ᕉᒪᒥᐅᓄᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᐅᓗᓯᐅᑉ ᑎᑎᖅᑲᖏᑦ ᕉᒪᒥᐅᓄᑦ

¹ ᐸᐅᓗᓯᒥᑦ ᔩᓱᓯ ᙭ᔅᑑᓯᐅᑉ ᐱᔨᖓᓂᑦ, ᐋᐴᓯᑕᓕᐅᓂᕐᒧᑦ ᕾᖁᔭᐅᓯᒪᔪᒥᑦ, ᓂᕈᐊᕐᑕᐅᓯᒪᔪᒥᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᒎᑎᒥᓐᖔᕐᑐᓂᒃ ᐊᔪᕆᕐᑐᐃᖁᓪᓗᒍ.

² ᐅᖃᐅᓰᑦ ᑐᓴᕈᒥᓇᕐᑐᑦ ᑖᒃᑯᐊᖑᕗᑦ ᓯᕗᓂᖓᒍᑦ ᐊᖏᕈᑎᒋᓚᐅᕐᑕᖏᑦ ᓇᓚᐅᑦᑍᔪᑎᒍᑦ, ᑎᑎᕋᕐᓯᒪᕗᑦ ᐊᒡᓚᖕᓂ ᐃᑦᔪᕐᓁᑦᑐᓂ.

³ ᑐᓴᕈᒥᓇᕐᑐᑦ ᐅᖃᐅᓯᖃᕐᒪᑕ ᐃᕐᓂᖓᓂᒃ, ᐃᓄᒃᑐᑦ ᑎᒥᖃᕐᓂᕐᒥᒍᑦ ᑍᕕᑎᐅᑉ ᑭᖑᕚᕆᓚᐅᕐᐹ,

⁴ ᐃᑦᔪᕐᓁᑦᑐᒥᒃ ᐃᓅᓯᖃᕐᓂᕐᒥᒍᑦ ᒎᑎᒧᑦ ᐃᕐᓂᐅᓂᖓᓂᒃ ᓇᓗᓁᕐᑕᐅᓚᐅᕐᐳᖅ ᐱᔪᓐᓇᕐᓂᕐᔪᐊᒃᑯᑦ ᒪᑭᓚᐅᕐᓂᕐᒥᒍᑦ ᑐᖁᒥᑦ, ᑖᓐᓇᐅᕗᖅ ᔩᓱᓯ ᙭ᔅᑑᓯ ᐊᑕᓂᕗᑦ.

⁵ ᑖᑦᓱᒨᓇ ᐱᑎᑕᐅᕗᒍᑦ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐋᐴᓯᑕᓕᓐᖑᕐᑎᑕᐅᓪᓗᑕ ᐃᓄᓕᒫᑦ ᕾᖁᔭᐅᖁᓪᓗᒋᑦ, ᓈᓚᒍᓐᓇᕐᓯᖁᓪᓗᒋᓪᓗ ᐅᒃᐱᕐᓂᑯᑦ.

⁶ ᐃᓕᑦᓯᑦᑕᐅᖅ ᐃᓚᒋᔭᐅᕗᓯ ᕾᖁᔭᐅᔪᓄᑦ ᔩᓱᓯ ᙭ᔅᑑᓯᒧᑦ ᐃᓄᖁᑎᒋᔭᐅᖁᓪᓗᓯ.

⁷ ᕉᒪᒥᐅᑕᓕᒫᖑᔪᓯ ᑎᑎᕋᕐᕕᒋᕙᑦᓯ ᒎᑎᐅᑉ ᓇᒡᓕᒋᔭᖏᑦ, ᐃᑦᔪᕐᓁᑦᑑᓗᑎᒃ ᐃᓄᖁᑎᒋᔪᒪᓪᓗᓂᒋᑦ ᕾᖁᔭᖏᑦ: ᒎᑎᐅᑉ ᐊᑖᑕᑦᑕ ᐊᑕᓂᑦᑕᓗ ᔩᓱᓯ ᙭ᔅᑑᓯᐅᑉ ᑐᓂᓯᕕᒋᓕᓯ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᒥᓂᒃ ᖃᓄᐃᖏᑦᓯᐊᕐᑎᑦᓯᓂᖓᓂᒡᓗ.

