ᕉᒪᒥᐅᓄᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᓗᖏᕐᓱᕐᓗᖓ ᐃᓅᖃᑎᒃᑲ ᑐᒃᓯᐅᑎᕙᒃᑲ ᒎᑎᒧᑦ ᐱᐅᓕᔭᐅᖁᓪᓗᒋᑦ.

² ᓇᓗᓁᕈᓐᓇᕐᐸᒃᑲ ᐃᓗᖏᕐᓱᕐᓗᑎᒃ ᐱᔪᒪᓂᖃᕐᑐᑦ ᒎᑎᒧᑦ, ᐃᓗᖏᕐᓱᕐᓂᖓᓪᓕ ᖃᐅᔨᓯᒪᓪᓚᕆᖕᓂᕐᒥᑦ ᑐᓐᖓᕕᖃᓐᖏᓚᖅ.

³ ᐃᓗᐊᕐᑑᓂᕋᕐᑕᐅᓂᖅ ᒎᑎᒥᑦ ᐱᔪᖅ ᖃᐅᔨᒪᓐᖏᓛᑦ, ᓇᖕᒥᓂᕐᒥᒃᑎᒍᓪᓕ ᐃᓗᐊᕐᑐᓕᔪᓐᖑᕋᓱᐊᕐᐳᑦ, ᐃᒻᒥᖕᓂᒃ ᑐᓂᓯᒪᓐᖏᓚᑦ ᒎᑎᐅᑉ ᐃᓗᐊᕐᑐᓕᔪᓐᖑᕐᑎᑦᓯᓂᖓᓄᑦ.

⁴ ᙭ᔅᑑᓯ ᐃᓱᓕᑎᑦᓯᖕᒪᑦ ᐱᖁᔧᑦ ᐊᑐᕐᑕᐅᓂᖏᓐᓂᒃ, ᑖᑦᓱᒧᖓ ᐅᒃᐱᕐᓂᖃᕐᑐᓕᒫᑦ ᐃᓗᐊᕐᑑᓂᕋᕐᑕᐅᖁᓪᓗᒋᑦ.

ᐱᐅᓕᔭᐅᓂᖅ ᑕᒤᓐᓄᑦ ᑐᕌᖓᕗᖅ

⁵ ᒨᓯᓯ ᑎᑎᕋᓚᐅᕐᒪᑦ ᐃᓄᒃ ᒎᑎᒧᑦ ᐃᓗᐊᓂᕋᕐᑕᐅᔪᒪᓗᓂ ᐃᓅᓯᖃᕋᓱᐊᕐᑐᖅ ᐱᖁᔭᑎᒍᑦ, “ᑍᒤᓕᐅᕈᓂ ᒪᓕᑦᑎᐊᕋᓱᐊᕐᓂᕆᔭᓂ ᐃᓅᑦᔪᑎᒋᓂᐊᕐᐹ.”

⁶ ᐃᓗᐊᕐᓂᕋᕐᑕᐅᓗᓂᓕ ᐅᒃᐱᕐᓂᕐᒥᒃ ᑐᓐᖓᕕᓕᒃ ᐅᖃᕐᐳᖅ, ᐃᓗᒃᑯᑦ ᐃᓱᒪᓂᐊᕐᓇᒃ, “ᑭᓇ ᕿᓚᖕᒧᑦ ᖁᒻᒧᐊᖕᓂᐊᕐᐹ?” (ᐃᒫᒃ, ᙭ᔅᑑᓯ ᐊᖅᑲᕐᑎᑦᓴᕐᑐᕐᓗᒍ.)

⁷ ᐃᒫᒡᓘᓐᓃᑦ “ᑭᓇ ᑐᖁᖓᔪᑦ ᐃᓂᖓᓄᐊᕐᓂᐊᕐᐹ?” (ᐃᒫᒃ, ᙭ᔅᑑᓯ ᑐᖁᖓᔪᓂᑦ ᐂᓗᒍ.)

