ᕉᒪᒥᐅᓄᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉᕋᕼᐋᒻ ᐊᑦᔨᐅᑎᑕᐅᓂᖓ

¹ ᐂᑉᕋᕼᐋᒻ ᓯᕗᓕᕆᔭᕗᑦ ᖃᓄᖅ ᐅᖃᐅᓯᕆᔪᓐᓇᕐᐱᑎᒎ? ᓱᓇᒥᒃ ᑎᒥᒃᑯᑦ ᓇᓂᓯᓚᐅᕐᐸ?

² ᐂᑉᕋᕼᐋᒻᓕ ᐱᓂᐊᑦᓯᐊᕐᓂᕐᒥᓄᑦ ᐸᓯᔭᒃᓴᐅᔪᓐᓃᕐᑎᑕᐅᓚᐅᕈᓂ, ᐃᒻᒥᓂᒃ ᓂᕐᑐᕈᑎᒃᓴᖃᕋᔭᓚᐅᕐᐳᖅ, ᓂᕐᑐᕐᓇᑎᑕᐅᒐᔭᓐᖏᓚᕐᓕ ᒎᑎᐅᑉ ᓵᖓᓂ.

³ ᖃᓄᕐᓕ ᐊᒡᓔᑦ ᐅᖃᕐᐹᑦ? “ᐂᑉᕋᕼᐋᒻ ᒎᑎ ᐅᒃᐱᕆᕚ, ᑕᒪᑐᒧᖓ ᒎᑎᐅᑉ ᐃᓗᐊᕐᑑᓂᕋᓚᐅᕐᐹ.”

⁴ ᐃᓄᒃ ᐱᓇᓱᐊᕐᓂᕐᒥᓄᑦ ᑮᓇᐅᔭᕐᑖᕐᐸᖕᒪᑦ, ᑮᓇᐅᔭᕐᑖᖏᓪᓗ ᑐᓂᕐᕈᓯᐊᑐᐃᓐᓇᐅᓂᕋᕐᑕᐅᓐᖏᓚᑦ ᐊᑭᓕᕐᑕᐅᓂᒃᓴᒥᓄᑦ ᐱᖕᒪᒋᑦ.

⁵ ᐃᓄᒡᓕ ᐅᒃᐱᕐᑐᖅ ᐱᓇᓱᐊᕐᓂᕐᒥᓄᑦ ᐱᓇᓂ; ᑕᑎᖃᕐᓗᓂᓗ ᒎᑎᒥᒃ ᐱᐅᖏᑦᑐᓕᔪᓂᒃ ᐸᓯᔭᒃᓴᐅᔪᓐᓃᕐᑎᑦᓯᔪᒥᒃ, ᐅᒃᐱᕐᓂᕐᒥᓄᑦ ᐃᓗᐊᕐᑑᓂᕋᕐᑕᐅᕗᖅ.

⁶ ᑍᕕᑎᑦᑕᐅᖅ ᐅᖃᕆᕗᖅ ᑍᒫᑦᓮᓐᓇᖅ, ᐃᓄᒃ ᖁᕕᐊᓱᒍᑎᒃᓴᖃᕐᓂᕋᕐᓗᒍ ᒎᑎᒧᑦ ᐃᓗᐊᕐᑑᓂᕋᕐᑕᐅᔪᖅ, ᐱᓂᐊᑦᓯᐊᕐᓂᕐᒧᑦ ᐱᑦᔪᑎᖃᕋᓂ:

⁷ “ᓮᒪᓇᕐᑐᒦᐳᑦ ᑍᒃᑯᐊ ᐱᐅᖏᑦᑐᓕᓂᖏᓐᓂᒃ ᐃᓱᒪᒋᔪᓐᓁᕐᕕᐅᔪᑦ, ᐊᔪᕐᓂᖏᓪᓗ ᐃᓱᒪᓇᕈᓐᓃᕐᑎᑕᐅᔪᑦ;

⁸ ᐃᓄᒃ ᓮᒪᓇᕐᑐᒦᐳᖅ, ᐊᑕᓂᐅᑉ ᐊᔪᕐᓂᖃᕈᓐᓃᕐᓂᕋᕐᑕᖓ.”

⁹ ᖁᕕᐊᓱᒍᑎᒃᓴᖃᕐᓂᖅ ᑕᒪᓐᓇ ᑍᕕᑎᐅᑉ ᐅᖃᐅᓯᕆᔭᖓ ᑭᐱᔭᐅᓯᒪᔪᓄᑐᐊᖅ ᑐᕌᖓᕚ ᐅᕝᕙᓗ ᑭᐱᔭᐅᓯᒪᖏᑦᑐᓄᑦ ᑐᕌᖓᒋᕚ? ᐃᒫᒃ ᐅᖃᕋᑦᑕ ᐂᑉᕋᕼᐋᒻ ᐅᒃᐱᕐᓂᒃᑯᑦ ᐃᓗᐊᕐᓯᑎᑕᐅᓂᕋᑕᐅᓚᐅᕐᐳᖅ.

¹⁰ ᓱᓇ ᐱᑦᔪᑎᒋᓪᓗᒍ ᑍᒤᓚᐅᕐᐹ? ᑍᒤᓚᐅᕐᐹ ᑭᐱᔭᐅᓯᒪᓕᕐᑎᓪᓗᒍ ᐅᕝᕙᓗ ᑭᐱᔭᐅᓚᐅᕐᑎᓐᓇᒍ? ᑭᐱᔭᐅᔭᕇᕐᓯᒪᑎᓪᓗᒍ ᑍᒤᓚᐅᓐᖏᓚᖅ, ᑭᐱᔭᐅᓚᐅᕐᑎᓐᓇᒍᓕ ᑍᒤᓚᐅᕐᐳᖅ.

¹¹ ᑭᐱᔭᐅᓂᖓᓕ ᓇᓗᓁᒃᑯᑕᐅᓚᐅᕐᐳᖅ ᓇᓗᓁᕐᓯᑦᔪᑕᐅᓪᓗᓂᓗ ᐃᓗᐊᕐᑑᓂᕋᕐᑕᐅᖕᒪᑦ ᐅᒃᐱᕐᓂᖅ ᐱᑦᔪᑎᒋᓪᓗᒍ, ᑭᐱᔭᐅᓚᐅᕋᓂ ᓱᓕ ᐱᓚᐅᕐᑕᒥᓄᑦ ᑕᒤᓐᓄᑦ ᐅᒃᐱᕐᑐᓄᑦ ᐊᑖᑕᒋᔭᐅᖁᓪᓗᒍ ᑭᐱᔭᐅᓯᒪᖏᑦᑑᒐᓗᐊᓄᑦ ᐃᓗᐊᕐᑑᓂᕋᕐᑕᐅᓂᕐᒥᒃ ᐱᖃᑕᐅᖁᓪᓗᒋᑦ.

¹² ᐊᑖᑕᒋᔭᐅᒋᕗᕐᓗ ᑭᐱᔭᐅᓯᒪᔪᓄᑦ ᑭᐱᔭᐅᓯᒪᓂᖏᑦ ᐱᑦᔪᑎᒋᓇᒋᑦ ᐅᒃᐱᕐᓂᒥᒍᓪᓕ ᐂᑉᕋᕼᐋᒻᑐᑦ ᓯᕗᓕᕕᓂᑦᑎᑐᑦ ᑭᐱᔭᐅᓚᐅᖅᑳᕋᓂ ᐃᓅᓯᕆᓚᐅᕐᑕᖓᓂᒃ ᒪᓕᖕᓂᖏᓐᓄᑦ.

