ᕉᒪᒥᐅᓄᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦᐃᓅᓯᖃᕐᓂᖅ ᐊᓂᕐᓂᕐᒥ 1 ᑍᒤᒻᒪᑦ ᑕᕝᕙ ᒫᓐᓇ ᐃᒋᑕᒃᓴᐅᔪᖃᕐᓂᐊᕈᓐᓃᕐᐳᖅ ᙭ᔅᑑᓯ ᔩᓱᓯᒦᑦᑐᓂᒃ. 2 ᙭ᔅᑑᓯ ᔩᓱᓯᒃᑯᑦ ᐊᓂᕐᓂᐅᑉ ᐃᓅᓯᖃᕐᑎᑦᓯᔫᑉ ᐱᖁᔭᖏᑎᒍᑦ ᕿᓚᕈᑦᔮᕐᑕᐅᒐᒪ ᐊᔪᕐᓂᐅᑉ ᑐᖂᓪᓗ ᐱᖁᔭᖏᓐᓂᑦ. 3 ᒎᑎ ᐱᓂᐊᕐᓯᒪᖕᒪᑦ ᐱᖁᔧᑦ ᐊᔪᕐᑕᖓᓂᒃ, ᑎᒥᐅᑉ ᐃᓕᖅᑯᓯᖓᓄᑦ ᓴᓐᖐᓕᑎᑕᐅᓯᒪᔪᓂᒃ, ᐃᕐᓂᓂ ᓇᖕᒥᓂᓂ ᑎᓕᓚᐅᕐᒪᒍ ᐃᓄᒃ ᐊᔪᕐᓂᓕᒃ ᐊᑦᔨᒋᓕᕐᓗᒍ ᐊᔪᕐᓂᒧᑦ ᑐᓂᕐᕈᑎᒃᓴᐅᖁᓪᓗᒍ, ᑍᒤᒻᒪᑦ ᐃᒋᑕᒃᓴᓐᖑᕐᑎᓚᐅᕐᐹ ᐃᓅᑉ ᐊᔪᕐᓂᖓ. 4 ᐸᓯᔭᒃᓴᐅᔪᓐᓃᕐᑎᑕᐅᓂᖅ ᐱᖁᔧᑦ ᓴᖅᑭᑎᑕᐅᖁᔭᖓᑦ ᓈᒻᒪᒃᓯᑎᑕᐅᖁᓪᓗᒍ ᐅᕙᑦᑎᓐᓂ, ᑎᒥᐅᑉ ᐱᔪᒪᓂᖏᑦ ᒪᓕᒃᓗᒋᑦ ᐃᓅᖏᓐᓇᑦᑕ, ᐊᓂᕐᓂᐅᓪᓕ ᐱᔪᒪᔭᖓᓂᒃ ᓈᓚᒃᐳᒍᑦ. 5 ᑎᒥᐅᑉ ᐱᔪᒪᔭᖓᓂᒃ ᓈᓚᒃᑐᑦ ᐃᓱᒪᖃᕐᒪᑕ ᑎᒥᐅᑉ ᐱᔪᒪᔭᖏᓐᓂᒃ; ᐊᓂᕐᓂᐅᓪᓕ ᐱᔪᒪᔭᖓᓂᒃ ᓈᓚᒃᑐᑦ ᐃᓱᒪᖃᕐᐳᑦ ᐊᓂᕐᓂᐅᑉ ᐱᔪᒪᔭᖏᓐᓂᒃ. 6 ᑎᒥᐅᑉ ᐱᔪᒪᔭᖓᓂᒃ ᓈᓚᖕᓂᖅ ᑐᖁᓐᓇᕐᒪᑦ, ᐊᓂᕐᓂᕐᒥᒡᓕ ᓈᓚᖕᓂᖅ ᐃᓅᓯᐅᕗᖅ ᐃᓱᒫᓗᓇᕐᑐᖃᕋᓂᓗ. 