⁸ ᖃᓄᕐᓕ ᐅᖃᕐᐹ? ᐅᖃᐅᓯᐅᑉ ᖃᓂᒋᕚᑎᑦ, ᖃᓂᕐᓃᑉᐳᖅ ᐃᓗᖕᓃᓪᓗᓂᓗ (ᐃᒫᒃ, ᐅᖃᐅᓯᖅ ᐅᒃᐱᕐᓂᖅ ᐅᖃᐅᓯᕆᔭᕗᑦ);

⁹ ᐃᒤᓕᖓᖕᒪᑦ, ᓇᖕᒥᓂᖅ ᖃᓂᒃᑯᑦ ᐅᖃᐅᓯᕆᒍᕕᐅᒃ ᔩᓱᓯ ᐊᑕᓂᐅᓂᕋᕐᓗᒍ ᐆᒻᒪᑎᒃᑯᓪᓗ ᐅᒃᐱᕐᓗᑎᑦ ᒎᑎᐅᑉ ᐆᒻᒪᕐᑎᓚᐅᕐᒪᒍ ᑐᖁᒥᑦ, ᑕᕝᕙ ᐱᐅᓕᔭᐅᓂᐊᕐᐳᑎᑦ.

¹⁰ ᐆᒻᒪᑎᒃᑰᕐᑐᒥᒃ ᐅᒃᐱᕐᓂᖃᕐᑐᖅ ᐸᓯᔭᒃᓴᐅᔪᓐᓃᕐᑎᑕᐅᖕᒪᑦ, ᖃᓂᕐᒥᒍᓪᓗ ᐅᖃᐅᓯᖃᕐᑐᖅ ᑖᓐᓇ ᐱᐅᓕᔭᐅᓂᐊᕐᐳᖅ.

¹¹ ᐊᒡᓔᑦ ᐅᖃᕐᒪᑕ, “ᑖᑦᓱᒧᖓ ᐅᒃᐱᕐᑐᖅ ᑲᓐᖑᓱᒃᑎᑕᐅᓂᐊᓐᖏᓚᖅ.”

¹² ᐊᑦᔨᒌᖏᑦᑑᖏᒻᒪᑕ ᔫᑎᑦ ᒍᕇᑭᓪᓗ; ᐊᑕᓂᖅ ᑖᓐᓇᑦᓮᓐᓇᖅ ᐊᑕᓂᐅᖕᒪᑦ ᑕᒤᓐᓄᑦ ᓮᒻᒪᕐᑎᑦᓯᓂᕐᒥᒡᓗ ᐊᒥᒐᖏᑦᑐᒥᒃ ᑐᓂᓯᕗᖅ ᑕᒤᓐᓄᑦ ᑐᒃᓯᐊᕐᕕᒋᔨᒥᓄᑦ.

¹³ ᐊᒡᓔᑦ ᐅᖃᕐᒪᑕ, “ᐃᒤᑦᓱᒫᕐᐳᖅ ᐊᑕᓂᐅᑉ ᐊᑎᖓᓄᑦ ᑐᒃᓯᐊᕐᑐᑦ ᐱᐅᓕᔭᐅᔪᒫᕐᐳᑦ.”

¹⁴ ᖃᓄᕐᓕ ᐃᑲᔪᕐᑕᐅᔪᒪᓗᑎᒃ ᓂᓪᓕᐊᕕᒋᒐᔭᕐᐸᑦᔫᒃ? ᐅᒃᐱᕆᓐᖏᒍᓂᑦᔪᒃ, ᖃᓄᕐᓗ ᐅᒃᐱᕆᒐᔭᕐᐸᑦᔫᒃ? ᑐᓴᓚᐅᕐᓯᒪᖏᒃᑯᓂᑦᔪᒃ, ᖃᓄᕐᓗ ᑐᓴᕋᔭᕐᐹᑦ? ᐊᔪᕆᕐᑐᕐᑕᐅᖏᓪᓗᑎᒃ.

