ᔪᐊᓇᓯᐅᑉ ᑕᑯᑎᑕᐅᓂᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐂᖏᓖᓪᓗ ᑕᓪᓕᒪᖓᑦᑕ ᑎᑦᑐᓚᐅᑦ ᓂᓪᓕᕐᑎᒻᒪᒍ, ᑕᑯᕗᖓ ᐅᓪᓗᕆᐊᒥᒃ ᑲᑕᒃᑐᒥᒃ ᓄᓇᕐᔪᐊᕐᒧᑦ, ᑖᓐᓇᓗ ᑐᓂᔭᐅᕗᖅ ᐃᑎᕐᓴᕐᔪᐊᑉ ᓇᑎᖃᖏᑦᑑᑉ ᐅᒃᑯᐃᕈᑎᖓᓂᒃ;

² ᐅᓪᓗᕆᐊᓪᓗ ᐃᑎᕐᓴᕐᔪᐊᖅ ᓇᑎᖃᖏᑦᑐᖅ ᐅᒃᑯᐃᕐᐹ, ᐃᓯᕐᓗᒡᓗ ᓴᖅᑭᑉᐳᖅ ᐃᓗᐊᓂᑦ ᐃᑯᐊᓚᑦᓯᕕᒡᔪᐊᕐᒥᑦ ᐳᔫᕐᑐᑎᑐᑦ ᑍᒤᑦᑐᖅ, ᓯᕿᓂᕐᓗ ᓯᓚᓗ ᑖᕐᓯᑎᑕᐅᕘᒃ ᐃᑎᕐᓴᕐᔪᐊᑉ ᐃᓯᕐᓗᖓᓄᑦ.

³ ᐃᓯᕐᓗᖕᒥᓪᓗ ᐱᒃᓕᕐᑕᐅᔮᕐᑐᑦ ᓴᖅᑭᑉᐳᑦ ᓄᓇᕐᔪᐊᕐᒧᑦ, ᑖᒃᑯᐊᓗ ᓯᑯᐊᕐᐱᐅᓂᑎᑐᑦ ᐱᔪᓐᓇᕐᓂᕐᑖᕐᑎᑕᐅᕗᑦ ᓄᓇᕐᔪᐊᕐᒧᑦ;

⁴ ᐅᖃᐅᑎᔭᐅᕗᓪᓗ ᐊᓯᕈᐃᖁᓇᒋᑦ ᐃᕕᒃᓱᒐᕐᓂᒃ ᓄᓇᕐᔪᐊᕐᒦᑦᑐᓂᒃ ᑐᖑᔪᕐᑐᓕᒫᓂᒃ ᓇᐹᕐᑐᓂᒡᓗ ᐱᕈᕐᑐᓂᒡᓗ, ᐃᓄᖕᓂᒡᓕ ᑭᓯᐊᓂ ᐊᓯᕈᐃᖁᓪᓗᒋᑦ ᒎᑎᐅᑉ ᓇᕿᑦᔪᑎᖓᓂᒃ ᖃᐅᕐᒥᒍᑦ ᓇᓗᓁᒃᑯᑕᖃᖏᑦᑐᓂᒃ;

⁵ ᐱᒃᓕᕐᑕᐅᔮᕐᑐᓪᓕ ᐃᓄᖕᓂᒃ ᐋᓐᓂᐊᑎᓯᖁᔭᐅᕗᑦ ᑕᖅᑭᓂᒃ ᑕᓪᓕᒪᓂᒃ, ᑐᖁᑦᓯᖁᔭᐊᓇᑎᒡᓕ, ᐋᓐᓂᐊᑎᑕᐅᓂᖏᓪᓗ ᓯᑯᐊᕐᐱᐅᓂᐅᑉ ᑲᐴᑎᖓᑕ ᐋᓐᓂᐊᓇᕐᓂᖓᑐᑦ ᑍᒤᑉᐳᑦ.

