ᔪᐊᓇᓯᐅᑉ ᑕᑯᑎᑕᐅᓂᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᒡᓔᑦ ᓇᕿᑦᔪᓯᕐᓯᒪᔪᑦ ᓄᕐᕋᐅᔭᕐᓗ

¹ ᑕᑯᕗᖓᓗ ᐃᒃᓯᕙᐅᑕᕐᔪᐊᕐᒥ ᐃᒃᓯᕚᕐᑑᑉ ᑕᓕᕐᐱᖕᒥᓄᑦ ᑎᒍᒥᐊᕐᑕᖏᓐᓂᒃ ᐊᒡᓚᖕᓂᒃ ᐃᒧᓯᒪᔪᓂᒃ ᐃᒡᓗᒃᑐᑦ ᑎᑎᕋᕐᕕᒋᓯᒪᔪᓂᒃ, ᑖᒃᑯᐊ 7ᓂᒃ ᓇᕿᑦᔪᓯᕐᓯᒪᕗᑦ;

² ᑕᑯᕗᖓᓗ ᐱᔪᓐᓇᕐᑐᕐᔪᐊᒥᒃ ᐂᖏᓕᒥᒃ ᓂᐱᖅᑯᕐᑐᓪᓗᓂ ᐅᖃᕐᑐᒥᒃ, “ᑭᓇ ᐊᒡᓚᖕᓂᒃ ᐃᒧᓯᒪᔪᓂᒃ ᐃᓯᕕᑦᓯᔪᓐᓇᕐᑎᑕᐅᕚ, ᓇᕿᑦᔪᑎᖏᓪᓗ ᐲᔭᕐᓗᒋᑦ?”

³ ᓇᓪᓕᐊᓐᓂᒡᓘᓐᓃᑦ ᕿᓚᖕᒥ ᓄᓇᒥᓗ ᓄᓇᐅᓪᓗ ᐊᑖᓂ ᑖᒃᑯᓂᖓ ᐃᓯᕕᑦᓯᔪᓐᓇᕐᑐᖃᓐᖏᓚᖅ ᑕᑯᓇᓱᐊᕈᓐᓇᕐᑐᒥᒃ,

⁴ ᑕᕝᕙ ᖁᕝᕕᐅᓕᕐᐳᖓ ᕿᐊᓕᕐᓗᖓᓗ ᑖᒃᑯᓂᖓ ᐃᓯᕕᑦᓯᔪᓐᓇᕐᑎᑕᐅᔪᖃᖏᒻᒪᑦ ᑕᑯᓇᓱᐊᕈᓐᓇᕐᑐᒥᒃ.

⁵ ᑕᕝᕙ ᐊᖓᔪᖅᑳᑉ ᐃᓚᖓᑦᑕ ᐅᖃᐅᑎᕚᖓ, “ᕿᐊᖏᓪᓗᑎᑦ; ᑕᑯᒋᑦ, ᓔᔭᓐᑕᖃᕐᐳᖅ ᔫᑕᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ, ᑍᕕᑎᐅᑉ ᑭᖑᕚᖓᓂᒃ, ᓵᓚᖃᕐᓯᒪᔪᒥᒃ, ᑖᑦᓱᒪ ᓇᕿᑦᔪᑏᑦ 7 ᐲᕈᓐᓇᕐᐰᑦ ᐊᒡᓔᓪᓗ ᐃᒧᓯᒪᔪᑦ ᐃᓯᕕᓪᓗᒋᑦ.”

⁶ ᑕᕝᕙ ᑕᑯᕗᖓ ᓄᕐᕋᐅᔭᒥᒃ ᓇᖏᕐᑐᒥᒃ ᐃᒃᓯᕙᐅᑕᕐᔪᐊᑦ ᐊᑯᕐᖓᓐᓂ ᐆᒪᔪᓄᑦ ᓯᑕᒪᓄᑦ ᐊᖓᔪᖅᑳᓄᓪᓗ ᐊᕙᓗᔭᐅᓯᒪᔪᒥᒃ, ᑖᓐᓇ ᓄᕐᕋᐅᔭᖅ ᑐᖁᑕᐅᓯᒪᔪᕕᓂᐅᔮᕐᐳᖅ, 7ᓂᒃ ᓇᒡᔪᖃᕐᐳᖅ 7ᓂᒡᓗ ᐃᔨᖃᕐᓗᓂ, ᑖᒃᑯᐊ ᑕᕝᕙ ᒎᑎᐅᑉ ᐊᓂᕐᓂᖏᑦ 7 ᑎᓕᔭᐅᓯᒪᔪᑦ ᓄᓇᕐᔪᐊᓕᒫᒧᑦ;

⁷ ᓄᕐᕋᐅᔭᖅ ᐅᐸᒍᑎᓪᓗᓂ ᐊᒡᓔᑦ ᐃᒧᓯᒪᔪᑦ ᐃᒃᓯᕙᐅᑕᕐᔪᐊᕐᒦᑦᑑᑉ ᑕᓕᕐᐱᖕᒥᓄᑦ ᑎᒍᒥᐊᕐᑕᖏᑦ ᑎᒍᕔᑦ.