ᑐᒃᓯᐊᕐᓂᖅ ᖁᔭᓕᓂᕐᒧᑦ

⁸ ᓯᕗᓪᓕᕐᒥᒃ ᒎᑎᒐ ᖁᔭᒋᕙᕋ ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ ᑕᒪᑦᓯ ᐱᑦᔪᑎᒋᓪᓗᓯ, ᐅᒃᐱᕐᓂᓯ ᓇᓂᓕᒫᖅ ᐅᖃᐅᓯᐅᓕᕐᒪᑦ ᓯᓚᕐᔪᐊᕐᒥ.

⁹ ᒎᑎᐅᑉ ᐱᔨᑦᓯᕐᑕᒪ ᐱᔪᓐᓇᕐᓂᓕᒫᓐᓄᑦ ᐊᔪᕆᕐᑐᐃᓂᕐᒥᒃ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐃᕐᓂᖓᓂᒃ, ᖃᐅᔨᒪᑦᓯᐊᕐᐹᖓ ᐃᖅᑲᐅᒤᓐᓇᕋᑦᓯ ᑐᒃᓯᐊᓕᕌᖓᒪ ᑐᒃᓯᐅᑎᖃᑦᑕᕋᑦᓯ,

¹⁰ ᑐᒃᓯᐊᖃᑦᑕᕋᒪ ᒎᑎ ᐱᖁᔨᒃᐸᑦ ᐱᕕᒃᓴᖃᕐᑎᑕᐅᔪᒪᓪᓗᖓ ᐃᓕᑦᓯᓐᓄᑦ ᑎᑭᑦᓱᓐᓇᖁᓪᓗᖓ.

¹¹ ᑭᐱᓂᐊᕐᐳᖓ ᑕᑯᔪᒪᓪᓗᓯ, ᐃᓕᑦᓯᓐᓄᑦ ᐱᑎᑦᓯᔪᒪᓪᓗᖓ ᐊᓂᕐᓂᒃᑯᑦ ᑐᓂᕐᕈᓯᐊᓂᒃ ᓴᓐᖏᔪᓐᖑᕐᑎᑕᐅᒃᑲᓐᓂᖁᓪᓗᓯ,

¹² ᐃᒤᑉᐳᖅ, ᑲᔪᖏᕐᓴᖃᑦᑕᐅᑎᖁᓪᓗᑕ ᐅᒃᐱᕐᓂᑦᑎᒍᑦ, ᐃᓕᑦᓯᓗ ᐅᕙᖓᓗ ᐅᒃᐱᕐᓂᒃᑯᑦ ᐱᕙᓪᓕᕐᑎᖃᑦᑕᐅᑎᖁᓪᓗᑕ.

¹³ ᖃᐅᔨᒪᖁᕙᑦᓯᓕ ᐅᒃᐱᕐᑐᓯ; ᐅᓄᕐᑐᐃᕐᓱᕐᓗᖓ ᐃᓕᑦᓯᓐᓄᐊᕋᓱᖃᑦᑕᕐᓯᒪᕗᖓ, ᑎᑭᖏᑦᔪᑎᒃᓴᖃᖃᑦᑕᓚᐅᕐᐳᖓᓕ ᒫᓐᓇᒧᑦ ᑎᑭᓪᓗᒍ, ᐃᓕᑦᓯᓐᓂᑦ ᑲᑎᕐᓱᐃᔪᑎᑐᑦ ᑍᒤᑦᓱᒪᓪᓗᖓ, ᔫᑎᐅᖏᑦᑐᓂᓗ ᑍᒫᒃ ᐱᔪᒪᒋᓪᓗᖓ.

¹⁴ ᐱᓇᓱᐊᒐᒃᓴᖃᕋᒪ ᑕᒤᓐᓄᑦ ᒍᕇᑭᓄᑦ, ᐱᖁᔭᓂᒃ ᒪᓕᒐᖃᕐᑐᓄᓪᓗ, ᓯᓚᑐᔪᓄᑦ ᓯᓔᑦᑐᓄᓪᓗ.

