ᕉᒪᒥᐅᓄᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎ ᐃᓄᖁᑎᖏᓪᓗ

¹ ᓱᓕᔪᒥᒃ ᐅᖃᕐᐳᖓ ᙭ᔅᑑᓯᒥ, ᓴᒡᓗᓇᖓ; ᐃᓱᒪᒪ ᐃᒃᐱᒋᔭᖓᑕ ᑐᑭᓯᑎᑉᐹᖓ ᐊᓂᕐᓂᐅᑉ ᐃᑦᔪᕐᓁᑦᑑᑉ ᓇᓗᓁᕐᓯᓂᖓᒍᑦ,

² ᕿᒃᓵᖕᓂᕐᔪᐊᖃᕋᒪ ᐃᓗᒃᑯᓪᓗ ᐋᓐᓂᐊᕈᑎᒋᓪᓗᒍ.

³ ᓇᖕᒥᓂᖅ ᐊᒡᓛᑦ ᓇᕐᕈᓇᕐᓯᑎᑕᐅᔪᒪᒐᔭᕐᐳᖓ ᙭ᔅᑑᓯᒥᓪᓘᓐᓃᑦ ᐊᕕᑎᑕᐅᖔᕐᓗᖓ ᐃᓅᖃᑎᒃᑲ ᐱᑦᔪᑎᒋᓪᓗᒋᑦ, ᔫᑎᐅᖃᑎᒃᑲ ᑎᒥᒃᑯᑦ ᐃᓚᒋᔭᒃᑲ.

⁴ ᑖᒃᑯᐊ ᐃᓴᕆᐊᓕᒥᐅᖑᕗᑦ; ᕿᑐᕐᖓᐅᓂᕐᒥᒡᓗ ᐱᖃᕐᐳᑦ, ᓂᕐᑐᕐᓇᕐᓂᕐᒥᒃ ᖃᐅᔨᑎᓯᒪᕔᑦ; ᐊᖏᖃᑎᒌᖕᓂᕐᒥᒡᓗ ᐱᑎᓯᒪᓪᓗᒋᑦ, ᐱᖁᔭᓂᒃ ᑐᓂᓯᕕᒋᓯᒪᕔᑦ, ᑐᒃᓯᐊᖃᑦᑕᕐᓂᕐᒥᒡᓗ ᐊᑐᕐᐳᑦ, ᐊᖏᕐᕕᒋᓯᒪᓪᓗᓂᖏᓪᓗ;

⁵ ᑭᖑᕚᕆᔭᐅᕗᑦ ᐱᒋᐊᕐᕕᐅᓚᐅᕐᑐᓄᑦ ᓯᕗᓕᕕᓂᑦᑎᓐᓄᑦ, ᔫᑎᐅᓪᓗᑎᒡᓗ, ᙭ᔅᑑᓯᐅᑉ ᑎᒥᑖᕐᓂᖓᓄᑦ ᐃᓅᖃᑎᒋᔭᐅᕗᑦ. ᑖᓐᓇ ᒎᑎᐅᔪᖅ ᑕᒤᓐᓄᑦ ᓂᕐᑐᕐᑕᐅᓕ ᐃᓱᖃᖏᑦᑐᒧᑦ. ᐋᒥᓐ.

⁶ ᒎᑎᐅᑉ ᐅᖃᐅᓯᖏᑦ ᓱᓕᖏᓐᓂᕋᕐᓗᒋᑦ ᐅᖃᓐᖏᓚᖓ; ᑕᒪᕐᒥᒃ ᐃᓴᕆᐊᓕᒥᐅᑦ ᑭᖑᕚᕆᖏᒻᒪᒋᑦ ᐃᓴᕆᐊᓔᑎᐅᔪᑦ.

⁷ ᐂᑉᕋᕼᐋᒻᓗ ᕿᑐᕐᖓᕆᔧᓐᓇᕆᓐᖏᓔᑦ ᑭᖑᕚᕆᔭᕋᓗᐊᓂ, ᒎᑎ ᐅᖃᕐᓯᒪᒐᓗᐊᕐᑎᓪᓗᒍ, “ᐂᓴᑭᒃᑯᑦ ᑭᖑᕚᑎᑦ ᐱᔪᒫᕐᐳᑦ.”

⁸ ᐅᓇ ᑐᑭᓕᒃ ᑎᒥᒃᑯᑦ ᑭᖑᕚᖑᔪᑑᖏᑦᑐᑦ ᒎᑎᐅᑉ ᕿᑐᕐᖓᕆᖕᒪᒋᑦ; ᐊᖏᕐᓯᒪᓂᒃᑯᓪᓕ ᕿᑐᕐᖓᐅᔪᑦ ᐂᑉᕋᕼᐋᒻᒧᑦ ᑭᖑᕚᖑᓂᕋᕐᑕᐅᖕᒪᑕ.

