ᕉᒪᒥᐅᓄᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᒧᑦ ᐸᓯᔭᒃᓴᐅᖏᓐᓂᕋᕐᑕᐅᓂᖅ

¹ ᑍᒤᒻᒪᓪᓕ ᒫᓐᓇ ᒎᑎᒧᑦ ᐸᓯᔭᒃᓴᐅᖏᓐᓂᕋᕐᑕᐅᔪᒍᑦ ᐅᒃᐱᕐᓂᒃᑯᑦ, ᒎᑎᒧᑦ ᐃᓱᒫᓘᑎᖃᕈᓐᓃᕐᐳᒍ ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ.

² ᑖᑦᓱᒨᓇ ᐱᕕᒃᓴᖃᓕᕋᑦᑕ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᑕᕝᕙᓂ ᒫᓐᓇ ᓇᔪᕐᑕᑦᑎᓐᓂ, ᖁᕕᐊᓲᑎᖃᕐᐳᒍᓪᓗ ᓂᕆᐅᖕᓂᕐᒥᒃ ᒎᑎᐅᑉ ᓂᕐᑐᕐᓇᕐᓂᕐᔪᐊᖓᓂᒃ ᐱᖃᑕᐅᔪᓐᓇᓕᕐᓂᑦᑎᓐᓂᒃ.

³ ᑕᒪᑐᒥᖓᑐᐊᖑᖏᑦᑐᖅ, ᐊᒃᓱᕈᕐᑎᑕᐅᓂᑦᑎᓐᓂᒡᓕ ᖁᕕᐊᓲᑎᖃᕐᐳᒍᑦ, ᖃᐅᔨᒪᒐᑦᑕ ᐊᒃᓱᕈᕐᑎᑕᐅᓂᖅ ᕿᓄᐃᓵᕐᓂᕐᒥᒃ ᐱᑎᑦᓯᖕᒪᑦ.

⁴ ᕿᓄᐃᓵᕐᓂᕐᓗ ᐃᓕᖅᑯᓯᑦᓯᐊᕆᖕᓂᕐᒥᒃ ᐱᑎᑦᓯᕗᖅ, ᐃᓕᖅᑯᓯᑦᓯᐊᕆᖕᓂᕐᓗ ᓂᕆᐅᖕᓂᕐᒥᒃ ᐱᑎᑦᓯᕗᖅ,

⁵ ᓂᕆᐅᖕᓂᐅᓪᓗ ᑕᒪᑐᒪ ᐅᒡᒍᐊᕐᑎᓐᖏᓛᑎᒍᑦ, ᒎᑎᐅᑉ ᓇᒡᓕᖕᓂᓂ ᐃᓗᑦᑎᓐᓄᑦ ᑯᕕᖕᒪᒍ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ ᑖᑦᓱᒨᓇ ᑐᓂᕐᕈᓯᐊᕆᔭᑦᑎᒍᑦ.

⁶ ᓴᓐᖐᑦᑑᑎᓪᓗᑕ ᓱᓕ, ᐊᑲᐅᓈᑦᓯᐊᕐᑐᒥᒃ ᙭ᔅᑑᓯ ᑐᖁᑕᐅᑦᔪᑎᖃᓚᐅᕐᐳᖅ ᐊᔪᕐᑐᓕᔪᓂᒃ.

⁷ ᐃᓗᐊᕐᑐᓕᔪᖅ ᐱᑦᔪᑎᒋᓗᒍ ᑐᖁᔪᒪᔪᖃᕋᔭᓐᖏᓚᖅ; ᐃᒻᒪᖄᓕ ᐃᓄᑦᓯᐊᕙᒃ ᐱᑦᔪᑎᒋᓗᒍ ᑐᖁᔪᒪᔪᖃᑐᐃᓐᓇᕆᐊᖃᕋᓗᐊᕐᐳᖅ.

⁸ ᒎᑎᐅᓪᓕ ᓇᒡᓕᖕᓂᓂ ᐅᕙᑦᑎᓐᓄᑦ ᓴᖅᑭᑎᓚᐅᕐᐹ ᓱᓕ ᐊᔪᕐᑐᓕᔨᐅᑎᓪᓗᑕ ᙭ᔅᑑᓯᐅᑉ ᑐᖁᑦᔪᑎᒋᓚᐅᕐᐹᑎᒍᑦ.

⁹ ᑍᒤᒻᒪᓪᓕ, ᒫᓐᓇ ᐸᓯᔭᒃᓴᐅᔪᓐᓃᕐᑎᑕᐅᕗᒍᑦ ᑖᑦᓱᒪ ᐊᐅᖓᓄᑦ, ᐊᖏᓂᕐᓴᒥᒡᓗ ᑖᑦᓱᒨᓇ ᐱᐅᓕᔭᐅᔪᒫᕐᐳᒍᑦ ᒎᑎᐅᑉ ᓂᓐᖓᐅᓯᖓᓂᑦ.

