ᔪᐊᓇᓯᐅᑉ ᑕᑯᑎᑕᐅᓂᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖑᓐᓂᐊᕐᑎᕐᔪᐊᖅ

¹ ᐂᖏᓖᓪᓗ 7 ᖃᓪᓗᑎᓂᒃ 7ᓂᒃ ᐱᓯᒪᓚᐅᕐᑐᑦ ᐃᓚᖓᑦᑕ ᕾᓪᓗᓂ ᐅᖃᐅᑎᕚᖓ, “ᕾᒋᑦ, ᑕᑯᑎᓐᓂᐊᕋᒃᑭᑦ ᐊᖑᓐᓂᐊᕐᑎᕐᔪᐊᑉ ᐃᖅᑲᕐᑐᕐᑕᐅᓂᖓᓂᒃ ᑖᓐᓇ ᐃᓂᖃᕐᑐᖅ ᐃᒪᕐᔪᐃᑦ ᖃᓂᒋᔮᓂ,

² ᐊᖓᔪᖅᑳᕐᔪᐊᓪᓗ ᓄᓇᕐᔪᐊᕐᒦᑦᑐᑦ ᐊᕐᓇᕐᓂᐊᖃᑦᑕᓚᐅᕐᐹᑦ, ᓄᓇᕐᔪᐊᕐᒥᐅᓪᓗ ᐋᖓᔮᓕᕐᑎᓚᐅᕐᐰᑦ ᐊᓯᓐᓂᐊᕐᓂᐅᑉ ᐅᐂᓂᖓᓂᒃ ᐃᒥᕐᑎᓪᓗᒋᑦ.”

³ ᑕᕝᕙ ᐂᖏᓕᐅᑉ ᐊᓂᕐᓂᒃᑯᑦ ᐂᑎᑉᐹᖓ ᐃᓄᖃᖏᑦᑐᒧᑦ, ᑕᕝᕙᓂᓗ ᑕᑯᕗᖓ ᐊᕐᓇᒥᒃ ᐆᒪᔪᐊᓗᖕᒥ ᐊᐅᐸᕐᑐᒥ ᐃᑭᒪᔪᒥᒃ ᑖᓐᓇᓗ ᐆᒪᔪᐊᓗᒃ ᑎᑎᕋᕐᕕᒋᓯᒪᕗᖅ ᑎᒥᓕᒫᒥᒍᑦ ᒎᑎᒥᒃ ᐅᖃᕐᓂᕐᓘᑎᖃᕐᑐᓂᒃ, ᓂᐊᖁᖃᕐᐳᕐᓗ 7ᓂᒃ ᓇᒡᔪᖃᕐᓗᓂᓗ ᖁᓕᓂᒃ.

⁴ ᐊᕐᓇᕐᓗ ᐊᓐᓄᕌᕐᓯᒪᕗᖅ ᓵᑦᑐᒥᒃ ᐊᐅᐸᓪᓚᕆᒃᑐᒥᒃ ᐊᐅᐸᕐᑐᒥᒡᓗ, ᒎᓗᓂᒡᓗ ᐅᔭᕋᖕᓂᒡᓗ ᐱᐅᔪᓂᒃ ᓴᐸᖓᕐᓂᒡᓗ ᐊᓐᓄᕌᒥ ᖄᖓᒍᑦ ᐱᐅᓴᐅᑎᖃᕐᐳᖅ, ᑎᒍᒥᐊᕐᓗᓂᓗ ᖃᓪᓗᑎᒥᒃ ᒎᓗᒥᒃ ᐃᒪᖃᕐᑐᒥᒃ ᓇᕐᕈᓇᕐᑐᓂᒃ ᐊᖑᓐᓂᐊᖃᑦᑕᕐᓂᖓᑕᓗ ᓴᓗᒤᓐᓂᖏᓐᓂᒃ.

