ᔪᐊᓇᓯᐅᑉ ᑕᑯᑎᑕᐅᓂᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᕿᑦᔪᑏᑦ

¹ ᑕᑯᕗᖓ ᓇᕿᑦᔪᑎᐅᑉ 7ᖓᑦᑕ ᐃᓚᖓᓐᓂᒃ ᓄᕐᕋᐅᔭᖅ ᒪᒃᐱᕐᓯᑎᓪᓗᒍ, ᐆᒪᔪᐃᓪᓗ ᓯᑕᒪᑦ ᐃᓚᖓᑦ ᑐᓴᕐᐸᕋ ᑲᓪᓕᐅᑉ ᐃᒃᑐᓚᐅᕐᓂᖓᑐᑦ ᓂᐱᖃᕐᓗᓂ ᐅᖃᕐᑐᖅ, “ᕾᒋᑦ!”

² ᑕᑯᕗᖓᓗ, ᑕᑯᒋᑦ ᕿᒻᒥᕐᔪᐊᒥᒃ ᖃᑯᕐᑕᒥᒃ, ᑕᕝᕙᓂᓗ ᐃᑭᒪᔪᖅ ᐱᑎᒃᓯᒥᒃ ᑎᒍᒥᐊᕐᐳᖅ; ᓂᐊᖂᑎᒥᒡᓗ ᑐᓂᓯᕕᐅᕗᖅ, ᑕᕝᕙᓐᖓᓪᓗ ᐊᐅᓪᓚᕋᒥ ᓵᓚᖃᕐᐳᖅ ᓵᓚᖃᕆᐊᕐᑐᒃᑲᓐᓂᕐᓗᓂᓗ.

³ ᓄᕐᕋᐅᔭᐅᓪᓗ ᓇᕿᑦᔪᑎᐅᑉ ᐂᑉᐹ ᒪᒃᐱᕆᕚ, ᐆᒪᔫᓪᓗ ᐂᑉᐸᖓ ᐅᖃᕐᑐᖅ ᑐᓴᕐᐸᕋ, “ᕾᒋᑦ!”

⁴ ᕿᒻᒥᕐᔪᐊᒥᒡᓗ ᓴᖅᑭᑦᑐᖃᕆᕗᖅ, ᐊᐅᑉᐸᕆᒃᑐᒥᒃ; ᖄᖓᓂᓗ ᐃᑭᒪᔪᖅ ᐱᔪᓐᓇᕐᓂᕐᑖᕐᑎᑕᐅᕗᖅ ᓄᓇᕐᔪᐊᕐᒥᑦ ᓮᒪᓂᕐᒥᒃ ᐲᕐᓯᖁᓪᓗᒍ, ᐃᓅᖃᑎᒌᑦ ᐃᒻᒥᖕᓄᑦ ᑐᖁᕋᐅᑎᖁᓪᓗᒋᑦ; ᓴᕕᒡᔪᐊᒥᒡᓗ ᐊᖏᔪᕐᔪᐊᒥᒃ ᑐᓂᓯᕕᐅᕗᖅ.

⁵ ᓄᕐᕋᐅᔭᐅᓪᓗ ᓇᕿᑦᔪᑏᑦ ᐱᖓᔪᖓᑦ ᒪᒃᐱᕐᒪᒍ; ᐆᒪᔪᐃᑦ ᐱᖓᔪᖓᑦ ᐅᖃᕐᑐᖅ ᑐᓴᕐᐸᕋ, “ᕾᒋᑦ!” ᑕᑯᓴᕋᒪᓗ, ᑕᑯᕗᖓ ᕿᒻᒥᕐᔪᐊᒥᒃ ᕿᕐᓂᕐᑕᒥᒃ, ᑕᕝᕙᓂᓗ ᐃᑭᒪᔪᖅ ᐅᖁᒤᓐᓂᕐᓂᐊᕈᑎᒥᒃ ᑎᒍᒥᐊᕐᐳᖅ.