7 ᐃᓱᒪ ᑎᒥᐅᑉ ᐱᔪᒪᔭᖓᓂᒃ ᓈᓚᒃᑐᖅ ᒎᑎᒥᒃ ᐊᑭᕋᕐᑐᕐᒪᑦ; ᐃᒻᒥᓂᒃ ᑐᓂᔪᒪᓐᖏᓚᖅ ᒎᑎᐅᑉ ᐱᖁᔭᖏᓐᓄᑦ; ᐊᓱᐃᓛᒃ ᐊᔪᓪᓚᕆᒃᐳᖅ. 8 ᑎᒥᐅᑉ ᐱᔪᒪᔭᖏᓐᓂᒃ ᒪᓕᒃᑐᑦ ᒎᑎᒥᒃ ᖁᕕᐊᓱᒃᑎᑦᓯᔪᓐᓇᓐᖏᓚᑦ. 9 ᐃᓕᑦᓯᓕ ᑎᒥᐅᑉ ᐱᔪᒪᔭᖓᓃᓐᖏᓚᓯ, ᐊᓂᕐᓂᕐᒦᑉᐳᓯᓕ, ᒎᑎᐅᑉ ᐊᓂᕐᓂᖓ ᐃᓂᖃᕐᐸᑦ ᐃᓕᑦᓯᓐᓂ. ᙭ᔅᑑᓯᐅᑉ ᐊᓂᕐᓂᖓᓂᒃ ᐱᖃᖏᑦᑐᖅ ᑖᑦᓱᒧᖓ ᐱᖁᑎᒋᔭᐅᓐᖏᓚᖅ. 10 ᙭ᔅᑑᓯᓕ ᐃᓕᑦᓯᓐᓃᑉᐸᑦ, ᑎᒥᓯ ᑐᖁᖓᒐᓗᐊᕐᐳᖅ ᐊᔪᕐᓂᕐᒥ, ᐊᓂᕐᓂᓯᓕ ᐆᒪᕗᑦ ᐃᓗᐊᕐᑑᑎᑕᐅᓂᖅ ᐱᑦᔪᑎᒋᓪᓗᒍ. 11 ᑖᑦᓱᒪᓕ ᐊᓂᕐᓂᖓᑕ ᔩᓱᓯᒥᒃ ᐆᒻᒪᕐᑎᑦᓯᔫᑉ ᑐᖁᒥᑦ ᐃᓂᒋᒃᐸᓯ, ᙭ᔅᑑᓯ ᔩᓱᓯᒥᒃ ᐆᒻᒪᕐᑎᑦᓯᓚᐅᕐᑑᑉ ᑐᖁᒥᑦ ᑎᒥᓯ ᑐᖁᔪᒃᓮᑦ ᐃᓅᓯᑖᕐᑎᓐᓂᐊᕆᕔᑦ ᑖᑦᓱᒪ ᐊᓂᕐᓂᖓᒍᑦ ᐃᓗᑦᓯᓐᓃᑦᑐᒧᑦ. 12 ᑍᒤᒻᒪᑦ ᐅᒃᐱᕐᑑᖃᑎᒃᑲ ᐱᓂᐊᒐᒃᓴᖃᕐᐳᒍᑦ, ᑎᒥᑦᑕ ᐱᔪᒪᔭᖓᓅᖏᑦᑐᖅ, ᑍᒫᒡᓗ ᐃᓅᔪᒪᓂᕐᒨᖏᑦᑐᖅ. 13 ᑎᒥᐅᑉ ᐱᔪᒪᔭᖓ ᒪᓕᒡᓗᒍ ᐃᓄᒎᑦᓯ ᑐᖁᔪᒫᕐᐳᓯ, ᐊᓂᕐᓂᑯᓪᓕ ᑎᒥᐅᑉ ᐱᓂᐊᕐᓂᖏᑦ ᑐᖁᒃᑯᑦᓯᒋᑦ ᐃᓅᔪᒫᕐᐳᓯ. 14 ᒎᑎᐅᑉ ᐊᓂᕐᓂᖓᑕ ᑕᓯᐅᕐᑕᓕᒫᖏᑦ ᒎᑎᐅᑉ ᕿᑐᕐᖓᕆᖕᒪᒋᑦ. 