ᔪᐊᓇᓯᐅᑉ ᑕᑯᑎᑕᐅᓂᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᕿᓚᒃ ᓄᑖᖅ ᓄᓇᓗ ᓄᑖᖅ

¹ ᑕᕝᕙ ᑕᑯᒋᕗᖓ ᕿᓚᖕᒥᒃ ᓄᑖᒥᒃ ᓄᓇᒥᒡᓗ ᓄᑖᒥᒃ; ᕿᓚᒃ ᓯᕗᓪᓕᖅ ᓄᓇᓗ ᓯᕗᓪᓕᖅ ᑕᒪᕐᒥᒃ ᐱᑕᖃᕈᓐᓃᕐᐳᒃ, ᐃᒪᕐᔪᐊᕐᓗ ᐱᑕᖃᕈᓐᓃᕆᕗᖅ.

² ᐃᒡᓗᒐᓴᒡᔪᐊᓪᓗ ᐃᑦᔪᕐᓁᑦᑐᑦ ᑕᑯᕙᒃᑲ, ᔨᕉᓴᓕᒻ ᓄᑖᖅ, ᕿᓚᖕᒥᑦ ᐊᖅᑲᕐᑐᖅ ᒎᑎᒥᑦ, ᐊᑐᐃᓐᓇᕈᕐᓯᒪᓕᕐᑐᖅ ᓄᓕᐊᒃᓴᑐᑦ ᐊᓐᓄᕌᕐᓯᒪᑦᓯᐊᓕᕐᑐᑎᑐᑦ ᐅᐃᒃᓴᒥᓄᑦ ᐊᑐᐃᓐᓇᐅᓕᕐᑐᑎᑐᑦ.

³ ᓂᐱᕐᔪᐊᒥᒡᓗ ᑐᓴᕐᐳᖓ ᐃᒃᓯᕙᐅᑕᕐᔪᐊᕐᒥᑦ ᐅᖃᕐᑐᒥᒃ, “ᑕᑯᒋᑦ, ᒎᑎ ᓄᓇᖃᖃᑦᑕᐅᓂᐊᓕᕐᐳᖅ ᐃᓄᖕᓄᑦ. ᑖᑦᓱᒪ ᐃᒡᓗᒥᐅᖃᑎᒋᓂᐊᕐᐰᑦ, ᑖᑦᓱᒪᓗ ᐃᓄᖁᑎᒋᓂᐊᕐᐰᑦ, ᒎᑎᐅᓪᓗ ᓇᖕᒥᓂᖅ ᓇᔪᕐᓂᐊᕐᐰᑦ ᒎᑎᒋᔭᐅᓗᓂ.

⁴ ᖁᕝᕕᐅᕐᓂᓕᒫᖏᑦ ᐊᓪᓚᕐᑎᕐᓂᐊᕐᐰᑦ ᐃᔨᖏᓐᓂᑦ, ᑐᖁᖃᑦᑕᕐᓂᐊᕈᓐᓃᕐᐳᑦ, ᕿᒃᓵᖃᑦᑕᕈᓐᓃᕐᓗᑎᒃᓗ ᕿᐊᔪᖃᕐᓂᐊᕈᓐᓃᕐᐳᖅ, ᐋᓐᓂᐊᔪᖃᕐᓂᐊᕈᓐᓃᕐᓗᓂᓗ, ᐱᑐᕾᑦ ᓄᖑᒻᒪᑕ.”

⁵ ᐃᒃᓯᕙᐅᑕᕐᔪᐊᕐᒥᓗ ᐃᒃᓯᕙᔪᖅ ᐅᖃᕐᐳᖅ, “ᑕᑯᒋᑦ ᓱᓇᓕᒫᓂᒃ ᓄᑖᓐᖑᕐᑎᑦᓯᕗᖓ.” ᐅᖃᒃᑲᓐᓂᕐᐳᕐᓗ, “ᐅᑯᐊ ᑎᑎᕋᒃᑭᑦ, ᐅᖃᐅᓰᑦ ᑖᒃᑯᐊ ᐅᒃᐱᕆᔭᒃᓴᐅᕗᑦ ᓱᓕᓪᓗᑎᒡᓗ.”