⁹ ᐊᖏᕈᑎ ᐃᒫᒃ ᐅᖃᕐᓯᒪᖕᒪᑦ, “ᒫᓐᓇᑐᑦ ᑍᒤᓪᓗᐊᓕᕐᑎᓪᓗᒍ ᐅᑎᕈᒫᕐᐳᖓ ᓵᕋ ᐃᕐᓂᖃᓕᕈᒫᕐᐳᖅ.”

¹⁰ ᑕᒪᓐᓇᑐᐊᖅ ᑍᒤᓐᖏᓚᖅ, ᕇᐱᑲᓕ ᕿᑐᕐᖓᕐᑖᕐᒪᑦ ᒪᕐᕉᖕᓂᒃ ᐊᖑᒻᒥᑦ ᐊᑕᐅᓯᕐᒥᑦ, ᓯᕗᓕᑦᑎᓐᓂᑦ ᐂᓴᑭᒥᑦ,

¹¹ ᓱᓕ ᐃᓅᓚᐅᕐᑎᓐᓇᒋᒃ ᐱᐅᔪᒥᒡᓘᓐᓃᑦ ᐱᐅᖏᑦᑐᒥᒡᓘᓐᓃᑦ ᓱᓕ ᐊᑐᓚᐅᕐᑎᓐᓇᒋᒃ, ᒎᑎᐅᑉ ᓂᕈᐊᕐᓯᓂᖓ ᕾᖁᔨᓂᕐᒥᒍᑦ ᑲᔪᓯᖁᓪᓗᒍ, ᐱᓂᐊᕐᓂᕐᒥᒃ ᐱᑦᔪᑎᖃᕐᑎᓐᓇᒍ ᕾᖁᔨᓂᖓᓕ ᐱᑦᔪᑎᒋᓪᓗᒍ,

¹² ᕇᐱᑲ ᐅᖃᐅᑦᔭᐅᓚᐅᕐᐳᖅ, “ᐊᖓᔪᒃᓯᐅᑉ ᓄᑲᓂ ᐱᔨᑦᓯᕈᒫᕐᐹ.”

¹³ ᑎᑎᕋᕐᓯᒪᖕᒪᑦ, “ᔧᑯ ᓇᒡᓕᒋᓚᐅᕐᐸᕋ, ᐄᓴᓕ ᐆᒥᒋᓪᓗᒍ.”

¹⁴ ᖃᓄᕐᓕ ᐅᖃᕐᑐᒃᓴᐅᓕᕐᐱᑖ? ᒎᑎᐅᑉ ᐱᓂᐊᕐᓂᖓ ᐸᓯᔭᒃᓴᐅᓂᖃᕐᐹ? ᑍᒤᖏᒻᒪᕆᒃᐳᖅ!

¹⁵ ᒨᓯᓯᒧᑦ ᐅᖃᓚᐅᕐᒪᑦ, “ᓂᑲᒋᔪᒫᕐᐸᒃᑲ ᓂᑲᒋᔪᒪᔭᒃᑲ, ᓇᒡᓕᒋᔪᒫᕐᐸᒃᑲᓗ ᓇᒡᓕᒋᔪᒪᔭᒃᑲ.”

¹⁶ ᑍᒤᒻᒪᑦ ᐃᓅᑉ ᐱᔪᒪᔭᖓᓂᒃ ᐱᑦᔪᑎᖃᓐᖏᓚᖅ ᐱᓇᓱᐊᓗᐊᕐᓂᖓᓂᒡᓘᓐᓃᑦ, ᒎᑎᐅᓪᓕ ᓂᑲᒍᓱᖕᓂᖓᓂᒃ ᑐᓐᖓᕕᖃᕐᐳᖅ.

¹⁷ ᒎᑎᐅᑉ ᐅᖃᐅᓯᖏᑦ ᐰᕉᒧᑦ ᐅᖃᕐᒪᑕ, “ᒪᑭᑎᓚᐅᕐᐸᒋᑦ ᐊᑐᕈᒪᓪᓗᑎᑦ ᐱᔪᓐᓇᕐᓂᕋ ᓴᖅᑭᑎᑦᓱᒪᓪᓗᒍ ᐃᓕᖕᓂᒃ ᐊᑐᕐᓗᖓ, ᐊᑎᕋ ᐅᖃᐅᑎᒋᔭᐅᖁᓪᓗᒍ ᓄᓇᕐᔪᐊᓕᒫᒥ.”

¹⁸ ᑍᒤᒻᒪᑦ ᒎᑎ ᓂᑲᒍᓱᒃᐳᖅ ᓂᑲᒋᔪᒪᔭᒥᓂᒃ, ᓯᑎᔫᑎᓪᓗᒋᓪᓗ ᐃᓱᒪᖏᑦ ᓯᑎᑎᑦᓱᒪᔭᓂ.

