ᕉᒪᒥᐅᓄᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᓱᖁᓯᔪᐃᑦᑑᓂᖓ 1 ᔫᑎᑦ ᓱᓇᒥᒃ ᑕᕝᕙ ᐱᖃᕐᓂᕐᓴᐅᕚᑦ ᐅᕝᕙᓗ ᑭᐱᓯᒪᓂᖅ ᓱᓇᒧᑦ ᐊᑐᕐᐸ? 2 ᑕᒤᑎᒍᑦ ᐊᑐᕐᓂᖃᕐᐳᖅ. ᓯᕗᓪᓕᕐᒥᒃ ᒎᑎᐅᑉ ᐅᖃᐅᓯᓪᓚᕆᖏᓐᓂᒃ ᑐᓂᓯᕕᐅᓯᒪᕗᑦ. 3 ᐃᓚᖏᓪᓕ ᐅᒃᐱᕐᓂᖃᑦᓯᐊᖏᑉᐸᑕ? ᒎᑎᐅᑉ ᓱᖁᓯᔪᐃᑦᑑᓂᖓ ᐊᑐᕈᓐᓃᕐᑎᒐᔭᕐᐸᑦᔫᒃ? 4 ᑍᒤᒐᔭᓐᖏᓚᖅ! ᒎᑎ ᓱᓕᔫᕗᖅ ᐃᓄᐃᑦ ᓴᒡᓗᑐᔫᑎᓪᓗᒋᑦ, ᐃᒫᒃ ᑎᑎᕋᕐᓯᒪᖕᒪᑦ, “ᓱᓕᓃᑦ ᓇᓗᓁᕐᑕᐅᓕ ᐅᖃᐅᓯᒃᑯᑦ, ᐃᖅᑲᕐᑐᕐᑕᐅᓕᕈᕕᑦ ᓵᓚᖃᖁᓪᓗᑎᑦ.” 5 ᐊᔪᕐᑐᓕᓂᕗᓪᓕ ᓴᖅᑭᑎᑦᓯᒃᑲᓐᓂᕐᐸᑕ ᒎᑎᐅᑉ ᓈᒻᒪᒃᑐᑑᓂᖓᓂᒃ, ᖃᓄᖅ ᐅᖃᕐᑐᒃᓴᐅᕕᑕ? ᒎᑎᒧᑦ ᓈᒻᒪᓈᖏᑦᑐᒥᒃ ᓂᓐᖓᒡᕕᐅᓂᕋᕈᓐᓇᕐᐱᑖ? (ᐃᓄᐃᑦ ᐃᓱᒪᑦᔪᓯᖓᒍᑦ ᒫᓐᓇ ᐅᖃᕐᐳᖓ.) 6 ᑍᒤᑦᓱᓐᓇᓐᖏᓚᖅ! ᖃᓄᕐᓕ ᒎᑎᐅᑉ ᓯᓚᕐᔪᐊᕐᒥᐅᑦ ᐃᖅᑲᕐᑐᕋᔭᕐᐰᑦ? 7 ᐅᕙᖓᓕ ᓱᓕᖏᓐᓂᓐᓄᑦ ᒎᑎᐅᑉ ᓱᓕᑦᓯᐊᕐᓂᖓ ᐊᖏᒡᓕᒃᐸᑦ ᓂᕐᑐᕐᓇᕐᓂᕐᔪᐊᖑᓕᕐᓗᓂ, ᓱᖕᒪᓪᓖ? ᓱᓕ ᐃᒋᑕᒃᓴᐅᒐᔭᕐᐳᖓ ᐊᔪᕐᑐᓕᓂᓐᓄᑦ? 