⁶ ᐅᖃᐅᑎᒋᕚᖓᓗ, “ᐱᔭᕇᕐᐳᖅ! ᐋᓪᐸᐅᕗᖓ ᐅᒥᒐᐅᓪᓗᖓᓗ, ᐱᒋᐊᕐᓂᐅᕗᖓ ᐃᓱᓕᓐᓂᐅᓪᓗᖓᓗ. ᐃᒥᕈᒃᑐᖅ ᐃᒥᕐᑎᓐᓂᐊᕐᐸᕋ ᐃᒥᕐᒥᒃ ᐃᓅᓯᖃᕐᓇᕐᑐᒥᑦ ᑯᕕᔪᒥᑦ ᐊᑭᖃᖏᑦᑐᒥᒃ.

⁷ ᓇᓪᓕᐊᑦ ᓵᓚᖃᕐᑐᖅ ᑍᒤᑦᑐᒥᒃ ᑭᖑᕐᖑᑦᔨᓂᐊᕐᐳᖅ, ᑖᑦᓱᒪᓗ ᒎᑎᒋᓂᐊᕐᐹᖓ ᐅᕙᖓᓗ ᐃᕐᓂᕆᓂᐊᕐᐸᕋ.

⁸ ᓯᕘᕋᓂᕐᒧᓪᓕ ᓯᕗᒧᒍᓐᓃᕐᑐᑦ, ᐅᒃᐱᖏᑦᑐᑦ, ᐃᒃᓯᒎᕐᓂᕐᒧᑦ ᓱᕈᕐᑎᕐᓯᒪᔪᑦ, ᐃᓄᐊᕐᑏᑦ, ᐊᕐᓇᕐᓂᐊᕐᑏᑦ ᐊᖑᓐᓂᐊᕐᑏᓪᓗ, ᐊᖓᒃᑰᓇᓱᐊᕐᑏᑦ, ᒎᑎᐅᓐᖑᐊᓖᑦ, ᓴᒡᓗᑐᔪᓪᓗ, ᑖᒃᑯᐊ ᐃᓂᖃᕈᒫᕐᐳᑦ ᑕᓯᕐᒥ ᐃᑯᒪᕐᔪᐊᕐᒥ ᐃᒃᑭᕆᒃᑐᕐᔪᐊᕐᒧᑦ ᓲᓪᕕᒧᑦ ᐃᑯᒪᔪᒧᑦ, ᑕᒪᓐᓇ ᑕᕝᕙ ᑐᖂᑉ ᐂᑉᐸᖓ.”

ᔨᕉᓴᓕᒻ ᓄᑖᖅ

⁹ ᐂᖏᓖᓪᓗ 7ᐅᓚᐅᕐᑐᑦ ᖃᓪᓗᑎᓂᒃ 7ᓂᒃ ᑎᒍᒥᐊᕐᓗᑎᒃ ᑲᑉᐱᐊᓇᕐᑐᕐᔪᐊᓂᒃ 7ᓂᒃ ᐃᒪᖃᕐᑐᓂᒃ, ᐃᓚᖓᑦᑕ ᕾᓪᓗᓂ ᐅᖃᐅᑎᕚᖓ, “ᕾᒋᑦ, ᓄᓕᐊᒃᓴᒥᒃ ᑕᑯᑎᓐᓂᐊᕋᒃᑭᑦ, ᓄᕐᕋᐅᔭᐅᑉ ᓄᓕᐊᒃᓴᖓᓂᒃ.”