⁸ ᐊᒡᓔᑦ ᐃᒧᓯᒪᔪᑦ ᑎᒍᖕᒪᒋᑦ, ᐆᒪᔪᑦ ᓯᑕᒪᑦ ᐊᖓᔪᖅᑳᓪᓗ 24 ᓄᕐᕋᐅᔭᐅᑉ ᓵᖓᓄᑦ ᐹᒻᒪᒡᓗᑎᒃ ᐅᑯᕗᑦ, ᐊᑐᓂᑦ ᑯᑭᑦᑕᐸᐅᑎᐅᔭᓂᒃ ᕼᐊᐱᓂᒃ ᑎᒍᒥᐊᕐᐳᑦ, ᐴᒍᑕᕐᓂᒡᓗ ᒎᓗᓂᒃ ᐃᓯᕐᓗᐊᕐᓂᑎᑦᓯᑦᔪᑎᓂᒃ ᑕᑕᑦᑐᓂᒃ, ᑕᒪᑦᔭ ᐃᑦᔪᕐᓁᑎᑕᐅᓯᒪᔪᑦ ᑐᒃᓯᐊᕐᓂᖏᑦ;

⁹ ᐃᓐᖏᕐᓯᕗᓪᓗ ᐃᖏᕈᒻᒥᒃ ᓄᑖᒥᒃ, ᐅᖃᕐᓗᑎᒃ: “ᐊᒡᓚᖕᓂᒃ ᐃᒧᓯᒪᔪᓂᒃ ᐃᓯᕕᑦᓯᔪᓐᓇᕐᑎᑕᐅᔪᑑᕗᑎᑦ ᓇᕿᑦᔪᑎᖏᓐᓂᒃ ᐲᕐᓯᔪᓐᓇᕋᕕᑦ, ᑐᖁᑕᐅᓚᐅᕋᕕᑦ ᐊᐅᖕᓄᓪᓗ ᐃᓄᐃᑦ ᐊᑭᓕᓚᐅᕐᐸᑎᑦ ᒎᑎᒧᑦ ᐅᑎᕐᑎᓪᓗᒋᑦ, ᑭᖑᕚᕇᓕᒫᓂᑦ ᐅᖃᐅᓯᖃᑎᒌᖏᑦᑐᓂᑦ ᐃᓄᒐᓴᒡᔪᐊᓂᑦ ᐃᓅᖃᑎᒌᒡᔪᐊᓂᓪᓗ.

¹⁰ ᑐᓂᕐᕈᓯᕐᑎᑦᓯᔨᓐᖑᕐᑎᑉᐸᑎᓪᓗ ᐊᑕᓂᐅᕕᖕᒥ ᒎᑎᑦᑎᓐᓄᑦ, ᐊᐅᓚᑦᓯᔨᐅᖁᓪᓗᒋᓪᓗ ᓄᓇᕐᔪᐊᕐᒥ.”

¹¹ ᑕᑯᓴᕐᒥᒐᒪ, ᑐᓵᓕᕐᐳᖓ ᐃᒃᓯᕙᐅᑕᕐᔪᐊᑉ ᐊᕙᑖᓂᑦ ᐆᒪᔪᑦ ᓯᑕᒪᑦ ᐊᖓᔪᖅᑳᓪᓗ ᐂᖏᓖᓪᓗ ᐅᓄᕐᑐᕐᔪᐊᑦ ᓂᐱᖏᓐᓂᒃ, ᒥᓕᐊᓐ ᒥᓕᐊᖏᕐᑐᕐᓗᒋᑦ ᓈᓴᒐᒃᓴᐅᖏᑦᑐᕐᔪᐊᓂᒃ,

¹² ᓂᐱᖅᑯᕐᑐᔪᐊᓘᓪᓗᑎᒃ ᐅᖃᕐᐳᑦ: “ᓄᕐᕋᐅᔭᖅ ᑐᖁᑕᐅᓚᐅᕐᑐᖅ, ᐱᔪᓐᓇᕐᓂᕐᑖᕈᓐᓇᕐᑐᑐᕗᖅ ᐊᔪᕐᓴᖏᓐᓂᕐᒥᒃ ᓯᓚᑐᓂᕐᒥᒃ ᐊᔪᒐᖃᖏᓐᓂᕐᒥᒃ, ᐅᐱᒋᔭᐅᓂᕐᒥᒃ ᐱᓐᓇᕐᓇᕐᓂᕐᒥᒃ, ᓂᕐᑐᕐᑕᐅᓂᕐᒥᒡᓗ!”

¹³ ᑐᓴᕐᐳᖓᓗ ᐆᒪᔪᓕᒫᓂᒃ ᕿᓚᖕᒦᑦᑑᓂᒃ ᓄᓇᒦᑦᑐᓂᒃ ᓄᓇᐅᓪᓗ ᐊᑖᓃᑦᑐᓂᒃ ᐃᒪᕐᕕᖕᒦᑦᑐᓂᒡᓗ, ᑕᒤᓐᓂᒃ ᐊᓂᕐᓂᖃᕐᑐᓕᒫᓂᒃ, ᐅᖃᕐᑐᓂᒃ, “ᐃᒃᓯᕙᐅᑕᕐᔪᐊᕐᒥ ᐃᒃᓯᕙᔪᖅ ᓄᕐᕋᐅᔭᕐᓗ ᓂᕐᑐᕐᑕᐅᓕᑦ ᐅᐱᒋᔭᐅᓕᑦ ᐱᓐᓇᕐᓇᕐᑎᑕᐅᓗᑎᒃ ᐊᔪᖓᖃᖏᓐᓂᕐᒥᒡᓗ, ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ!”

¹⁴ ᐆᒪᔪᓪᓗ ᓯᑕᒪᑦ ᐅᖃᕐᐳᑦ, “ᐋᒦᓐ!” ᐊᖓᔪᖅᑳᓪᓗ ᐅᑯᓪᓗᑎᒃ ᐹᒻᒪᒃᐳᑦ ᑐᒃᓯᐊᕐᕕᒋᓪᓗᒍᓗ.