ᕉᒪᒥᐅᓄᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᐃᖅᑲᕐᑐᐃᓂᖓ ᓇᓛᒎᕐᑐᖅ 1 ᑍᒤᒻᒪᑦ ᐸᓯᔭᒃᓴᐅᖏᑦᔪᑎᒃᓴᖃᓐᖏᓚᑎᑦ, ᐊᓯᖕᓂᒃ ᐃᖅᑲᕐᑐᐃᔪᑎᑦ; ᐃᖅᑲᕐᑐᐃᑦᔪᑎᒋᔭᕐᓄᑦ ᐃᓕᖕᓂᒃ ᓇᖕᒥᓂᖅ ᐸᓯᔭᒃᓴᓐᖑᕐᑎᑉᐳᑎᑦ, ᐃᖅᑲᕐᑐᐃᑦᔪᑎᒋᔭᕐᓂᒃ ᑍᒫᓪᓗᐊᖅ ᐱᓇᓱᐊᕋᕕᑦ. 2 ᖃᐅᔨᒪᒐᑦᑕ ᒎᑎᐅᑉ ᐃᖅᑲᕐᑐᐃᓂᖓ ᓈᒻᒪᓈᑦᓯᐊᕐᑐᒥᒃ ᐃᖅᑲᕐᑐᐃᖕᒪᑦ ᑍᒤᓕᐅᕐᑐᓄᑦ. 3 ᐃᓄᑐᐃᓐᓇᐅᔪᑎᑦ, ᑍᒤᓕᐅᕐᑐᓂᒃ ᐃᖅᑲᕐᑐᐃᓪᓗᑎᑦ, ᐃᖅᑲᕐᑐᐃᑦᔪᑎᖕᓂᒡᓗ ᐊᑐᕐᐸᒡᓗᑎᑦ, ᒎᑎᐅᑉ ᐃᖅᑲᕐᑐᐃᓂᖓᓂᒃ ᕿᒫᔪᓐᓇᕋᓱᒋᕖᑦ? 4 ᐅᕝᕙᓗ ᐱᑦᓯᐊᕐᓂᕐᔪᐊᖓ ᐊᖏᔪᖅ ᑲᒪᖏᑦᓯᕐᑐᕐᓂᖓᓗ ᕿᓄᐃᓵᕐᓂᖓᓗ ᓇᕐᕈᒋᕕᐅᒃ? ᖃᐅᔨᒪᓐᖏᓚᑏ? ᒎᑎᐅᑉ ᐱᑦᓯᐊᕐᓂᕐᔪᐊᖓᑕ ᑕᓯᐅᕋᓱᐊᕐᒪᑎᑦ ᖃᕿᐊᓕᕐᓂᕐᒧᑦ? 5 ᓯᑎᔪᐊᓘᓂᕐᓄᑦ ᐆᒻᒪᑎᒃᑯᓪᓗ ᖃᕿᐊᓕᕈᒪᖏᓐᓂᕐᓄᑦ ᐃᓕᖕᓂᒃ ᖁᒥᐅᑎᒋᓕᕐᐳᑎᑦ ᐅᓪᓗᒧᑦ ᒎᑎᐅᑉ ᓂᓐᖓᒡᕕᒃᓴᖓᓄᑦ ᐃᖅᑲᕐᑐᐃᓂᖓ ᓈᒻᒪᓈᑦᓯᐊᕐᑐᖅ ᓴᖅᑭᑉᐸᑦ. 6 ᑖᑦᓱᒪ ᐊᑭᓕᕈᒫᕐᒪᒋᑦ ᐃᓄᓕᒫᑦ ᐊᑐᓂᑦ ᐱᓂᐊᕐᓂᕆᓚᐅᕐᑕᖏᑦ ᒪᓕᒡᓗᒋᑦ. 