¹⁰ ᐊᓂᕐᓂᒃᑯᓪᓗ ᐊᐅᓪᓚᕈᑎᕚᖓ ᖃᖅᑲᕐᔪᐊᕐᒧᑦ, ᐳᕐᑐᔪᕐᔪᐊᒧᑦ, ᑕᑯᑎᑉᐹᖓᓗ ᔨᕉᓴᓕᒥᒃ ᐃᑦᔪᕐᓁᑦᑐᓂᒃ ᐃᒡᓗᒐᓴᒡᔪᐊᓂᒃ ᕿᓚᖕᒥᑦ ᐊᖅᑲᕐᑐᓂᒃ ᒎᑎᒥᑦ,

¹¹ ᒎᑎᐅᓪᓗ ᐱᓐᓇᕐᓇᕐᓂᕐᔪᐊᖓᓄᑦ ᖃᐅᒪᕗᑦ, ᕿᓪᓕᕐᐳᑦ ᐅᔭᕋᒃᑎᑐᑦ ᐱᐅᓂᕐᐹᑎᑐᑦ, ᔮᓯᐸᕆᑐᑦ, ᐊᓕᒍᕐᑎᑐᓪᓗ ᕿᓪᓚᕆᒃᑐᑎᑐᑦ.

¹² ᐳᕐᑐᔪᒥᒃ ᐊᖏᔪᕐᔪᐊᒥᒡᓗ ᐊᕙᓗᕐᔪᐊᖃᕐᐳᖅ, 12ᓂᒃ ᐃᑎᕐᑕᕐᕕᖃᕐᓗᑎᒃ, ᐃᑎᕐᑕᕐᕕᖏᓪᓗ ᐂᖏᓕᑕᖃᕐᐳᑦ 12ᓂᒃ, ᐃᑎᕐᑕᕐᕖᓪᓗ ᐃᓴᕆᐊᓕᒥᐅᑦ ᑭᖑᕚᖏᑕ ᐊᑎᖏᓐᓂᒃ 12ᓂᒃ ᑎᑎᕋᕐᕕᒋᓯᒪᕗᑦ.

¹³ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ ᐃᑎᕐᑕᕐᕖᑦ ᐱᖓᓲᕗᑦ, ᐅᓐᓄᐊᓪᓗᐊᑉ ᓇᓛᓃᑦᑐᑦ ᐃᑎᕐᑕᕐᕖᑦ ᐱᖓᓲᕗᑦ, ᐅᓪᓗᓪᓗᐊᑉ ᓇᓛᓃᑦᑐᑦ ᐃᑎᕐᑕᕐᕖᑦ ᐱᖓᓲᕗᑦ, ᓯᕿᓂᐅᓪᓗ ᓂᐱᕕᐊᑕ ᓇᓛᓃᑦᑐᑦ ᐃᑎᕐᑕᕐᕖᑦ ᐱᖓᓲᒋᕗᑦ.

¹⁴ ᐃᒡᓗᒐᓴᒡᔪᐊᓪᓗ ᐊᕙᓗᕐᔪᐊᖓ ᑐᓐᖓᕕᖃᕐᐳᖅ 12ᓂᒃ, ᑐᓐᖓᕕᖏᓪᓗ ᑎᑎᕋᕐᓯᒪᒋᕗᑦ ᓄᕐᕋᐅᔭᐅᑉ ᐋᐴᓯᑕᓕᖏᑕ ᐊᑎᖏᓐᓂᒃ 12ᓂᒃ.

¹⁵ ᐂᖏᓕᓗ ᐅᕙᓐᓄᑦ ᐅᖃᓪᓚᒃᑐᖅ ᐆᒃᑐᕋᐅᑎᖃᕐᐳᖅ ᒎᓗᒥᒃ ᑕᒪᑐᒧᖓ ᐃᒡᓗᒐᓴᒡᔪᐊᑦ ᐆᒃᑐᕋᕐᐰᑦ ᐃᑎᕐᑕᕐᕕᖏᑦ ᐊᕙᓗᕐᔪᐊᖏᓪᓗ.

