ᔪᐊᓇᓯᐅᑉ ᑕᑯᑎᑕᐅᓂᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᒪᑐᒪ ᑭᖑᕐᖓᒍᑦ ᑐᓴᕐᐳᖓ ᐃᓄᒋᐊᒃᑐᕐᔪᐊᓄᑦ ᓂᐱᒋᔭᐅᔮᕐᑐᓂᒃ ᓂᐱᖅᑯᕐᑐᓪᓗᑎᒃ ᐅᖃᕐᑐᓂᒃ, “ᐋᓕᓘᔭ! ᐱᐅᓕᔭᐅᓂᖅ ᐱᓐᓇᕐᓇᕐᓂᕐᓗ ᐱᔪᓐᓇᕐᓂᕐᓗ ᒎᑎᑦᑕ ᐱᒋᕔᑦ;

² ᑖᑦᓱᒪ ᐃᖅᑲᕐᑐᐃᓂᖏᑦ ᓱᓕᖕᒪᑕ ᓈᒻᒪᓈᑦᓯᐊᕐᓗᑎᒡᓗ; ᐃᖅᑲᕐᑐᓚᐅᕐᒪᒍ ᐊᖑᓐᓂᐊᕐᑎᕐᔪᐊᖅ ᓄᓇᕐᔪᐊᕐᒥᐅᓂᒃ ᐊᓯᕈᐃᓚᐅᕐᑐᖅ ᐊᖑᓐᓂᐊᕐᓂᕐᒥᓄᑦ, ᑖᑦᓱᒪᓗ ᐊᑭᓂᐊᕐᕕᒋᓚᐅᕐᐹ ᐱᔨᖏᑕ ᐊᐅᖏᑦ ᐱᑦᔪᑎᒋᓪᓗᒋᑦ.”

³ ᓱᓕ ᐅᖃᒃᑲᓐᓂᕆᕗᑦ, “ᐋᓕᓘᔭ! ᐃᒡᓗᒐᓴᒡᔪᐊᑦ ᐃᑯᐊᓚᓂᖏᑕ ᐳᔪᖓ ᖁᒻᒧᐊᑦᓮᓐᓇᕐᓂᐊᕐᐳᖅ ᐃᓱᖃᖏᑦᑐᒧᑦ.”

⁴ ᐊᖓᔪᖅᑳᓪᓗ 24 ᐆᒪᔪᐃᓪᓗ ᓯᑕᒪᑦ ᐹᒻᒪᒡᓗᑎᒃ ᒎᑎ ᐅᐱᒋᕚᑦ ᐃᒃᓯᕙᐅᑕᕐᔪᐊᕐᒥ ᐃᒃᓯᕙᔪᖅ, ᐅᖃᕐᓗᑎᒃ, “ᐋᒥᓐ ᐋᓕᓘᔭ!”

ᓄᕐᕋᐅᔭᐅᑉ ᑲᑎᑎᑕᐅᓂᖓᑕ ᓂᕆᕕᒡᔪᐊᕈᑕᐅᓂᖓ

⁵ ᐃᒃᓯᕙᐅᑕᕐᔪᐊᕐᒥᓪᓗ ᓂᓪᓕᕐᑐᖃᕐᐳᖅ, ᐅᖃᕐᓗᓂ, “ᒎᑎᕗᑦ ᓂᕐᑐᕐᓯᐅᒃ, ᑖᑦᓱᒧᖓ ᐱᔨᐅᔪᓯ ᑕᒪᑦᓯ, ᑖᑦᓱᒥᖓ ᐅᐱᒍᓱᒃᑐᓯ, ᓴᓐᖐᑦᑐᑦ ᓴᓐᖏᔪᓪᓗ.”

⁶ ᑕᕝᕙ ᑐᓴᕐᐳᖓ ᐃᓄᒋᐊᒃᑐᕐᔪᐊᓄᑦ ᓂᐱᒋᔭᐅᔮᕐᑐᓂᒃ, ᐃᒪᕐᔪᐊᓪᓗ ᐃᒃᑑᓕᔮᕐᓂᕆᔮᕐᑕᖏᓐᓂᒃ ᑲᓪᓘᓪᓗ ᐃᒃᑐᓚᐅᕐᓂᖓᑐᑦ ᑕᒤᑦᑑᔮᕐᑐᓂᒃ, ᐅᖃᕐᑐᓂᒃ, “ᐋᓕᓘᔭ! ᐊᑕᓂᖅ ᒎᑎᕗᑦ ᐊᔪᒐᖃᖏᑦᑐᖅ ᐊᖓᔪᖅᑳᕐᔪᐊᖑᕗᖅ.