¹⁵ ᑍᒤᒻᒪᑦ ᑲᔪᖏᕐᐳᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᔪᕆᕐᑐᐃᑦᔪᒪᓪᓗᖓ ᐃᓕᑦᓯᓐᓄᑦ ᕉᒪᒦᑦᑐᓄᑦ.

ᐅᖃᐅᓰᑦ ᑐᓴᕈᒥᓇᕐᑐᑦ ᐱᔪᓐᓇᕐᓂᖓ

¹⁶ ᐅᖃᐅᓰᑦ ᑐᓴᕈᒥᓇᕐᑐᑦ ᑲᓐᖑᓲᑎᒋᖏᓐᓇᒃᑭᑦ: ᒎᑎᐅᑉ ᐱᔪᓐᓇᕐᓂᕆᖕᒪᒋᑦ ᐅᒃᐱᕐᑐᓕᒫᓄᑦ ᐱᐅᓕᔭᐅᑦᔪᑕᐅᖁᓪᓗᒋᑦ, ᔫᑎᑦ ᓯᕗᓪᓕᐅᓗᑎᒃ ᒍᕇᑭᓄᓪᓗᑦᑕᐅᖅ.

¹⁷ ᐅᖃᐅᓯᕐᑎᒍᑦ ᑐᓴᕈᒥᓇᕐᑐᑎᒍᑦ ᒎᑎᒧᑦ ᓈᒻᒪᒋᔭᐅᓕᕐᓂᖅ ᓴᖅᑭᑎᑕᐅᖕᒪᑦ ᐅᒃᐱᕐᓂᑯᑦ; ᐃᒫᒃ ᑎᑎᕋᕐᓯᒪᔪᖃᕐᒪᑦ, “ᐃᓗᐊᕐᑐᓕᔪᖅ ᐃᓅᔪᒫᕐᐳᖅ ᐅᒃᐱᕐᓂᕐᒥᓄᑦ.”

ᐃᓄᓕᒫᑦ ᐸᓯᔭᒃᓴᐅᓂᖃᕐᓂᖓᑦ

¹⁸ ᒎᑎᐅᑉ ᓂᓐᖓᐅᓯᖓ ᕿᓚᖕᒥᑦ ᓴᖅᑭᑎᑕᐅᖕᒪᑦ ᒎᑎᖃᖏᑦᑐᓕᒫᓄᑦ ᐃᓄᐃᓪᓗ ᐱᐅᖏᑐᓕᐅᕐᓂᖏᓐᓄᑦ ᓱᓕᓂᕐᒥᒃ ᐊᒡᕕᐊᕐᓯᔪᓄᑦ ᐱᐅᖏᑦᑐᓕᐅᕐᓂᕐᒥᖕᓄᑦ.

¹⁹ ᒎᑎᒥᒃ ᖃᐅᔨᔪᓐᓇᕐᓂᖅ ᓇᓗᓇᖏᑦᓯᐊᕐᐳᖅ ᑖᒃᑯᓄᖓ, ᒎᑎᐅᑉ ᓇᓗᓁᕐᓯᕕᒋᓚᐅᕐᒪᒋᑦ.

²⁰ ᑍᒪᓐᖓᓂᑦ ᓯᓚᕐᔪᐊᑉ ᐱᓐᖑᕐᑎᑕᐅᓂᖓᓂᑦ, ᒎᑎᐅᑉ ᑕᑯᒃᓴᐅᓇᓂ ᐱᔪᓐᓇᕐᓂᖏᑦ, ᐊᔪᒐᖃᖏᓐᓂᖓᓗ ᐃᓱᖃᖏᑦᑐᖅ, ᒎᑎᐅᓂᖓᑕᓗ ᐃᓕᖅᑯᓯᖓ, ᓇᓗᓇᖏᑦᓯᐊᕐᓗᑎᒃ ᑕᑯᒃᓴᐅᖕᒪᑕ, ᑐᑭᓯᔭᐅᔪᓐᓇᕐᐳᓪᓗ ᓴᓇᓯᒪᔭᖏᑎᒍᑦ ᓇᓗᓁᕐᑕᐅᖕᒪᑕ. ᑍᒤᒻᒪᑦ ᐸᓯᔭᒃᓴᐅᖏᑦᔪᑎᒃᓴᖃᕈᓐᓃᕐᐳᑦ.