¹⁶ ᐃᒡᓗᒐᓴᒡᔪᐊᓪᓗ ᓯᒃᑭᑕᓪᓗᐊᑦᓯᐊᖑᕗᑦ, ᑕᑭᓂᖓᓗ ᓯᓕᖕᓂᖓᓗ ᐊᑦᔨᒌᒃᐳᒃ; ᐃᒡᓗᒐᓴᒡᔪᐊᓪᓗ ᐆᒃᑐᕋᐅᑎᒥᓄᑦ ᐆᒃᑐᕋᕐᒪᒍ, ᑕᑭᓂᖃᕐᐳᖅ 1,500ᒤᓕᓂᒃ. ᓯᓕᖕᓂᖓᓗ ᑕᑭᓂᖓᓗ ᐳᕐᑐᓂᖓᓗ ᑕᒪᕐᒥᒃ ᐊᑦᔨᒌᒃᐳᑦ.

¹⁷ ᐂᖏᓕᐅᓪᓗ ᐊᕙᓗᕐᔪᐊᖅ ᐆᒃᑐᕋᕆᕚ, ᐃᑎᒐᖕᓂᒃ 216ᓂᒃ ᐃᑦᔪᓂᖃᕐᐳᖅ, ᐆᒃᑐᕋᐅᓯᐅᕙᒃᑐᑦ ᒪᓕᒡᓗᒋᑦ ᐂᖏᓕᐅᑉ ᐆᒃᑐᕋᕐᒪᒍ.

¹⁸ ᐊᕙᓗᕐᔪᐊᕐᓗ ᔮᓯᐸᕆᐅᕗᖅ, ᐃᒡᓗᒐᓴᒡᔪᐊᓪᓗ ᒎᓗᐃᓐᓇᐅᕗᑦ, ᐊᓕᒍᕐᑎᑐᓪᓗ ᑕᑯᒃᓴᐅᑦᓯᐊᕐᓇᕐᑎᒋᓪᓗᑎᒃ.

¹⁹ ᐊᕙᓗᕐᔪᐊᓪᓗ ᑐᓐᖓᕕᖏᑦ ᐱᐅᓴᕐᓯᒪᕗᑦ ᐅᔭᕋᖕᓄᑦ ᐱᐅᔪᐊᓗᖕᓄᑦ; ᓯᕗᓪᓕᕐᐹᖅ ᑐᓐᖓᕕᖓ ᔮᓯᐸᕆᐅᕗᖅ, ᑐᖓᓕᖓ ᓴᐰᕋᐅᕗᖅ, ᐱᖓᔪᖓᑦ ᐊᒊᑎᐅᕗᖅ, ᓯᑕᒪᖓᑦ ᐃᒪᕆᐅᓪᑎᐅᕗᖅ,

²⁰ ᑕᓪᓕᒪᖓᑦ ᓴᕐᑑᓂᒃᓯᐅᕗᖅ, ᐱᖓᓲᔪᕐᑐᖓᑦ ᑳᕐᓃᓕᐊᖑᕗᖅ, 7ᖓᑦ ᑯᕌᓱᓔᑎᐅᕗᖅ, ᓯᑕᒪᐅᔪᕐᑐᖓᑦ ᐱᕅᓕᐅᕗᖅ, 9ᖓᑦ ᑑᐹᑦᓯᐅᕗᖅ, ᖁᓕᖓᑦ ᑯᕅᓱᐸᕅᓯᐅᕗᖅ, 11ᖓᑦ ᔮᓯᓂᑎᐅᕗᖅ, 12ᖓᑦ ᐋᒥᑎᔅᑎᐅᕗᖅ.

²¹ ᐃᑎᕐᑕᕐᕕᖏᓪᓗ 12 ᓴᐸᖓᒃᓴᔭᐅᕗᑦ ᐃᒫᓂᑦ ᐱᓯᒪᔪᑦ, ᐃᑎᕐᑕᕐᕖᑦ ᐊᑐᓂᑦ ᐊᑕᐅᓯᕐᒥᑦ ᓴᐸᖓᒃᓴᔭᒥᑦ ᓴᓇᓯᒪᓪᓗᑎᒃ, ᐃᒡᓗᒐᓴᒡᔪᐊᓪᓗ ᐊᖅᑯᑎᖏᑦ ᒎᓘᕗᑦ ᐃᓚᓯᒪᓇᑎᒃ, ᐊᓕᒍᕐᑎᑐᑦ ᑕᑯᒃᓴᐅᓇᑦᓯᐊᕐᓗᑎᒃ.