7 ᕿᓄᐃᓵᕐᓗᑎᒡᓕ ᐱᐅᔪᒥᒃ ᐱᓇᓱᐊᕐᑐᑦ, ᓂᕐᑐᕐᑕᐅᓂᕐᒥᒃ ᕿᓂᕐᑐᑦ, ᐅᐱᒋᔭᐅᓂᕐᒥᒡᓗ, ᑐᖁᓱᐃᑦᑑᓂᕐᒥᒡᓗ, ᑖᑦᓱᒪ ᑐᓂᓯᕕᒋᔪᒫᕐᐰᑦ ᐃᓅᓯᕐᒥᒃ ᓄᖑᓱᐃᑦᑐᒥᒃ; 8 ᐊᓯᖏᓪᓕ ᐃᒻᒥᖕᓂᑐᐊᖅ ᐃᓱᒪᒋᓪᓗᑎᒃ ᐱᓇᓱᐊᕐᑐᑦ ᓱᓕᓂᕐᒥᒡᓗ ᓈᓚᖏᑦᑐᑦ, ᐊᔪᕐᓂᕐᒥᒃ ᒪᓕᖔᕐᓗᑎᒃ, ᑖᒃᑯᐊ ᓂᓐᖓᒡᕕᐅᓂᕐᒧᑦ ᓱᒋᐊᕐᑕᐅᓂᕐᒧᓪᓗ ᑎᑭᑦᓱᒫᕐᐳᑦ. 9 ᐅᖁᒤᓐᓇᕐᑐᖃᕈᒫᕐᐳᖅ ᐃᓱᒫᓗᓇᕐᑐᖃᕈᒫᕐᓗᓂᓗ ᐃᓄᓕᒫᓄᑦ ᐊᔪᕐᑐᓕᔪᓄᑦ, ᔫᑎᓄᑦ ᓯᕗᓪᓕᕐᒥᒃ ᒍᕇᑭᓄᓪᓗ, 10 ᒎᑎᐅᑉ ᓂᕐᑐᕐᓇᕐᓂᖃᕐᑎᑦᓱᒫᕐᐰᑦ ᐱᐅᔪᒥᒃ ᐱᓇᓱᐊᕐᑐᑦ ᐅᐱᒋᔭᐅᓗᑎᒡᓗ, ᓮᒻᒪᕐᑎᑕᐅᓗᑎᒡᓗ, ᔫᑎᑦ ᓯᕗᓪᓕᐅᓗᑎᒃ ᒍᕇᑭᓄᓪᓗ. 11 ᒎᑎᐅᑉ ᐃᓄᓕᒫᑦ ᐊᑦᔨᒌᒃᑎᒻᒪᒋᑦ. 12 ᐊᔪᕐᑐᓕᔪᑦ ᐱᖁᔭᖃᕋᑎᒃ ᐊᓯᐅᔪᒫᕐᐳᑦ ᐱᖁᔭᖃᖏᓪᓗᑎᒃ, ᐱᖁᔭᖃᕐᓗᑎᒡᓗ ᐊᔪᕐᑐᓕᔪᓕᒫᑦ ᐱᖁᔭᑦ ᒪᓕᒡᓗᒋᑦ ᐃᖅᑲᕐᑐᕐᑕᐅᔪᒫᕐᐳᑦ. 13 ᐱᖁᔭᓂᒃ ᑐᓴᑐᐃᓐᓇᕐᑐᑦ ᓈᒻᒪᒃᓯᑎᑕᐅᖏᒻᒪᑕ ᒎᑎᐅᑉ ᓵᖓᓂ, ᐱᖁᔭᓂᒡᓕ ᒪᓕᑦᓯᐊᕐᑐᑦ ᓈᒻᒪᖕᓂᕋᕐᑕᐅᔪᒫᕐᐳᑦ. 14 ᔫᑎᐅᖏᑦᑐᑦ ᐱᖁᔭᖃᖏᒃᑲᓗᐊᕐᓗᑎᒃ ᐃᓕᖅᑯᓯᕐᒥᒃᑎᒍᑦ ᐱᖁᔭᑦ ᐊᑐᖁᔭᖏᓐᓂᒃ ᐊᑐᓲᖑᒋᕗᑦ, ᐱᖁᔭᖃᕐᒪᑕ ᐃᓕᖅᑯᓯᕐᒥᒃᑎᒍᑦ, ᐱᖁᔭᓂᒃ ᐱᓯᒪᖏᒃᑲᓗᐊᕐᓗᑎᒃ. 15 ᑕᕝᕙ ᓴᖅᑭᑎᑦᓯᕗᑦ ᐱᖁᔧᑦ ᐊᑐᕐᑕᐅᖁᔭᖏᓐᓂᒃ ᐃᓗᒥᐅᑕᖃᕐᓂᕐᒥᖕᓂᒃ, ᐃᒃᐱᒋᔭᒥᒃᑎᒍᓪᓗ ᓇᓗᓁᕐᓯᓪᓗᑎᒃ, ᐃᓱᒪᒥᒃᑎᒍᓪᓗ ᐃᖅᑲᕐᑐᕐᑕᐅᕙᒃᓗᑎᒃ, ᑕᒻᒪᖏᓐᓂᕐᒥᖕᓂᒡᓗ ᖃᐅᔨᑎᑕᐅᕙᒃᑭᓪᓗᑎᒃ. 