ᕉᒪᒥᐅᓄᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᓯᖃᕐᓂᖅ ᒎᑎᒥᒃ ᐱᔨᑦᓯᕐᓗᓂ

¹ ᑍᒤᒻᒪᑦ ᐃᓇᑉᐸᑦᓯ ᐃᓅᖃᑎᒃᑳ, ᒎᑎᐅᑉ ᓂᑲᒍᓱᖕᓂᕐᔪᐊᖓ ᐱᑦᔪᑎᒋᓗᒍ, ᑎᒥᓯ ᑐᓂᓯᒋᒃ ᑐᓂᕐᕈᑎᒃᓴᑐᑦ; ᐆᒪᓗᓯᓕ, ᐃᑦᔪᕐᓁᑦᑐᑐᑦ ᒎᑎᒧᓪᓗ ᖁᕕᐊᒋᔭᐅᔪᑐᑦ, ᑍᒤᓕᐅᕈᑦᓯ ᒎᑎ ᓱᓕᑦᓯᐊᕐᑐᒥᒃ ᐱᔨᑦᓯᕐᓂᐊᕐᐸᓯ ᐊᓂᕐᓂᒃᑯᑦ.

² ᓯᓚᕐᔪᐊᑉ ᒪᑐᒪ ᐃᓄᖏᑦ ᐊᑦᔨᒋᔪᓐᓃᕐᓯᐅᒃ, ᐊᑦᔨᒋᔪᓐᓃᕐᑎᑕᐅᓕᕆᑦᓯ ᐃᓱᒪᓯ ᓄᑖᓐᖑᕐᑎᑕᐅᓗᑎᒃ, ᒎᑎᐅᑉ ᐱᔪᒪᔭᖓᓂᒃ ᖃᐅᔨᔪᓐᓇᕐᓯᖁᓪᓗᓯ, ᓱᓇ ᐱᐅᖕᒪᖔᑦ ᓱᓇᓗ ᒎᑎᐅᑉ ᖁᕕᐊᒋᖕᒪᖔᒍ, ᓈᒻᒪᒋᖕᒪᖔᒍᓗ.

³ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᖓᑕ ᑐᓂᓯᕕᒋᓯᒪᖕᒪᖓ ᑕᒪᑦᓯᓐᓄᑦ ᐅᖃᕐᐳᖓ: ᓇᖕᒥᓂᑦᓯᓐᓂᒃ ᐱᐅᔪᕆᖁᓇᓯ, ᐃᓕᑦᓯᓐᓂᒡᓕ ᐃᓱᒪᒋᓕᕆᑦᓯ ᐃᓱᒪᒃᓴᕐᓯᐅᑦᓯᐊᕐᓗᓯ, ᐊᑐᓂᑦ ᒎᑎᐅᑉ ᑐᓂᔭᖓ ᐅᒃᐱᕐᓂᖅ ᒪᓕᒡᓗᒍ.

⁴ ᐅᕙᒍᑦᑕᐅᖅ ᐊᑐᓂᑦ ᐊᑕᐅᓯᕐᒥᒃ ᑎᒥᖃᕋᑦᑕ, ᑎᒥᕗᑦ ᐊᑦᔨᒌᖏᑦᑐᓂᒃ ᐃᓚᖃᕐᓗᑎᒃ, ᑖᒃᑯᐊ ᐊᑐᓂᑦ ᐊᑦᔨᒌᖏᑦᑐᒥᒃ ᐱᓇᓱᐊᕐᓂᖃᕐᒪᑕ.

⁵ ᑍᒫᒃᑕᐅᖅ ᙭ᔅᑑᓯᒥ ᐊᒥᓲᓪᓗᑕ, ᑎᒥᐅᕗᒍᑦ ᐊᑕᐅᓯᕐᒥ, ᐊᑐᓂ ᐊᒃᑐᐊᖃᑦᑕᐅᑎᓪᓗᑕ ᐅᕙᑦᑎᓐᓄᑦ ᑎᒥᒦᑦᑐᑎᑐᑦ.