²¹ ᒎᑎᒥᒃ ᖃᐅᔨᒪᒐᓗᐊᕐᐳᑦ ᓂᕐᑐᕐᓇᒍᓕ ᒎᑎᖃᕐᑐᑎᑐᑦ ᖁᔭᒋᓇᒍᓘᓐᓃᑦ, ᐃᓱᒪᒋᔭᖏᑦ ᐊᑑᑎᖃᕈᓐᓃᕐᐳᑦ ᐃᓱᒪᖏᓪᓗ ᐃᒃᐱᒍᓱᖏᑦᑐᑦ ᑖᕐᓯᑎᑕᐅᕗᑦ.

²² ᓯᓚᑐᓇᓱᒋᒐᒥᒃ, ᓯᓔᑦᑑᓕᕐᐳᑦ,

²³ ᒎᑎᐅᑉ ᑐᖁᓱᐃᑦᑑᑉ ᓂᕐᑐᕐᓇᕐᓂᕐᔪᐊᖓ ᐃᓇᖏᕐᑕᐅᑎᑉᐹᑦ ᐃᓅᑉ ᑐᖁᔪᒫᕐᑑᑉ ᐊᑦᔨᖓᓄᑦ ᑎᖕᒥᐊᓄᓪᓗ, ᓂᕐᔪᑏᓪᓗ ᐃᒪᕐᒥᐅᑍᓪᓗ ᐊᑦᔨᖏᓐᓄᑦ.

²⁴ ᑍᒤᒻᒪᑦ ᒎᑎᐅᑉ ᐃᓱᒪᕐᓱᕐᑎᓕᕐᐰᑦ ᐱᐅᖏᑦᑐᓕᓂᕐᓄᑦ ᐃᓗᒥᖕᓂᑦ ᐱᔪᒪᓂᕆᔭᖏᓐᓄᑦ, ᑎᒥᒥᖕᓂᒡᓗ ᐃᒻᒥᖕᓄᑦ ᐅᐱᓐᓇᕐᕈᓐᓃᑎᑦᓯᓂᕐᒧᑦ.

²⁵ ᓱᓕᓂᕐᓗ ᒎᑎᒥᑦ ᐱᔪᖅ ᐃᓇᖏᕐᑕᐅᑎᑉᐹᑦ ᓴᒡᓗᓂᕐᒧᑦ, ᓂᕐᑐᐃᖔᕐᓗᑎᒃ ᐱᔨᑦᓯᕐᓗᑎᒡᓗ ᐱᓐᖑᕐᑎᑕᐅᓯᒪᔪᓂᒃ ᐱᓐᖑᕐᑎᑦᓯᔨᑎᒃ ᐃᓱᒪᒋᓇᒍ, ᑖᓐᓇ ᓂᕐᑐᕐᑕᐅᔪᒃᓴᐅᔪᖅ ᐃᓱᖃᖏᑦᑐᒧᑦ. ᐋᒥᓐ.

²⁶ ᑍᒤᒻᒪᑦ, ᒎᑎᐅᑉ ᐃᓱᒪᕐᓱᕐᑎᓕᕐᐰᑦ ᐱᔪᒪᓂᕐᔪᐊᓄᑦ ᑲᓐᖑᓇᕐᑐᓄᑦ. ᐊᕐᓁᓪᓘᓐᓃᑦ ᐊᖑᒻᒧᑦ ᐱᔪᒪᓂᑎᒃ ᐊᑐᕈᓐᓃᕐᓗᒍ ᐊᑐᖃᑦᑕᓕᕐᐳᑦ ᐊᑐᒐᒃᓴᔭᕆᓐᖏᑕᒥᖕᓂᒃ,

²⁷ ᑍᒫᒃᑕᐅᖅ ᐊᖑᑏᑦ ᐱᓂᐊᕐᓂᕆᔭᒃᓴᑎᒃ ᐊᕐᓇᒧᑦ ᐊᑐᕈᓐᓃᕐᓗᒍ ᐊᖑᑕᐅᖃᑎᒥᖕᓄᑦ ᐱᓇᓱᐊᖃᑦᑕᓕᕐᐳᑦ, ᑲᓐᖑᓇᕐᑐᐊᓗᖕᓂᒃ ᐱᓇᓱᐊᖃᑦᑕᕐᐳᑦ ᐊᖑᑕᐅᖃᑎᒥᖕᓄᑦ; ᑍᒤᒻᒪᑦ ᐃᒻᒥᖕᓄᑦ ᐊᑭᓕᕐᑕᐅᑦᔪᑎᒃᓴᒥᖕᓂᒃ ᐊᑐᖃᑦᑕᕐᐳᑦ ᑕᒻᒪᕈᑎᐊᓗᖕᒥᖕᓄᑦ.