15 ᐊᓂᕐᓂᕐᒥᒃ ᐱᑎᑕᐅᓯᒪᖏᓐᓇᑦᓯ ᑭᒡᒐᐅᑎᑦᓯᔪᒥᒃ ᓯᕘᕋᓂᕐᒧᑦ, ᐊᓂᕐᓂᕐᒥᒡᓕ ᑐᓂᓯᕕᐅᕗᓯ ᒎᑎᒧᑦ ᕿᑐᕐᖓᕆᔭᐅᑎᑦᓯᔪᒥᒃ. ᑖᑦᓱᒨᓇ ᓂᓪᓕᐊᕗᒍᑦ, “ᐋᐸ ᐊᑖᑖᒃ!” 16 ᐊᓂᕐᓂᖅ ᓇᖕᒥᓂᖅ ᐊᓂᕐᓂᑦᑎᓐᓄᑦ ᖃᐅᔨᑎᑦᓯᕗᖅ ᒎᑎᒧᑦ ᕿᑐᕐᖓᕆᔭᐅᓂᑦᑎᓐᓂᒃ. 17 ᕿᑐᕐᖓᕆᔭᐅᒍᑦᑕᓗ, ᑭᖑᕐᖑᑦᔨᔪᒃᓴᐅᓕᕐᐳᒍᑦ, ᒎᑎᐅᑉ ᐃᓄᖁᑎᒥᓄᑦ ᑭᖑᕐᖑᑎᔭᒃᓴᐅᑎᑕᖏᓐᓂᒃ ᙭ᔅᑑᓯᓗ ᑭᖑᕐᖑᑦᔨᖃᑎᒋᔪᒫᓕᕐᓗᒍᑦ, ᙭ᔅᑑᓯ ᐅᖁᒤᒃᓴᖃᑎᒋᕙᕗᑦ ᓂᕐᑐᕐᓇᕐᓯᑎᑕᐅᓂᖓᓂᒃᑕᐅᖅ ᐱᖃᑕᐅᔪᒫᖁᓪᓗᑕ. ᓯᕗᓂᑦᑎᓐᓂ ᐱᓐᓇᕐᓇᕐᓯᑎᑕᐅᔪᒫᕐᓂᖅ 18 ᐃᓱᒪᒋᒐᒃᑯ ᐅᖁᒤᑦᑐᒦᓐᓃᑦ ᒫᓐᓇ ᐊᑐᕐᑕᐅᔪᑦ ᐊᑦᔨᐅᑎᑕᒃᓴᐅᖏᒻᒪᑕ ᐱᓐᓇᕐᓇᕐᑐᕐᔪᐊᒧᑦ ᓴᖅᑭᑎᑕᐅᔪᒫᕐᑐᒧᑦ ᐅᕙᑦᑎᓐᓄᑦ. 19 ᐱᓐᖑᕐᑎᑕᐅᓯᒪᔪᓪᓕ ᐅᑕᖅᑭᕗᑦ ᕿᓚᓈᕐᓗᑎᒃ ᒎᑎᐅᑉ ᕿᑐᕐᖓᖏᑕ ᓇᓗᓁᕐᑕᐅᓂᒃᓴᖏᓐᓂᒃ; 20 ᐱᓐᖑᕐᑎᑕᐅᓯᒪᔪᑦ ᓱᓇᒃᓴᐅᖏᓐᓂᕐᒧᑦ ᑎᑭᑎᑕᐅᓚᐅᕐᒪᑕ, ᓇᖕᒥᓂᖅ ᐱᔪᒪᔭᒥᖕᓄᑦ ᐱᓇᑎᒃ ᑖᑦᓱᒪᓕ ᑍᒤᑎᓚᐅᕐᒪᒋᑦ ᓂᕆᐅᒋᔭᒃᓴᖃᖁᓪᓗᒋᑦ; 21 ᐱᓐᖑᕐᑎᓯᒪᔪᑦ ᕿᓚᕈᑦᔮᕐᑕᐅᔪᒫᕐᒪᑕ ᐊᔪᓕᕐᕕᒋᓯᒪᔭᒥᖕᓂᑦ ᓄᖑᔪᒫᕐᑐᒥᑦ ᐱᑎᑕᐅᓪᓗᑎᒡᓗ ᓂᕐᑐᕐᓇᕐᑐᕐᔪᐊᒧᑦ ᒎᑎᐅᑉ ᕿᑐᕐᖓᖏᑕ ᕿᓚᕈᑦᔮᕐᑕᐅᓯᒪᓂᖓᓂᒃ. 