¹⁵ ᖃᓄᕐᓗ ᐊᔪᕆᕐᑐᐃᒐᔭᕐᐹᑦ ᑎᓕᔭᐅᓯᒪᖏᓪᓗᑎᒃ? ᐊᒡᓚᓂ ᑎᑎᕋᕐᓯᒪᔪᖃᕐᒪᑦ, “ᐱᐅᔪᐊᓘᕗᑦ ᐃᓯᒐᖏᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᕆᐊᕐᑐᕐᖢᑎᒃ ᑎᑭᐅᑦᔨᔪᑦ!”

¹⁶ ᑕᒪᕐᒥᒡᓕ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᓈᓚᒃᑐᐃᓐᓇᐅᓐᖏᓚᑦ; ᐂᓮᐊᓯ ᐅᖃᕐᒪᑦ, “ᐊᑕᓃᖅ, ᑭᐊ ᐅᖅᑳᐅᓯᕆᔭᕗᑦ ᐅᒃᐱᕆᕔᑦ?”

¹⁷ ᑕᕝᕙ ᐅᒃᐱᕐᓂᖅ ᐱᒋᐊᕐᐳᖅ ᑐᓴᕐᑎᑕᐅᓂᒃᑯᑦ, ᑐᓴᕐᑎᑕᐅᓂᕐᓗ ᐱᒋᐊᕐᐳᖅ ᙭ᔅᑑᓯᐅᑉ ᐊᔪᕆᕐᑐᐃᑦᔪᑕᐅᓂᖓᓂᑦ.

¹⁸ ᐊᐱᕆᕗᖓᓕ, ᑐᓴᓚᐅᓐᖏᓛᑦ? ᐃᓛᒃ ᑐᓴᓪᓚᕆᒃᓯᒪᕗᑦ; ᐊᒡᓔᑦ ᐅᖃᕐᒪᑕ: “ᓂᐱᖏᑦ ᓄᓇᕐᔪᐊᓕᒫᒧᑦ ᑎᑭᐅᑎᕗᑦ, ᐅᖃᐅᓯᖏᓪᓗ ᓯᓚᕐᔪᐊᑉ ᐃᓱᐊᓄᑦ ᑎᑭᑉᐳᑦ.”

¹⁹ ᓱᓕ ᐊᐱᕆᒃᑲᓐᓂᕐᐳᖓ, ᐃᓴᕆᐊᓕᒥᐅᑦ ᑐᑭᓯᓚᐅᓐᖏᓛᑦ? ᒨᓯᓯ ᓯᕗᓪᓕᐅᓗᓂ ᑭᐅᔪᓐᓇᕐᐳᖅ ᐅᖃᕐᒪᑦ, “ᓄᓇᖃᑎᒌᒡᔪᐊᓂᒃ ᐊᑐᕐᓗᖓ ᐃᓄᖁᑎᒃᑲ ᓯᖕᓇᑎᓐᓂᐊᕐᐸᒃᑲ; ᓯᓔᑦᑐᓄᓪᓗ ᓄᓇᖃᑎᒌᓄᑦ ᓂᓐᖓᒃᓴᕐᑕᐅᑎᑦᓱᒪᕙᑦᓯ.”

²⁰ ᑕᕝᕙ ᐂᓮᐊᓯ ᓯᕘᕋᓇᓂ ᐅᖃᓚᐅᕆᕗᖅ, “ᓇᓂᔭᐅᓯᒪᕗᖓ ᐅᕙᓐᓂᒃ ᕿᓂᖏᑦᑐᓄᑦ; ᐅᕙᓐᓂᒃ ᑕᑯᔭᐅᑎᑉᐳᖓ ᐅᕙᓐᓂᒃ ᐊᐱᖅᑯᑎᖃᖏᑦᑐᓄᑦ.”

²¹ ᐃᓴᕆᐊᓕᒥᐅᓪᓕ ᐱᑦᔪᑎᒋᓪᓗᒋᑦ ᐅᖃᕐᐳᖅ, “ᐅᓪᓗᖅ ᓈᓪᓗᒍ ᐊᒡᒐᒃᑲ ᐃᓴᒻᒥᕙᒃᑲ ᐃᓄᖕᓄᑦ ᓈᓚᒍᒪᖏᑦᑐᓄᑦ ᐊᑭᕋᕐᑐᕐᑐᓄᓪᓗ.”