ᔪᐊᓇᓯᐅᑉ ᑕᑯᑎᑕᐅᓂᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᖃᓪᓗᑏᑦ ᒎᑎᐅᑉ ᓂᓐᖓᐅᓯᖓᓂᒃ ᐃᓗᓕᓖᑦ

¹ ᑐᓴᕐᐳᖓᓗ ᓂᐱᖅᑯᕐᑐᔪᒥᒃ ᑐᒃᓯᐊᕐᕕᒡᔪᐊᒥᑦ ᐱᔪᒥᒃ ᐅᖃᐅᑦᔨᔪᒥᒃ ᐂᖏᓕᓂᒃ 7ᓂᒃ, “ᖃᓪᓗᑏᑦ 7 ᑯᕕᔭᕐᑐᓕᕐᓯᐅᒃ ᓄᓇᕐᔪᐊᕐᒧᑦ ᒎᑎᐅᑉ ᓂᓐᖓᐅᓯᖓᓂᒃ ᐃᒪᓖᑦ.”

² ᐂᖏᓕᐅᓪᓗ ᓯᕗᓕᕐᐹᑉ ᖃᓪᓗᑎᓂ ᑯᕕᕚ ᓄᓇᕐᔪᐊᕐᒧᑦ, ᑕᕝᕙ ᐃᓄᐃᑦ ᑕᑯᒥᓁᑦᑐᓄᑦ ᐊᔪᐊᕐᓄᓪᓗ ᐋᓐᓂᐊᓇᕐᑐᕐᔪᐊᓄᑦ ᑎᑭᑕᐅᕗᑦ ᐆᒪᔪᐊᓘᑉ ᓇᓗᓁᒃᑯᑕᖓᓂᒃ ᓇᓗᓁᒃᑯᑕᖃᕐᑐᑦ ᐊᑦᔨᓐᖑᐊᖓᓄᓪᓗ ᓴᓇᓯᒪᔪᒧᑦ ᑐᒃᓯᐊᕐᕕᖃᖃᑦᑕᕐᑐᑦ.

³ ᐂᖏᓕᐅᓪᓗ ᐂᑉᐸᖓᑕ ᖃᓪᓗᑎᓂ ᑯᕕᒋᕚ ᐃᒪᕕᖕᒧᑦ, ᐃᓅᓪᓗ ᑐᖁᖓᔫᑉ ᐊᐅᖓᑐᑦ ᑍᒤᓕᕐᐳᖅ, ᐆᒪᔪᓕᒫᓪᓗ ᐃᒪᕐᒥᐅᑍᑦ ᑐᖁᕋᕐᐳᑦ.

⁴ ᐂᖏᓖᓪᓗ ᐱᖓᔪᖓᑦᑕ ᖃᓪᓗᑎᓂ ᑯᕕᒋᕚ ᑰᖕᓄᑦ ᓄᓇᐅᓪᓗ ᐃᓗᐊᓂᑦ ᑰᒃᑐᓄᑦ, ᐃᒥᓕᒫᓪᓗ ᐊᐅᓐᖑᕐᐳᑦ.

⁵ ᐂᖏᓕᓗ ᐃᒪᕐᓄᑦ ᐊᖓᔪᖅᑳᖑᔪᖅ ᐅᖃᕐᑐᖅ ᑐᓴᕐᐸᕋ: “ᐃᖅᑲᕐᑐᐃᑦᔪᑎᒋᔭᑎᑦ ᑕᒪᑐᒧᖓ ᓈᒻᒪᑦᓯᐊᕐᐳᑦ, ᒫᓐᓇ ᑍᒤᓐᓇᕕᑦ ᑍᒤᓚᐅᕋᕕᓪᓗ, ᐃᑦᔪᕐᓁᑦᑐᑑᔪᑎᑦ.

⁶ ᑖᒃᑯᐊ ᐊᐅᓈᕐᑎᑦᓯᓚᐅᕐᒪᑕ ᐃᑦᔪᕐᓁᑦᑐᑦ ᓇᓚᐅᑦᑍᔪᑦ ᐊᐅᖏᓐᓂᒃ, ᑕᕝᕙ ᐊᐅᖕᒥᒃ ᐃᒥᒐᒃᓴᖏᓐᓂᒃ ᑐᓂᓯᕕᒋᕙᑎᑦ. ᑍᒤᑕᐅᔭᕆᐊᖃᕐᒪᑕ!”

⁷ ᑕᕝᕙ ᓂᐱᒥᒃ ᑐᓴᓕᕆᕗᖓ ᑐᓂᕐᕈᓯᕐᕕᖕᒥᑦ ᐅᖃᕐᑐᒥᒃ, “ᐊᑕᓃᖅ ᒎᑎ ᐊᔪᒐᖃᖏᑦᑐᑎᑦ, ᓱᓕᕗᑦ ᓈᒻᒪᓈᑦᓯᐊᕐᓗᑎᒡᓗ ᐃᖅᑲᕐᑐᐃᓂᕆᔭᑎᑦ!”

