ᕉᒪᒥᐅᓄᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᔪᕐᓂᕐᒧᑦ ᑐᖁᖓᓂᖅ ᐃᓅᓂᕐᓗ ᙭ᔅᑑᓯᒥᒃ ᐃᓚᖃᕐᓂᒃᑯᑦ

¹ ᖃᓄᕐᓕ ᐅᖃᕐᓂᐊᓕᕐᐱᑖ? ᐊᔪᕐᓂᕐᒦᖏᓐᓇᕐᑐᒃᓴᐅᕕᑖ? ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐊᖏᒡᓕᒃᑲᓐᓂᖁᓪᓗᒎ?

² ᑍᒤᑦᑐᓐᓇᖏᑦᑐᖅ! ᐅᕙᒍᑦ ᐊᔪᕐᓂᕐᒧᑦ ᑐᖁᓯᒪᔪᒍᑦ, ᓱᓕ ᐃᓅᔪᒃᓴᐅᒋᕕᑖ ᐊᔪᕐᓂᕐᒥ?

³ ᖃᐅᔨᒪᓐᖏᓚᓰ ᑕᒪᑦᑕ ᙭ᔅᑑᓯ ᔩᓱᓯᒧᑦ ᐹᑉᑎᑕᐅᓯᒪᔪᒍᑦ ᑐᖁᖓᓄᑦ ᐹᑉᑎᑕᐅᓯᒪᒐᑦᑕ?

⁴ ᐃᓗᕕᕐᑕᐅᖃᑎᒋᓯᒪᕙᕗᑦ ᑐᖁᒧᑦ ᐹᑉᑎᑕᐅᓂᒃᑯᑦ, ᙭ᔅᑑᓯᑦᑕᐅᖅ ᐆᒻᒪᕐᑎᑕᐅᖕᒪᑦ ᑐᖁᒥᑦ ᐊᑖᑕᐅᑉ ᓂᕐᑐᕐᓇᕐᓂᕐᔪᐊᖓᒍᑦ, ᐅᕙᒍᑦᑕᐅᖅ ᐃᓅᓯᕐᒥ ᓄᑖᒥ ᐃᓅᔪᓐᓇᕐᓯᖁᓪᓗᑕ.

⁵ ᑕᕝᕙ ᑍᒫᒃ ᑐᖁᖃᑎᒋᓯᒪᒍᑦᑎᒍ ᐊᑕᐅᓯᓐᖑᖃᑎᒋᓗᒍ, ᑖᑦᓱᑐᓇᕐᑕᐅᖅ ᖁᓚᕐᓇᖏᑦᑐᒥᒃ ᒪᑭᑦᓱᒫᕆᕗᒍᑦ ᐊᑕᐅᓯᓐᖑᖃᑎᒋᓗᒍ.

⁶ ᖃᐅᔨᒪᒐᑦᑕ ᐃᓅᓯᑐᖃᕗᖅ ᙭ᔅᑑᓯᐅᑉ ᑭᑭᐊᒃᑐᕐᑕᐅᖃᑎᒋᓚᐅᕐᒪᒍ ᓴᓐᓂᖓᔪᓕᖕᒥ ᑎᒥᐅᑉ ᐊᔪᕐᑐᓕᔪᒪᓂᖓ ᓵᓚᐅᖁᓪᓗᒍ, ᕿᓚᒃᓱᕐᑕᐅᓯᒪᔪᓐᓃᖁᓪᓗᑕᓗ ᐊᔪᕐᓂᕐᒧᑦ.

⁷ ᑕᕝᕙ ᑐᖁᓯᒪᔪᖅ ᕿᓚᕈᑦᔮᕐᑕᐅᕗᖅ ᐊᔪᕐᓂᕐᒥᑦ.

⁸ ᙭ᔅᑑᓯᓕ ᑐᖁᖃᑎᒋᓯᒪᒍᑦᑎᒍ, ᐅᒃᐱᕐᐳᒍᑦᑕᐅᖅ ᐃᓅᖃᑎᒋᔪᒫᕋᑦᑎᒍ.

⁹ ᖃᐅᔨᒪᕗᒍᑦ ᙭ᔅᑑᓯ ᑐᖁᒥᑦ ᒪᑭᑎᑕᐅᔪᖅ ᑐᖁᒃᑲᓐᓂᕐᓂᐊᕈᓐᓃᕐᒪᑦ; ᑐᖁ ᐱᔪᓐᓇᕐᓂᖃᕈᓐᓃᕐᒪᑦ ᑖᑦᓱᒧᖓ.