8 ᓱᖕᒪᓪᓕ ᐅᖃᓐᖏᓚᒍᑦ, ᓱᓕᖏᑦᑐᒥᒃ ᐅᖃᕐᓂᕐᓘᑕᐅᑎᓪᓗᑕ, ᐃᓚᖏᓐᓂᓪᓗ ᐅᖃᕐᓂᕋᕐᑕᐅᒐᑦᑕ, “ᐊᔪᕐᑐᓕᓚᐅᕐᑕ ᐱᐅᔪᖅ ᓴᖅᑭᖁᓪᓗᒍ?” ᑍᒤᓕᔪᑦ ᐃᒋᑕᐅᑦᔪᑎᒃᓴᖓᑦ ᓈᒻᒪᓈᕐᐳᖅ. ᐃᓄᖕᒥᒃ ᒎᑎᒧᑦ ᓈᒻᒪᒋᔭᐅᔪᖃᓐᖏᓚᖅ 9 ᖃᓄᕐᓕ ᑍᒪ; ᔫᑎᐅᔪᒍᑦ ᐱᐅᓂᕐᓴᐅᕕᑖ? ᑍᒤᓐᖏᓚᖅ! ᐅᖃᕇᓚᐅᕐᐳᖓ ᔫᑎᓪᓗ ᒍᕇᑭᓪᓗ ᐊᑦᔨᒌᖕᓂᕋᕐᓗᒋᑦ ᐊᔪᕐᓂᒧᑦ ᓵᓚᐅᓯᒪᔪᐃᓐᓇᐅᖕᒪᑕ, 10 ᑎᑎᕋᕐᓯᒪᖕᒪᑦ: “ᐱᐅᔪᒥᒃ ᐱᓇᓱᐊᕐᑐᖃᓐᖏᓚᖅ, ᐊᑕᐅᓯᕐᒥᒡᓘᓐᓃᑦ; 11 ᑐᑭᓯᔪᖃᓐᖏᓚᖅ, ᒎᑎᒥᒡᓘᓐᓃᑦ ᕿᓂᕐᑐᖃᓐᖏᓚᖅ. 12 ᑕᒪᕐᒥᒃ ᒎᑎᒥᒃ ᑐᓄᑦᑎᓯᒪᖕᒪᑕ, ᑕᒪᕐᒥᒡᓗ ᑕᒻᒪᕐᓯᒪᕗᑦ; ᐱᐅᔪᒥᒃ ᐱᓇᓱᐊᕐᑐᖃᓐᖏᓚᖅ ᐊᑕᐅᓯᕐᒥᒡᓘᓐᓃᑦ. 13 ᖃᓂᖏᑦ ᐃᓗᕕᕐᑎᑐᑦ ᒪᑐᐃᕐᓯᒪᔪᑎᑐᑦ ᑍᒤᑉᐳᑦ; ᐅᖃᕐᒥᖕᓄᑦ ᓯᓔᕐᕆᒃᓯᓂᕐᒥᒃ ᐱᓇᓱᐊᕐᐳᑦ, ᖁᒡᓗᒋᐊᑦ ᑐᖁᓐᓇᕐᑐᖏᑦ ᖃᓂᖏᓐᓃᑉᐳᑦ. 14 ᖃᓂᖏᑦ ᑕᑕᑉᐳᑦ ᐅᖃᕐᓂᕐᓗᖕᓂᕐᒥᒃ ᖃᓯᓕᓇᕐᑐᒥᒃ. 15 ᐱᓱᒃᐳᑦ ᑐᐊᕕᕐᖢᑎᒃ ᐱᕕᒃᓴᕐᓯᐅᕐᓗᑎᒃ ᑐᖁᑦᓯᔪᒪᒧᑦ. 16 ᐊᖅᑯᓵᕐᑕᕕᓂᖏᑦ ᐊᓯᕈᕐᓯᒪᕗᑦ ᕿᒃᓵᖕᓇᕐᑑᓪᓗᑎᒡᓗ, 17 ᓮᒪᓂᖃᑦᓯᐊᕐᓂᕐᒥᒃ ᖃᐅᔨᒪᓐᖏᓚᑦ, 18 ᒎᑎᒥᒡᓗ ᓯᕘᕋᓂᕐᒥᒃ ᖃᐅᔨᒪᓐᖏᓚᑦ.” 