ᔪᐊᓇᓯᐅᑉ ᑕᑯᑎᑕᐅᓂᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᕐᕌᒍᑦ 1,000

¹ ᑕᑯᓕᕆᕗᖓ ᐂᖏᓕᒥᒃ ᕿᓚᖕᒥᑦ ᐊᖅᑲᕐᑐᒥᒃ, ᑎᒍᒥᐊᕐᑐᒥᒃ ᐃᑎᕐᓴᕐᔪᐊᑉ ᓇᑎᖃᖏᑦᑑᑉ ᐅᒃᑯᐃᕈᑎᖓᓂᒃ ᐊᕐᓵᕐᑑᔭᓂᒡᓗ.

² ᑐᕌᒎᓂᓗ ᑎᒍᕚ, ᑖᓐᓇ ᖁᒡᓗᒋᐊᑐᖃᖅ, ᑕᕝᕙ ᐱᐅᓐᖏᑐᒥ ᐱᔪᒥᓵᕆᔨ ᑖᓇ ᓵᑖᓇᓯ, ᑖᓐᓇᓗ ᕿᓚᒃᓱᕐᐹ ᕿᓚᒃᓱᕐᓯᒪᓂᐊᓕᕐᓗᓂ ᐊᕐᕌᒍᓂᑦ 1,000ᓂᒃ.

³ ᐂᖏᓕᐅᓪᓗ ᐃᒋᑉᐹ ᐃᑎᕐᓴᕐᔪᐊᕐᒧᑦ ᓇᑎᖃᖏᑦᑐᒧᑦ, ᐅᒃᑯᐊᖓᓗ ᐊᑦᓱᖏᕐᓗᒍ ᓇᕿᑦᔪᓯᕐᐹ, ᐃᓅᖃᑎᒌᒡᔪᐊᓂᒃ ᑕᒻᒪᕐᑎᑦᓯᔪᓐᓃᖁᓪᓗᒍ, ᐊᕐᕌᒍᐃᑦ 1,000 ᓈᓚᐅᖏᓐᓂᖏᓐᓂ. ᑕᒪᓐᓇ ᐊᓂᒍᕐᐸᑦ ᕿᓚᕈᑦᔮᕐᑕᐅᔭᕆᐊᖃᓛᕐᐳᖅ ᓯᕕᑭᑦᑑᒥᒃ.

⁴ ᑕᕝᕙ ᐃᒃᓯᕙᐅᑕᕐᔪᐊᓂᒃ ᑕᑯᒋᕗᖓ, ᑕᕝᕙᓂᓗ ᐃᒃᓯᕙᔪᑦ ᐱᔪᓐᓇᕐᓂᕐᒥᒃ ᑐᓂᓯᕕᐅᕗᑦ ᐃᖅᑲᕐᑐᐃᔪᓐᓇᖁᓪᓗᒋᑦ. ᑕᑯᒋᕗᖓᓗ ᓂᐊᖁᐃᕐᑕᐅᓯᒪᔪᑦ ᑕᕐᓂᖏᓐᓂᒃ ᐅᖃᐅᓯᖃᕐᓂᖏᓐᓄᑦ ᔩᓱᓯᒥᒃ ᒎᑎᐅᓪᓗ ᐅᖃᐅᓯᖏᓐᓂᒃ, ᑐᒃᓯᐊᕐᕕᖃᓚᐅᖏᑦᑐᓪᓗ ᐆᒪᔪᐊᓗᖕᒥᒃ ᐅᕝᕙᓗ ᐊᑦᔨᓐᖑᐊᖓᓂᒃ ᓴᓇᓯᒪᔪᒥᒃ ᓇᓗᓁᒃᑯᑕᖓᓂᒡᓗ ᓇᓗᓁᒃᑯᓯᕐᑕᐅᓚᐅᖏᑦᑐᑦ ᖃᐅᒥᒃᑎᒍᑦ ᐊᒡᒐᖕᒥᒃᑎᒍᓪᓘᓐᓃᑦ. ᑖᒃᑯᐊ ᐆᒻᒪᕋᒥᒃ, ᙭ᔅᑑᓯ ᐊᖓᔪᖅᑳᕐᔪᐊᖑᖃᑎᒋᕚᑦ ᐊᕐᕌᒍᓂᒃ 1,000ᓂᒃ.