16 ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᓯᕆᔭᒃᑲ ᒪᓕᒡᓗᒋᑦ, ᑕᒪᓐᓇ ᐊᑐᕈᒫᕐᐳᖅ ᒎᑎ ᐃᖅᑲᕐᑐᐃᓕᕐᐸᑦ ᐃᓄᐃᑦ ᐃᔨᕐᓯᒪᔭᖏᓐᓂᒃ ᔩᓱᓯ ᙭ᔅᑑᓯᑯᑦ. ᔫᑎᓪᓗ ᐱᖁᔭᓪᓗ 17 ᐃᕝᕕᓪᓕ ᔫᑎᐅᓂᕋᕐᑐᑎᑦ ᐱᖁᔭᓂᒡᓗ ᑕᑎᖃᕐᑐᑎᑦ, ᒎᑎᒥᒡᓗ ᐃᓚᖃᑦᓯᐊᕐᓂᕐᓂᒃ ᓂᕐᑑᑎᖃᕐᑐᑎᑦ. 18 ᐊᑐᕐᑕᐅᖁᔭᖓ ᖃᐅᔨᒪᒐᕕᐅᒃ ᐱᐅᓂᕐᐹᖑᔪᖅ ᐊᑲᐅᒋᒐᕕᐅᒃ, ᑍᒫᒃ ᐱᖁᔭᓂᑦ ᐊᔪᕆᕐᑐᕐᑕᐅᒐᕕᑦ, 19 ᖃᐅᔨᒪᑦᓯᐊᕋᕕᓪᓗ ᑕᐅᑐᖏᑦᑐᓂᒃ ᑕᓯᐅᕐᓯᔪᓐᓇᕋᓱᒋᕗᑎᑦ, ᑖᕐᑐᒦᑦᑐᓂᒡᓗ ᖃᐅᒻᒤᔪᓐᓇᕋᓱᒋᓪᓗᑎᑦ, 20 ᓯᓔᑦᑐᓂᒡᓗ ᐋᖅᑭᒋᐊᕐᓯᔪᓐᓇᕋᓱᒋᓪᓗᑎᑦ, ᓄᑕᖅᑲᓂᒡᓗ ᐃᓕᓮᔪᓐᓇᕋᓱᒋᓪᓗᑎᑦ, ᐱᖁᔭᓂᒃ ᐱᑕᖃᕇᕋᕕᑦ ᐃᓕᓯᒪᓂᕐᒥᒃ ᓱᓕᑦᓯᐊᕐᓂᕐᒥᒡᓗ ᐱᑕᖃᕐᓂᕋᕐᑕᕐᓂᒃ; 21 ᐊᓯᖕᓂᒃ ᐊᔪᕆᕐᑐᐃᕙᒃᑲᕕᑦ, ᐃᓕᖕᓂᒡᓕ ᐊᔪᕆᕐᑐᕈᓐᓇᓐᖏᓚᑏᑦ? ᑎᒡᓕᒋᐊᖃᖏᓐᓂᕐᒥᒃ ᐊᔪᕆᕐᑐᐃᕙᒃᑐᑎᑦ, ᓇᖕᒥᓂᕐᓗ ᑎᒡᓕᖃᑦᑕᕐᐲᑦ? 22 ᐅᖃᕐᐸᒃᑐᑎᑦ ᓄᓕᐊᕇᖕᓂᕐᒥᒃ ᐊᓯᕈᐃᔪᒃᓴᐅᖏᓐᓂᕐᒥᒃ, ᓇᖕᒥᓂᕐᓕ ᓄᓕᐊᕇᖕᓂᖅ ᐊᓯᕈᕐᐱᐅᒃ? ᒎᑎᓐᖑᐊᓂᒃ ᐱᐅᒃᓴᖏᓐᓂᕋᕐᐸᒃᑐᑎᑦ, ᑐᒃᓯᐊᕐᕕᖕᓂᒡᓗ ᑎᒡᓕᒡᕕᖃᖃᑦᑕᕐᐲᑦ? 