ᔪᐊᓇᓯᐅᑉ ᑕᑯᑎᑕᐅᓂᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦᔨᕉᓴᓕᒻ ᓄᑖᖅ 1 ᑕᕝᕙ ᐂᖏᓕᐅᑉ ᑕᑯᑎᒃᑭᕚᖓ ᑰᖕᒥᒃ ᐃᓅᓯᖃᕐᓇᕐᑐᒥᒃ ᐃᒪᓕᖕᒥᒃ, ᐊᓕᒍᕐᑐᑦ ᑍᒤᑦᑐᒥᒃ ᑲᑭᐊᒃᑐᒥᒃ ᐃᒪᓕᖕᒥᒃ, ᒎᑎᐅᑉ ᓄᕐᕋᐅᔭᐅᓪᓗ ᐃᒃᓯᕙᐅᑕᕐᔪᐊᖓᓐᓂᑦ ᑰᒃᑐᒥᒃ 2 ᐃᒡᓗᒐᓴᒡᔪᐊᑦ ᐊᖅᑯᑎᖓᑕ ᕿᑎᖓᒎᖓᔪᒥᒃ; ᑰᒡᓗ ᑕᒪᓐᓇ ᐊᑭᓕᕇᓂᒃ, ᓇᐹᕐᑐᖃᕐᐳᖅ ᐆᒪᓇᕐᑐᓂᒃ, ᐸᐅᕐᖓᖃᕐᑐᓂᒃ ᐊᑦᔨᒌᖏᑦᑐᓂᒃ 12ᓂᒃ, ᑕᖅᑭᑕᒫᑦ ᐸᐅᕐᖓᕐᑖᖃᑦᑕᕐᑐᓂᒃ; ᓇᐹᕐᑐᐃᓪᓗ ᐅᖃᐅᔭᖏᑦ ᐋᖅᑭᒃᑕᐅᑦᔪᑎᒃᓴᐅᕗᑦ ᐃᓅᖃᑎᒌᒡᔪᐊᓄᑦ. 3 ᑕᕝᕙᓂ ᐃᒡᓗᒐᓴᖕᓂ ᐆᒥᓇᕐᑎᑕᐅᓯᒪᔪᖃᕐᓂᐊᕈᓐᓃᕐᐳᖅ ᓱᓇᒥᒡᓘᓐᓃᑦ. ᒎᑎᐅᓪᓕ ᓄᕐᕋᐅᔭᐅᓪᓗ ᐃᒃᓯᕙᐅᑕᕐᔪᐊᖓ ᑕᕝᕙᑑᔪᒫᕐᐳᖅ ᑕᕝᕙᓂ, ᐱᔨᖏᑕᓗ ᐅᐱᒌᓐᓇᕈᒫᕐᐹᑦ; 4 ᑮᓇᖓᓗ ᑕᑯᔪᒫᕐᐹᑦ, ᐊᑎᖓᓗ ᖃᐅᖏᓐᓂ ᑎᑎᕋᕐᓯᒪᔪᒫᕐᐳᖅ. 5 ᑕᕝᕙᓂᓗ ᐅᓐᓄᐊᖃᕈᓐᓃᕈᒫᕐᐳᖅ; ᖃᐅᒻᒪᖅᑯᑎᖃᕆᐊᖃᕈᒫᕋᑎᒡᓗ ᓯᕿᓂᕐᒥᒡᓘᓐᓃᑦ, ᐊᑕᓂᖅ ᒎᑎ ᖃᐅᒻᒪᖅᑯᑎᒋᔪᒫᕐᒪᑦᔪᒃ, ᑕᕝᕙᓂᓗ ᐊᖓᔪᖅᑳᕐᔪᐊᖑᖃᑕᐅᔪᒫᕐᐳᑦ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᔩᓱᓯᐅᑉ ᑎᑭᓐᓂᖓ 6 ᐂᖏᓕᐅᓪᓗ ᐅᖃᐅᑎᕚᖓ, “ᐅᖃᐅᓰᑦ ᑕᒪᒃᑯᐊ ᓱᓕᕗᑦ ᐅᒃᐱᕆᔭᒃᓴᐅᓪᓗᑎᒡᓗ. ᐊᑕᓂᕐᓗ, ᒎᑎ ᐊᓂᕐᓂᕐᒥᓂᒃ ᑐᓂᓯᓚᐅᕐᑐᖅ ᓇᓚᐅᑦᑍᔪᖁᑎᒥᓄᑦ, ᐂᖏᓕᖁᑎᒥᓂᒃ ᑎᓕᓯᕗᖅ ᐱᔨᖓᓂᒃ ᖃᐅᔨᑎᑦᓯᖁᓪᓗᒍ ᓇᓪᓕᐅᑎᓂᐊᓕᕐᑐᓂᒃ ᐊᑯᓂᐅᖏᑦᑐᖅ.” 7 ᔩᓱᓯᓗ ᐅᖃᕐᐳᖅ, “ᑕᑯᒋᑦ ᐊᑯᓂᐅᖏᑦᑐᖅ ᕾᓂᐊᓕᕐᐳᖓ. ᓮᒪᓇᕐᑐᒦᐳᖅ ᑖᓐᓇ ᓇᓚᐅᑦᑍᓂᕐᓂᒃ ᑎᑎᕋᕐᓯᒪᔪᓂᒃ ᐅᑯᓇᓂ ᓈᓚᒃᑐᖅ.” 8 ᐅᕙᖓ ᔪᐊᓇᓯ ᑖᓐᓇᐅᕗᖓ ᑕᒪᒃᑯᓂᖓ ᑐᓴᕐᓗᖓᓗ ᑕᑯᓚᐅᕐᑐᖓ. ᑐᓴᕇᕋᒃᑭᑦ ᑕᑯᔭᕇᕋᒃᑭᓪᓗ, ᐂᖏᓕᐅᑉ ᓵᖓᓄᑦ ᐹᒻᒪᓚᐅᕐᐳᖓ ᑐᒃᓯᐊᕐᕕᒋᔪᒪᓪᓗᒍ ᑕᒪᒃᑯᓂᖓ ᐅᕙᓐᓂᒃ ᑕᑯᑎᕐᓯᓚᐅᕐᑐᖅ; 9 ᑖᑦᓱᒪᓕ ᐅᖃᐅᑎᕚᖓ, “ᑍᒤᓕᐅᕐᑐᒃᓴᐅᓐᖏᓚᑎᑦ! ᐱᔨᐅᖃᑕᐅᑐᐃᓐᓇᕋᒪ ᐃᓕᒃᑐᑦ ᐅᒃᐱᑑᖃᑎᒃᑐᓪᓗ ᓇᓚᐅᑦᑍᔪᑎᑐᑦ, ᑖᒃᑯᑎᑑᓇᕐᓗ ᐅᕙᓂ ᑎᑎᕋᕐᓯᒪᔪᓂ ᓈᓚᒃᑐᑎᑐᑦ. ᒎᑎᓕ ᐅᐱᒋᓗᒍ ᓂᕐᑐᕈᒃ!” 10 ᑖᑦᓱᒪᓗ ᐅᖃᐅᑎᕚᖓ, “ᑖᒃᑯᓇᓂ ᑎᑎᖅᑲᓂ ᐱᔪᒫᕐᑐᑦ ᐅᖃᐅᓯᐅᓂᖏᑦ ᐃᔨᕐᓯᒪᑦᑍᓕᒃᑭᑦ, ᑕᒪᒃᑯᐊ ᓇᓪᓕᐅᑎᕕᒃᓴᖓᑦ ᖃᒡᓕᖕᒪᑦ. 