¹⁰ ᑐᖁᒐᒥ ᐊᔪᕐᓂᕐᒧᑦ ᐊᑕᐅᓯᐊᕐᓗᓂ ᑐᖁᕗᖅ; ᑐᖁᒃᑲᓐᓂᕐᓂᐊᕈᓐᓃᕐᓗᓂ, ᐃᓅᓯᕐᓕ ᐃᓅᓯᕆᔭᖓ ᐃᓅᓯᕆᕚ ᒎᑎᒧᑦ.

¹¹ ᑍᒫᒃᑕᐅᖅ ᐃᓕᑦᓯᓐᓂᒃ ᐃᓱᒪᒋᔪᒃᓴᐅᕗᓯ ᐊᔪᕐᓂᕐᒧᑦ ᑐᖁᓯᒪᓂᑦᓯᓐᓂᒃ ᐃᓅᓗᓯᓗ ᒎᑎᒧᑦ ᙭ᔅᑑᓯ ᔩᓱᓯᒥ.

¹² ᑍᒤᒻᒪᑦ ᐊᔪᕐᓂᖅ ᐊᐅᓚᑦᓯᔨᐅᔪᓐᓃᕐᓕ ᑎᒥᑦᓯᓐᓂ ᑐᖁᔪᒃᓴᒥ, ᑎᒥᑦᓯ ᐱᔪᒪᕕᒡᔪᐊᕐᓂᖏᑦ ᓈᓚᒍᓐᓁᕐᓯᒋᒃ.

¹³ ᐊᕙᑎᓯᓗ ᐊᔪᕐᑐᓕᑦᑍᓕᑦᔪᑎᒋᓕᕐᓯᐅᒃ ᐱᐅᖏᑦᑐᒧᑦ ᐊᖅᑯᑕᐅᖁᓇᒋᑦ, ᐃᓕᑦᓯᓐᓂᒡᓕ ᑐᓂᓕᕆᑦᓯ ᒎᑎᒧᑦ ᑕᓯᐅᕐᑕᐅᓯᒪᔪᑎᑐᑦ ᑐᖁᒥᑦ ᐃᓅᓯᕐᒧᑦ, ᐊᕙᑎᓯᓗ ᑐᓂᓯᒋᒃ ᒎᑎᒧᑦ ᐊᑐᕐᑕᐅᖁᓪᓗᒋᑦ ᐃᓗᐊᕐᑐᓕᓂᕐᒧᑦ.

¹⁴ ᐊᔪᕐᓂᖅ ᐱᔪᓐᓇᕐᓂᖃᕈᓐᓃᕐᒪᑦ ᐃᓕᑦᓯᓐᓄᑦ, ᐱᖁᔭᓄᑦ ᐱᓯᒪᔭᐅᔪᓐᓃᕋᑦᓯ ᒎᑎᐅᓪᓕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᐱᓯᒪᔭᐅᓕᕐᐳᓯ.

ᐃᓗᐊᕐᑐᓕᓂᕐᒧᑦ ᑭᒡᒐᕆᔭᐅᓂᖅ

¹⁵ ᖃᓄᕐᓕ ᑕᕝᕙ ᐊᔪᕐᑐᓕᑐᐃᓐᓇᑐᒃᓴᐅᕕᑖ, ᐱᖁᔭᓂᑦ ᐱᓯᒪᔭᐅᔪᓐᓃᕋᑦᑕ ᒎᑎᐅᓪᓕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᔪᐊᖓᓄᑦ ᐱᓯᒪᔭᐅᓕᕋᑦᑕ? ᑍᒤᑦᑐᓐᓇᖏᓚᖅ!

¹⁶ ᖃᐅᔨᒪᓐᖏᓚᓰ ᑐᓂᒍᑦᓯ ᐃᓕᑦᓯᓐᓂᒃ ᑭᓇᑐᐃᓐᓇᕐᒧᑦ ᑭᒡᒐᑎᑐᑦ ᒪᓕᑦᓯᐊᕐᓂᐊᕐᑐᑎᑐᑦ, ᑭᒡᒐᐅᓕᕐᐳᓯ ᑕᕝᕙ ᓈᓚᒃᑕᑦᓯᓐᓄᑦ, ᐊᔪᕐᓂᕐᒧᓪᓘᓐᓃᑦ ᑐᖁᑎᑦᓯᔪᒧᑦ, ᐅᕝᕙᓗ ᓈᓚᖕᓂᕐᒧᑦ, ᐃᓗᐊᕐᑐᓐᖑᕐᑎᑦᓯᔪᒧᑦ?

