ᕉᒪᒥᐅᓄᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᑕᕝᕙᐅᕗᑏᕐᓯᓃᑦ

¹ ᑕᑯᖅᑯᑎᑦᓯᐊᕐᑕᕋ ᐃᓕᑦᓯᓐᓄ ᑎᓕᕙᕋ ᓇᔭᕗᑦ ᐲᐱ, ᑕᓯᐅᕐᑎᐅᔪᖅ ᐅᒃᐱᕐᑑᖃᑎᒌᓂ ᑭᓐᑯᕆᐊᒥᐅᓂ.

² ᑖᓐᓇ ᐃᓚᓕᐅᕐᓯᐅᒃ ᐊᑕᓂᕐᒥ ᒎᑎᐅᑉ ᐃᓄᖁᑎᖏᑕ ᐱᐅᓯᖏᑎᑐᑦ, ᐃᑲᔪᕐᓗᒍᓗ ᐃᓕᑦᓯᓐᓂᑦ ᐃᑲᔪᕐᑕᐅᔭᕆᐊᖃᕐᐸᑦ, ᐃᓄᖕᓂᒃ ᐊᒥᓱᓂᒃ ᐃᑲᔪᕐᓯᒪᖕᒪᑦ ᐅᕙᓐᓂᒡᓗ ᐊᒡᓛᑦ.

³ ᑕᕝᕙᐅᕗᑏᕐᑎᑉᐹᒃᑲᒃ ᐳᕆᓯᓚ ᐊᑯᐃᓚᓗ, ᐱᓇᓱᐊᖃᑏᒃᑲᒃ ᙭ᔅᑑᓯ ᔩᓱᓯᒥ,

⁴ ᑖᒃᑯᐊᒃ ᐃᓅᓯᕐᒥᖕᓂ ᑲᑉᐱᐊᓇᕐᑐᒃᑰᓚᐅᕐᒪᑎᒃ ᐅᕙᖓ ᐱᑦᔪᑎᒋᓪᓗᖓ, ᐅᕙᖓᑑᖏᑦᑐᖅ ᐅᒃᐱᕐᑑᖃᑎᒌᓪᓗᑦᑕᐅᖅ ᔫᑎᐅᖏᑦᑐᑦ ᑖᒃᑯᖕᓂᖓ ᖁᔭᓕᖃᑎᒌᒃᐳᒍᑦ;

⁵ ᑕᕝᕙᐅᕗᑏᕐᑎᒃᑭᕙᒃᑲ ᐅᒃᐱᕐᑑᖃᑎᒌᑦ ᑖᒃᑯᐊ ᐃᒡᓗᖓᓐᓂ ᑲᑎᒪᕙᒃᑐᑦ. ᑕᕝᕙᐅᕗᑏᕆᕙᕋ ᐃᓚᓐᓇᕆᔭᕋ ᐃᐰᓂᑕᔅ, ᑖᓐᓇ ᐂᓯᐊᒥᐅᓂᑦ ᓯᕗᓪᓕᕐᐹᖑᓪᓗᓂ ᙭ᔅᑑᓯᒧᑦ ᓵᒋᐊᓚᐅᕐᒪᑦ.

⁶ ᑕᕝᕙᐅᕗᑏᕐᐸᕋ ᒥᐊᕆ, ᐱᓇᓱᐊᕐᓯᒪᔪᖅ ᐊᒃᓱᕈᕐᓗᓂ ᐃᓕᑦᓯᓐᓂ.