⁶ ᑖᒃᑯᐊᓗ ᐅᓪᓗᐃᑦ ᓇᓪᓕᐅᑎᓯᒪᑎᓪᓗᒋᑦ ᐃᓄᐃᑦ ᑐᖁᑦᔪᑎᒃᓴᒥᖕᓂᒃ ᕿᓂᖃᑦᑕᕈᒫᕐᐳᑦ ᓇᓂᓯᓂᐊᓐᖏᓚᓪᓕ; ᑐᖁᔪᒪᒐᓗᐊᕈᑎᒃ, ᑐᖂᑉ ᕿᒫᔪᒫᕐᒪᒋᑦ.

⁷ ᐱᒃᓕᕐᑕᐅᔮᕐᑐᓪᓗ ᑕᐅᑦᑐᖃᕐᐳᑦ ᕿᒻᒥᕐᔪᐊᑎᑐᑦ ᐅᓇᑕᕐᓂᕐᒧᑦ ᐸᕐᓇᒃᓯᒪᔪᑎᑐᑦ; ᓂᐊᖁᕐᒥᒃᑎᒍᑦ ᓂᐊᖂᑎᖃᕐᐳᑦ ᒎᓘᔮᕐᑐᓂᒃ; ᑮᓇᖃᕐᓗᑎᒡᓗ ᐃᓄᒃᑎᑐᑦ,

⁸ ᓄᔭᖃᕐᐳᓪᓗ ᐊᕐᓇᑎᑐᑦ, ᑭᒍᑎᖃᕐᓗᑎᒡᓗ ᓔᔭᓐᑎᑐᑦ;

⁹ ᓴᒡᕕᖕᒥᒃᑎᒍᓪᓗ ᓴᕕᕋᔭᐅᔮᕐᑐᒥᒃ ᓴᒡᕕᖕᒥᐅᑕᖃᕐᐳᑦ, ᐃᓴᕈᖏᑕᓗ ᐃᓴᕈᕐᓱᕐᓂᖏᑦ ᑐᓴᕐᓴᐅᓂᖃᕐᐳᑦ ᐊᒃᓴᓗᐊᓖᑦ ᑲᓕᒊᑦ ᐊᒥᓱᑦ ᕿᒻᒥᕐᔪᐊᒐᓴᒡᔪᐊᓪᓗ ᐅᓇᑕᕆᐊᓕᕐᓂᖏᑎᑐᑦ.

¹⁰ ᐸᒥᐅᖏᑦ ᓯᑯᐊᕐᐱᐅᑉ ᐸᒥᐅᖓᑐᑦ ᐋᓐᓂᕐᓇᕐᑎᒋᔪᒥᒃ ᑲᐴᑎᖃᕐᐳᑦ, ᐸᒥᐅᒥᖕᓄᓗ ᐋᓐᓂᐊᑎᑦᓯᔪᓐᓇᕐᐳᑦ ᐃᓄᖕᓂᒃ ᑕᖅᑭᓂᒃ ᑕᓪᓕᒪᓂᒃ.

¹¹ ᑖᒃᑯᐊᓗ ᐊᖓᔪᖅᑳᕐᔪᐊᖃᕐᐳᑦ ᐂᖏᓕᒥᒃ ᐃᑎᕐᓴᕐᔪᐊᕐᒥᑦ ᓇᑎᖃᖏᑦᑐᒥᑦ ᐱᔪᒥᒃ; ᐄᑉᕉᑎᑐᑦ ᐊᑎᖃᕐᐳᖅ ᐊᐸᑖᓐ, ᒍᕇᑭᑎᑐᓪᓗ ᐊᑎᖃᕐᐳᖅ ᐊᐴᓕᐊᓐᒥᒃ.