⁶ ᐊᑦᔨᒌᖏᑦᑐᓂᒃ ᑐᓂᕐᕈᓯᐊᕐᓯᒪᒐᑦᑕ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᑐᓂᕐᕈᓯᐊᑦᑎᓐᓂᒃ, ᐊᑏ ᑐᓂᕐᕈᓯᐊᕗᑦ ᐊᑐᑦᓯᐊᓚᐅᕐᓚᕗᑦ: ᓇᓪᓕᐊᑦ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᑐᓂᕐᕈᓯᐊᕈᓂ, ᑍᒤᓕᐅᕐᓕ ᐅᒃᐱᕐᓂᖅ ᐱᓯᒪᔭᓂ ᒪᓕᒡᓗᒍ;

⁷ ᓇᓪᓕᐊᑦ ᐱᔨᑦᓯᕐᓂᕐᒥᒃ ᑐᓂᕐᕈᓯᐊᕈᓂ ᐱᔨᑦᓯᕐᓕ; ᐃᓕᓐᓂᐊᕐᑎᑦᓯᓂᕐᒥᒃ ᑐᓂᕐᕈᓯᐊᕈᓂ ᐃᓕᓐᓂᐊᕐᑎᑦᓯᓕ;

⁸ ᐱᕙᓪᓕᕐᑎᑦᓯᓂᕐᒥᒃ ᑐᓂᕐᕈᓯᐊᕈᓂ ᐱᕙᓪᓕᕐᑎᑦᓯᓕ, ᓇᓪᓕᐊᑦ ᑐᓂᓯᒍᓂ ᐊᓐᓂᕈᓱᖏᓪᓗᓂ ᑐᓂᓯᓕ; ᑕᓯᐅᕐᑎᐅᓂᕐᒥᒃ ᐱᓯᒪᒍᓂ ᐊᒃᓱᕈᕐᓕ; ᓂᑲᒍᓱᖕᓂᕐᒥᒃ ᐱᓇᓱᐊᕈᓂ, ᖁᕕᐊᓱᒡᓗᓂ ᑍᒤᓕᐅᕐᓕ.

⁹ ᓇᒡᓕᖕᓂᖅ ᓱᓕᑦᓯᐊᕐᑐᒃᓴᐅᕗᖅ; ᐊᔪᕐᓂᖅ ᐆᒥᒋᓯᐅᒃ, ᐱᐅᔪᕐᓕ ᑎᒍᒥᐊᑦᓯᐊᕐᓗᒍ.

¹⁰ ᓇᒡᓕᒃᑎᒌᒋᑦᓯ ᐅᒃᐱᖃᑎᒌᑦ ᓇᒡᓕᖕᓂᖓᑐᑦ; ᐊᓯᑦᓯᓂᒃ ᐅᐱᒋᔭᖃᕐᓂᖅ ᐊᒃᓱᕉᑎᒋᓯᐅᒃ.

¹¹ ᐊᒃᓱᕈᕐᓗᓯ ᐱᓇᓱᐊᕆᑦᓯ ᐃᕿᐊᓱᒃᑍᓕᓗᓯ, ᐊᓂᕐᓂᒃᑯᑦ ᑲᑦᓱᖎᕐᓯᒪᑦᓯᐊᕐᓗᓯ, ᐊᑕᓂᖅ ᐱᔨᑦᓯᕐᓗᒍ.

¹² ᓂᕆᐅᖕᓂᑦᓯᓄᑦ ᖁᕕᐊᓱᒃᑎᑕᐅᒋᑦᓯ, ᐊᒃᓱᕈᑎᑕᐅᓂᕐᒥᒃ ᕿᓄᐃᓵᕆᑦᓯ, ᑐᒃᓯᐊᑦᓮᓐᓇᕐᓗᓯ.