22 ᖃᐅᔨᒪᒐᑦᑕ ᐱᓐᖑᕐᑎᓯᒪᔪᓕᒫᑦ ᐋᓐᓂᐊᕐᑐᑐᑦ ᓂᓪᓕᐊᖃᑦᑕᕐᓯᒪᖕᒪᑕ ᐃᕐᓂᓱᒃᑐᑎᑐᑦ ᒫᓐᓇᒧᑦ ᑎᑭᓪᓗᒍ. 23 ᑖᒃᑯᐊᑐᐊᖑᖏᑦᑐᖅ, ᐅᕙᒍᓪᓕᑦᑕᐅᖅ, ᐊᓂᕐᓂᐅᑉ ᐱᕈᕐᑎᑕᖏᓐᓂᒃ ᓯᕗᓪᓕᕐᓂᒃ ᐱᓯᒪᔪᒍᑦ, ᐋᓐᓂᐊᔪᑐᑦ ᓂᓪᓕᐊᖃᑦᑕᕆᕗᒍᑦ ᐃᓗᑦᑎᒍᑦ ᐅᑕᖅᑭᓪᓗᑕ ᑎᒍᐊᕐᑖᖑᔪᒫᕐᓂᑦᑎᓐᓂᒃ, ᑎᒥᕗᑦ ᐱᐅᓕᔭᐅᓕᕐᐸᑕ. 24 ᓂᕆᐅᖕᓂᕐᒧᑦ ᑕᒪᑐᒧᖓ ᐱᐅᓕᔭᐅᓚᐅᕋᑦᑕ, ᓂᕆᐅᒋᔭᕗᓪᓕ ᑕᑯᒍᑦᑎᒍ ᓂᕆᐅᖕᓂᐅᔪᓐᓃᕐᒪᑦ. ᑭᓇᓕ ᑕᑯᓐᓇᕐᑕᒥᓂᒃ ᓂᕆᐅᒍᓐᓇᕐᐹ? 25 ᓂᕆᐅᒃᑯᑦᑕᓕ ᑕᑯᓐᓇᓐᖏᑕᑦᑎᓐᓂᒃ, ᕿᓄᐃᓵᕐᓗᑕ ᑕᕝᕙ ᐅᑕᖅᑭᕙᕗᑦ. 26 ᑍᒫᒃᑕᐅᖅ ᓴᓐᖐᓐᓂᑦᑎᓐᓂ ᐊᓂᕐᓂᐅᑉ ᐃᑲᔪᕐᐹᑎᒍᑦ; ᑐᒃᓯᐊᕈᑎᒋᔭᕆᐊᖃᕐᑕᑦᑎᓐᓂᒃ ᖃᓄᖅ ᓈᒻᒪᒃᑐᒥᒃ ᓇᓗᒐᑦᑕ, ᐊᓂᕐᓂᐅᓪᓕ ᑐᒃᓯᐅᑎᕚᑎᒍᑦ ᐊᓂᕐᓴᐅᒥᓂᒃᑯᑦ ᐊᒡᓛᑦ ᐅᖃᐅᓯᕆᔪᓐᓇᕋᔭᓐᖏᑕᑦᑎᓐᓂᒃ. 27 ᒎᑎᐅᓪᓗ ᐃᓗᑦᑎᓐᓂᒃ ᖃᐅᔨᓴᕐᑎᐅᔫᑉ ᐊᓂᕐᓂᐅᑉ ᐃᓱᒪᖓ ᖃᐅᔨᒪᕚ, ᐊᓂᕐᓂᖅ ᑐᒃᓯᐅᑦᔨᕙᖕᒪᑦ ᒎᑎᐅᑉ ᐃᓄᖁᑎᖏᓐᓂᒃ ᒎᑎᐅᑉ ᐱᔪᒪᔭᖓ ᒪᓕᒃᓗᒍ. 