ᔪᐊᓇᓯᐅᑉ ᑕᑯᑎᑕᐅᓂᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᕿᑦᔪᑏᑦ 7ᖓᑦ

¹ ᓄᕐᕋᐅᔭᐅᑉ ᓇᕿᑦᔪᑏᑦ 7ᖓᑦ ᐲᕐᒪᒍ, ᑕᕝᕙ ᕿᓚᖕᒥ ᓂᐱᖃᕐᑐᖃᖏᑦᓯᐊᓕᕐᐳᑦ ᐃᑲᕐᕋᐅᑉ ᓇᑉᐸᓕᒫᖓᓂᒃ.

² ᑕᕝᕙ ᑕᑯᓕᕐᐳᖓ ᐂᖏᓖᓂᒃ 7ᓂᒃ ᒎᑎᐅᑉ ᓵᖓᓂ ᓇᖏᕐᑐᓂᒃ, ᑎᑦᑐᓚᐅᑎᓂᒡᓗ 7ᓂᒃ ᑐᓂᓯᕕᐅᕗᑦ.

³ ᐂᖏᓕᑦᑕᐅᖅ ᐊᓯᐊ ᑕᒪᐅᓐᖓᕐᐳᖅ ᑐᓂᕐᕈᓯᕐᕕᐅᑉ ᓵᖓᓄᐊᕐᓗᓂ ᒎᓗᒥᒃ ᐳᔫᑦᑎᑦᓯᕕᖕᒥᒃ ᑎᒍᒥᐊᕐᑐᖅ; ᑐᓂᓯᕕᐅᕗᕐᓗ ᐳᔫᕐᑎᑕᒃᓴᖏᓐᓂᒃ ᐊᒥᓱᓂᒃ ᐃᓚᓕᐅᑎᔭᐅᖁᓪᓗᒋᑦ ᐃᑦᔪᕐᓁᑎᑕᐅᓯᒪᔪᓕᒫᑦ ᑐᒃᓯᐊᕐᓂᖏᓐᓄᑦ ᑐᓂᕐᕈᑕᐅᖁᓪᓗᒋᑦ ᒎᓗᒧᑦ ᑐᓂᕐᕈᓯᕐᕕᖕᒧᑦ ᐃᒃᓯᕙᐅᑕᕐᔪᐊᑉ ᓵᖓᓃᑦᑐᒧᑦ.

⁴ ᐳᔫᕐᑎᑕᐅᔪᑦ ᐳᔪᖓ ᐃᑦᔪᕐᓁᑎᑕᐅᓯᒪᔪᑦ ᑐᒃᓯᐊᕐᓂᖏᓐᓄᑦ ᖁᒻᒧᐊᖃᑕᐅᕗᖅ ᐂᖏᓕᐅᑉ ᐊᒡᒐᖏᓐᓂᑦ ᒎᑎᐅᑉ ᓵᖓᓂ.

⁵ ᑕᕝᕙ ᐂᖏᓕᐅᑉ ᐳᔪᕐᑎᑦᓯᕕᐅᑉ ᐃᓂᖓ ᑎᒍᓪᓗᒍ ᐃᓗᓪᓕᕐᓱᕐᐹ ᐃᑯᒪᓂᒃ ᑐᓂᕐᕈᓯᕐᕕᖕᒥᑦ ᐱᔪᓂᒃ ᐃᒋᓪᓗᒋᓪᓗ ᓄᓇᕐᔪᐊᕐᒧᑦ; ᑕᕝᕙ ᓂᐱᕐᔪᐊᕐᑕᖃᓕᕐᐳᖅ ᐃᒃᑐᓚᐅᕐᑐᒥᒃ, ᑲᓪᓕᕐᕙᓗᒃᑐᒥᒡᓗ, ᖃᐅᒻᒪᓪᓚᖕᒥᒡᓗ, ᓄᓇᐅᓪᓗ ᓴᔪᒃᐱᓪᓚᖕᓂᖓᓂᒃ.

ᑎᑦᑐᓚᐅᑏᑦ

⁶ ᐂᖏᓖᓪᓗ 7 ᑎᑦᑐᓚᐅᑎᓂᒃ 7ᓂᒃ ᑎᒍᒥᐊᕐᑐᑦ ᓂᓪᓕᕐᑎᑦᓯᓂᐊᕐᓗᑎᒃ ᐊᑐᐃᓐᓇᕈᕐᑎᓕᕐᐳᑦ.

⁷ ᓯᕗᓪᓕᕐᐹᓪᓗ ᐂᖏᓕᐅᑉ ᑎᑦᑐᓚᐅᑦ ᓂᓪᓕᕐᑎᒻᒪᒍ, ᓇᑕᖅᑯᕐᓁᑦ ᐃᑯᒤᓪᓗ, ᐊᐅᒥᒃ ᐃᓚᖃᕐᓗᑎᒃ, ᓄᓇᕐᔪᐊᕐᒧᑦ ᑲᑕᒐᓕᕐᐳᑦ; ᓄᓇᕐᔪᐊᕐᓗ ᐊᕝᕙᖓᑕ ᐅᖓᑖᓄᑦ ᐃᑭᑕᐅᕗᖅ, ᓇᐹᕐᑐᐃᓪᓗ ᐊᕝᕙᖏᑕ ᐅᖓᑖᓄᑦ ᐃᑯᐊᓪᓚᒃᑭᕗᑦ, ᐃᕕᒃᓱᒐᓕᒫᓪᓗ ᑐᖑᔪᕐᑐᑦ ᐃᑯᐊᓪᓚᒃᑕᐅᒋᕗᑦ.

