎᒃᑲ ᐊᖑᑎᑦ ᐅᖃᐅᑎᖃᐅᕙᒃᑲ ᐊᒡᕕᐊᕐᑕᐅᖁᓇᒃ, ᐃᒥᕈᓕᕌᖓᕕᓪᓗ, ᐃᒥᕆᐊᕐᑐᖃᑦᑕᕆᑦ ᑲᑎᕐᓱᐃᔪᑦ ᐃᒥᕐᕕᒋᖃᑦᑕᕐᑕᖓᓐᓂᑦ.”

¹⁰ ᕉᑎᓗ ᓰᖅᑯᕐᓗᓂ ᐅᑯᕗᖅ ᓄᓇ ᐊᒃᑐᕐᓗᓂᐅᒃ ᖃᐅᕐᒥᓄᑦ, ᐅᖃᕐᓗᓂᓗ, “ᖃᓄᐃᒻᒪᑦ ᐱᑦᓯᐊᕋᓱᐊᕐᐱᖔ? ᐃᒃᐱᒋᔭᒃᓴᐅᒐᒫ? ᑕᑯᒋᑦ ᓄᓇᖃᑎᒋᔭᐅᖏᑦᑐᖓ.”

¹¹ ᐳᐊᓯᐅᑉ ᑭᐅᕚ ᐅᖃᕐᓗᓂᓗ, “ᑕᒤᓐᓂᒃ ᐅᖃᐅᑦᔭᐅᓚᐅᕋᒪ ᓴᑭᖕᓂᒃ ᑲᒪᑦᓯᐊᖃᑦᑕᕐᓂᕐᓂᒃ ᑍᒪᓐᖓᓂᑦ ᐅᐃᕕᑦ ᑐᖁᓂᖓᑕ ᑭᖑᓂᖓᓂ, ᖃᐅᔨᒪᓪᓗᖓᓗ ᐊᖓᔪᖅᑳᑎᑦ ᑕᒪᕐᒥᒃ ᕿᒪᒃᓯᒪᓕᕋᕕᒋᑦ ᓄᓇᓗ ᐃᓅᕕᒋᓯᒪᔧᑦ, ᐃᓄᖕᓄᓪᓗ ᑎᑭᓯᒪᓕᕐᓗᑎᑦ ᓯᕗᓂᖓᒍᑦ ᖃᐅᔨᒪᓚᐅᕐᓯᒪᓐᖏᑕᕐᓄᑦ.

¹² ᐊᑕᓂᐅᑉ ᐊᑭᓕᕐᓕᑎᑦ ᐱᓇᓱᐊᕐᓂᕆᓯᒪᔭᕐᓄᑦ, ᐱᑦᓯᐊᕐᓂᕆᓯᒪᔧᓪᓗ ᐊᑕᖏᕐᓗᒍ ᐃᓗᐃᑦᑐᒥᒃ ᐊᑭᓕᕐᑕᐅᖁᓪᓗᒍ ᐃᓴᕆᐊᓕᒥᐅᑦ ᐊᑕᓂᖓᓄᑦ ᒎᑎᖓᓄᓪᓗ, ᑖᑦᓱᒧᖓ ᓴᐳᑦᔨᔨᒋᔪᒪᓯᒪᓕᕐᑕᕐᓄᑦ.”

¹³ ᑕᕝᕙ ᕉᑎᐅᑉ ᑭᐅᕚ, “ᐊᖓᔪᖅᑳᕋ; ᐅᕙᓐᓄᑦ ᐱᑦᓯᐊᕐᑐᐊᓘᕗᑎᑦ ᓯᕘᕋᔪᓐᓃᕐᑎᓐᓇᕕᖓ ᐅᖃᐅᑦᔨᑦᓯᐊᕐᓂᒃᑯᑦ, ᑲᑎᕐᓱᐃᔨᖁᑎᒃᑐᑦ ᑍᒤᑦᑑᑎᓐᓇᖓ.”