28 ᖃᐅᔨᒪᒐᑦᑕ ᑭᓱᑐᐃᓐᓁᑦ ᒎᑎᒥᒃ ᓇᒡᓕᒋᔭᖃᕐᑐᓄᑦ ᐱᐅᔪᒧᑦ ᐋᖅᑭᒃᑕᐅᕙᖕᒪᑕ, ᕾᖁᔭᐅᓯᒪᔪᓄᑦ ᒎᑎᐅᑉ ᐱᓇᓱᐊᕈᒪᔭᖓᓄᑦ. 29 ᓯᕗᓂᖓᒍᑦ ᓂᕈᐊᕐᓯᒪᔭᓂ ᒎᑎᐅᑉ ᕾᖁᓯᒪᖕᒪᒋᑦᑕᐅᖅ ᐃᕐᓂᕐᒥᓄᑦ ᐊᑦᔨᒋᔭᐅᓕᖁᓪᓗᒋᑦ, ᑖᓐᓇ ᐊᖓᔪᒃᖠᕐᐹᖑᖁᓪᓗᒍ ᐅᒃᐱᕐᑑᖃᑎᒌᑦ ᐊᒥᓱᑦ ᐊᑯᕐᖓᓐᓂ. 30 ᓯᕗᓂᖓᒍᓪᓗ ᓂᕈᐊᕐᓯᒪᔭᓂ ᕾᖁᓚᐅᕆᕔᑦ; ᕾᖁᔭᓂᓗ ᐸᓯᔭᒃᓴᐅᔪᓐᓃᕐᑎᓚᐅᕐᐰᑦ; ᐸᓯᔭᒃᓴᐅᔪᓐᓃᕐᑎᑕᓂᓗ ᓂᕐᑐᕐᓇᕐᓂᕐᒥᓂᒃ ᐃᓚᖏᐅᑎᑎᓚᐅᕆᕔᑦ. ᒎᑎᐅᑉ ᓇᒡᓕᖕᓂᖓ ᙭ᔅᑑᓯ ᔩᓱᓯᒥ 31 ᑕᒪᑐᒧᖓ ᑕᕝᕙ ᖃᓄᖅ ᐅᖃᕐᑐᒃᓴᐅᓕᕐᐱᑖ? ᒎᑎᐅᑉ ᐃᓚᒋᒃᐸᑎᒍᑦ, ᑭᐊ ᐊᑭᕋᕐᑐᕈᓐᓇᕐᐹᑎᒎᑦ? 32 ᑖᑦᓱᒪ ᓇᖕᒥᓂᖅ ᐃᕐᓂᓂ ᐊᓐᓂᕆᓇᒍ ᐅᕙᑦᑎᓐᓄᓕᒫᖅ ᑐᓂᓚᐅᕐᒪᒍ, ᑕᕝᕙᓖ ᑐᓂᓯᓂᐊᓐᖏᓛᑎᒍᑦ ᓱᓇᓕᒫᓂᒃ ᑖᑦᓱᒨᓇ? 33 ᒎᑎᐅᑉ ᓂᕈᐊᕐᓯᒪᔭᖏᑦ ᑭᐊ ᐊᑭᕋᕐᑐᕈᓐᓇᕐᐰᑦ? ᒎᑎ ᑖᓐᓇ ᐸᓯᔭᒃᓴᐅᔪᓐᓃᕐᑎᑦᓯᑎᓪᓗᒍ; 34 ᑭᓇ ᐃᒋᑕᒃᓴᓐᖑᕐᑎᑦᓯᔪᓐᓇᕐᐹ ᑕᑯᒋᑦ ᙭ᔅᑑᓯ ᔩᓱᓯᐅᑉ, ᑐᖁᓚᐅᕐᑑᑉ, ᑐᖁᒥᓪᓗ ᒪᑭᓚᐅᕐᑑᑉ, ᒎᑎᐅᓪᓗ ᑕᓕᕐᐱᐊᓃᑦᑑᑉ, ᑖᑦᓱᒪ ᑕᕝᕙ ᑐᒃᓯᐅᑎᖃᑦᑕᕐᐹᑎᒍᑦ. 