19 ᒫᓐᓇ ᖃᐅᔨᒪᕗᒍᑦ ᐱᖁᔧᑦ ᐅᖃᐅᑦᔨᖕᒪᑕ ᐱᖁᔭᖃᕐᑐᓄᑦ, ᐃᓄᓕᒫᑦ ᑭᐅᑦᔪᑎᒃᓴᖃᖁᓇᒋᑦ, ᓯᓚᕐᔪᐊᕐᒥᐅᓕᒫᑦ ᐃᖅᑲᕐᑐᕐᑕᐅᓕᕐᐸᑕ ᒎᑎᒧᑦ. 20 ᑍᒤᒻᒪᑦ ᒎᑎᐅᑉ ᓵᖓᓂ ᓈᒻᒪᒋᔭᐅᔪᓐᓇᕐᑐᖃᕐᓂᐊᓐᖏᓚᖅ ᐱᖁᔭᓂᒃ ᒪᓕᖕᓂᒃᑯᑦ, ᐱᖁᔭᑎᒍᑦ ᖃᐅᔨᑎᑕᐅᒐᑦᑕ ᐊᔪᕐᓂᕐᒥᒃ. ᒎᑎᒧᑦ ᐸᓯᔭᒃᓴᐅᔪᓐᓃᕐᓂᖅ ᐅᒃᐱᕐᓂᒃᑯᑦ 21 ᒎᑎᒧᓪᓕ ᐸᓯᔭᒃᓴᐅᔪᓐᓃᕐᓂᖅ ᓇᓗᓇᕈᓐᓃᕐᑎᑕᐅᕗᖅ ᐱᖁᔭᑦ ᐊᓯᐊᒍᑦ, ᐱᖁᔧᑦ ᓇᓚᐅᑦᑍᔪᓪᓗ ᑎᑎᕋᕐᓯᒪᔭᖏᑦ ᑕᒪᑐᒥᖓ ᓇᓗᓁᕐᓯᓯᒪᕗᑦ. 22 ᒎᑎᒧᑦ ᓈᒻᒪᒋᔭᐅᓕᕐᓂᖅ ᐱᔭᒃᓴᐅᕗᖅ ᐅᒃᐱᕐᑐᓕᒫᓄᑦ, ᐅᒃᐱᕐᓂᒃᑯᑦ ᔩᓱᓯ ᙭ᔅᑑᓯᒧᑦ. 23 ᐊᑦᔨᒌᖏᑦᑐᖃᖏᒻᒪᑦ ᐃᓘᓐᓇᑦᓯᐊᑎᒃ ᐊᔪᕐᑐᓕᓯᒪᖕᒪᑕ ᒎᑎᐅᓪᓗ ᓂᕐᑐᕐᓇᕐᓂᕐᔪᐊᖓᓄᑦ ᑎᑭᐅᑎᔪᓐᓁᓪᓕᓪᓗᑎᒃ, 24 ᐊᑭᖃᖏᑦᑐᒥᒃ ᐸᓯᔭᒃᓴᐅᔪᓐᓃᕐᑎᑕᐅᕗᑦ ᑖᑦᓱᒪ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᑐᓂᕐᕈᑖᓄᑦ, ᐱᐅᓕᔭᐅᓂᒃᑯᑦ ᙭ᔅᑑᓯ ᔩᓱᓯᒃᑯᑦ. 25 ᑖᓐᓇ ᒎᑎᐅᑉ ᑐᓂᕚ ᑐᓂᕐᕈᑎᒋᓪᓗᒍ ᑐᖁᖓᒍᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ, ᑖᑦᓱᒧᖓ ᐅᒃᐱᕐᑐᑦ. ᒎᑎ ᑍᒤᓕᐅᓚᐅᕐᐳᖅ ᓈᒻᒪᓈᑦᓯᐊᕐᓂᓂ ᓴᖅᑭᑎᑦᓱᒪᓪᓗᒍ, ᑍᒪᓐᖓᑦ ᕿᓄᐃᓵᕈᑎᒋᓚᐅᕋᒥᒋᑦ ᓯᕗᕐᖓᒍᑦ ᐊᔪᕐᑐᓕᓂᕆᔭᐅᓚᐅᕐᑐᑦ; 26 ᑍᒤᓕᐅᓚᐅᕐᐳᖅ ᓈᒻᒪᓈᕐᑐᒥᒃ ᐃᖅᑲᕐᑐᐃᓂᓂ ᓴᖅᑭᑎᑦᓱᒪᓪᓗᒍ, ᐸᓯᔭᒃᓴᐅᔪᓐᓃᕐᑎᑦᓯᓪᓗᓂᓗ ᐅᒃᐱᓕᕐᑐᒥᒃ ᔩᓱᓯᒧᑦ. 27 ᖃᓄᕐᓕ ᓂᕐᑐᕐᓇᐅᑎᒃᓴᖃᕐᐱᑖ? ᓂᕐᑐᕐᓇᐅᑎᒃᓴᖃᓐᖏᓚᒍᑦ. ᓱᓇ ᐱᑦᔪᑎᒋᓪᓗᒍ? ᐱᖁᔭᓂᒃ ᒪᓕᒋᐊᖃᕐᓂᖅ ᐱᑦᔪᑎᒋᓪᓗᒍ ᐅᖃᐅᓯᐅᓐᖏᓛᖅ? ᑍᒤᓐᖏᓚᖅ, ᐅᒃᐱᕐᓂᖅ ᐱᑦᔪᑎᒋᓪᓗᒍ. 28 ᐅᖃᐅᓯᖃᕐᐳᒍᑦ ᐃᓄᒃ ᐸᓯᔭᒃᓴᐅᔪᓐᓃᕐᑎᑕᐅᖕᒪᑦ ᐅᒃᐱᕐᓂᕐᒥᒍᑦ, ᐱᖁᔭᓂᒃ ᒪᓕᖕᓂᕐᒥᓅᖏᑦᑐᖅ. 29 ᐅᕝᕙᓗ ᒎᑎ ᒎᑎᐅᕙ ᔫᑎᓄᑦ ᑭᓯᐊᓂ, ᔫᑎᐅᖏᑦᑐᓄᓪᓕ ᒎᑎᒋᔭᐅᓐᖏᓛᖅ? ᑖᒃᑯᓄᖓᑦᑕᐅᖅ ᒎᑎᒋᔭᐅᒋᕗᖅ, 30 ᒎᑎ ᐊᑕᐅᓯᐅᖕᒪᑦ; ᑭᐱᔭᐅᓯᒪᔪᑦ ᐸᓯᔭᒃᓴᐅᔪᓐᓃᕐᑎᓚᐅᕐᐰᑦ ᐅᒃᐱᕐᓂᒃᑯᑦ ᑭᐱᔭᐅᓯᒪᖏᑦᑐᑦᑕᐅᖅ ᐅᒃᐱᕐᓂᒃᑯᑦ ᑕᒪᑐᒧᖓᑦᓮᓐᓇᖅ ᐸᓯᔭᒃᓴᐅᔪᓐᓃᕐᑎᑕᐅᒋᕗᑦ. 31 ᑕᕝᕙᓕ ᑕᒪᑐᒧᖓ ᐅᒃᐱᕐᓂᕐᒧᑦ ᐱᖁᔭᑦ ᐊᑐᕈᓐᓃᕐᑎᑉᐸᕘᑦ? ᑍᒤᓐᖏᓚᖅ! ᐱᖁᔭᓪᓕ ᑐᓐᖓᕕᒋᓂᕐᓴᕆᓕᕐᐸᕗᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society