¹⁴ ᓂᕆᓐᓇᕐᓯᖕᒪᑦ ᐳᐊᓯᐅᑉ ᕉᑎ ᑐᓐᖓᓴᕐᐹ, ᓂᐊᖂᔭᕐᑐᖁᓪᓗᓂᐅᒃ ᒥᓱᒃᐸᒡᓗᒍ ᐸᐅᕐᖎᑦ ᐃᑦᑎᖓᓄᑦ, ᐃᒃᓯᕙᖃᑕᐅᓕᕐᒪᓪᓗ ᐃᖅᑲᓁᔭᕐᑎᖁᑎᖏᓐᓄᑦ, ᐳᐊᓯᐅᑉ ᓂᐊᖂᔭᒃᓴᓂᒃ ᐃᒐᒧᑦ ᐆᓯᒪᔪᓂᒃ ᑐᓂᓯᕕᒋᕚ. ᕉᑎᓗ ᓂᕆᓕᕋᒥ ᐊᕿᐊᑦᑐᑦᓯᐊᕐᐳᖅ ᐊᒥᐊᒃᑯᒻᒪᕆᒡᓗᓂ.

¹⁵ ᕉᑎᓕ ᐱᕈᕐᓰᕕᖕᒧᐊᕐᒥᖕᒪᑦ ᑲᑎᑦᓯᔭᕐᑐᕐᓗᓂ ᓂᐊᖂᔭᒃᓴᓂᒃ: ᐳᐊᓯᐅᑉ ᑲᑎᕐᓱᐃᔨᖁᑎᓂ ᐊᖑᑎᑦ ᐅᖃᐅᑎᕔᑦ, “ᐃᓱᒪᕐᓱᕐᓗᓂ ᕉᑎ ᑲᑎᑦᓯᓚᐅᕐᓕ ᑲᑎᑦᓴᕇᕐᓯᒪᔪᓪᓘᓐᓃᑦ ᐊᑯᕐᖓᓐᓂᑦ ᐱᒐᓗᐊᕐᐸᑦ ᓱᖁᑎᒋᔭᐅᑦᑍᓕᓂᐊᕐᐳᖅ.

¹⁶ ᐊᒻᒪᓗ ᓇᑲᑎᕇᕐᓯᒪᔪᑦ ᐃᓚᖓᓐᓂᒃ ᐊᒥᐊᒃᑯᖃᑦᑕᕐᓂᐊᕐᐳᓯ ᕉᑎᐅᑉ ᑎᒍᖃᑦᑕᕐᓂᐊᖕᒪᒋᑦ, ᐃᓂᕐᑎᕐᑕᐅᑦᑍᓕᓂᐊᕐᐳᖅ.”

¹⁷ ᑕᕝᕙ ᕉᑎ ᑲᑎᑦᓯᓚᐅᕐᐳᖅ ᐱᕈᕐᓰᕕᖕᒥ ᐅᓐᓄᖕᒪᑦ ᑭᓯᐊᓂ ᓄᖅᑲᑍᓐᓇᕐᓗᓂ, ᑲᑎᑕᓂᓕ ᐊᓇᐅᓕᕐᓗᒋᑦ ᓂᐊᖂᔭᒃᓮᑦ ᐲᔭᕋᒥᒋᑦ ᐅᖁᒤᓐᓂᖃᓕᓚᐅᕐᐳᖅ 25ᐸᐅᓐ ᖃᓂᒋᔭᓂ.

¹⁸ ᑖᒃᑯᐊᓗ ᑲᑎᓚᐅᕐᑕᓂ ᐊᖏᕐᕋᐅᑎᕔᑦ ᐃᒡᓗᒐᓴᖕᓄᑦ, ᓴᑭᖓᑕᓗ ᑕᑯᕔᑦ ᑲᑎᑕᕕᓂᖏᑦ. ᓴᑭᓂᓗ ᒥᓇᕐᐹ ᓂᕆᓪᓗᑎᒃ ᐊᒥᐊᒃᑯᒋᓚᐅᕐᑕᒥᓂᒃ.

¹⁹ ᓁᐅᒥᐅᓪᓗ ᐊᐱᕆᕚ, “ᓇᑭᓄᑯᐊ ᓂᐊᖂᔭᒃᓮᑦ ᐅᓪᓗᒥ ᑲᑎᑕᕕᓂᕐᑏᑦ? ᑭᐊᓗ ᐱᕈᕐᓰᕕᖁᑎᖓᓂᑦ ᑲᑎᑦᓯᔪᓐᓇᕐᑎᑕᐅᓐᓂᕐᐲᑦ? ᐱᕈᕐᓰᕕᖁᑎᓕᒃ ᑍᓐᓇ ᒎᑎᒧᑦ ᐱᑦᓯᐊᕐᕕᐅᖁᕙᕋ ᐃᓕᖕᓂᒃ ᐱᔪᓐᓇᕐᑎᑦᓯᓚᐅᕐᑐᖅ.” ᕉᑎᐅᓪᓕ ᓴᑭᓂ ᓁᐅᒥ ᐅᖃᐅᑎᕚ ᑲᑎᑦᓯᓚᐅᕐᓂᕋᕐᓗᓂ ᐳᐊᓯᐅᑉ ᐱᕈᕐᓰᕕᖁᑎᖓᓂᑦ.

