ᔪᐊᓇᓯᐅᑉ ᑕᑯᑎᑕᐅᓂᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᕿᓚᖕᒥ ᓂᕐᑐᐃᔪᑦ

¹ ᑕᒪᑐᒪ ᑭᖑᓂᖓᒍᑦ ᑕᑯᒋᕗᖓ, ᑕᑯᒋᑦ, ᐅᒃᑯᐊᒥᒃ ᐅᒃᑯᐃᓐᖔᕐᑐᒥᒃ ᕿᓚᖕᒧᑦ! ᓂᓪᓕᕐᑐᖃᕐᐳᕐᓗ, ᑐᓴᓚᐅᕐᑕᓐᓂᒃ ᐅᕙᓐᓄᑦ ᐅᖃᕐᑐᒥᒃ ᑎᑦᑐᓚᐅᑎᑎᑐᑦ ᓂᐱᖅᑯᑐᑎᒋᔪᒥᒃ, ᐅᖃᕐᐳᖅ, “ᒪᐅᖓ ᕾᒋᑦ, ᑕᑯᑎᓐᓂᐊᕋᒃᑭᑦ ᓇᓪᓕᐅᑎᔪᒫᕐᑐᓂᒃ ᑕᒪᑐᒪ ᑭᖑᓂᖓᒍᑦ.”

² ᑕᕝᕔᓐᓇᕐᓗ ᐊᓂᕐᓂᕐᒦᓕᕐᐳᖓ, ᑕᑯᒋᓪᓗ, ᕿᓚᖕᒦᑦᑐᒥᒃ ᑕᑯᕗᖓ ᐃᒃᓯᕙᐅᑕᕐᔪᐊᕐᒥᒃ, ᑕᕝᕙᓂᓗ ᐃᒃᓯᕙᔪᖃᕐᐳᖅ.

³ ᑕᑉᕙᓂ ᐃᒃᓯᕚᕐᑐᖅ ᑕᐅᑦᑐᖃᕐᐳᖅ ᐅᔭᕋᒃᑎᑐᑦ ᑕᑯᒥᓇᕐᑐᑎᑐᑦ ᔭᓯᐸᕆᑐᑦ ᑳᕐᓃᓕᐊᑐᓪᓗ, ᐃᒃᓯᕙᐅᑕᕐᔪᐊᓪᓗ ᐊᕙᑖᒍᑦ ᐊᔭᒍᑕᖃᕐᐳᖅ ᐅᔭᕋᒃᑎᑐᑦ ᐃᒪᕆᐅᓪᑎᑐᑦ ᑕᐅᑦᑐᖃᕐᑐᒥᒃ.

⁴ ᐃᒃᓯᕙᐅᑕᕐᔪᐊᕐᓗ ᐊᕙᑕᖏᕐᑕᐅᓯᒪᕗᖅ ᐃᒃᓯᕙᐅᑕᕐᔪᐊᓄᑦ 24ᓄᑦ, ᑖᒃᑯᐊᓗ ᐃᒃᓯᕚᕐᕕᐅᕗᑦ ᐊᖓᔪᖅᑳᓄᑦ 24ᓄᑦ, ᐊᓐᓄᕌᕐᓯᒪᔪᓄᑦ ᖃᑯᕐᑕᓂᒃ, ᓂᐊᖂᓯᕐᓯᒪᔪᓄᑦ ᐊᖓᔪᖅᑳᕐᓯᐅᑎᓂᒃ ᒎᓗᓂᒃ.

⁵ ᐃᒃᓯᕙᐅᑕᕐᔪᐊᕐᒥᓪᓗ ᖃᐅᒻᒫᓪᓚᒃᑐᖃᖃᑦᑕᕐᐳᖅ, ᑐᓴᕐᓴᐅᔪᖃᕐᐳᕐᓗ ᑲᓪᓕᕐᒥᒃ ᐃᒃᑑᓕᔮᒥᒡᓗ, ᐃᒃᓯᕙᐅᑕᕐᔪᐊᓪᓗ ᓯᕗᕌᓃᑦᑐᖃᕐᐳᖅ ᖃᐅᒻᒪᖅᑯᑎᓂ 7ᓂᒃ ᐃᑯᒪᔪᓂᒃ, ᑖᒃᑯᐊ ᑕᕝᕙ ᒎᑎᐅᑉ ᐊᓂᕐᓂᖏᑦ 7.