11 ᓇᓪᓕᐊᑦ ᐱᐅᖏᑦᑐᓕᔪᖅ ᐱᐅᖏᑦᑐᒥᒃ ᐱᓇᓱᐊᖏᓐᓇᕐᓕ, ᑲᓐᖑᓇᕐᑐᓕᔪᕐᓗ ᐱᐅᖏᑦᑐᓂᒃ ᑲᓐᖑᓇᕐᑐᓖᓐᓇᕐᓕ, ᐃᓗᐊᕐᑐᓕᔪᕐᓗ ᐱᑦᓯᐊᕐᓂᕐᒥᒃ ᐱᓇᓱᐊᖏᓐᓇᕐᓕ, ᐃᑦᔪᕐᓁᑦᑐᕐᓗ ᐃᑦᔪᕐᓁᖏᓐᓇᕐᓕ.” 12 ᔩᓱᓯᓗ ᐅᖃᕐᐳᖅ, “ᑕᑯᒋᑦ, ᐊᑯᓂᐅᖏᑦᑐᖅ ᕾᓂᐊᕐᐳᖓ, ᐊᑭᓕᐅᑎᒃᓴᕋ ᓇᒃᓴᕐᓗᒍ, ᐱᓂᐊᕐᓂᖏᑦ ᒪᓕᒡᓗᒋᑦ ᐊᑭᓕᕐᑕᐅᖁᓪᓗᒋᑦ. 13 ᐋᓪᐸᐅᕗᖓ ᐅᒥᒐᐅᓪᓗᖓᓗ, ᓯᕗᓪᓕᕐᐸᐅᕗᖓ ᑭᖑᓪᓕᕐᐸᐅᓪᓗᖓᓗ, ᐱᒋᐊᕐᓂᐅᓪᓗᖓᓗ ᐃᓱᓕᕝᕕᐅᕗᖓ.” 14 ᓮᒪᓇᕐᑐᒦᐳᑦ ᐊᓐᓄᕌᒥᖕᓂᒃ ᓴᓗᒻᒪᕐᓮᓯᒪᔪᑦ, ᓂᕆᔪᓐᓇᕐᑎᑕᐅᕐᒪᑕ ᓇᐹᕐᑐᒥᑦ ᐆᒪᓐᓇᕐᑐᒥᑦ ᐃᒡᓗᒐᓴᒡᔪᐊᓪᓗ ᐃᑎᕐᑕᕐᕕᖏᑎᒍᑦ ᐃᑎᕈᓐᓇᕐᑎᑕᐅᓂᐊᕐᒪᑕ. 15 ᐃᒡᓗᒐᓴᒡᔪᐊᓪᓕ ᓯᓚᑖᓃᑉᐳᑦ ᕿᒻᒦᑦ ᐊᖓᒃᑰᓇᓱᐊᕐᑐᓪᓗ ᐊᕐᓇᕐᓂᐊᕐᑏᑦ ᐊᖑᓐᓂᐊᕐᑏᓪᓗ, ᐃᓄᐊᕐᑏᓪᓗ, ᒎᑎᓐᖑᐊᓖᓪᓗ, ᓴᒡᓗᑐᔪᓪᓗ ᐅᖃᐅᓯᕐᒥᒃᑎᒍᑦ ᐱᓂᐊᕐᓂᕐᒥᒃᑎᒍᓪᓗ. 16 “ᐅᕙᖓ ᔩᓱᓯ ᐂᖏᓕᖁᑎᓐᓂᒃ ᑎᓕᓯᓚᐅᕐᐳᖓ ᐅᖃᐅᑦᔨᖁᓪᓗᒍ ᐃᓕᖕᓂᒃ ᐅᖃᐅᓯᕆᔭᒃᓴᕐᓂᒃ ᐅᒃᐱᕐᑑᖃᑎᒌᓄᑦ. ᑍᕕᑎᐅᑉ ᐃᓚᒌᖕᓂᖏᑕ ᑭᖑᕚᖏᓐᓂᑦ ᐱᓯᒪᕗᖓ, ᐅᓪᓗᕆᐊᖑᕗᖓ ᖃᐅᒻᒪᕆᒃᑐᖅ ᖃᐅᓕᓵᕐᑐᕐᓯᐅᑦ.” 