ᒎᑎᐅᑉ ᐊᖏᕐᓯᒪᓂᖓ ᐱᑖᕆᔭᐅᕗᖅ ᐅᒃᐱᕐᓂᕐᒧᑦ ᑲᔪᓯᓂᒃᑯᑦ

¹³ ᐂᑉᕋᕼᐋᒻ ᑭᖑᕚᖏᓪᓗ ᒎᑎᐅᑉ ᐊᖏᕐᕕᒋᓚᐅᕐᐰᑦ, ᓯᓚᕐᔪᐊᕐᒥᒃ ᐱᒃᓴᖃᕐᑎᓐᓂᐊᕐᓂᕋᕐᓗᒋᑦ ᐱᖁᔭᓂᒃ ᓈᓚᑦᓯᐊᕐᓂᕐᒥᖕᓄᑦ ᐱᑦᔪᑎᖃᕋᑎᒃ ᐃᓗᐊᕐᑑᓂᕋᕐᑕᐅᓂᕐᒥᒍᓪᓕ ᐅᒃᐱᕐᓂᕐᒥᖕᓄᑦ.

¹⁴ ᐱᖁᔭᓂᒡᓕ ᒪᓕᑦᓯᐊᕐᓂᕐᒧᑦ ᒎᑎᐅᑉ ᐊᖏᕐᓯᒪᓂᖓᓂᒃ ᐱᑎᑕᐅᒐᔭᕐᐸᑕ, ᐅᒃᐱᕐᓂᖅ ᑕᕝᕙ ᐊᑐᕈᓐᓃᕐᐳᖅ, ᒎᑎᐅᓪᓗ ᐊᖏᕐᓯᒪᓂᖓ ᐊᑐᕈᓐᓃᕐᓗᓂ.

¹⁵ ᐱᖁᔧᑦ ᓈᓚᒃᑕᐅᖏᑉᐸᑕ ᒎᑎᐅᑉ ᓂᓐᖓᐅᓯᖓᓂᒃ ᓴᖅᑭᑎᑦᓯᖕᒪᑕ, ᐱᖁᔭᖃᖏᑦᑐᓂᓕ ᐱᖁᔭᓂᒃ ᓈᓚᖏᓐᓂᕐᑕᖃᓐᖏᓚᖅ.

¹⁶ ᑍᒤᒻᒪᑦ ᒎᑎᐅᑉ ᐊᖏᕈᑖ ᐅᒃᐱᕐᓂᕐᒥᒃ ᑐᓐᖓᕕᖃᕐᐳᖅ, ᓇᓗᓁᕐᓯᒪᑦᓯᐊᖁᓪᓗᒍ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᑭᓯᐊᓂ ᐱᔭᐅᔪᓐᓇᕐᓂᖓᓂᒃ ᐂᑉᕋᕼᐋᒻ ᑭᖑᕚᓕᒫᖏᓐᓄᑦ, ᐱᖁᔭᓂᒃ ᒪᓕᒃᑐᓄᑦ ᑖᒃᑯᓄᖓᑑᖏᑦᑐᖅ ᐊᓯᖏᓐᓄᓪᓗᑦᑕᐅᖅ ᐂᑉᕋᕼᐋᒻᑐᑦ ᐅᒃᐱᕐᓂᖃᕐᑐᓄᑦ: ᐂᑉᕋᕼᐋᒻ ᑕᒪᑦᑕ ᐊᑖᑕᒋᒐᑦᑎᒍ,

¹⁷ ᐊᒡᓔᑦ ᐅᖃᕐᒪᑕ, “ᐃᓅᖃᑎᒌᒡᔪᐊᓄᑦ ᐊᒥᓱᓄᑦ ᐊᑖᑕᒋᔭᐅᓕᕐᑎᑉᐸᒋᑦ.” ᒎᑎᐅᑉ ᓵᖓᓂ ᑖᑦᓱᒪ ᐅᒃᐱᕐᕕᒋᔭᖓᑕ, ᑖᑦᓱᒪ ᑐᖁᖓᔪᑦ ᐆᒻᒪᕐᑎᑉᐰᑦ ᐱᖁᔨᓂᕐᒥᓄᓪᓗ ᓴᖅᑭᔮᓚᐅᖏᑦᑐᓂᒃ ᓴᖅᑭᑎᑦᓯᓯᒪᓪᓗᓂ.