⁵ ᖃᐅᖓᒍᓪᓗ ᑎᑎᕋᕐᓯᒪᔪᖃᕐᐳᖅ ᐊᑎᕐᒥᒃ ᓇᓗᓇᕐᑐᒥᒃ: “ᐹᐱᓘᓂ ᐊᔪᖏᑦᑐᕐᔪᐊᖅ, ᐊᖑᓐᓂᐊᕐᑏᑦ ᐊᓈᓇᖓᑦ ᓄᓇᕐᔪᐊᒥ ᓇᕐᕈᓇᕐᑐᓕᓃᑦ.”

⁶ ᐊᕐᓇᕐᓗ ᑕᑯᕙᕋ ᐋᖓᔮᕐᑐᖅ ᐃᑦᔪᕐᓁᑦᑐᑦ ᐊᐅᖏᓐᓄᑦ ᔩᓱᓯᓗ ᐱᓪᓗᒍ ᑐᖁᑕᐅᓯᒪᔪᑦ ᐊᐅᖏᓐᓄᑦ. ᑖᓐᓇᓗ ᑕᑯᒐᒃᑯ ᐊᒃᓱᐊᓗᒃ ᑲᒪᓂᐊᕈᑎᒋᕙᕋ.

⁷ ᐂᖏᓕᐅᓪᓕ ᐅᖃᐅᑎᕚᖓ, “ᓱᖕᒪᑦ ᑲᒪᓂᐊᕈᑎᒋᕕᐅᒃ? ᐅᖃᐅᑎᔪᒪᕙᒋᑦ ᑖᒃᑯᐊ ᓇᓗᓇᕐᓂᖏᑕ ᑐᑭᖏᓐᓂᒃ, ᐆᒪᔪᐊᓘᓪᓗ ᓇᓗᓇᕐᓂᖓᓂᒃ ᓂᐊᖁᖃᕐᑐᒥᒃ 7ᓂᒃ ᓇᒡᔪᖃᕐᓗᓂᓗ ᖁᓕᓂᒃ ᐊᕐᓇᐅᑉ ᐃᑭᒪᕕᒋᔭᖓᓂᒃ.

⁸ ᑖᓐᓇ ᐆᒪᔪᐊᓗᒃ ᑕᑯᓚᐅᕐᑍᑦ ᐆᒪᓚᐅᕐᑑᒐᓗᐊᖅ, ᒫᓐᓇᓕ ᑐᖁᖓᓕᕐᑐᖅ, ᑖᓐᓇᓗ ᒪᑭᑦᓱᒫᕐᐳᖅ ᐃᑎᕐᓴᕐᔪᐊᒥᑦ ᓇᑎᖃᖏᑦᑐᒥᑦ ᐊᓯᕈᕐᑕᐅᔭᕐᑐᓕᕐᓗᓂ; ᓄᓇᕐᔪᐊᒥᓗ ᐃᓅᔪᑦ ᐃᓅᓯᕾᓐᓇᕐᓇᕐᑐᒥ ᐃᓅᔪᒃᓮᑦ ᐊᑎᖃᕐᕕᖏᓐᓂ ᐊᑎᖏᑦ ᑎᑎᕋᕐᑕᐅᓯᒪᖏᑦᑐᑦ ᑍᒪᓐᖓᓂᑦ ᓯᓚᕐᔪᐊᖅ ᐱᓐᖑᕐᑎᑕᐅᓂᖓᓂᑦ, ᑖᒃᑯᐊ ᐆᒪᔪᐊᓗᒃ ᑕᑯᓕᕈᓂᑦᔪᒃ ᑲᒪᓂᐊᕈᑎᒋᔪᒫᕐᐹᑦ, ᑖᓐᓇ ᐆᒪᓚᐅᕐᑑᒐᓗᐊᖅ ᒫᓐᓇᓗ ᑐᖁᖓᓕᕐᑐᖅ ᓱᓕ ᑕᑯᓕᕈᓂᑦᔪᒃ.