⁷ ᖁᕕᐊᓱᒡᓗᑕ ᐊᖏᒡᓕᑎᕐᓚᕗᑦ ᓂᕐᑐᕐᓗᒍᓗ, ᓄᕐᕋᐅᔭᐅᑉ ᑲᑎᑎᑕᐅᕕᒃᓴᖓ ᓇᓪᓕᐅᑎᖕᒪᑦ, ᓄᓕᐊᒃᓴᖓᓗ ᐊᑐᐃᓐᓇᕈᕐᓗᓂ ᑖᑦᓱᒧᖓ.

⁸ ᐊᓐᓄᕌᕈᓐᓇᕐᑎᑕᐅᕗᖅ ᓵᑦᑐᒥᒃ, ᑕᑯᒥᓇᕐᑐᒥᒃ ᓴᓗᒻᒪᑦᓯᐊᕐᑐᒥᒃ.” ᐊᓐᓄᕌᖅ ᑖᓐᓇ ᓵᑦᑐᖅ ᐊᓐᓄᕌᒃᓴᐅᕗᖅ ᐃᑦᔪᕐᓁᑦᑐᓄᑦ ᐃᓗᐊᕐᑐᒥᒃ ᐃᓅᓯᖃᕐᓗᑎᒃ ᐱᓇᓱᐊᓚᐅᕐᑐᓄᑦ.

⁹ ᐂᖏᓕᐅᓪᓗ ᐅᖃᐅᑎᕚᖓ, “ᐅᓇ ᑎᑎᕋᕈᒃ: ᓮᒪᕐᑎᑕᐅᓯᒪᕗᑦ ᓄᕐᕋᐅᔭᐅᑉ ᑲᑎᑎᑕᐅᓂᖓᑕ ᓂᕆᕕᒡᔪᐊᕈᑕᐅᓂᐊᕐᓂᖓᓄᑦ ᕾᖁᔭᐅᔪᑦ.” ᐂᖏᓕᓗ ᐅᖃᒃᑲᓐᓂᕐᐳᖅ, “ᑕᒪᒃᑯᐊ ᓱᓕᔪᒥᒃ ᒎᑎᐅᑉ ᐅᖃᐅᓯᕆᕔᑦ.”

¹⁰ ᑕᕝᕙ ᐃᑎᒐᖏᓐᓄᑦ ᐹᒻᒪᒃᐳᖓ ᒥᑭᒡᓕᑎᕐᓗᖓ ᐅᐱᒋᕕᒃᔪᐊᕈᒪᓪᓗᒍ, ᑖᑦᓱᒪᓕ ᐅᖃᐅᑎᕚᖓ, “ᑍᒤᓕᐅᕆᐊᖃᓐᖏᓚᑎᑦ! ᐱᔨᑐᐃᓐᓇᐅᖃᑕᐅᕗᖓ ᐃᓕᒃᑐᑦ ᐅᒃᐱᖃᑎᒃᑐᓪᓗ ᐅᖅᑲᕆᒃᓴᐅᑦᔨᔪᓄᑦ ᔩᓱᓯᒥᒃ. ᒎᑎᓕ ᐅᐱᒋᕕᒃᔪᐊᕆᐊᖃᕐᐸᑦ.” ᔩᓱᓯᐅᑉ ᓇᓗᓁᔭᓚᐅᕐᑕᖓ ᐊᓂᕐᓂᐅᕗᖅ ᓇᓚᐅᑦᑍᔪᑦ ᐱᔪᓐᓇᐅᑎᒋᓚᐅᕐᑕᖓᑦ.

ᕿᒻᒥᕐᔪᐊᒥ ᖃᑯᕐᑕᒥ ᐃᑭᒪᔪᖅ

¹¹ ᑕᕝᕙ ᕿᓚᒃ ᐅᒃᑯᐃᕐᑐᖅ ᑕᑯᕙᕋ, ᑕᑯᒋᓪᓗ, ᓴᖅᑭᑦᑐᖃᕐᐳᖅ ᕿᒻᒥᕐᔪᐊᒥᒃ ᖃᑯᕐᑕᒥᒃ! ᑕᕝᕙᓂᓗ ᐃᑭᒪᔪᖅ ᐊᑎᖃᕐᐳᖅ ᓱᖁᓯᔪᐃᑦᑐᒥᒃ ᓱᓕᔪᒥᒡᓗ, ᓈᒻᒪᑦᓯᐊᕐᑐᒥᒡᓗ ᐃᖅᑲᕐᑐᐃᓂᖃᕐᐳᖅ ᑕᒪᓐᓇᓗ ᐅᓇᑕᐅᑎᒋᕚ.