¹⁸ ᓂᕆᐅᖕᓂᖃᓚᐅᕐᐳᖅ ᐅᒃᐱᕐᓂᒃᑯᑦ ᓂᕆᐅᒋᔭᒃᓴᑕᖃᕐᑎᓐᓇᒍ, ᐊᑖᑕᒋᔭᐅᔪᒫᕐᓂᕐᒥᓂᒃ ᐃᓅᖃᑎᒌᒡᔪᐊᓄᑦ ᐊᒥᓱᓄᑦ; ᐅᖃᐅᑦᔭᐅᓚᐅᕋᒥ, “ᑍᒫᒃᑕᐅᖅ ᑭᖑᕚᑎᑦ ᐅᓄᕐᑐᕐᔪᐊᖑᔪᒫᕐᐳᑦ.”

¹⁹ ᐅᒃᐱᕐᓂᕐᒥ ᓴᓐᖐᓕᓚᐅᓐᖏᓚᖅ ᑎᒥᓂ ᐃᓱᒪᒋᓗᒍ, ᑐᖁᖓᔪᑐᑦ ᑍᒤᑲᓴᓕᕋᓗᐊᕐᓗᓂ ᐊᕐᕌᒍᖃᓕᓚᐅᕋᒥ 100 ᖃᓂᒋᔮᓂ, ᓄᓕᐊᓂ ᓵᕋ ᐃᓱᒫᓘᑎᒋᓚᐅᓐᖏᓛ ᕿᑐᕐᖏᓱᐃᑦᑑᑎᓪᓗᒍ.

²⁰ ᐅᒃᐱᕈᓱᑎᐊᖏᓐᓂᕐᒥᒃ ᓴᖑᑦᔪᑎᖃᓚᐅᓐᖏᓚᖅ ᒎᑎᐅᑉ ᐊᖏᕈᑎᒋᓯᒪᔭᖓᓂᒃ, ᐅᒃᐱᕐᓂᒥᒍᑦ ᓴᓐᖏᔫᓕᕐᐸᓪᓕᐊᓚᐅᕐᐳᖅ ᒎᑎᒥᒃ ᓂᕐᑐᕐᓇᕐᑎᑦᓯᓂᕐᒥᓄᑦ,

²¹ ᓱᓕᔪᕐᓴᑦᓯᐊᓚᐅᕐᐳᖅ ᒎᑎ ᐊᖏᕈᑎᒋᓯᒪᔭᒥᓂᒃ ᑲᔪᓯᑦᓯᐊᕈᓐᓇᕐᓂᖓᓂᒃ.

²² ᑍᒤᒻᒪᑦ ᐂᑉᕋᕼᐋᒻ ᐅᒃᐱᕐᓂᒃᑯᑦ, “ᐃᓗᐊᕐᓯᑎᑕᐅᓂᕋᑕᐅᓚᐅᕐᐳᖅ.”

²³ ᐅᖃᐅᓯᕐᓕ ᐃᒤᓕᔪᖅ, “ᐃᓗᐊᕐᑑᓂᕋᕐᑕᐅᓚᕐᐳᖅ.” ᑎᑎᕋᕐᑕᐅᓯᒪᕗᖅ ᑖᓐᓇᑐᐊᖅ ᐱᑦᔪᑎᒋᓇᒍ,

²⁴ ᐅᕙᒍᓪᓕᑦᑕᐅᖅ ᐱᑦᔪᑎᒋᓪᓗᑕ. ᒎᑎᒧᑦ ᐃᓗᐊᕐᑑᓂᕋᕐᑕᐅᖁᓪᓗᑕ ᑖᑦᓱᒧᖓ ᐅᒃᐱᕐᑐᒍᑦ ᑐᖁᒥᑦ ᒪᑭᑎᑦᓯᓯᒪᓂᖓᓂᒃ ᐊᑕᓂᑦᑎᓐᓂᒃ ᔩᓱᓯᒥᒃ,

²⁵ ᑖᓐᓇ ᑐᖁᑕᐅᓚᐅᕐᐳᖅ ᐊᔪᕐᓂᕗᑦ ᐱᑦᔪᑎᒋᓪᓗᒋᑦ ᒪᑭᑎᑕᐅᓚᐅᕆᕗᖅ ᒎᑎᒧᑦ ᐸᓯᔭᒃᓴᐅᔪᓐᓃᖁᓪᓗᑕ.