¹² ᑕᕝᕙ ᓯᕗᓪᓕᖅ ᑲᑉᐱᐊᓇᕐᑐᕐᔪᐊᖅ ᐊᓂᒍᕐᐳᖅ; ᑕᑯᒋᑦ, ᑕᒪᑐᒪ ᓱᓕ ᑭᖑᕐᖓᒍᑦ ᒪᕐᕉᖕᓂᒃ ᑲᑉᐱᐊᓇᕐᑐᕐᔪᐊᖕᓂᒃ ᓇᓪᓕᐅᑦᑐᒃᓴᖃᕐᐳᖅ.

¹³ ᑕᕝᕙ ᐂᖏᓕᐅᑉ ᐱᖓᓲᔪᕐᑐᖓᑦᑕ ᑎᑦᑐᓚᐅᑦ ᓂᓪᓕᕐᑎᒃᑭᕚ, ᓂᐱᒥᒡᓗ ᑐᓴᕐᐳᖓ ᑐᓂᕐᕈᓯᕐᕕᐅᑉ ᒎᓘᑉ ᑎᕆᖅᑯᖏᓐᓂᑦ ᓯᑕᒪᓂᑦ ᐱᔪᒥᒃ ᒎᑎᐅᑉ ᓵᖓᓃᑦᑐᒥᑦ,

¹⁴ ᓂᐱᓗ ᐂᖏᓖᑦ ᐱᖓᓲᔪᕐᑐᖓᓐᓄᑦ ᑎᑦᑐᓚᐅᑎᖃᕐᑐᒧᑦ ᐅᖃᕐᐳᖅ, “ᐂᖏᓖᑦ ᓯᑕᒪᑦ ᕿᓚᕈᑦᔮᒃᑭᑦ ᐊᑦᓱᖏᕐᑕᐅᓯᒪᔪᑦ ᑰᒑᓗᖕᒥ ᐃᕗᕅᑎᒥ.”

¹⁵ ᑕᕝᕙ ᐂᖏᓖᑦ ᓯᑕᒪᑦ ᕿᓚᕈᑦᔮᕐᑕᐅᕗᑦ, ᐅᐸᓗᖕᒊᕈᑕᐅᓯᒪᔪᑦ ᐃᑲᕐᕋᕐᒥ ᑕᕝᕙᓂ; ᐅᓪᓗᕐᒥ; ᑕᖅᑭᕐᒥ; ᐊᕐᕌᒍᒥᓗ ᑕᕝᕙᓂ; ᑐᖁᑦᓯᖁᓪᓗᒋᑦ ᓯᓚᕐᔪᐊᑉ ᐃᓄᖏ ᑕᒪᕐᒥᒃ ᐱᖓᓲᓕᓗᒋᑦ ᐊᑕᐅᓯᖅ ᐱᖓᓲᑦᔪᑎᖏᑦ ᑐᖁᑉᐰᑦ.

¹⁶ ᐅᖃᐅᑎᔭᐅᕗᖓ ᕿᒻᒥᕐᔪᐊᒦᑦᑐᑦ ᐅᓇᑕᕐᑐᒃᓮᑦ ᐅᓄᕐᓂᖏᓐᓂᒃ, ᑖᒃᑯᐊ ᐅᓄᕐᓂᖃᕐᐳᑦ 200ᒥᓕᐊᓂᒃ.

¹⁷ ᑕᑯᑎᑕᐅᓂᒃᑯᓪᓗ ᑕᑯᕙᒃᑲ ᕿᒻᒥᕐᔪᐊᑦ ᖄᖓᓂᓗ ᐃᑭᒪᔪᑦ; ᓴᒡᕕᖕᒥᐅᑕᖃᕐᐳᑦ ᐃᑯᐊᓚᔪᑎᑐᑦ ᐊᐅᐸᕐᑎᒋᔪᓂᒃ ᐅᔭᕋᒃᑎᑐᓪᓗ ᓴᐰᕋᑎᑐᑦ ᑐᖑᔪᕐᑎᒋᔪᓂᒃ, ᐃᑭᓴᕅᑦᑐᑎᑐᓪᓗ ᖁᕐᓱᕐᑎᒋᓪᓗᑎᒃ ᓲᓪᕙᑎᑐᑦ, ᕿᒻᒥᕐᔪᐊᖏᓪᓗ ᓂᐊᖁᖃᕐᐳᑦ ᓔᔭᓐᐅᑉ ᓂᐊᖁᖏᑎᑐᑦ, ᖃᓂᖏᓐᓂᓪᓗ ᐊᓂᔪᖃᕐᐳᖅ ᐃᑯᒪᒥᒃ, ᐃᓯᕐᓗᖕᒥᒡᓗ, ᐳᔪᕐᒥᒡᓗ ᑍᔭᐅᔪᒥᒃ ᓲᓪᕙᒥᒃ.