⁶ ᓂᐱᒥᒡᓗ ᑐᓴᕐᐳᖓ ᐆᒪᔪᐊᓗᖕᓂᑦ ᓯᑕᒪᓂᑦ ᓂᐱᒋᔭᐅᔫᔮᕐᑐᓂᒃ, ᐅᖃᕐᑐᒥᒃ, “ᓂᐊᖂᔭᒃᓴᐅᑉ ᐅᖁᒤᓐᓂᖓᑕ ᐊᑕᐅᓯᐅᑉ ᐊᕝᕙᖓᑕ ᐊᕝᕙᖓ ᐊᑭᖃᕐᓕ ᐅᓪᓗᓕᒫᖅ ᑮᓇᐅᔭᓕᐊᖑᕙᒃᑐᑎᑐᑦ, ᕿᕐᓈᖓᔫᓪᓗ ᓂᐊᖂᔭᒃᓴᐅᑉ ᐅᖁᒤᓐᓂᖓᑕ ᐊᑕᐅᓯᐅᑉ ᓇᑉᐸᖓᓂᑦ ᐊᖏᓂᕐᓴᖅ ᐊᑭᖃᕐᓕ ᐅᓪᓗᓕᒫᖅ ᑮᓇᐅᔭᓕᐊᖑᕙᒃᑐᑎᑐᑦ; ᐸᐅᕐᒊᓪᓕ ᐅᕐᓱᖏᑦ ᐸᐅᕐᒊᓪᓗ ᐃᑦᑎᖏᑦ ᐊᓯᕈᕐᑎᓐᓂᐊᕐᓇᒋᑦ!”

⁷ ᓄᕐᕋᐅᔭᐅᓪᓗ ᒪᒃᐱᕐᕆᕚ ᓇᕿᑦᔪᑎᑦ ᓯᑕᒪᖓᑦ; ᐆᒪᔪᐃᓪᓗ ᓯᑕᒪᖓᑦ ᐅᖃᕐᑐᖅ ᑐᓴᕐᐸᕋ, “ᕾᒋᑦ!”

⁸ ᑕᑯᕗᖓᓗ, ᑕᑯᒋᑦ, ᕿᒻᒥᕐᔪᐊᒥᒃ ᑐᖁᖓᔪᑎᑐᑦ ᖃᑯᐊᖓᔪᒥᒃ, ᑕᕝᕙᓂᓗ ᐃᑭᒪᔪᖅ ᐊᑎᖃᕐᐳᖅ ᑐᖁᒥᒃ, ᑐᖁᖓᔪᓪᓗ ᐃᓂᖏᑕ ᑭᖑᓂᑦᓯᐊᖓᓂ ᒫᓕᒃᐹ; ᑖᒃᑯᐊᓗ ᐱᔪᓐᓇᕐᓂᕐᑖᕐᑎᑕᐅᕗᑦ ᓄᓇᕐᔪᐊᕐᒥᐅᑦ ᐃᓄᖏᑕ ᐊᕝᕙᖏᑕ ᓇᑉᐸᖏᓐᓂᒃ ᑐᖁᑎᑦᓯᖁᓪᓗᒋᑦ ᐅᓇᑕᕐᓂᒃᑯᑦ ᑳᖕᓇᕐᑐᕐᔪᐊᓄᑦ ᐋᓐᓂᐊᓇᕐᑐᓄᑦ ᐆᒪᔪᓄᓪᓗ ᐃᕐᓯᓇᕐᑐᑎᒍᑦ.

⁹ ᓄᕐᕋᐅᔭᐅᓪᓗ ᓇᕿᑦᔪᑏᑦ ᑕᓪᓕᒪᖓᑦ ᒪᒃᐱᕐᒪᒍ, ᑕᑯᕗᖓ ᑐᓂᕐᕈᓯᕐᕕᐅᑉ ᐊᑖᓂ ᑐᖁᑕᐅᔪᕕᓃᑦ ᑕᕐᓂᖏᓐᓂᒃ ᒎᑎᐅᑉ ᐅᖃᐅᓯᖏᓐᓂᒃ ᐅᖃᓪᓚᖕᓂᕐᒧᑦ ᓇᓗᓁᕐᓯᓂᕐᒥᒡᓗ ᑲᔪᓯᑦᓯᐊᕐᓂᕐᒧᑦ ᑐᖁᑕᐅᔪᕕᓂᕐᓂᒃ;

¹⁰ ᓂᐱᖅᑯᕐᑐᓪᓗᑎᒡᓗ ᓂᓪᓕᐊᕗᑦ, “ᐊᔪᒐᖃᖏᑦᑐᑎᑦ ᐊᑕᓃᖅ, ᐃᑦᔪᕐᓁᑦᑐᑎᑦ ᓱᓕᔪᑎᓪᓗ, ᖃᓄᖅ ᓱᓕ ᓯᕕᑐᑎᒋᕚ? ᓄᓇᕐᔪᐊᕐᒥᐅᓂᒃ ᐃᖅᑲᕐᑐᐃᓂᒃᓮᑦ ᐅᕙᑦᑎᓐᓂᒃ ᑐᖁᑦᓯᓚᐅᕐᑐᑦ ᐊᑭᓂᐊᕐᓗᒋᑦ?”