²⁸ ᓱᓕ ᒎᑎᒥᒃ ᖃᐅᔨᔭᕆᐊᖃᕋᓱᒋᖏᒻᒪᑕ, ᒎᑎᐅᑉ ᐃᓱᒪᕐᓱᕐᑎᓕᕐᐰᑦ ᐱᐅᖏᑦᑐᒥᒃ ᐱᔪᒪᓂᖏᓐᓄᑦ, ᐊᑐᒐᒃᓴᕆᓐᖏᑕᒥᖕᓂᒡᓗ ᐊᑐᓕᖁᓪᓗᒋᑦ.

²⁹ ᐱᐅᖏᑦᑐᓕᓂᕐᓂᒃ ᖃᓄᐃᑦᑐᑐᐃᓐᓇᑦᓯᐊᓂᒃ ᐱᓕᕆᕗᑦ, ᐱᐅᖏᑦᑐᓂᒃ, ᐱᔪᒪᕕᒡᔪᐊᕐᓂᕐᓂᒃ, ᐊᑭᕋᕐᑑᑎᓂᕐᓂᒃ, ᐊᓯᒥᖕᓂᑦ ᐱᖃᕐᓂᕐᓴᐅᔪᒪᓂᕐᒥᒃ, ᑐᖁᑦᓯᔪᒪᓂᕐᒥᒃ, ᐅᓇᑕᕈᒪᓂᕐᒥᒃ, ᓯᓔᕐᕆᒃᓯᓂᕐᒥᒃ, ᐅᒋᐊᓐᖑᖃᑦᑕᐅᑎᓂᕐᒥᒃ, ᑎᕐᓕᐊᖃᑦᑍᓂᕐᓂᒡᓗ.

³⁰ ᐅᖃᕐᓂᕐᓗᖃᑦᑕᐅᑎᕗᑦ, ᒎᑎᒥᒃ ᐆᒥᓱᒃᐳᑦ, ᓂᓐᖓᐅᒪᓪᓗᑎᒃ ᐅᖃᐅᓯᕾᓐᓇᕐᐳᑦ, ᐱᐅᔪᕆᕗᑦ, ᐅᓇᖕᒥᓁᔭᕐᐳᑦ, ᐱᐅᖏᑦᑐᓕᐅᕈᑎᒃᓴᓂᒃ ᐋᖅᑭᒃᓱᐃᕗᑦ, ᐊᖓᔪᖅᑳᒥᖕᓂᒃ ᓈᓚᒍᓐᓇᓐᖏᓚᑦ.

³¹ ᓯᓔᑦᑑᕗᑦ, ᐅᒃᐱᕐᓂᖃᓐᖏᓚᑦ, ᐃᓅᖃᑎᒥᖕᓂᒃ ᐱᑦᓯᐊᓐᖏᓚᑦ, ᓇᒡᓕᒍᓱᒐᑎᒡᓗ.

³² ᒎᑎᐅᑉ ᐊᑐᕐᑕᐅᖁᔭᖓ ᓈᒻᒪᓈᕐᓯᒪᔪᖅ ᖃᐅᔨᒪᒐᓗᐊᕐᐹᑦ ᑍᒤᓕᐅᕐᑐᑦ ᑐᖁᑕᒃᓴᐅᓂᖏᓐᓂᒃ, ᑕᒪᒃᑯᓂᖓᓕ ᐊᑐᑐᐃᓐᓇᓐᖏᓚᑦ ᐊᓯᒥᖕᓂᒡᓕ ᐊᒡᓛᑦ ᓈᒻᒪᒃᓴᕐᐳᑦ ᑕᒪᒃᑯᓂᖓ ᐊᑐᕐᑐᓂᒃ.