ᒎᑎᐅᑉ ᓂᓐᖓᖕᓂᖓ ᓂᑲᒍᓱᖕᓂᖓᓗ

¹⁹ ᐅᕙᓐᓄᑦ ᐅᖃᕋᔭᓕᕐᐳᓯ ᐃᒫᒃ, “ᓱᖕᒪᓖᓐᓇ ᓱᓕ ᓈᒻᒪᖏᑦᑐᓂᒃ ᓇᓂᓯᕙᒃᐹ? ᑭᐊᓗ ᐱᔪᒪᔭᖓ ᐊᑭᕋᕐᑐᕈᓐᓇᕐᐸᐅᒃ?”

²⁰ ᐃᓅᒃ, ᐃᕝᕕᓪᓕ ᑭᓇᐅᕖᑦ, ᒎᑎᒥᒃ ᑭᐅᒪᔪᓐᓇᕋᕕᑦ? ᒪᕐᕋᖅ ᓴᓇᔭᐅᔪᖅ ᓴᓇᔨᒥᓄᑦ ᐅᖃᕈᓐᓇᕐᐹ, “ᓱᖕᒪᑦ ᑍᒫᒃ ᓴᓇᕕᖔ?”

²¹ ᒪᕐᕋᕐᒥᒃ ᐃᓗᓕᖁᑎᓕᐅᕐᑐᖅ ᐃᓱᒪᒥᓂᒃ ᓴᓇᔭᕆᐊᖃᓐᖏᓛᖅ, ᒪᕐᕋᕐᒥᑦ ᑕᕝᕙᓐᖓᑦᓮᓐᓇᖅ ᐂᑉᐸᖓ ᐱᒻᒪᕆᐊᓗᖕᓄᑦ ᑭᓯᐊᓂ ᐊᑐᕐᑕᐅᔪᒃᓴᐅᓂᐊᕐᑎᓪᓗᒍ ᐂᑉᐸᖓᓗ ᖃᐅᑕᒫᕐᓯᐅᑕᐅᓗᓂ ᐊᑐᒐᒃᓴᓕᐊᕆᓗᒍ?

²² ᒎᑎᐅᑉ ᓂᓐᖓᖕᓂᓂ ᑕᑯᔭᐅᖁᒐᒥᐅᒃ ᐱᔪᓐᓇᕐᓂᓂᓗ ᖃᐅᔨᔭᐅᖁᒐᒥᐅᒃ, ᐃᓗᓕᖅᑯᑎᓕᐊᖑᓯᒪᔪᑦ ᐊᑯᓂ ᕿᓄᐃᓵᕈᑎᒋᕔᑦ ᓂᓐᖓᖕᓂᖓᓄᑦ ᐊᓯᕈᕐᑕᐅᔪᒃᓴᐅᓪᓗᑎᒃ ᓴᓇᔭᐅᓯᒪᔪᑦ,

²³ ᓂᕐᑐᕐᓇᕐᓂᕐᔪᐊᖓᑕ ᐊᒥᒐᖏᑦᑐᐊᓘᓂᖓ ᓇᓗᓁᕐᑕᐅᖁᓪᓗᒍ ᓂᑲᒋᔭᐅᔭᕆᐊᓕᖕᓄᑦ, ᐅᐸᓗᖕᒊᕈᑎᒋᓯᒪᔭᒥᓄᑦ ᓯᕗᓂᖓᒍᑦ ᓂᕐᑐᕐᓇᕐᓯᑎᑕᐅᓚᖁᓪᓗᒋᑦ.

²⁴ ᐅᕙᒍᑦᑕᐅᖅ ᕾᖁᓯᒪᕚᑎᒍᑦ, ᔫᑎᓂᑐᐊᖑᖏᑦᑐᖅ ᔫᑎᐅᖏᑦᑐᓂᓪᓕᑦᑕᐅᖅ.

²⁵ ᕼᐆᓯᐊᒃᑯᑦ ᐅᖃᕐᓯᒪᖕᒪᑦ, “ᐃᓄᖁᑎᒋᓚᐅᓐᖏᑕᒃᑲ ᐃᓄᖁᑎᓐᓂᒃ ᑍᓕᕈᒫᕐᐸᒃᑲ, ᓇᒡᓕᒋᔭᐅᓚᐅᕐᓯᒪᖏᑦᑐᓪᓗ ᓇᒡᓕᒋᔭᓐᓂᒃ ᑍᓕᕈᒫᕐᐸᒃᑲ.”

²⁶ “ᑕᕝᕙᓂᑦᓮᓐᓇᖅ ᐅᖃᐅᑦᔭᐅᕝᕕᕕᓂᕐᒥᖕᓂ, ‘ᐃᓄᖁᑎᒋᓐᖏᓚᑦᓯ,’ ᑍᔭᐅᓕᕈᒫᕐᐳᑦ ‘ᒎᑎᐅᑉ ᐆᒤᓐᓇᕐᑑᑉ ᕿᑐᕐᖓᖏᓐᓂᒃ.’”