17 ᐊᓂᕐᓂᖅ ᐃᑦᔪᕐᓁᑦᑐᖅ ᓄᓕᐊᒃᓴᕐᓗ ᐅᖃᕐᐴᒃ, “ᕾᒋᑦ.” ᑕᒪᑐᒥᖓᓗ ᑐᓴᕐᑐᑦ ᐅᖃᕐᓕᑦ, “ᕾᒋᑦ.” ᐃᒥᕈᒃᑐᖅ ᕾᓕ, ᐱᔪᒪᔪᖅ ᐃᒥᕐᓕ ᐊᑭᖃᖏᑦᑐᒥᒃ ᐃᒥᕐᒥᒃ ᐆᒪᓇᕐᑐᒥᒃ. ᐅᖃᐅᓰᑦ ᐃᓱᓕᓐᓂᖏᑦ 18 ᐅᕙᖓ ᔪᐊᓇᓯ ᖃᐅᔨᒪᖁᔨᕗᖓ ᑕᒤᓐᓂᒃ ᑐᓴᕐᑐᓂᒃ ᐅᑯᓂᖓ ᐱᔪᒫᕐᑐᓂᒃ ᐅᕙᓂ ᐊᒡᓚᖕᓂ ᑎᑎᕋᕐᑕᐅᓯᒪᔪᓂᒃ: ᓇᓪᓕᐊᑦ ᑖᒃᑯᓂᖓ ᐃᓚᓯᒃᐸ ᒎᑎᐅᑉ ᓱᒋᐊᕐᓯᓂᕆᒐᔭᕐᑕᖓᓂᒃ ᐃᓚᒋᐊᕈᒫᐰᑦ ᑲᑉᐱᐊᓇᕐᑐᓂᒃ ᐅᑯᓇᓂ ᐊᒡᓚᖕᓂ ᐅᖃᐅᑕᐅᓯᒪᔪᓂ, 19 ᓇᓪᓕᐊᓐᓂᒡᓗ ᐃᓚᓐᖎᔪᖃᕐᐸᑦ ᐅᑯᓇᓂ ᐱᔪᒫᕐᑐᑦ ᐅᖃᐅᓯᕐᑕᖏᓐᓂᒃ ᐊᒡᓚᖕᓂ ᑎᑎᕋᕐᓯᒪᔪᓂ, ᑖᓐᓇ ᒎᑎᐅᑉ ᐃᓚᓐᖎᕕᒋᔪᒫᕆᕚ ᐱᔭᒃᓴᖓᓂᒃ ᓇᐹᕐᑐᒥᑦ ᐆᒪᓇᕐᑐᒥᑦ ᐃᒡᓗᒐᓴᒡᔪᐊᓂᓪᓗ ᐃᑦᔪᕐᓁᑦᑐᓂᑦ, ᑖᒃᑯᓇᓂ ᐅᖃᐅᓯᐅᓯᒪᔪᓂᒃ ᑕᕝᕙᓂ ᐊᒡᓚᖕᓂ. 20 ᑖᒃᑯᓂᖓ ᐅᖃᐅᓯᖃᕐᑐᖅ ᐅᖃᕐᐳᖅ, “ᓱᓕᕗᖓ ᐊᑯᓂᐅᖏᑦᑐᖅ ᕾᓂᐊᕐᐳᖓ.” ᐋᒥᓐ. ᐊᑕᓃᖅ ᔩᓱᓯ ᕾᓕᕆᑦ! 21 ᐊᑕᓂᑦᑕ ᔩᓱᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ ᐃᑦᔪᕐᓁᑦᑐᓕᒫᑦ. ᐋᒦᓐ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society