¹⁸ ᓯᓚᕐᔪᐊᒥᐅᓪᓗ ᐃᓄᖏᑦ ᐱᖓᓲᓕᒐᔭᕐᐸᑕ ᐱᖓᔪᖏᑦ ᑐᖁᑕᐅᕗᑦ ᑖᒃᑯᓄᖓ ᐊᓯᕈᕐᓇᕐᑐᓄᑦ ᐱᖓᓱᓄᑦ; ᐃᑯᒪᒧᑦ, ᐃᓯᕐᓗᖕᒧᓪᓗ, ᐳᔪᕐᒧᓪᓗ ᓲᓪᕙᒧᑦ ᕿᒻᒥᕐᔪᐊᑦ ᖃᓂᖏᓐᓂᑦ ᐊᓂᔪᓄᑦ.

¹⁹ ᕿᒻᒥᕐᔪᐊᓪᓗ ᐱᔪᓐᓇᕐᓂᖏᑦ ᖃᓂᖏᓐᓃᑉᐳᑦ ᐸᒥᐅᖏᓐᓂᓗ; ᐸᒥᐅᖏᓪᓗ ᖁᒡᓗᒋᐊᑎᑐᑦ ᓂᐊᖁᖃᕐᐳᑦ, ᑖᒃᑯᓄᖓᓗ ᐃᓄᖕᓂᒃ ᐋᓐᓂᕐᓯᕗᑦ.

²⁰ ᓯᓚᕐᔪᐊᕐᒥᐅᓪᓕ ᐃᓄᖏᑕ ᐃᓚᖏᑦ, ᑖᒃᑯᓄᖓ ᐊᓯᕈᕐᓇᕐᑐᓄᑦ ᑐᖁᑕᐅᖏᑦᑐᑦ, ᓱᓕ ᖃᕿᐊᓕᓐᖏᓚᑦ ᓴᓇᓯᒪᔭᒥᖕᓂᑦ ᑐᒃᓯᐊᕐᕕᒋᕙᒃᑕᒥᖕᓂᓪᓗ ᐊᓂᕐᓂᕐᓗᖕᓄᑦ, ᒎᑎᓐᖑᐊᒥᖕᓂᓪᓗ ᒎᓗᓂᑦ ᓯᐅᓪᕕᕆᓂᑦ, ᑲᓐᓄᔭᓂᑦ, ᐅᔭᕋᖕᓂᑦ, ᕿᔪᖕᓂᓪᓗ, ᑕᑯᔪᓐᓇᖏᑦᑐᓂᑦ ᑐᓵᔪᓐᓇᖏᑦᑐᓂᑦ ᐱᓱᒍᓐᓇᖏᑦᑐᓂᓪᓗ;

²¹ ᖃᕿᐊᓕᓚᐅᓐᖏᓚᑦᑕᐅᖅ ᐃᓄᐊᕐᓂᕐᒥᑦ ᐊᖓᒃᑰᓇᓱᐊᕐᓂᕐᒥᑦ ᐅᕝᕙᓗ ᓄᓕᐊᕐᓂᕐᒥᑦ ᑎᒡᓕᖕᓂᕐᒥᓪᓗ.