¹¹ ᐊᑐᓂᓪᓗ ᐊᓐᓄᕌᕐᑖᕐᑎᑕᐅᕗᑦ ᖃᑯᕐᑕᓂᒃ ᑕᑭᔪᓂᒃ ᐅᑕᖅᑭᒃᑲᓐᓂᖁᔭᐅᕗᓪᓗ ᓱᓕ ᓯᕕᑭᑦᑐᒥᒃ, ᐱᔨᐅᖃᑎᖏᑦ ᐅᒃᐱᑑᖃᑎᖏᓪᓗ ᑖᒃᑯᑎᑐᓇᖅ ᑐᖁᑕᐅᔪᒃᓮᑦ ᓈᒻᒪᒃᓯᓚᐅᖏᓐᓂᖏᓐᓂ.

¹² ᓄᕐᕋᐅᔭᐅᓪᓗ ᓇᕿᕐᔪᑏᑦ ᐱᖓᓲᔪᕐᑐᖓᑦ ᒪᒃᐱᕐᒪᒍ, ᑕᑯᓴᕋᒪ ᑕᑯᕗᖓ, ᓄᓇᕐᔪᐊᖅ ᐊᖏᔪᒥᒃ ᓴᔪᒃᐱᓪᓚᒃᐳᖅ; ᓯᕿᓂᕐᓗ ᑖᕐᓯᕗᖅ ᐳᑐᕐᓛᑎᑐᑦ ᕿᕐᓂᕐᑎᒋᓕᕐᓗᓂ, ᑕᖅᑭᕐᓗ ᐃᓗᐃᑦᑐᖅ ᐊᐅᐸᕐᓯᕗᖅ ᐊᐅᒃᑎᑐᑦ ᑍᒤᓕᕐᓗᓂ.

¹³ ᐅᓪᓗᕆᐊᓪᓗ ᑲᑕᒐᕐᐳᑦ ᓄᓇᕐᔪᐊᕐᒧᑦ ᓇᐹᕐᑐᑐᑦ ᐸᐅᕐᖓᓂᒃ ᑲᑕᒊᔪᑐᑦ ᐱᕈᕇᕐᑎᓪᓗᒋᑦ ᐊᐅᓚᑕᐅᓪᓗᓂ ᐊᓄᕆᕐᔪᐊᕐᒧᑦ.

¹⁴ ᓄᓇᕐᔪᐊᓪᓗ ᓯᓚᖓ ᐲᕐᑕᐅᕗᖅ ᑎᑎᖅᑲᑎᑐᑦ ᐃᒧᔭᐅᔪᑎᑐᑦ, ᖃᖅᑲᓕᒫᓪᓗ ᕿᑭᕐᑕᓕᒫᓪᓗ ᐃᓂᒥᖕᓂᑦ ᐲᕐᑕᐅᕗᑦ.

¹⁵ ᓄᓇᕐᔪᐊᕐᒥᓗ ᐊᖓᔪᖅᑳᕐᔪᐊᑦ ᐊᔪᖏᑦᑐᖁᑕᐅᔪᓪᓗ ᐅᓇᑕᕐᑐᒃᓴᓪᓗ ᐊᖓᔪᖅᑳᖏᑦ ᐊᔪᕐᓴᓐᖏᑦᑐᓪᓗ ᓴᓐᖏᔪᓪᓗ, ᐃᓄᑐᐃᓐᓇᓕᒫᓪᓗ, ᓯᐊᓛᑦ ᓯᐊᓛᖑᖏᑦᑐᓪᓗ, ᐃᔨᕆᐊᕐᑐᕐᐳᑦ ᕾᕈᓱᖕᓄᑦ ᖃᖅᑳᓗᐃᓪᓗ ᐅᔭᕋᓱᒃᔪᖏᑦᑕ ᐊᖁᕐᖓᓐᓄᑦ.

¹⁶ ᖃᖅᑳᓗᖕᓄᓪᓗ ᐅᔭᕋᓱᒡᔪᖕᓄᓪᓗ ᐅᖃᕐᐳᑦ, “ᓯᑑᒡᕕᒋᓗᑕ ᐃᔨᓚᐅᕐᑎᒍᑦ ᐃᒃᓯᕙᐅᑕᕐᔪᐊᕐᒥ ᐃᒃᓯᕙᔫᑉ ᑮᓇᖓᓂᑦ, ᓄᕐᕋᐅᔭᐅᓪᓗ ᓂᓐᖓᖕᓂᖓᓂᑦ;

¹⁷ ᓂᓐᖓᖕᓂᕐᔪᐊᖓᑕ ᑲᑉᐱᐊᓇᕐᓂᖓ ᓇᓪᓕᐅᑎᖕᒪᑦ, ᑭᓇᓗ ᑖᑦᓱᒧᖓ ᓵᓐᖓᓗᓂ ᓇᖏᕈᓐᓇᕐᐹ?”