⁵ ᑐᖁᖓᔪᓪᓕ ᑖᒃᑯᐊ ᐊᓯᖏᑦ ᒪᑭᓚᐅᓐᖏᓚᑦ ᐊᕐᕌᒍᐃᑦ 1,000 ᓈᓚᐅᖏᓐᓂᖏᓐᓂ. ᑕᒪᑦᔭ ᓯᕗᓪᓕᖅ ᑐᖁᖓᔪᓂᑦ ᒪᑭᓐᓂᖅ.

⁶ ᖁᕕᐊᓇᕐᐳᖅ ᐃᑦᔪᕐᓁᑦᑑᓪᓗᓂᓗ ᒪᑭᓐᓂᕐᒥᒃ ᓯᕗᓪᓕᕐᒥᒃ ᒪᑭᖃᑕᐅᔪᓄᑦ! ᑐᖂᑉ ᐂᑉᐸᖓᓄᑦ ᐱᔪᓐᓇᕐᓂᖃᕐᕕᐅᔪᓐᓃᕐᒪᑕ ᑭᖑᓂᖓᒍᑦ, ᒎᑎᐅᑉ ᙭ᔅᑑᓯᐅᓪᓗ ᑐᓂᕐᕈᓯᕐᑎᑦᓯᔨᒋᓂᐊᓕᕐᒪᒋᑦ, ᐊᐅᓚᑦᓯᖃᑎᒋᓂᐊᕐᐹᓪᓗ ᐊᕐᕌᒍᓂᒃ 1,000ᓂᒃ.

ᓵᑖᓇᓯᐅᑉ ᓵᓚᐅᓂᖓ

⁷ ᐊᕐᕌᒍᐃᓪᓗ 1,000 ᐊᓂᒍᕐᐸᑕ, ᓵᑖᓇᓯ ᐊᓂᑎᑕᐅᔪᒫᕐᐳᖅ ᑎᒍᔭᐅᓯᒪᕕᖕᒥᓂᑦ,

⁸ ᐃᓅᖃᑎᒌᒡᔪᐊᓂᒡᓗ ᓇᓂᑐᐃᓐᓈᕐᑐᓂᒃ ᑕᒻᒪᕐᑎᑦᓯᔭᕐᑐᕈᒫᕐᐳᖅ ᓯᐊᒻᒪᕐᑎᑕᐅᓯᒪᔪᓂᒃ, ᐅᒃᑯᓇᓂ, ᓄᓇᓕᖕᓂ ᒑᒡᒥ ᒪᒑᒡᒥᓗ, ᓵᑖᓇᓯᐅᑉ ᑲᑎᑎᑦᓱᒫᕐᐰᑦ ᐅᓇᑕᕆᐊᖁᓪᓗᒋᑦ; ᑖᒃᑯᐊᓗ ᓯᐅᕋᕐᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ ᐅᓄᕐᓂᖃᕈᒫᕐᐳᑦ.

⁹ ᓄᓇᕐᔪᐊᕐᒧᓪᓗ ᓇᒧᑐᐃᓐᓈᕈᒫᕐᐳᑦ ᐅᓇᑕᕆᐊᕐᓗᑎᒃ ᐊᕙᑕᖏᕐᓯᔪᒫᕐᐳᑦ ᐃᑦᔪᕐᓁᑦᑐᓂᒃ ᐃᒡᓗᒐᓴᒡᔪᐊᓂᒡᓗ ᓇᒡᓕᖕᓇᕐᑐᓂᒃ; ᕿᓚᖕᒥᓪᓕ ᐃᑯᒪᒥᒃ ᑲᑕᒃᕕᐅᔪᒫᕐᐳᑦ ᓄᖑᑕᐅᓗᑎᒃ.

¹⁰ ᑕᕝᕙ ᓵᑖᓇᓯ ᑖᒃᑯᓂᖓ ᑕᒻᒪᕐᑎᑦᓯᓚᐅᕐᑐᖅ ᐃᒋᑕᐅᔪᒫᕐᐳᖅ ᑕᓯᕐᔪᐊᒧᑦ ᐃᒃᑭᕆᑦᑐᕐᔪᐊᒥᒃ ᓲᓪᕕᕆᒧᑦ ᐃᑯᒪᔪᒧᑦ ᑕᕝᕙᓂ ᐆᒪᔪᐊᓘᑉ ᓇᓚᐅᑦᑍᓂᕐᓗᒃᑑᓪᓗ ᐃᒋᑕᐅᕕᒋᓯᒪᔭᖓᓄᑦ, ᑖᒃᑯᐊᓗ ᑕᕝᕙᓂ ᐋᓐᓂᐊᑎᑕᐅᔪᒫᕐᐳᑦ ᐅᓪᓗᖅ ᐅᓐᓄᐊᕐᓗ ᓈᓗᒋᒃ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.