⁷ ᑕᕝᕙᐅᕗᑏᕐᐸᕋ ᐋᓐᑐᕈᓁᑯᔅ ᔫᓂᐊᓗ, ᑖᒃᑯᐊᒃ ᑎᒥᒃᑯᑦ ᐃᓚᒋᔮᒃᑲᒃ ᑎᒍᔭᐅᓯᒪᖃᑎᒋᓚᐅᕐᑖᒃᑲᒡᓗ ᐊᑕᓂᕐᒥ; ᑖᒃᑯᐊᒃ ᐋᐴᓯᑕᓕᖕᓂᑦ ᐊᒃᓱᕈᖃᑕᐅᓂᕐᐹᖑᓯᒪᖕᒪᑎᒃ, ᙭ᔅᑑᓯᒧᓪᓗ ᓵᒋᐊᕐᓯᒪᓕᓚᐅᕐᒪᑎᒃ ᓵᒋᐊᓚᐅᕐᑎᓐᓇᖓ.

⁸ ᑕᕝᕙᐅᕗᑏᕐᐸᕋ ᐊᒻᐸᓔᐊᑐᔅ, ᑖᓐᓇ ᐊᑕᓂᕐᒥ ᓇᒡᓕᒋᔭᕋ.

⁹ ᑕᕝᕙᐅᕗᑏᕆᕙᕋ ᐅᕐᐹᓄᓯ, ᐱᓇᓱᐊᖃᑎᕗᑦ ᙭ᔅᑑᓯᒥ, ᐃᓚᓐᓈᕆᔭᕋᓗ ᓯᑕᑭᓯ.

¹⁰ ᑕᕝᕙᐅᕗᑏᕆᕙᕋ ᐊᐱᓕᔅ, ᐆᒃᑐᕐᑕᐅᓯᒪᔪᖅ ᐊᒃᓱᕈᕐᑐᕐᓗ ᙭ᔅᑑᓯᒥ. ᑕᕝᕙᐅᕗᑏᕐᐸᒃᑲᓗ ᐊᕆᔅᑐᐴᓗᓯᐅᑉ ᐃᒡᓗᒥᐅᖃᑎᖏᑦ.

¹¹ ᑕᕝᕙᐅᕗᑏᕆᕙᕋ ᐃᕉᑎᐅᓂ ᑎᒥᒃᑯᑦ ᐃᓚᒋᔭᕋ, ᑕᕝᕙᐅᕗᑏᕐᐸᒃᑲᓗ ᓈᑭᓴᓯᐅᑉ ᐃᒡᓗᒥᐅᖃᑎᖏᑦ ᐊᑕᓂᕐᒥ ᐅᒃᐱᖃᑎᕗᑦ.

¹² ᑕᕝᕙᐅᕗᑏᕐᐸᒃᑲ ᑐᕅᐲᓇ ᑐᕅᐴᓴᓗ, ᑖᒃᑯᐊᒃ ᐊᕐᓈᒃ ᐱᓇᓱᐊᕐᑑᒃ ᐊᑕᓂᕐᒥ. ᓇᒡᓕᖕᓇᕐᑐᕐᓗ ᐳᕐᓯᓯ, ᑖᓐᓇᑦᑕᐅᖅ ᐊᕐᓇᐅᓪᓗᓂ ᐊᓱᕈᒻᒪᕆᒃᓯᒪᔪᖅ ᐊᑕᓂᕐᒥ.

¹³ ᑕᕝᕙᐅᕗᑏᕐᐸᕋ ᕉᕙᓯ, ᐊᑕᓂᐅᑉ ᓂᕈᐊᕐᓯᒪᔭᖓ, ᐊᓈᓇᖓᓗ, ᑖᑦᓱᒪ ᐃᕐᓂᕐᒥᑐᑦ ᐱᖃᑦᑕᓚᐅᕐᒪᖓ.

¹⁴ ᑕᕝᕙᐅᕗᑏᕐᐸᒃᑲ ᐊᓯᓐᑯᕅᑕᓯ, ᐱᓕᒑᓐᓗ, ᕼᐊᕐᒥᓯ, ᐸᑐᕉᐸᓯ, ᕼᐊᕐᒪᓯᓗ, ᐅᒃᐱᕐᑑᖃᑎᒌᓕᒫᓪᓗ ᓇᔪᕐᑎᖏᑦ.