¹² ᐃᔨᖏᒡᓗ ᐃᑯᐊᓚᔪᑎᑐᑦ ᑍᒤᑉᐴᒃ, ᓂᐊᖂᑎᖃᕐᐳᕐᓗ ᐊᖓᔪᖅᑳᐅᓂᖓᑕ ᓇᓗᓁᒃᑯᑕᖏᓐᓂᒃ ᐊᒥᓱᓂᒃ; ᐊᑎᖓᓗ ᑕᕝᕙᓂ ᑎᑎᕋᕐᓯᒪᕗᖅ ᑭᓇᒧᓪᓘᓃᑦ ᖃᐅᔨᔭᐅᔪᓐᓇᖏᑦᑐᖅ ᑖᑦᓱᒪ ᑭᓯᒥ ᖃᐅᔨᒪᔭᑐᐊᕆᕚ.

¹³ ᐅᓕᒡᔪᐊᖓᓗ ᐊᑐᕐᑕᖓ ᐊᐅᖕᒥᒃ ᐃᑦᓴᒃᓯᒪᕗᖅ, ᐊᑎᖃᕐᑎᑕᐅᕗᕐᓗ, ᒎᑎᐅᑉ ᐅᖃᐅᓯᖓᓂᒃ.

¹⁴ ᕿᓚᖕᒥᐅᓪᓗ ᐅᓇᑕᕐᑐᒃᓴᖁᑎᖏᑕ ᒪᓕᒃᐹᑦ, ᕿᒻᒥᕐᔪᐊᖃᕐᓗᑎᒃ ᖃᑯᕐᑕᓂᒃ, ᐊᓐᓄᕌᕐᓯᒪᓪᓗᑎᒡᓗ ᓵᑦᑐᓂᒃ ᓴᓗᒪᔪᓂᒃ ᖃᑯᕐᑕᓂᖅ.

¹⁵ ᖃᓂᖓᓂᓪᓗ ᐊᓂᔪᖃᕐᐳᖅ ᓴᕕᒡᔪᐊᒥᒃ ᐃᐱᒃᑐᒥᒃ ᑖᑦᓱᒧᖓ ᐃᓅᖃᑎᒌᒡᔪᐊᑦ ᓵᓚᒋᔪᒫᕐᐰᑦ, ᐊᐅᓚᓐᓂᐊᕐᐰᓪᓗ ᐊᔭᐅᑉᐱᐊᒧᑦ ᓴᕕᕋᔭᖕᒧᑦ; ᑐᓪᓕᕋᕐᓗᒋᓪᓗ ᐅᐂᓃᑦ ᐃᑦᑏᔭᕐᓂᐊᕐᐰᑦ ᐃᑦᑏᔧᕕᖕᒦᑦᑐᑦ ᑕᒪᑦᔭ ᒎᑎᐅᑉ ᐊᔪᒐᖃᖏᑦᑑᑉ ᓂᓐᖓᐅᓯᕐᔪᐊᖓᑕ ᐃᑦᓯᖓ.

¹⁶ ᐅᓕᒡᔪᐊᖓᓂ ᖁᒃᑐᕋᖏᖕᓂᓗ ᐊᑎᖓ ᑎᑎᕋᕐᓯᒪᕗᖅ, “ᐊᖓᔪᖅᑳᕐᔪᐊᖅ ᐊᖓᔪᖅᑳᕐᔪᐊᓄᑦ ᐊᑕᓂᐅᔪᕐᓗ ᐊᑕᓂᕐᓄᑦ.”