¹⁰ ᒎᑎᒥᒃ ᐊᑭᕋᕐᑐᕐᑎᐅᓚᐅᕐᑐᒍᑦ ᒫᓐᓇ ᒎᑎᒥᒃ ᐃᓚᓐᓈᖃᕐᓂᕐᒧᑦ ᐅᑎᕐᑎᑕᐅᓯᒪᓕᕐᐳᒍᑦ ᐃᕐᓂᖓᑕ ᑐᖁᖓᒍᑦ, ᐊᖏᓂᕐᓴᒥᒡᓕ ᒫᓐᓇ ᐃᓚᓐᓈᖃᕐᓂᕐᒧᑦ ᐅᑎᕐᑎᑕᐅᓯᒪᔪᒍᑦ ᐱᐅᓕᔭᐅᔪᒫᓕᕐᐳᒍᑦ ᑖᑦᓱᒪ ᐃᓅᓯᖓᒍᑦ.

¹¹ ᑕᒪᓐᓇᑐᐊᖑᓐᖏᓚᕐᓕ, ᒎᑎᒥᒡᓕ ᖁᕕᐊᓲᑎᖃᕐᐳᒍᑦ ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ, ᑖᑦᓱᒨᓇ ᒫᓐᓇ ᐅᑎᕐᑎᑕᐅᓯᒪᓕᕋᑦᑕ ᒎᑎᒧᑦ.

ᐋᑕᒥ ᙭ᔅᑑᓯᓗ

¹² ᑍᒤᒻᒪᑦ ᐊᔪᕐᓂᖅ ᓯᓚᕐᔪᐊᕐᒧᑦ ᑎᑭᓯᒪᕗᖅ ᐃᓄᒃᑯᑦ ᐊᑕᐅᓯᒃᑯᑦ, ᑐᖁᓗ ᑎᑭᓯᒪᓪᓗᓂ ᐊᔪᕐᓂᒃᑯᑦ. ᑍᒤᒻᒪᑦ ᑐᖁ ᐃᓄᓕᒫᓄᑦ ᑎᑭᓯᒪᕗᖅ, ᐃᓄᓕᒫᑦ ᐊᔪᕐᑐᓕᓯᒪᖕᒪᑕ.

¹³ ᐊᔪᕐᓂᖅ ᓯᓚᕐᔪᐊᕐᒦᓚᐅᕐᐳᖅ ᐱᖁᔭᖃᓚᐅᖅᑳᕐᑎᓐᓇᒍ, ᐱᖁᔭᖃᖏᑦᑐᓂᓪᓕ ᐊᔪᕐᓂᖅ ᐃᓱᒪᒋᔭᐅᓐᖏᓚᖅ.

¹⁴ ᑐᖁ ᐊᐅᓚᑦᓯᓚᐅᕐᐳᖅ ᐋᑕᒥᒥᑦ ᒨᓯᓯ ᑎᑭᓪᓗᒍ, ᐊᒡᓛᑦ ᐋᑕᒥᐅᑉ ᓈᓚᖏᓐᓂᖓᑐᑦ ᐱᖏᑦᑑᒐᓗᐊᓄᑦ, ᐋᑕᒥᓕ ᑎᑭᑦᑐᒃᓴᒧᑦ ᐊᑦᔨᑐᐃᓐᓇᐅᕗᖅ.

¹⁵ ᑐᓂᕐᕈᑦ ᐊᑭᖃᖏᑦᑐᖅ ᐊᔪᕐᑐᓕᓂᕐᓗ ᐊᑦᔨᒌᓐᖏᓚᒃ. ᐊᒥᓱᑦ ᑐᖁᓯᒪᖕᒪᑕ ᐃᓅᑉ ᐊᑕᐅᓯᐅᑉ ᐊᔪᕐᑐᓕᓂᖓᓄᑦ. ᐊᖏᓂᕐᓴᒥᒡᓕ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᑐᓂᕐᕈᑎᖓᓗ ᐊᑭᖃᖏᑦᑐᖅ ᐃᓄᒃᑯᑦ ᐊᑕᐅᓯᒃᑯᑦ ᔩᓱᓯ ᙭ᔅᑑᓯᒃᑯᑦ ᐅᓄᕐᑐᓄᑦ ᐱᓯᒪᕗᖅ.