¹³ ᒎᑎᐅᑉ ᐃᓄᖁᑎᖏᑦ ᐱᔭᕆᐊᖃᕐᑕᖏᓐᓂᒃ ᑐᓂᓯᕕᒋᓯᒋᒃ, ᑐᓐᖓᓱᒃᑎᑦᓯᕙᒡᓗᓯᓗ ᑎᑭᓯᒪᔪᓂᒃ.

¹⁴ ᐊᑭᕋᕐᑐᕐᑎᓯ ᓮᒻᒪᕐᑎᑕᐅᖁᓯᒋᒃ; ᓮᒻᒪᕐᑎᑕᐅᖁᔨᒋᑦᓯ ᓱᒋᐊᕐᑕᐅᖁᔨᖏᓪᓗᓯ.

¹⁵ ᖁᕕᐊᓱᒃᑐᑦ ᖁᕕᐊᓱᖃᑎᒋᓯᒋᒃ, ᕿᐊᔪᓪᓗ ᕿᐊᖃᑎᒋᓗᒋᑦ.

¹⁶ ᐱᓇᓱᐊᖃᑎᒌᑦᓯᐊᕆᑦᓯ ᐃᓕᑦᓯᓐᓄᑦ; ᐱᐅᔪᕆᖏᓪᓗᓯ, ᐊᔪᕐᓂᕐᓮᑦ ᐱᓇᓱᐊᖃᑎᒋᓯᒋᒃ; ᓇᖕᒥᓂᖅ ᓯᓚᑐᓇᓱᒋᖏᓪᓗᓯ.

¹⁷ ᐱᑦᓯᐊᕐᑕᐅᖏᒃᑯᕕᑦ, ᐊᑭᓇᓱᐊᕐᑍᓕᒋᑦ ᐱᑦᓯᐊᖏᓐᓂᕐᒧᑦ. ᑲᒪᑦᓯᐊᕐᓗᓯ ᐱᐅᒋᔭᐅᔪᒥᒃ ᐃᓅᓯᖃᕆᑦᓯ ᐃᓄᓕᒫᓄᑦ.

¹⁸ ᐱᔪᓐᓇᕐᓂᓕᒫᑦᓯᓐᓄᑦ, ᐃᓅᖃᑎᖃᑦᓯᐊᕋᓱᐊᕆᑦᓯ ᐃᓄᓕᒫᓂᒃ.

¹⁹ ᐃᓚᓐᓇᕆᔭᒃᑲ, ᓇᖕᒥᓂᖅ ᐊᑭᒋᐊᕐᓂᐊᕋᓯ, ᒎᑎᐅᓪᓕ ᓂᓐᖓᖕᓂᕆᔪᒫᕐᑕᖓᓄᑦ ᑐᕌᖓᑎᓕᕐᓯᐅᒃ; ᐊᒡᓚᒃᓯᒪᖕᒪᑦ, “ᐊᑭᓂᐊᕐᓂᖅ ᐱᒋᕙᕋ, ᐅᕙᖓ ᐊᑭᓂᐊᕈᒫᕐᐳᖓ, ᐊᑕᓂᖅ ᐅᖃᕐᐳᖅ.”

²⁰ ᐃᒫᒡᓕ ᐱᔪᒃᓴᐅᕗᓯ, ᐅᖃᕐᓯᒪᖕᒪᑦ: “ᐊᑭᕋᕐᑐᕐᑏᑦ ᑳᒃᐸᑦ, ᓂᕆᑎᑦᔪᒃ; ᐃᒥᕈᒃᐸᑦ, ᐃᒥᕐᑎᑦᔪᒃ; ᑍᒤᓕᐅᕈᕕᑦ ᐊᐅᒪᓂᒃ ᐃᑯᒪᓕᖕᓂᒃ ᓂᐊᖁᖓᓄᐊᖅᑬᓂᐊᕐᐳᑎᑦ.”

²¹ ᐊᔪᕐᓂᕐᒧᑦ ᓵᓚᒋᔭᐅᓂᐊᕐᓇᒃ; ᐱᐅᔪᒧᓪᓕ ᐊᔪᕐᓂᖅ ᓵᓚᒋᓕᕈᒃ.