²⁰ ᑕᕝᕙ ᓁᐅᒥᐅᑉ ᐅᑯᐊᓂ ᐅᖃᐅᑎᕚ, “ᐊᑕᓂᖅ ᑐᒃᓯᐊᕐᕕᒋᕙᕋ ᐳᐊᓯ ᓮᒻᒪᕐᑎᑕᐅᖁᓪᓗᒍ, ᐊᑕᓂᖅ ᐊᖏᕈᑎᒋᓯᒪᔭᒥᓂᒃ ᐱᑦᓯᐊᕐᓂᕐᒥᓂᒡᓗ ᐳᐃᒍᓚᐅᕐᓯᒪᖏᒻᒪᑦ ᐃᓅᔪᓄᑦ ᑐᖁᖓᔪᓄᓪᓗ.” ᓁᐅᒥᓗ ᐅᖃᒃᑲᓐᓂᕐᐳᖅ, “ᑖᓐᓇ ᐳᐊᓯ ᐅᐃᒋᓚᐅᕐᑕᒪ ᑭᖑᕚᖑᖃᑎᖏᑕ ᐃᓚᒋᖕᒪᒍ, ᐅᕙᑦᑎᓐᓂᒃ ᐰᕆᒃᓯᒋᐊᖃᕐᑐᑦ ᐃᓚᖓᑦ.”

²¹ ᑕᕝᕙ ᕉᑎ ᒧᐊᐱᒥᐅᑕᖅ ᐅᖃᕐᐳᖅ, “ᐊᒻᒪᑦᑕᐅᖅ ᐱᕈᕐᓰᕕᖕᒥᓂ ᑲᑎᑦᓰᓐᓇᖁᖅᑲᐅᕚᖓ ᐃᖅᑲᓁᔭᕐᑎᖁᑎᒥᓄᑦ ᐱᓇᓱᐊᖃᑕᐅᖁᓪᓗᖓ ᐱᕈᕐᑐᓂᒃ ᑲᑎᕐᓱᐃᔭᕇᓚᐅᖏᓐᓂᖏᓐᓂ.”

²² ᓁᐅᒥᐅᑉ ᐅᑯᐊᓂ ᕉᑎ ᐅᖃᐅᑎᕚ, “ᐳᐊᓯᐅᑉ ᐱᕈᕐᓰᕕᖁᑎᖓᓃᖃᑕᐅᖏᓐᓇᕈᕕᑦ ᐊᕐᓇᓂ ᐊᑲᐅᓂᕐᓴᐅᕗᖅ, ᓱᒃᑯᑕᐅᑐᐃᓐᓇᕆᐊᖃᕋᕕᑦ ᐱᕈᕐᓰᕕᐅᑉ ᐊᓯᐊᓄᑦ ᐱᓇᓱᐊᕆᐊᕐᑐᕋᓗᐊᕈᕕᑦ.”

²³ ᑍᒤᒻᒪᑦ ᕉᑎ ᑲᑎᑦᓯᖃᑕᐅᖏᓐᓇᓚᐅᕐᐳᖅ ᐱᕈᕐᑐᓂᒃ ᑲᑎᑦᓯᑎᓪᓗᒋᑦ ᐳᐊᓯᐅᑉ ᐱᓇᓱᐊᕐᑎᖏᓐᓄᑦ ᐊᕐᓇᓄᑦ, ᐱᕈᕐᑐᑦ ᓂᕿᒃᓮᑦ ᓂᐊᖂᔭᒃᓮᓪᓗ ᑲᑎᑕᐅᔭᕇᓚᐅᖏᓐᓂᖏᓐᓂ; ᕉᑎᓗ ᓴᑭᒥᓃᖏᓐᓇᓚᐅᕐᐳᖅ ᐱᓇᓱᐊᕐᑎᓪᓗᒍ.