¹⁶ ᑐᓂᕐᕈᑎᐅᑉ ᐊᑭᖃᖏᑦᑑᑉ ᐱᑎᑦᓯᓂᖓ ᐊᑦᔨᖃᓐᖏᓚᖅ ᐃᓅᑉ ᐊᑕᐅᓯᐅᑉ ᐊᔪᕐᑐᓕᓂᕐᒥᓄᑦ ᐱᑎᑦᓯᓂᖓᓂᒃ. ᐊᔪᕐᑐᓕᓂᐅᓪᓕ ᐊᑕᐅᓯᐅᑉ ᐃᖅᑲᕐᑐᕐᑕᐅᓂᖓ ᐃᒋᑕᒃᓴᓐᖑᕐᑎᑦᓯᖕᒪᑦ, ᑐᓂᕐᕈᓪᓕ ᐊᑭᖃᖏᑦᑐᖅ ᐊᔪᕐᑐᓕᓃᑦ ᐅᓄᕋᓗᐊᕐᑎᓪᓗᒋᑦ ᐸᓯᔭᒃᓴᐅᔪᓐᓃᕐᑎᑦᓯᕗᖅ.

¹⁷ ᐃᓅᑉ ᐊᑕᐅᓯᐅᑉ ᐊᔪᕐᑐᓕᓂᖓᒍᑦ, ᑐᖁ ᐊᐅᓚᑦᓯᓚᐅᕐᐳᖅ ᑖᑦᓱᒨᓇ ᐃᓄᒃᑯᑦ ᐊᑕᐅᓯᒃᑯᑦ, ᐊᖏᓂᕐᓴᒥᒡᓕ ᑖᒃᑯᐊ ᒎᑎᐅᑉ ᐱᔪᓐᓇᕐᑎᑦᓯᓂᕐᒥᓄᑦ ᐊᒥᒐᖏᑦᑐᒥᒃ ᐱᑎᑕᐅᔪᑦ, ᐃᓗᐊᕐᓯᑎᑕᐅᔪᓪᓗ ᑐᓂᕐᕈᑎᒃᑯᑦ ᐊᑭᖃᖏᑦᑐᒃᑯᑦ, ᐊᐅᓚᑦᓯᔪᒫᕐᐳᑦ ᐃᓅᓯᕐᒥ ᐃᓄᒃᑯᑦ ᐊᑕᐅᓯᒃᑯᑦ ᔩᓱᓯ ᙭ᔅᑑᓯᒃᑯᑦ.

¹⁸ ᐃᓅᑉ ᐊᑕᐅᓯᐅᑉ ᐊᔪᕐᑐᓕᓂᖓ ᐃᓄᓕᒫᓂᒃ ᐃᒋᑕᒃᓴᓐᖑᕐᑎᑦᓯᓚᐅᕐᒪᑦ, ᑍᒫᒃᑕᐅᖅ ᐃᓅᑉ ᐊᑕᐅᓯᐅᑉ ᐃᓗᐊᕐᑑᓂᖓᒍᑦ ᐃᓗᐊᕐᑐᓕᔪᓐᖑᕐᑎᑦᓯᕗᖅ ᐃᓅᓯᖃᓕᕐᑎᑦᓯᓪᓗᓂᓗ ᐃᓄᓕᒫᓂᒃ.

¹⁹ ᐃᓅᑉ ᐊᑕᐅᓯᐅᑉ ᓈᓚᖏᓐᓂᖓᑕ ᐊᒥᓱᑦ ᐊᔪᕐᑐᓕᔪᓐᖑᕐᑎᓚᐅᕐᒪᒋᑦ, ᑍᒫᒃᑕᐅᖅ ᐃᓅᑉ ᐊᑕᐅᓯᐅᑉ ᓈᓚᖕᓂᖓᑕ ᐊᒥᓱᑦ ᐃᓗᐊᕐᑐᓕᔪᓐᖑᕐᑎᑦᓱᒫᕐᐰᑦ.

²⁰ ᐱᖁᔭᖅ ᓴᖅᑭᑎᑕᐅᓚᐅᕐᐳᖅ ᐊᔪᕐᑐᓕᓂᐅᑉ ᐊᖏᔪᓂᖓ ᓇᓗᓁᕐᑕᐅᒃᑲᓐᓂᖁᓪᓗᒍ; ᐊᔪᕐᑐᓕᓂᕐᓕ ᐊᖏᒡᓕᖕᒪᑦ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐊᖏᓂᕐᓴᒥᒃ ᐱᓇᓱᐊᓕᓚᐅᕐᐳᖅ.

²¹ ᑕᕝᕙ ᐊᔪᕐᓂᐅᑉ ᐊᐅᓚᑦᓯᓂᖓ ᑐᖁᓐᓇᕐᑐᒥᒃ ᓴᖅᑭᑎᑦᓯᓚᐅᕐᒪᑦ, ᑍᒫᒃᑕᐅᖅ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐊᐅᓚᑦᓯᔨᐅᓕᕆᕗᖅ ᐃᓗᐊᕐᑐᓕᔪᓐᖑᕐᑎᑕᐅᓂᕐᒧᑦ, ᐃᓅᓯᖃᕐᓇᕐᑐᑎᒥᒃ ᐃᓱᖃᖏᑦᑐᒧᑦ ᔩᓱᓯ ᙭ᔅᑑᓯᒃᑯᑦ ᐊᑕᓂᑦᑎᒍᑦ.