⁸ ᐂᖏᓕᐅᓪᓗ ᐂᑉᐸᖓᑕ ᑎᑦᑐᓚᐅᑦ ᓂᓪᓕᕐᑎᒻᒪᒍ, ᖃᖅᑳᓗᒃᑎᑐᑦ ᑕᐅᑦᑐᖃᕐᑐᖅ, ᐃᑯᐊᓚᔪᐊᓗᒃ ᐃᒪᕐᔪᐊᕐᒧᑦ ᑲᑕᒃᑎᑕᐅᕗᖅ;

⁹ ᐃᒪᕕᒡᓗ ᐊᕝᕙᖓᑕ ᐅᖓᑖᓄᑦ ᐊᐅᓐᖑᕐᐳᖅ, ᐃᒪᕐᕕᐅᓪᓗ ᐆᒪᔪᖏᑦ ᐊᕝᕙᖓᑕ ᐅᖓᑖᓃᑦᑐᑦ ᑐᖁᕗᑦ, ᐅᒥᐊᕐᔪᐊᓪᓗ ᐊᕝᕙᖏᑕ ᐅᖓᑖᓃᑦᑐᑦ ᐊᓯᕈᕐᑕᐅᒋᕗᑦ.

¹⁰ ᐂᖏᓕᐅᓪᓗ ᐱᖓᔪᖓᑦᑕ ᑎᑦᑐᓚᐅᑦ ᓂᓪᓕᕐᑎᒻᒪᒍ, ᐅᓪᓗᕆᐊᖅ ᐊᖏᔪᖅ ᓇᓂᕈᐊᑎᑐᑦ ᐃᑯᐊᓚᔪᖅ, ᕿᓚᖕᒥᒃ ᑲᑕᒃᐳᖅ ᑰᒑᓗᐃᑦ ᐊᕝᕙᖏᑕ ᐅᖓᑖᓃᑦᑐᓄᑦ, ᓄᓇᐅᓪᓗ ᐃᓗᐊᓂᑦ ᑰᒃᑐᓄᑦ ᐊᒃᑑᑎᕗᖅ.

¹¹ ᑖᓐᓇ ᐅᓪᓗᕆᐊᖅ ᐊᑎᖃᕐᐳᖅ ᖃᒃᑭᓐᓇᕐᑐᒥᒃ. ᐃᒪᐅᓪᓗ ᐊᕝᕙᖓᑕ ᐅᖓᑖᓃᑦᑐᖅ ᖃᒃᑭᓐᓇᕐᓯᕗᖅ, ᐃᓄᐃᓪᓗ ᐃᒥᕐᑐᑦ ᐊᒥᓱᑦ ᑐᖁᕗᑦ, ᐃᒪᐅᑉ ᑕᒪᑐᒪ ᖃᒃᑭᓐᓇᕐᓯᓯᒪᓂᖓᓄᑦ.

¹² ᑕᕝᕙ ᐂᖏᓕᐅᑉ ᓯᑕᒪᖓᑦᑕ ᑎᑦᑐᓚᐅᑦ ᓂᓪᓕᕐᑎᒻᒪᒍ, ᑕᕝᕙ ᓯᕿᓂᖅ ᐊᕝᕙᖓᑕ ᐅᖓᑖᓄᑦ ᐊᒃᑐᕐᑕᐅᕗᖅ, ᑕᖅᑭᕐᓗ ᐊᕝᕙᖓᑕ ᐅᖓᑖᓄᑦ, ᐅᓪᓗᕆᐊᓪᓗ ᐊᕝᕙᖏᑕ ᐅᖓᑖᓄᑦ, ᖃᐅᒪᓂᖏᓪᓗ ᐃᓚᓐᖓᕐᐳᑦ ᐊᕝᕙᓪᓗᐊᖏᑦᑕ ᐅᖓᑖᓄᑦ ᖃᐅᒪᓂᕆᕙᒃᑕᒥᖕᓂᑦ; ᐅᓪᓘᓪᓗ ᐊᕝᕙᓪᓗᐊᖓᑕ ᐅᖓᑖᓄᑦ ᖃᐅᒪᓂᖓ ᐃᓚᓐᖓᕐᐳᖅ, ᐅᓐᓄᐊᕐᓗᑦᑕᐅᖅ ᐊᕝᕙᖓᑕ ᐅᖓᑖᓄᑦ ᐃᓚᓐᖓᕆᓪᓗᓂ.

¹³ ᑕᑯᓴᕋᒪᓗ, ᓇᒃᑐᕋᓕᖕᒥᒃ ᑐᓴᕐᐳᖓ ᖁᑦᓯᒃᑑᓪᓗᓂ ᖃᖓᑕᔪᒥᒃ ᓂᐱᖅᑯᕐᑐᓪᓗᓂ ᐅᖃᕐᑐᒥᒃ, “ᑲᑉᐱᐊᓐᓇᒦᒃ, ᑲᑉᐱᐊᓐᓇᒦᒃ, ᑲᑉᐱᐊᓐᓇᒦᒃ ᓄᓇᕐᔪᐊᕐᒥᐅᑕᓄᑦ, ᐂᖏᓖᑦ ᐱᖓᓱᑦ ᑎᑦᑐᓚᐅᑎᒥᖕᓂᒃ ᓂᓪᓕᕐᑎᑦᓯᓕᕐᐸᑕ!”