⁶ ᐃᒃᓯᕙᐅᑕᕐᔪᐊᓪᓗ ᓯᕗᕌ ᐃᒪᕐᔪᐊᑎᑐᑦ ᐊᓕᒍᕐᑎᑐᑦ ᑍᒤᒻᐳᖅ, ᕿᓪᓕᕐᓗᓂ ᑕᑯᒃᓴᐅᓇᑦᓯᐊᕐᐳᖅ. ᐃᒃᓯᕙᐅᑕᕐᔪᐊᓪᓗ ᓴᓂᕌᓃᑦᑐᖃᕐᐳᖅ ᐊᕙᑎᖏᖕᓂ, ᐆᒪᔪᕐᔪᐊᓂᒃ ᓯᑕᒪᓂᒃ, ᓵᒥᒃᑎᒍᑦ ᑐᓄᒥᒃᑎᒍᓪᓗ ᑕᒤᑎᒍᑦ ᐃᔨᓕᖕᓂᒃ.

⁷ ᓯᕗᓪᓕᕐᓗ ᓔᔭᓐᑐᑦ ᑕᐅᑦᑐᖃᕐᐳᖅ, ᐂᑉᐸᖓᓗ ᐃᒻᒧᒃᓯᐅᒐᐅᑉ ᐸᖕᓂᖓᑐᑦ ᑕᐅᑦᑐᖃᕐᐳᖅ, ᐱᖓᔪᖓᓪᓗ ᐃᓄᒃᑐᑦ ᑮᓇᖃᕐᐳᖅ, ᓯᑕᒪᖓᓪᓗ ᓇᒃᑐᕋᓕᒃᑎᑐᑦ ᖃᖓᑕᔪᑎᑐᑦ ᑍᒤᑉᐳᖅ.

⁸ ᐆᒪᔪᑦ ᓯᑕᒪᑦ, ᐃᓴᕈᖃᕐᐳᑦ ᐊᑐᓂᑦ ᐱᖓᓲᔪᕐᑐᓂᒃ, ᐃᔨᖃᕐᓗᑎᒡᓗ ᐃᓗᒥᒃᑎᒍᑦ ᓯᓚᑎᓕᒫᒥᒃᑎᒍᓪᓗ, ᐅᓪᓘᑎᓪᓗᒍᓗ ᐅᓐᓄᐊᒥᓗ ᓄᖅᑲᔪᐃᑦᑑᓪᓗᑎᒃ ᐃᓐᖏᕐᐳᑦ: “ᐃᑦᔪᕐᓁᑉᐳᖅ, ᐃᑦᔪᕐᓁᑉᐳᖅ, ᐃᑦᔪᕐᓁᑉᐳᖅ, ᐊᑕᓂᖅ ᒎᑎ ᐊᔪᒐᖃᖏᑦᑐᖅ, ᑍᒤᓚᐅᕋᒥ ᒫᓐᓇᓗ ᑍᒤᑦᑐᖅ ᑍᒤᖏᓐᓇᕐᓂᐊᕐᑐᕐᓗ ᓯᕗᓂᕐᒥ!”

⁹ ᐆᒪᔪᐃᑦ ᓂᕐᑐᐃᓕᕌᖓᒥᒃ ᐅᐱᒍᓱᖃᑦᑕᕐᐳᑦ ᖁᔭᓕᓪᓗᑎᒡᓗ ᑖᑦᓱᒥᖓ ᐃᒃᓯᕙᐅᑕᕐᔪᐊᕐᒥ ᐃᒃᓯᕙᔪᒥᒃ, ᐃᓅᑦᓮᓐᓇᕐᑐᒥᒃ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ,

¹⁰ ᑍᒤᓕᐅᓕᕌᖓᑕ, ᐊᖓᔪᖅᑳᑦ 24 ᐃᒃᓯᕙᐅᑕᕐᔪᐊᕐᒦᑦᑑᑉ ᓵᖓᓄᑦ ᓰᖅᑯᕐᓗᑎᒃ ᐅᑯᖃᑦᑕᕐᐳᑦ, ᓂᕐᑐᕐᓗᒍᓗ ᑖᓐᓇ ᐃᓅᑦᓮᓐᓇᕐᑐᖅ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ; ᓂᐊᖂᑎᑎᒡᓗ ᐊᖓᔪᖅᑳᕐᓯᐅᑏᑦ ᐃᒃᓯᕙᐅᑕᕐᔪᐊᑉ ᓵᖓᓄᑦ ᐃᓕᓪᓗᒋᑦ, ᐅᖃᕐᐸᒃᐳᑦ:

¹¹ “ᓂᕐᑐᒐᒃᓴᑑᕗᑎᑦ, ᐊᑕᓂᕗᑦ ᒎᑎᕗᓪᓗ, ᐅᐱᒋᔭᒃᓴᑑᕗᑎᑦ, ᐱᔪᓐᓇᕐᓂᖃᕐᑐᑑᓪᓗᑎᓪᓗ. ᐱᓐᖑᕐᑎᑦᑎᓯᒪᒐᕕᑦ ᓱᓇᓕᒫᓂᒃ, ᐱᖁᔨᓂᒃᑯᓪᓗ ᓴᖅᑭᓯᒪᕗᑦ ᐱᓐᖑᕐᑎᑕᐅᓪᓗᑎᒡᓗ.”