⁹ “ᓯᓚᑐᓂᒃᑯᑦ ᑐᑭᓯᓇᓱᐊᑦᓯᐊᕐᓂᒃᑯᓪᓗ ᑐᑭᓯᓇᓱᐊᕐᑕᐅᔭᕆᐊᖃᕐᐳᑦ: ᑖᒃᑯᐊ ᓂᐊᖁᐃᑦ 7 ᖃᖅᑲᐅᕗᑦ 7 ᐊᕐᓇᐅᑉ ᐃᒃᓯᕚᕐᕕᒋᔭᖓᓃᑦᑐᑦ; ᑐᑭᖃᕆᕗᑦ ᐊᖓᔪᖅᑳᕐᔪᐊᓂᒃ 7ᓂᒃ,

¹⁰ ᑕᓪᓕᒪᑦ ᑐᖁᖓᓕᕐᐳᑦ, ᐊᑕᐅᓯᖅ ᓱᓕ ᐊᖓᔪᖅᑲᐅᕕᖕᒥᓂᒃ ᐊᐅᓚᑦᓯᕗᖅ, ᐃᓚᖓᑦ ᓱᓕ ᐊᖓᔪᖅᑳᓐᖑᓚᐅᓐᖏᓚᖅ, ᐊᖓᔪᖅᑳᓐᖑᕈᓂᓗ ᐊᑯᓂᐅᖏᑦᑐᖅ ᐊᖓᔪᖅᑳᖑᔪᒫᕐᐳᖅ.

¹¹ ᐆᒪᔪᐊᓗᒡᓗ ᐆᒪᓚᐅᕐᑑᒐᓗᐊᖅ ᒫᓐᓇᓕ ᐆᒪᔪᓐᓃᕐᑐᖅ, ᑖᓐᓇ ᐊᖓᔪᖅᑳᕐᔪᐊᑦ ᓯᑕᒪᐅᔪᕐᑐᒋᒐᓗᐊᕐᐹᑦ ᑭᓯᐊᓂᓕ ᐊᖓᔪᖅᑳᕐᔪᐊᑦ 7ᒋᕚᑦ, ᐊᖓᔪᖅᑳᕐᔪᐊᕈᒃᑲᓐᓂᓚᐅᕐᒪᑦ ᐊᓯᕈᕐᑕᐅᔭᕐᑐᑐᐃᓐᓇᕐᓗᓂ.

¹² “ᓇᒡᔪᐃᓪᓗ ᖁᓖᑦ ᑕᑯᔭᑎᑦ ᐊᖓᔪᖅᑳᕐᔪᐊᖑᕗᑦ ᖁᓕᑦ ᓱᓕ ᐊᖓᔪᖅᑳᕐᔪᐊᓐᖑᓚᐅᖏᑦᑐᑦ, ᑭᓯᐊᓂᓕ ᐱᔪᓐᓇᕐᓯᑎᑕᐅᔪᒫᕐᐳᑦ ᐊᖓᔪᖅᑳᕐᔪᐊᖑᖁᓪᓗᒋᑦ ᐃᑲᕐᕋᕐᒥᒃ ᐊᑕᐅᓯᕐᒥᒃ, ᐊᐅᓚᑦᓯᖃᑎᖃᕐᓗᑎᒃ ᐆᒪᔪᐊᓗᖕᒥᒃ.

¹³ ᑖᒃᑯᐊ ᖁᓕᑦ ᐊᑕᐅᓯᕐᒥᒃ ᐃᓱᒪᖃᖃᑎᒌᒃᐳᑦ ᐱᔪᓐᓇᕐᓂᑎᒃ ᐱᔪᓐᓇᕐᓯᑎᑕᐅᓯᒪᓂᑎᒡᓗ ᑐᓂᓯᒪᓪᓗᒋᑦ ᐆᒪᔪᐊᓗᖕᒧᑦ;

¹⁴ ᑖᒃᑯᐊᓗ ᐅᓇᑕᕈᒫᕐᐳᑦ ᓄᕐᕋᐅᔭᒥᒃ, ᓄᕐᕋᐅᔭᕐᓕ ᓵᓚᖃᕈᒫᕐᐳᖅ ᑖᒃᑯᓂᖓ, ᐊᑕᓂᐅᒐᒥ ᐊᑕᓂᕐᓄᑦ ᐊᖓᔪᖅᑳᕐᔪᐊᖑᓪᓗᓂᓗ ᐊᖓᔪᖅᑳᕐᔪᐊᓄᑦ, ᐃᓚᖃᕈᒫᕐᒪᑦ ᕾᖁᔭᐅᓯᒪᔪᓂᒃ ᓂᕈᐊᕐᑕᐅᓯᒪᔪᓂᒡᓗ ᓱᕐᕋᔪᐃᑦᑐᒥᒃ ᒪᓕᒃᑎᐅᔪᓂᒃ ᑖᑦᓱᒥᖓ.”