¹⁵ ᑕᕝᕙᐅᕗᑎᕐᐸᕋ ᐱᓘᓗᒐᓯ, ᔫᓕᐊ, ᓂᕆᐊᓯ ᓇᔭᖓᓗ, ᐅᓔᒻᐸᓯᓗ ᒎᑎᐅᓪᓗ ᐃᓄᖁᑎᓕᒫᖏᑦ ᓇᔪᕐᑎᒋᔭᖏᑦ.

¹⁶ ᑕᕝᕙᐅᕗᑏᖃᑎᒌᒋᑦᓯ ᐅᒃᐱᖃᑎᒌᖕᓂᕐᒥ ᑯᓂᒡᓗᓯ ᐃᑦᔪᕐᓁᑦᑐᒧᑦ. ᙭ᔅᑑᓯᐅᑉ ᐅᒃᐱᕐᑐᖁᑎᓕᒫᖏᑦ ᑕᕝᕙᐅᕗᑏᕐᐳᑦ ᐃᓕᑦᓯᓐᓂᒃ.

ᑭᖑᓪᓕᕐᐹᒥᒃ ᐅᖃᐅᓯᒃᓮᑦ

¹⁷ ᐃᓅᖃᑎᒃᑲ ᐃᓇᑉᐸᑦᓯ, ᐅᑦᔨᕐᑐᑦᓯᐊᕐᓯᐅᒃ ᐃᓅᖃᑎᒌᖕᓂᕐᒥᒃ ᐊᕕᑎᑦᓯᕙᒃᑐᑦ, ᐅᒃᐱᕐᓂᑦᓯ ᑐᓐᖓᕕᒋᔭᖏᓐᓂᒃ ᓯᖁᑎᕆᓇᓱᒃᑏᑦ, ᐱᓇᓱᐊᕐᑐᓪᓗ ᐊᔪᕆᕐᑐᕐᑕᐅᑦᔪᑎᒋᓚᐅᕐᑕᑦᓯ ᐊᓯᐊᒎᕐᑐᓂᒃ; ᑖᒃᑯᐊ ᐃᓚᒋᓂᐊᕋᓯᒋᒃ.

¹⁸ ᑍᒤᑦᑐᑦ ᐊᑕᓂᑦᑎᓐᓂᒃ ᙭ᔅᑑᓯᒥᒃ ᑭᒡᒐᕐᑐᖏᒻᒪᑕ, ᓈᒻᒪᒃᓯᑎᑦᓯᓇᓱᑐᐃᓐᓇᕐᒪᑕ ᐱᔪᒪᓂᕐᒥᖕᓂᒃ ᐱᑦᔪᑎᑐᐊᖃᕐᓗᑎᒃ, ᐅᖃᐅᓯᕐᒥᖕᓄᑦ ᐅᖃᓪᓚᒃᑲᐅᓂᕐᒥᖕᓄᓪᓗ ᓯᓔᕐᕆᒃᓯᕙᒃᐳᑦ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ.

¹⁹ ᓇᑭᑐᐃᓐᓇᕐᓕ ᑐᓴᐅᒪᔭᐅᕗᓯ ᓈᓚᑦᓯᐊᕐᓂᕋᕐᑕᐅᑎᓪᓗᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ, ᑍᒤᒻᒪᑦ ᐊᖏᔪᒥᒃ ᖁᕕᐊᓲᑎᒋᕙᑦᓯ, ᓯᓚᑐᔫᖁᕙᑦᓯᓕ ᐱᐅᔪᒧᑦ ᐸᓯᔭᒃᓴᐅᖁᓇᓯᓗ ᐱᐅᖏᑦᑐᒧᑦ.

²⁰ ᑕᕝᕙ ᒎᑎᐅᑉ ᐃᓱᒪᔮᓐᖏᑎᑦᓯᓂᕐᒥᒃ ᐱᑕᓕᑐᐊᑉ ᐊᑯᓂᐅᖏᑦᑐᖅ ᓵᑖᓇᓯ ᓱᓇᐅᔪᓐᓃᕐᑎᓂᐊᕋᑦᓯᐅᒃ ᐃᑎᒐᑦᓯ ᐊᑖᓂ. ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ.

²¹ ᑎᒧᑎᐅᑉ, ᐱᓇᓱᐊᖃᑎᒪ ᑕᕝᕙᐅᕗᑏᕐᐹᓯ; ᓗᓯᐅᓯᐅᓪᓗ, ᔧᓴᐅᓪᓗ ᓱᓯᐹᑕᕆᐅᓪᓗ, ᑎᒥᒃᑯᑦ ᐃᓚᒋᔭᒪ.

²² ᐅᕙᖓ ᑑᕐᑎᐅᓯ, ᐅᑯᓂᖓ ᑎᑎᕋᕐᑐᖓ, ᑕᕝᕙᐅᕗᑏᕐᐸᑦᓯ ᐊᑕᓂᕐᒥ.

²³ ᒊᐊᓯᐅᑉ ᑐᔪᕐᒥᕕᖕᒪ, ᐅᒃᐱᕐᑑᖃᑎᒌᓪᓗ ᑲᑎᒪᕕᒋᕙᒃᑕᖓᑦᑕ, ᑕᕝᕙᐅᕗᑏᕐᐸᓯ. ᐃᕌᔅᑕᓯᐅᑉ, ᓄᓇᓕᒡᔪᐊᓂ ᑮᓇᐅᔭᓕᕆᔨᐅᔫᑉ, ᐅᒃᐱᕐᑑᖃᑎᑦᑕᓗ ᑯᐊᕐᑕᓯᐅᑉ ᑕᕝᕙᐅᕗᑏᕐᐹᓯ. [

²⁴ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ ᑕᒪᑦᓯ. ᐋᒥᓐ.]

ᑭᖑᓪᓕᕐᐹᖅ ᓂᕐᑐᐃᓂᖅ ᑐᒃᓯᐊᕐᓂᕐᓗ

²⁵ ᐃᓕᑦᓯᓐᓂᒡᓕ ᓲᖑᑎᑦᓯᔪᓐᓇᕐᑐᖅ ᐅᖃᐅᓯᕐᓄᑦ ᑐᓴᕈᒥᓇᕐᑐᓄᑦ ᐅᖃᐅᓯᕆᔭᓐᓄᑦ, ᔩᓱᓯ ᙭ᔅᑑᓯᒥᒡᓗ ᐅᖃᐅᓯᖃᕐᓂᓐᓄᑦ, ᓇᓗᓇᕐᑑᑉ ᓇᓗᓇᕈᓐᓃᕐᑎᑕᐅᓂᖓᓄᑦ ᐊᕐᕌᒍᒐᓴᖕᓂ ᐊᓂᒍᕐᑐᓂ ᐃᔨᑦᓯᒪᓚᐅᕐᑐᓂᒃ,

²⁶ ᒫᓐᓇᓕ ᓇᓗᓇᕈᓐᓃᕐᑎᑕᐅᖕᒪᑕ ᓇᓚᐅᑦᑍᔪᑦ ᑎᑎᖅᑲᖏᓐᓄᑦ ᐃᓅᖃᑎᒌᒡᔪᐊᓄᑦ, ᒎᑎᐅᑉ ᐃᓱᖃᖏᑦᑑᑉ ᐱᖁᔨᓂᖓᓄᑦ, ᐅᒃᐱᕐᑐᑦ ᓈᓚᒍᓐᓇᕐᓯᖁᓪᓗᒋᑦ ᑖᑦᓱᒥᖓ.

²⁷ ᑖᓐᓇ ᓯᓚᑐᔪᑑᔪᖅ ᒎᑎ, ᓂᕐᑐᕐᑕᐅᓕ ᐃᓱᖃᖏᑦᑐᒧᑦ ᔩᓱᓯ ᙭ᔅᑑᓯᒃᑯᑦ! ᐋᒥᓐ.