23 ᒎᑎᒥᑦ ᐱᖁᔭᖃᕐᑎᑕᐅᓂᕐᒥᒃ ᓂᕐᑐᕈᑎᖃᕐᑐᑎᑦ, ᒎᑎ ᓇᕐᕈᓇᕐᑎᖃᑦᑕᕐᐱᐅᒃ ᐱᖁᔭᓂᒃ ᓱᕅᖃᑦᑕᕐᓂᕐᓄᑦ? 24 ᑎᑎᕋᕐᓯᒪᖕᒪᑦ, “ᒎᑎᐅᑉ ᐊᑎᖓ ᓇᕐᕈᓇᕐᓯᑎᑕᐅᕗᖅ ᔫᑎᐅᖏᑦᑐᓂᑦ ᔫᑎᐅᔪᓯ ᑍᒤᑎᑦᓯᑎᓪᓗᓯ.” 25 ᑭᐱᔭᐅᓂᖅ ᐊᑐᕐᓇᕐᑑᕗᖅ ᐱᖁᔭᑦ ᒪᓕᑦᓯᐊᕈᕕᒋᑦ; ᐱᖁᔭᓂᒡᓕ ᓱᕅᒍᕕᑦ, ᑭᐱᔭᐅᓯᒪᖏᑦᑐᑎᑐᑦ ᑍᒤᓕᕐᐳᑎ. 26 ᑭᐱᔭᐅᓯᒪᖏᑦᑐᑦ ᐱᖁᔭᓂᒃ ᒪᓕᒃᐸᑕ, ᑭᐱᔭᐅᓯᒪᔪᑎᑐᑦ ᐃᓱᒪᒋᔭᐅᒐᔭᓐᖏᓛᑦ? 27 ᑎᒥᒥᒍᑦ ᑭᐱᔭᐅᓯᒪᖏᑦᑐᑦ ᐱᖁᔭᓂᒃ ᒪᓕᑦᓯᐊᕈᑎᒃ ᑖᒃᑯᓇᓐᖓᑦ ᐃᒋᑕᒃᓴᓐᖑᕐᑎᑕᐅᔪᒫᕐᐳᓯ ᐱᖁᔭᓂᒃ ᓱᕅᒍᑦᓯ ᐱᖁᔧᑦ ᑎᑎᕋᕐᓯᒪᔪᑦ ᐱᓯᒪᒐᓗᐊᕐᓗᒋᒃ ᑭᐱᔭᐅᓯᒪᓗᓯᓗ. 28 ᐃᓄᒃ ᔫᑎᓪᓚᕆᐅᖏᒻᒪᑦ ᑕᑯᒃᓴᐅᓂᑐᐃᓐᓇᕐᒥᒍᑦ, ᑭᐱᔭᐅᓂᕐᑕᐅᖅ ᑕᑯᒃᓴᐅᓂᒃᑯᑐᐃᓐᓈᐅᓐᖏᓚᖅ ᑎᒥᒃᑰᖓᑐᐃᓐᓇᕌᓂᓗ. 29 ᐃᓄᒃ ᔫᑎᓪᓚᕆᐅᕗᖅ ᐃᓗᒥᒍᑦ ᔫᑎᐅᔪᖅ, ᐃᓗᒥᒍᓪᓗ ᑭᐱᔭᐅᓯᒪᓗᓂ ᒎᑎᐅᑉ ᐊᓂᕐᓂᖓᒍᑦ, ᑎᑎᕋᕐᓯᒪᔪᑎᒍᑐᐃᓐᓇᐅᖏᑦᑐᖅ, ᑍᒤᑦᑑᑉ ᓂᕐᑐᕐᑕᐅᓂᖓ ᐃᓄᖕᓂᑦ ᐱᓐᖏᓚᖅ, ᒎᑎᒥᓪᓕ ᐱᕗᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society