ᑭᖑᓪᓕᕐᐹᒥᒃ ᐃᖅᑲᕐᑐᕐᑕᐅᓂᖅ

¹¹ ᑕᕝᕙ ᑕᑯᓕᕆᕗᖓ ᐃᒃᓯᕙᐅᑕᕐᔪᐊᕐᒥᒃ ᖃᑯᕐᑕᒥᒃ ᑕᕝᕙᓂᓗ ᐃᒃᓯᕚᕐᑐᒥᒃ; ᑖᑦᓱᒪᓕ ᓇᔪᕐᑕᖓᓂᑦ ᓄᓇᕐᔪᐊᖅ ᕿᓚᒡᓗ ᕿᒪᒃᓯᕘᒃ, ᐃᓂᒃᓴᖃᕈᓐᓃᕐᓗᑎᒡᓗ.

¹² ᑐᖁᓯᒪᔪᓪᓗ ᑕᑯᒋᕙᒃᑲ, ᐊᖏᔪᑦ ᒥᑭᔪᓪᓗ, ᐃᒃᓯᕙᐅᑕᕐᔪᐊᑉ ᓵᖓᓂ ᓇᖏᕐᑐᑦ, ᑎᑎᕋᕐᕕᒃᓮᓪᓗ ᒪᒃᐱᕐᑕᐅᕗᑦ. ᐊᓯᖏᓪᓗ ᐊᑎᖃᕐᕖᑦ ᒪᒃᐱᕐᑕᐅᒋᕗᑦ, ᑖᒃᑯᐊ ᐊᑎᖃᕐᕖᑦ ᐃᓅᓯᕾᓐᓇᕐᓇᕐᑐᑦ. ᑐᖁᓯᒪᔪᓪᓗ ᐊᑐᓂᑦ ᐃᖅᑲᕐᑐᕐᑕᐅᓕᕐᐳᑦ ᐱᓂᐊᕐᓂᕆᓯᒪᔭᖏᑦ ᒪᓕᒡᓗᒋᑦ, ᑎᑎᕋᕐᕕᒃᓴᓂ ᑎᑎᕋᕐᑕᐅᓯᒪᔪᑦ.

¹³ ᐃᒪᕐᔪᐊᒥᓗ ᑐᖁᓯᒪᔪᑦ ᐃᒪᕐᔪᐊᑉ ᓴᖅᑭᑎᒃᑭᕔᑦ, ᓄᓇᕐᔪᐊᒥᓗ ᑐᖁᖓᔪᑦ ᐃᓂᖏᓐᓃᑦᑐᑦ ᓄᓇᕐᔪᐊᑉ ᓴᖅᑭᑎᒃᑭᕔᑦ, ᑕᕝᕙ ᑕᒪᕐᒥᒃ ᐃᖅᑲᕐᑐᕐᑕᐅᓕᕐᐳᑦ ᐱᓂᐊᕐᓂᕆᓯᒪᔭᖏᑦ ᒪᓕᒡᓗᒋᑦ.

¹⁴ ᑕᕝᕙ ᑐᖁ ᑐᖁᖓᔪᓪᓗ ᐃᓂᖓᑦ ᑕᓯᕐᒧᑦ ᐃᑯᒪᕐᔪᐊᕐᒧᑦ ᐃᒋᑕᐅᕘᒃ. ᑖᓐᓇ ᑕᓯᖅ ᐃᑯᒪᕐᔪᐊᖅ ᑕᕝᕙ ᑐᑰᑉ ᐂᑉᐸᖓ;

¹⁵ ᓇᓪᓕᐊᓪᓗ ᑎᑎᕋᕐᕕᒃᓴᓂ ᐃᓅᓯᕾᓐᓇᕐᓇᕐᑐᓂ ᐊᑎᖓ ᑎᑎᕋᕐᑕᐅᓯᒪᖏᑦᑐᖅ, ᑖᓐᓇ ᐃᒋᑕᐅᕗᖅ ᑕᓯᕐᒧᑦ ᐃᑯᒪᕐᔪᐊᕐᒧᑦ.