35 ᑭᐊ ᐊᕕᑎᔪᓐᓇᕐᐹᑎᒍᑦ ᙭ᔅᑑᓯᐅᑉ ᓇᒡᓕᖕᓂᖓᓂᑦ? ᐃᓗᐊᖏᑦᔪᑎᒃᓴᖃᕐᓂᖅ ᐊᕕᑎᑦᓯᔪᓐᓇᕐᐹ, ᐅᕝᕙᓗ ᐅᖁᒤᒃᓴᕐᓂᖅ, ᐊᑭᕋᕐᑐᕐᑕᐅᓂᖅ, ᐅᕝᕙᓗ ᑳᖕᓇᕐᑐᕐᔪᐊᖅ, ᐋᓐᓄᕋᖃᖏᓐᓂᖅ ᐅᕝᕙᓗ ᑲᑉᐱᐊᓇᕐᑐᒦᓐᓂᖅ, ᑐᖁᑕᐅᓂᕐᓘᓐᓃᑦ? 36 ᑎᑎᕋᕐᓯᒪᖕᒪᑦ: “ᐱᑦᔪᑎᒋᓪᓗᑎᑦ ᐅᓪᓗᖅ ᓈᓪᓗᒍ ᑐᖁᒦᑎᑕᐅᕗᒍᑦ; ᓰᐱᑎᑐᑦ ᑐᖁᑕᐅᔭᕐᑐᕐᑐᑎᑐᑦ ᐱᔭᐅᓪᓗᑕ.” 37 ᑕᒪᒃᑯᐊᓕ ᐊᑐᕐᑍᓐᓇᕆᒐᓗᐊᕐᓗᒋᑦ ᓵᓚᖃᕐᑎᑕᐅᓪᓚᕆᒃᐳᒍᑦ ᑖᑦᓱᒨᓇ ᓇᒡᓕᒋᔨᑦᑎᒍᑦ. 38 ᖁᓚᖏᑦᓯᐊᕋᒪ ᑖᑦᓱᒪ ᓇᒡᓕᒍᓱᖕᓂᖓᓂᑦ ᓱᓇᒧᓪᓘᓐᓃᑦ ᐊᕕᑎᑕᐅᔪᓐᓇᖏᓐᓇᑦᑕ, ᑐᖁᒨᓪᓘᓐᓃᑦ, ᐃᓅᓯᕐᒧᓪᓘᓐᓃᑦ, ᐂᖏᓕᓄᓪᓘᓐᓃᑦ, ᕿᓚᖕᒥᓘᓐᓃᑦ ᐊᖓᔪᖅᑳᖑᔪᓄᑦ, ᒫᓐᓇᓗ ᐊᑐᕐᑕᑦᑎᓐᓄᑦ, ᐊᑐᕈᒫᕐᑕᑦᑎᓐᓄᓪᓘᓐᓃᑦ, ᐱᔪᓐᓇᕐᓂᐅᔪᓄᓪᓗ, 39 ᐳᕐᑐᓂᕐᔫᓪᓘᓐᓃᑦ, ᐃᑎᓂᕐᔫᓪᓘᓐᓃᑦ, ᐱᓐᖑᕐᑎᓯᒪᔪᓄᓪᓘᓐᓃᑦ ᓱᓇᑐᐃᓐᓇᕐᓄᑦ, ᑕᒪᒃᑯᓄᖓᑦ ᐊᕕᑎᑕᐅᔪᓐᓇᓐᖏᓐᓇᑦᑕ ᒎᑎᐅᑉ ᓇᒡᓕᖕᓂᖓᓂᑦ ᙭ᔅᑑᓯ ᔩᓱᓯᒥ ᐊᑕᓂᑦᑎᓐᓃᑦᑐᒥᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society