¹⁷ ᑕᕝᕙ ᐂᖏᓕᒥᒃ ᑕᑯᒋᕗᖓ ᓯᕿᓂᕐᒥ ᓇᖏᕐᑐᒥᒃ, ᓂᐱᖅᑯᕐᑐᓪᓗᓂᓗ ᑎᖕᒥᐊᓄᑦ ᖃᖓᑕᔪᓄᑦ ᐅᖃᕐᐳᖅ, “ᕾᒋᑦᓯ, ᑲᑎᓕᕐᑕ ᒎᑎᐅᑉ ᓂᕆᕕᒡᔪᐊᕐᕕᖓᓄᑦ,

¹⁸ ᓂᕆᓕᕐᑕ ᐊᖓᔪᖅᑳᕐᔪᐊᑦ ᑎᒥᖏᓐᓂᒃ, ᐅᓇᑕᕐᑎᖁᑎᖏᑕᓪᓗ ᐊᖓᔪᖅᑳᖁᑎᖏᓐᓂᒃ, ᐅᓇᑕᕐᑐᒃᓴᖁᑎᖏᑕᓗ ᐊᔪᖏᑦᑐᕐᔪᐊᑦ ᑎᒥᖏᓐᓂᒃ, ᕿᒻᒥᕐᔪᐊᓂᒃ ᑕᕝᕙᓂᓗ ᐃᑭᒪᔪᑦ ᑎᒥᖏᓐᓂᒃ, ᐃᓅᓕᒫᓪᓗ ᑎᒥᖏᓐᓂᒃ, ᓯᐊᓛᓂᑦ ᓯᐊᓛᖑᖏᑦᑐᓂᓗ, ᒥᑭᔪᓂ ᐊᖏᔪᓂᒡᓗ.”

¹⁹ ᑕᑯᓕᕆᕗᖓ ᐆᒪᔪᐊᓗᖕᒥᒃ ᓄᓇᕐᔪᐊᓪᓗ ᐊᖓᔪᖅᑳᕐᔪᐊᖏᓐᓂᒃ ᐅᓇᑕᕐᑐᒃᓴᖁᑎᖏᓐᓂᒡᓗ ᑲᑎᓕᕐᑐᓂᒃ ᐅᓇᑕᕆᐊᕈᒪᓪᓗᒍ ᕿᒻᒥᕐᔪᐊᕐᒥ ᐃᑭᒪᔪᖅ ᐅᓇᑕᕐᑎᖁᑎᖏᓐᓂᓪᓗ.

²⁰ ᐆᒪᔪᐊᓗᒡᓗ ᓵᓚᐅᓪᓗᓂ ᑎᒍᔭᐅᕗᖅ ᐊᑦᓱᖏᕐᑕᐅᓪᓗᓂᓗ, ᓇᓚᐅᑦᑍᓂᕐᓗᒃᑐᓪᓗ ᑎᒍᔭᐅᖃᑕᐅᕗᑦ ᑖᑦᓱᒪ ᓵᖓᓂ ᑲᒪᓇᕐᑐᓕᖃᑦᑕᐅᓚᕐᑐᑦ ᑲᒪᓇᕐᑐᓕᓂᕐᒥᓄᓪᓗ ᑕᒻᒪᕐᑎᑦᓯᓚᐅᕐᑐᑦ ᐆᒪᔪᐊᓘᑉ ᓇᓗᓁᒃᑯᑕᖓᓂᒃ ᓇᓗᓁᒃᑯᓯᕐᓯᒪᔪᓂᒃ ᑐᒃᓯᐊᕐᕕᖃᖃᑦᑕᓚᐅᕐᑐᓪᓗ ᐆᒪᔪᐊᓘᑉ ᐊᑦᔨᖓᓂᒃ ᓴᓇᓯᒪᔪᒥᒃ. ᑖᒃᑯᐊᒡᓗ ᑕᒪᕐᒥᒃ ᐃᒋᑕᐅᕘᒃ ᐆᒪᑎᓪᓗᒋᒃ ᑕᓯᕐᒧᑦ ᐃᑯᒪᕐᔪᐊᕐᒧᑦ ᐃᒃᑭᕆᒃᑐᕐᔪᐊᕐᒥᒃ ᓲᓪᕙᒥᒃ ᐃᑯᒪᔪᒧᑦ.

²¹ ᐊᓯᖏᓪᓗ ᐅᓇᑕᕐᑐᒃᓴᖁᑎᖏᑦ ᓴᕕᒡᔪᐊᒧᑦ ᑐᖁᑕᐅᕗᑦ ᑖᑦᓱᒪ ᕿᒻᒥᕐᔪᐊᕐᒥ ᐃᑭᒪᔫᑉ ᖃᓂᖓᓂᑦ ᐊᓂᓯᒪᔪᒧᑦ; ᑎᖕᒥᐊᓕᒫᓄᓪᓗ ᑎᒥᕕᓂᖏᑦ ᓂᕆᔭᐅᕗᑦ.