²² ᐃᒡᓗᒐᓴᒡᔪᐊᓂᓗ ᑕᕝᕙᓂ ᑐᒃᓯᐊᕐᕕᒡᔪᐊᕐᒥᒃ ᑕᑯᓐᖏᓚᖓ, ᐊᑕᓂᖅ ᒎᑎ ᐊᔪᒐᖃᖏᑦᑐᖅ ᓄᕐᕋᐅᔭᕐᓗ ᑐᒃᓯᐊᕐᕕᒡᔪᐊᕆᔭᐅᖕᒪᑦ.

²³ ᐃᒡᓗᒐᓴᒡᔪᐊᓪᓗ ᓯᕿᓂᕐᒧᑦ ᑕᖅᑭᕐᒧᓪᓘᓐᓃᑦ ᖃᐅᒪᑎᑕᐅᔭᕆᐊᖃᓐᖏᓚᑦ, ᒎᑎᐅᑉ ᐱᓐᓇᕐᓇᕐᓂᖓᑕ ᖃᐅᒪᑎᒻᒪᒋᑦ, ᓄᕐᕋᐅᔭᕐᓗ ᖃᐅᒻᒪᖅᑯᑎᒋᖕᒪᑦᔪᒃ.

²⁴ ᐃᓄᒐᓴᒡᔪᐊᑦ ᑖᑦᓱᒪ ᖃᐅᒪᑎᑦᓯᓂᖓᒍᑦ ᐃᓅᔪᒫᕐᐳᑦ; ᓄᓇᕐᔪᐊᕐᒥᐅᓪᓗ ᐊᖓᔪᖅᑳᕐᔪᐊᖏᑕ ᐱᓐᓇᕐᓇᕐᑐᖁᑎᑎᒃ ᑕᕝᕗᓐᖓᐅᑎᔪᒫᕐᐰᑦ.

²⁵ ᐃᑎᕐᑕᕐᕕᖏᓪᓗ ᐅᒃᑯᐊᓚᐅᕐᓯᒪᓂᐊᓐᖏᓚᑦ ᐅᓪᓗᒃᑯᑦ; ᑕᕝᕙᓂᓗ ᐅᓐᓄᐊᖃᕈᒫᕋᓂ;

²⁶ ᐃᓅᖃᑎᒌᒡᔪᐊᑦ ᐱᓐᓇᕐᓇᕐᓂᑎᒃ ᐅᐱᓐᓇᕐᓂᑎᒡᓗ ᑕᕝᕗᖓ ᓇᒃᓴᕈᒫᕐᐰᑦ.

²⁷ ᓴᓗᒪᖏᑦᑐᒥᒡᓕ ᑕᕝᕗᖓ ᐃᑎᕐᑐᖃᕈᒫᓐᖏᓚᖅ, ᓇᕐᕈᓇᕐᑐᓂᒡᓘᓐᓃᑦ ᐱᓇᓱᐊᕐᑐᓂᒃ ᐅᕝᕙᓗ ᓴᒡᓗᓯᒪᔪᓂᒃ, ᓄᕐᕋᐅᔭᐅᓪᓕ ᑎᑎᕋᕐᕕᒃᓴᖁᑎᖏᓐᓂ ᐃᓅᓯᕾᓐᓇᕐᓇᕐᑐᓂ ᐊᑎᖏᑦ ᑎᑎᕋᕐᑕᐅᓯᒪᔪᑦ ᑭᓯᒥ ᐃᑎᕈᒫᕐᐳᑦ.