⁸ ᐂᖏᓖᓪᓗ ᓯᑕᒪᖓᑦᑕ ᖃᓪᓗᑎᓂ ᑯᕕᒋᕚ ᓯᕿᓂᕐᒧᑦ, ᓯᕿᓂᕐᓗ ᐃᓄᖕᓂᒃ ᐆᑎᑦᓯᔪᓐᓇᕐᑎᑕᐅᕗᖅ ᐃᑯᐊᓚᔪᑎᑐᑦ ᐆᓇᕐᓂᕐᒥᓄᑦ;

⁹ ᐃᓄᐃᓪᓗ ᐆᓇᕐᑐᕐᔪᐊᒧᑦ ᐆᑕᐅᕗᑦ, ᒎᑎᐅᓪᓗ ᐊᑎᖓ ᐅᖃᕐᓂᕐᓘᑎᒋᕚᑦ ᑖᓐᓇ ᐱᔪᓐᓇᕐᓂᖃᕐᑐᖅ ᑖᒃᑯᓄᖓ ᑲᑉᐱᐊᓇᕐᑐᓄᑦ, ᖃᕿᐊᓕᓚᐅᓐᖏᓚᓪᓕ ᓂᕐᑐᐃᓇᑎᒡᓗ ᐱᓐᓇᕐᓇᕐᓂᕐᔪᐊᖓᓂᒃ.

¹⁰ ᐂᖏᓖᓪᓗ ᑕᓪᓕᒪᖓᑦᑕ ᖃᓪᓗᑎᓂ ᑯᕕᒋᕚ ᐆᒪᔪᐊᓘᑉ ᐃᒃᓯᕙᐅᑕᕐᔪᐊᖓᓄᑦ, ᐆᒪᔪᐊᓘᓪᓗ ᐊᑕᓂᐅᕕᖓ ᑖᕐᑐᕐᔪᐊᕐᒦᓕᕐᐳᖅ; ᐃᓄᐃᓪᓗ ᐅᖃᕐᒥᖕᓂᒃ ᑭᖕᒥᐊᓕᕐᐳᑦ ᐋᓐᓂᐊᓂᕐᒧᑦ,

¹¹ ᒎᑎᓗ ᕿᓚᖕᒦᑦᑐᖅ ᐅᖃᕐᓂᕐᓗᒡᕕᒋᕚᑦ ᐋᓐᓂᐊᓂᑎᒃ ᐊᔪᐊᕐᓂᑎᒡᓗ ᐱᓪᓗᒋᑦ, ᓱᓕᓕ ᖃᕿᐊᓕᓚᐅᓐᖏᓚᑦ ᐱᓂᐊᕐᓂᕆᔭᒥᖕᓂᑦ.

¹² ᐂᖏᓖᓪᓗ ᐱᖓᓲᔪᕐᑐᖓᑦᑕ ᖃᓪᓗᑎᓂ ᑯᕕᒋᕚ ᑰᒑᓗᖕᒧᑦ ᐃᕗᕅᑎᒧᑦ, ᑰᒐᓗᒡᓗ ᐃᒤᕐᑎᑉᐳᖅ, ᐊᖅᑯᑕᐅᔪᓐᓇᕐᓯᓪᓗᓂᓗ ᐊᖓᔪᖅᑳᕐᔪᐊᓄᑦ ᓯᕿᓂᐅᑉ ᓄᐃᕕᐊᑕ ᓇᓛᓂᓐᖔᕐᑐᓄᑦ.

¹³ ᑕᑯᒋᕗᖓᓗ, ᐊᓂᕐᓂᕐᓂᒃ ᐱᖓᓱᓂᒃ ᐱᐅᖏᑦᑐᓂᒃ ᓈᕌᔨᑎᑐᑦ ᑍᒤᑦᑐᓂᒃ, ᑖᒃᑯᐊᓗ ᑐᕌᒍᓂᐅᑉ ᖃᓂᖓᓂᑦ ᐊᓂᕗᑦ ᐆᒪᔪᐊᓘᓪᓗ ᖃᓂᖓᓂᑦ ᓇᓚᐅᑦᑍᓂᕐᓗᒃᑑᓪᓗ ᖃᓂᖓᓂᑦ;

¹⁴ ᑖᒃᑯᐊ ᐊᓂᕐᓂᕐᓘᕗᑦ ᓵᑖᓇᓯᒥᓐᖔᕐᓯᒪᔪᑦ, ᑲᒪᓇᕐᑐᓂᒃ ᓴᖅᑭᑎᑦᓯᖃᑦᑕᕐᐳᑦ, ᐊᓂᕐᓃᓪᓗ ᑖᒃᑯᐊ ᐱᖓᓱᑦ ᓯᓚᕐᔪᐊᕐᒥᐅᓕᒫᑦ ᐊᖓᔪᖅᑳᕐᔪᐊᖏᓐᓄᐊᕐᐳᑦ, ᑖᒃᑯᐊ ᑲᑐᑦᔨᓗᑎᒃ ᐅᓇᑕᖅᑯᓪᓗᒋᑦ ᒎᑎᐅᑉ ᐊᔪᒐᖃᖏᑦᑐᕐᔪᐊᑉ ᐅᓪᓗᕐᔪᐊᖓᑕ ᓇᓪᓕᐅᓐᓂᖓᓂ.

¹⁵ “ᑕᑯᒋᑦ, ᑎᑭᓐᓂᐊᕐᐳᖓ ᑎᒡᓕᒐᕆᐊᑐᕐᑐᑎᑐᑦ! ᖁᕕᐊᓱᒻᒪᕆᖕᓂᐊᕐᐳᖅ ᐃᖅᑯᒪᔪᖅ, ᐊᓐᓄᕌᕐᓯᒪᓗᓂᓗ ᐊᓐᓄᕌᖃᖏᓪᓗᓂ ᐱᓱᑲᑕᖁᓇᒍ ᑲᓐᖑᓲᑎᒃᓴᖃᖁᓇᒍᓗ!”

¹⁶ ᑕᕝᕙ ᐊᓂᕐᓃᑦ ᐱᐅᖏᑦᑐᑦ ᐊᖓᔪᖅᑳᕐᔪᐊᓂᒃ ