ᕉᒪᒥᐅᓄᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦᐊᓯᓯ ᐃᓱᒪᒋᓂᕐᓴᕆᓯᒋᒃ ᐃᓕᑦᓯᓐᓂᑐᐃᓐᓇᐅᖏᑦᑐᖅ 1 ᐅᕙᒍᑦ ᐅᒃᐱᕐᓂᕐᒥ ᓴᓐᖏᓂᕐᓴᐅᔪᒍᑦ ᕿᓄᐃᓵᕐᑐᒃᓴᐅᕗᒍᑦ ᓴᓐᖐᓐᓂᕐᓴᐅᔪᑦ ᐊᔪᓕᕐᓯᒪᑦᔪᑎᖃᕐᐸᑕ, ᐅᕙᑦᑎᓐᓂᑐᐊᖅ ᐃᓱᒪᒋᓇᓱᐊᖏᓪᓗᑕ; 2 ᐃᓘᓐᓇᑕᓕ ᐊᑐᓂᑦ ᐃᓅᖃᑎᑦᑎᓐᓂᒃ ᐃᓱᒪᖃᓕᕐᑕ ᐱᕙᓪᓕᐅᑎᒃᓴᖏᓐᓄᑦ, ᐱᕈᕐᐹᓪᓕᕐᑎᑦᓯᖁᓪᓗᑕ ᐅᒃᐱᕐᓂᕐᒥ. 3 ᙭ᔅᑑᓯᑦᑕᐅᖅ ᓇᖕᒥᓂᖅ ᓈᒻᒪᒋᔭᑐᐃᓐᓇᕐᒥᓂᒃ ᐊᑐᓚᐅᖏᒻᒪᑦ, ᐊᒡᓚᓂ ᑎᑎᕋᕐᓯᒪᖕᒪᑦ, “ᐃᓕᖕᓂᒃ ᐅᖃᕐᓂᕐᓘᑎᓖᑦ ᐅᖃᕐᓂᕐᓗᖕᓂᖏᑕ ᑐᕝᕕᒋᕚᖓ.” 4 ᖃᓄᓕᒫᖅ ᑎᑎᕋᕐᓯᒪᔪᑦ ᓯᕗᓂᑦᑎᓐᓂ ᑎᑎᕋᕐᓯᒪᕗᑦ ᐊᔪᕆᕐᑐᕐᑕᐅᑦᔪᑎᒃᓴᑦᑎᓐᓄᑦ, ᕿᓄᐃᓵᕐᓂᒃᑯᑦ ᑲᔪᖏᕐᓴᕐᑕᐅᓂᒃᑯᓪᓗ ᐊᒡᓚᑎᒍᑦ ᓂᕆᐅᒋᔭᒃᓴᕐᑖᕈᓐᓇᖁᓪᓗᑕ. 5 ᒎᑎᐅᓪᓕ ᕿᓄᐃᓵᕐᓂᖃᕐᑎᑦᓯᔫᑉ ᑲᔪᖏᕐᓮᔫᓪᓗ ᑐᓂᓯᕕᒋᓕᓯ ᐃᓱᒪᖃᖃᑎᒌᓂᕐᒥᒃ ᐃᓕᑦᓯᓐᓄᑦ ᐊᑐᓂᑦ, ᙭ᔅᑑᓯ ᔩᓱᓯ ᒪᓕᒡᓗᒍ, 6 ᐊᑕᐅᑦᓯᒃᑯᑦ ᓂᐱᑦᓯᒍᑦ ᓂᕐᑐᐃᓕᖁᓪᓗᓯ ᒎᑎᒥᒃ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐊᑖᑕᖓᓂᒃ. ᐅᖃᐅᓰᑦ ᑐᓴᕈᒥᓇᕐᑐᑦ ᔫᑎᐅᖏᑦᑐᓄᑦ ᐱᑎᑕᐅᓂᖏᑦ 7 ᑍᒤᒻᒪᑦ ᐃᓅᖃᑎᑦᓯᓐᓂᒃ ᑐᓐᖓᓱᒃᑎᑎᖃᑦᑕᕆᑦᑎ, ᓲᕐᓗᑕᐅᖅ ᙭ᔅᑑᓯᐅᑉ ᑐᓐᖓᓱᒃᑎᓯᒪᖕᒪᓯ ᐃᒻᒥᓄᑦ, ᒎᑎ ᓂᕐᑐᕐᑕᐅᖁᓪᓗᒍ. 8 ᐅᖃᐅᑎᕙᑦᓯ ᙭ᔅᑑᓯ ᐱᔨᓐᖑᓚᐅᕐᒪᑦ ᔫᑎᓄᑦ ᑭᐱᓯᒪᔪᓄᑦ ᒎᑎᐅᑉ ᓱᓕᑦᓯᐊᕐᓂᖓ ᓴᖅᑭᑎᑕᐅᖁᓪᓗᒍ, ᓯᕗᓕᕕᓂᖏᓐᓄᑦ ᐊᖏᕈᑎᒋᓯᒪᔭᖓᑕ ᑲᔪᓯᑎᑕᐅᓂᖓᒍᑦ. 9 ᔫᑎᐅᖏᑦᑐᓪᓗ ᓂᕐᑐᐃᓕᖁᓪᓗᒋᑦ ᒎᑎᒥᒃ ᓂᑲᒍᓱᖕᓂᖓ ᐱᑦᔪᑎᒋᓗᒍ. ᑎᑎᕋᕐᓯᒪᖕᒪᑦ, “ᑍᒤᒻᒪᑦ ᓂᕐᑐᕐᓂᐊᕐᐸᒋᑦ ᔫᑎᐅᖏᑦᑐᑦ ᐊᑯᕐᖓᓐᓂ, ᐃᓐᖏᕐᓗᖓᓗ ᓂᕐᑐᕈᒪᕙᒋᑦ.” 10 ᐅᖃᒃᑲᓐᓂᕐᒥᖕᒪᑦ, “ᔫᑎᐅᖏᑦᑐᓯ ᖁᕕᐊᓱᒋᑦᓯ, ᑖᑦᓱᒪ ᐃᓄᖁᑎᖏᑦ ᐃᓚᒋᓗᒋᑦ.” 11 ᐊᒻᒪ ᐅᖃᕆᕗᖅ, “ᐊᑕᓂᖅ ᓂᕐᑐᕐᓯᐅᒃ, ᑕᒪᑦᓯ ᔫᑎᐅᖏᑦᑐᓯ, ᐃᓄᓕᒫᓪᓗ ᐃᓐᖏᕐᕕᒋᓗᒍ ᓂᕐᑐᕐᓕᑦᔪᒃ.” 12 ᐂᓮᐊᓯ ᐅᖃᕐᒥᖕᒪᑦ, “ᔨᓯᐅᑉ ᑭᖑᕚᖓ ᒪᑭᑦᓱᒫᕐᐳᖅ, ᑖᓐᓇ ᐊᐅᓚᑦᓯᓕᕈᒫᕐᐳᖅ ᔫᑎᐅᖏᑦᑐᓂᒃ; ᑖᑦᓱᒨᓇ ᔫᑎᐅᖏᑦᑐᑦ ᓂᕆᐅᒋᔭᒃᓴᕐᑖᕈᒫᕐᐳᑦ.” 13 ᒎᑎᐅᓪᓕ ᓂᕆᐅᖕᓂᕐᑖᕐᑎᑦᓯᔫᑉ ᐃᓗᒻᒥᕐᑎᓪᓕᓯ ᖁᕕᐊᓱᖕᓂᕐᒥᒃ ᐃᓱᒫᓘᑎᖃᖏᑦᓯᐊᕐᓂᕐᒥᒡᓗ ᑖᑦᓱᒧᖓ ᐅᒃᐱᕐᓂᑦᓯᓐᓄᑦ, ᓂᕆᐅᖕᓂᓯ ᐊᖏᒡᓕᕙᓪᓕᐊᖏᓐᓇᖁᓪᓗᒍ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐱᔪᓐᓇᕐᓂᖓᒍᑦ. ᐸᐅᓗᓯᐅᑉ ᓯᕘᕋᓇᓂ ᑎᑎᕋᕐᓂᖓ 14 ᐃᓅᖃᑎᒃᑳ, ᐅᕙᖓ ᓇᖕᒥᓂᖅ ᖁᓚᖏᑦᓯᐊᕐᐳᖓ ᐱᐅᔪᒥᒃ ᐃᓗᒻᒥᕐᑕᐅᓯᒪᒐᑦᓯ, ᖃᐅᔨᑎᑕᐅᓯᒪᓪᓗᓯᓗ, ᐊᔪᕆᕐᑐᖃᑦᑕᐅᑎᔪᓐᓇᕐᓗᓯᓗ ᐃᓕᑦᓯᓐᓄᑦ. 15 ᓯᕘᕋᓇᖓᓕ ᑎᑎᕋᕐᕕᒋᓯᒪᕙᑦᓯ ᐅᖃᐅᓯᕆᔭᒪ ᐃᓚᖏᓐᓂ ᐃᖅᑬᑎᒃᑲᓐᓂᕈᒪᓪᓗᓯ, ᒎᑎᐅᑉ ᐱᓯᐊᕐᓂᕐᒥᒍᑦ ᑐᓂᓯᒪᔭᖓ ᐅᕙᓐᓄᑦ ᐱᑦᔪᑎᒋᓪᓗᒍ 16 ᐱᔨᑦᓯᕐᑎᐅᖁᓪᓗᖓ ᙭ᔅᑑᓯ ᔩᓱᓯᒥᒃ ᔫᑎᐅᖏᑦᑐᓄᑦ ᑐᓂᕐᕈᓯᕐᑎᑦᓯᔨᑎᑐᑦ ᐱᓇᓱᐊᖁᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᒎᑎᒥᑦ ᐱᔪᓂᒃ, ᔫᑎᐅᖏᑦᑐᑦ ᑐᓂᕐᕈᑕᐅᓗᑎᒃ ᓈᒻᒪᒋᔭᐅᖁᓪᓗᒋᑦ ᒎᑎᒧᑦ, ᐃᑦᔪᕐᓁᑎᑕᐅᓗᑎᒡᓗ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ. 17 ᙭ᔅᑑᓯ ᔩᓱᓯᒥ, ᐱᑦᔪᑎᒃᓴᖃᑦᓯᐊᕐᓗᖓ ᐱᓇᓱᐊᕐᓂᕋ ᒎᑎᒧᑦ ᓂᕐᑐᕐᓇᐅᑎᒋᔪᓐᓇᖁᓪᓗᒍ. 18 ᐅᖃᐅᓯᖃᕐᓂᐊᓐᖏᓚᖓ ᙭ᔅᑑᓯᐅᑉ ᐅᕙᒃᑯᑦ ᐱᓇᓱᐊᕐᓯᒪᔭᖓᑕ ᐊᓯᐊᓂᒃ ᔫᑎᐅᖏᑦᑐᑦ ᓈᓚᓕᖁᓪᓗᒋᑦ ᒎᑎᒥᒃ, ᐅᖃᐅᓯᒃᑯᑦ ᐱᓂᐊᕐᓂᒃᑯᓪᓗ. 19 ᓇᓗᓁᒃᑯᑍᑦ ᑲᒪᓇᕐᑐᓕᓃᓪᓗ ᐱᔪᓐᓇᕐᓂᖏᑎᒍᑦ, ᐊᓂᕐᓂᐅᓪᓗ ᐃᑦᔪᕐᓁᑦᑑᑉ ᐱᔪᓐᓇᕐᓂᖓᒍᑦ, ᔨᕉᓴᓕᒻᒥᑦ ᐱᒋᐊᕐᓗᖓ ᐃᓔᕆᑲᒻ ᑎᑭᓪᓗᒍ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᙭ᔅᑑᓯᒥᒃ ᐅᖃᐅᓯᖃᕐᓯᒪᕗᖓ ᑕᒤᓐᓄᑦ. 20 ᑍᒪᓐᖓᑦ ᐊᒃᓱᕈᕈᑎᖃᕐᐳᖓ ᐊᔪᕆᕐᑐᐃᔪᒪᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᙭ᔅᑑᓯᐅᑉ ᖃᐅᔨᒪᔭᐅᕕᒋᓐᖏᑕᓕᒫᖏᓐᓄᑦ, ᐃᒡᓗᓕᐅᕈᒪᓇᖓ ᐊᓯᒪ ᑐᓐᖓᕕᓕᐊᕆᓯᒪᔭᖓᓄᑦ. 21 ᐊᒡᓚᓂ ᑎᑎᕋᕐᓯᒪᖕᒪᑦ, “ᑖᑦᓱᒥᖓ ᐅᖃᐅᑦᔭᐅᓚᐅᖏᑦᑐᑦ ᑕᑯᔪᒫᕐᐹᑦ, ᑖᑦᓱᒥᖓᓗ ᑐᓴᓚᐅᖏᑦᑐᑦ ᑐᑭᓯᔪᒫᕐᐹᑦ.” ᐸᐅᓗᓯᐅᑉ ᕉᒪᒧᐊᕈᒪᓂᖓ 22 ᑕᒪᓐᓇ ᐱᑦᔪᑎᒋᓪᓗᒍ ᐃᓕᑦᓯᓐᓄ ᐅᓄᕐᑐᐃᕐᓱᕐᓗᖓ ᑎᑭᑦᓱᓐᓇᖃᑦᑕᓚᐅᓐᖏᓚᖓ. 23 ᒫᓐᓇᓕ, ᐱᓇᓱᐊᕐᓂᕋ ᓄᓇᓕᖕᓂ ᑖᒃᑯᓇᓂ ᐱᔭᕇᕋᒃᑯ, ᐊᕐᕌᒍᓂᒡᓗ ᐊᒥᓱᓂᒃ ᐊᑯᓂᒍᓱᖃᑦᑕᓚᐅᕋᒪ ᐅᐸᒍᒪᓪᓗᓯ, 24 ᓯᐰᓂᒧᐊᓕᕈᒪ ᐃᓕᑦᓯᓐᓄᑦ ᐊᖅᑯᓵᓛᕈᒪᕗᖓ, ᐳᓛᕈᒪᓪᓗᓯ ᐃᑲᔪᕐᑕᐅᔪᒪᓪᓗᖓᓗ ᐃᓕᑦᓯᓐᓄᑦ, ᑲᑎᒪᑬᓐᓇᕐᓂᑦᑎᓐᓄᑦ ᖁᕕᐊᓱᖃᑎᒋᔪᒪᓪᓗᓯ. 25 ᒫᓐᓇᓕ ᑭᓯᐊᓂ, ᔨᕉᓴᓕᒻᒧᑦ ᐂᓕᕐᐳᖓ ᒎᑎᐅᑉ ᐃᓄᖁᑎᖏᑦ ᑍᑲᓂ ᐃᑲᔪᕆᐊᕐᓗᒋᑦ. 26 ᒫᓯᑑᓂᐊᒥᐅᑦ ᐊᑬᐊᒥᐅᓪᓗ ᖁᕕᐊᓱᒡᓗᑎᒃ ᑐᓂᓯᔪᒪᓚᐅᕐᒪᑕ ᐊᔪᕐᓴᕐᑐᓄᑦ ᒎᑎᐅᑉ ᐃᓄᖁᑎᖏᓐᓄᑦ ᔨᕉᓴᓕᒻᒦᑦᑐᓄᑦ. 27 ᖁᕕᐊᓱᒡᓗᑎᒃ ᑍᒫᒃ ᐃᒻᒥᖕᓂᒃ ᐱᔪᒪᓚᐅᕐᒪᑕ, ᐅᓐᓃᓄᓇ ᐃᑲᔪᕆᐊᖃᕋᒥᒃ ᑍᒃᑯᓂᖓ, ᔫᑎᐅᖏᑦᑐᑦ ᐱᖃᑕᐅᓯᒪᒍᑎᒃ ᔫᑎᑦ ᐅᒃᐱᕐᓂᒃᑯᑦ ᓮᒻᒪᕐᑎᑕᐅᓂᖏᓐᓂᒃ, ᑍᒫᒃᑕᐅᖅ ᑕᑯᒃᓴᐅᔪᒃᑯᑦ ᓮᒻᒪᕐᑎᑕᐅᓂᕐᒥᖕᓂᒃ ᑲᑐᑦᔨᖃᑎᒋᔭᕆᐊᖃᕐᒪᒋᑦ. 28 ᑍᒤᒻᒪᑦ ᑕᒪᓐᓇ ᐱᔭᕇᕈᒃᑯ, ᑍᒃᑯᐊᓗ ᐱᔭᕆᐊᖃᕐᑕᒥᖕᓂ ᑐᓂᕐᕈᑎᓂᒃ ᑲᑎᑕᐅᓯᒪᔪᓂᒃ ᐱᒃᐸᑕ, ᓯᐰᓂᒧᐊᓕᕈᒪ ᐊᖅᑯᓵᓛᕈᒪᕙᑦᓯ; 29 ᖃᐅᔨᒪᒐᒪ ᐃᓕᑦᓯᓐᓄᐊᕈᒪ ᙭ᔅᑑᓯᐅᑉ ᓮᒻᒪᕐᑎᑦᓯᓂᖓ ᓈᒻᒪᑦᓯᐊᕐᓗᒍ ᓮᒻᒪᕐᑎᑕᐅᑦᔪᑎᒋᒐᔭᕋᒃᑯ. 30 ᐊᒃᓱᕈᕐᓗᖓ ᐃᓇᑉᐸᑦᓯ ᐃᓅᖃᑎᒃᑲ, ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ ᐊᓂᕐᓂᐅᓪᓗ ᓇᒡᓕᒍᓱᖕᓂᖓᒍᑦ, ᐊᒃᓱᕈᖃᑎᒋᓗᖓ ᑐᒃᓯᐅᑎᓚᐅᕐᓯᓐᖓ ᒎᑎᒧᑦ. 31 ᓴᐳᑎᔭᐅᖁᓪᓗᖓ ᐅᒃᐱᖏᑦᑐᓂᑦ ᔫᑎᐊᒦᑦᑐᓂᑦ, ᐱᓇᓱᐊᕐᓂᕋᓗ ᒎᑎᐅᑉ ᐃᓄᖁᑎᖏᓐᓄᑦ ᔨᕉᓴᓕᒻᒦᑦᑐᓄᑦ ᓈᒻᒪᒋᔭᐅᖁᓪᓗᒍ. 32 ᒎᑎ ᐱᖁᔨᒃᐸᑦ ᐃᓕᑦᓯᓐᓄᑦ ᑎᑭᑦᑐᓐᓇᖁᓪᓗᖓ ᖁᕕᐊᓱᒡᓗᖓ ᑲᑎᓐᖓᓂᑦᑎᓐᓄᓪᓗ ᐱᕚᓪᓕᖃᑎᒋᓗᓯ ᐱᖁᓪᓗᖓ. 33 ᒎᑎᐅᑉ ᓮᒻᒪᕐᑎᑦᓯᓂᖓᑕ ᐃᓚᒋᓕᓯ ᑕᒪᑦᓯ. ᐋᒥᓐ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society