²⁷ ᐂᓮᐊᓯ ᓂᓪᓕᐊᓚᐅᕐᐳᖅ ᐃᓴᕆᐊᓕᒥᐅᓄᑦ: “ᐃᓴᕆᐊᓕᒥᐅᑦ ᐃᓄᖏᑦ ᓯᐅᕋᕐᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ ᐅᓄᕐᑎᒋᒐᓗᐊᕐᐸᑕ, ᐊᒥᐊᒃᑯᑐᐊᖏᑦ ᐅᓄᖏᑦᑐᑦ ᐱᐅᓕᔭᐅᔪᒫᕐᐳᑦ.

²⁸ ᐊᑕᓂᖅ ᐊᑭᓂᐊᕈᒫᕐᒪᑦ ᓄᓇᕐᔪᐊᕐᒥᒃ ᓱᒃᑲᑦᑐᐊᓗᖕᒥᒃ ᖃᓄᐃᓕᔭᐅᒋᐊᓪᓚᕐᕕᖃᖏᑦᑐᒥᒃ.”

²⁹ ᐂᓮᐊᓯᓗ ᓇᓚᐅᑦᓯᓚᐅᕐᐳᖅ ᐅᖃᕐᓗᓂ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑭᖑᕚᕇᒃᓴᓕᐊᕆᓚᐅᖏᑉᐸᑎᒍᑦ, ᓱᑑᒪᒥᐅᑎᑐᑦ ᒍᒨᕋᒥᐅᑎᑐᓪᓗ ᑍᒤᑕᐅᒐᔭᓚᐅᕐᐳᒍᑦ.”

ᐃᓴᕆᐊᓕᒥᐅᑦ ᐅᖃᐅᓰᓪᓗ ᑐᓴᕈᒥᓇᕐᑐᑦ

³⁰ ᖃᓄᕐᓕ ᑕᕝᕙ ᐅᖃᕐᑐᒃᓴᐅᓕᕐᐱᑖ? ᔫᑎᐅᖏᑦᑐᑦ ᐃᓗᐊᕐᓯᑎᑕᐅᓂᕐᒥᒃ ᕿᓂᓚᐅᖏᑦᑐᑦ ᐃᓗᐊᕐᓯᑎᑕᐅᓯᒪᓕᕐᐸᑕ, ᑕᕝᕙ ᐃᓗᐊᕐᑑᓂᕋᕐᑕᐅᓂᕐᒥᑦ ᐅᒃᐱᕐᓂᑯᑦ ᐱᔪᒥᒃ.

³¹ ᐃᓴᕆᐊᓕᒥᐅᓪᓕ ᐃᓗᐊᕐᓯᑎᑕᐅᓂᕐᒥᒃ ᕿᓂᓚᐅᕐᑐᑦ ᐱᖁᔭᓂᒃ ᑐᓐᖓᕕᖃᕐᓂᒃᑯᑦ ᐃᓗᐊᕐᓯᑎᑕᐅᓚᐅᓐᖏᓚᑦ ᐱᖁᔭᑎᒍᑦ ᐱᔪᒥᒃ.

³² ᓱᖕᒪᑦ ᐃᓗᐊᕐᓯᑎᑕᐅᓚᐅᓐᖏᓚᑦ? ᐅᒃᐱᕐᓂᑯᑦ ᕿᓂᓚᐅᖏᒻᒪᑕ, ᐱᓂᐊᕐᓂᒃᑯᓪᓕ ᕿᓂᓚᐅᕐᒪᑕ. ᑍᒤᒻᒪᑦ ᐹᓪᓚᓚᐅᕐᐳᑦ ᐅᔭᕋᖕᒧᑦ ᓈᑎᑕᐅᓪᓗᑎᒃ.

³³ ᐊᒡᓚᖕᓂ ᑎᑎᕋᕐᓯᒪᖕᒪᑦ, “ᑕᑯᒋᑦ, ᓮᐅᓂᒥ ᐅᔭᕋᖕᒥᒃ ᐃᓕᓯᕗᖓ ᐃᓄᖕᓂᑦ ᐹᓪᓚᒍᑕᐅᔪᒫᕐᑐᒥᒃ, ᑖᒃᑯᓂᖓ ᐅᔭᕋᒃ ᐅᕐᕈᑎᑦᓯᔪᒫᕐᐳᖅ; ᑖᑦᓱᒧᖓᓗ ᐅᒃᐱᕐᑐᖅ ᑲᓐᖑᓱᒃᑎᑕᐅᓂᐊᓐᖏᓚᖅ.”