¹⁷ ᒎᑎ ᖁᔭᒋᔭᐅᓕ, ᐊᔪᕐᓂᕐᒧᑦ ᑭᒡᒐᐅᓚᐅᕐᑐᓯ ᓈᓚᑦᓯᐊᓕᕐᓯᒪᒐᑦᓯ ᐊᔪᐃᓐᓇᕐᓗᓯ ᐊᔪᕆᕐᑐᐃᑦᔪᑕᐅᓚᐅᕐᑐᓂᒃ ᐃᓕᑦᓯᓐᓄᑦ.

¹⁸ ᐊᔪᕐᓂᕐᒥᑦ ᕿᓚᕈᑦᔮᕐᑕᐅᓯᒪᓂᑦᓯᓐᓄᑦ, ᐃᓗᐊᕐᑐᓕᓂᕐᒧᑦ ᑭᒡᒐᕆᔭᐅᓕᕐᓯᒪᒐᑦᓯ.

¹⁹ ᐃᓄᑐᐃᓐᓇᕐᑎᑐᑦ ᐅᖃᕐᐳᖓ, ᓴᓐᖐᑦᑑᓂᓯ ᐱᑦᔪᑎᒋᓪᓗᒍ. ᐊᕙᑎᓯ ᑐᓂᓯᒪᓚᐅᕋᑦᓯᒋᒃ ᓴᓗᒪᖏᑦᑐᒧᑦ ᐊᔪᕐᑐᓕᓂᕐᒥᒡᓗ ᐊᖏᓕᕙᓪᓕᐊᑎᑦᓯᓪᓗᓯ ᐱᓇᓱᐊᕐᓂᑦᓯᓐᓄᑦ, ᒫᓐᓇᓕ ᐊᕙᑎᓯ ᑐᓂᓕᕐᓯᒋᒃ ᐃᓗᐊᕐᑐᓕᓂᕐᒧᑦ ᐃᑦᔪᕐᓁᑎᑕᐅᖁᓪᓗᒋᑦ.

²⁰ ᐊᔪᕐᓂᕐᒧᑦ ᑭᒡᒐᕆᔭᐅᑎᓪᓗᓯ, ᐊᑲᐅᔪᒧᑦ ᐊᐅᓚᑕᐅᓚᐅᖏᓐᓇᑦᓯ.

²¹ ᓱᓇᒥᒡᓕ ᑖᒃᑯᓇᓐᖓᑦ ᐱᕙᓪᓕᕈᑎᒃᓴᖃᕐᐱᓰ ᒫᓐᓇ ᑲᓐᖑᓇᕐᓂᕋᓕᕐᑕᑦᓯᓐᓂᒃ? ᑕᒪᒃᑯᐊ ᐃᓱᖃᕐᒪᑕ ᑐᖁᒥᒃ.

²² ᒫᓐᓇᓕ ᐊᔪᕐᓂᕐᒥᑦ ᕿᓚᕈᑦᔮᕐᑕᐅᓯᒪᓕᕋᑦᓯ ᒎᑎᒧᓪᓗ ᑭᒡᒐᐅᓕᕐᓗᓯ, ᐊᑭᓕᕐᑕᐅᕗᓯ ᑕᕝᕙ ᐃᑦᔪᕐᓁᑎᑕᐅᓂᕐᒥᒃ ᐃᓱᐊᓂᓗ ᐃᓅᓯᕐᒥᒃ ᓄᖑᓱᐃᑦᑐᒥᒃ.

²³ ᐊᔪᕐᓂᐅᑉ ᐊᑭᓕᐅᑖ ᑕᕝᕙ ᑐᖁ, ᒎᑎᐅᓪᓕ ᑐᓂᕐᕈᑖ ᐊᑭᖃᖏᑦᑐᖅ ᑕᕝᕙ ᐃᓅᓯᖅ ᓄᖑᓱᐃᑦᑐᖅ ᙭ᔅᑑᓯ ᔩᓱᓯᒥ ᐊᑕᓂᑦᑎᓐᓂ.