¹⁵ ᐂᖏᓕᐅᓪᓗ ᐅᖃᐅᑎᕚᖓ, “ᐃᒪᕐᔪᐊᑦ ᑕᑯᓯᒪᔭᑎᑦ, ᐊᕐᓇᐅᑉ ᐊᖑᓐᓂᐊᕐᑎᐅᑉ ᐃᒃᓯᕚᕐᕕᒋᔭᖏᑦ, ᐃᓅᕗᑦ ᐃᓄᒐᓴᒡᔪᐊᖑᓪᓗᑎᒡᓗ ᐃᓅᖃᑎᒌᒡᔪᐊᖑᕗᑦ ᐅᖃᐅᓯᖃᖃᑎᒌᖏᑦᑐᑦ.

¹⁶ ᓇᒡᔪᐃᓪᓗ ᖁᓖᑦ ᑕᑯᓯᒪᔭᑎᑦ, ᑖᒃᑯᐊ ᐆᒪᔪᐊᓗᒡᓗ ᐊᕐᓇᖅ ᐊᖑᓐᓂᐊᕐᑎ ᐊᑭᕋᕐᑐᓕᕈᒫᕐᐹᑦ; ᐱᒋᔭᓕᒫᖏᓐᓂᒡᓗ ᐱᖁᑍᒍᑎᔪᒫᕐᐹᑦ ᐊᓐᓄᕌᖃᕈᓐᓃᕐᑎᓪᓗᒍᓗ ᕿᒪᒍᒫᕐᐹᑦ, ᑎᒥᖓᓗ ᓂᕆᔪᒫᕐᐹᑦ ᐃᑯᒪᒧᓪᓗ ᓄᖑᑕᐅᑎᓪᓗᒍ,

¹⁷ ᒎᑎᐅᑉ ᐃᓱᒪᖃᓕᕐᑎᑦᓱᒫᕐᒪᒋᑦ ᐱᓇᓱᐊᕈᒪᔭᒥᓂᒃ ᓈᒻᒪᒃᓯᑎᑦᓯᖁᓪᓗᒋᑦ ᐱᓇᓱᐊᖃᑎᒌᓂᕐᒥᒃᑎᒍᑦ ᐊᑕᐅᓯᕐᒥᒃ ᐃᓱᒪᖃᕐᓗᑎᒃ ᐊᖓᔪᖅᑳᕐᔪᐊᖑᓂᕐᒧᑦ ᐱᔪᓐᓇᕐᓂᕐᒥᖕᓂᒃ ᐃᑲᔪᕈᑎᖃᖁᓪᓗᒋᑦ ᐆᒪᔪᐊᓗᖕᒧᑦ ᐊᐅᓚᑦᓯᓂᕐᒥᒃᑎᒍᑦ, ᒎᑎᐅᑉ ᐅᖃᐅᓯᖏᑦ ᓇᓚᐅᑦᓯᔭᕇᓚᐅᕐᑎᓐᓇᒋᑦ.

¹⁸ “ᐊᕐᓇᖅ ᑕᑯᓯᒪᔧᑦ ᑖᒃᑯᐊᖑᕗᑦ ᐃᒡᓗᒐᓴᒡᔪᐊᑦ ᐊᔪᖏᑦᑐᕐᔪᐊᑦ ᐊᐅᓚᑦᓯᔪᒫᕐᑐᑦ ᐊᖓᔪᖅᑳᕐᔪᐊᓂᒃ ᓄᓇᕐᔪᐊᕐᒦᑦᑐᓂᒃ.”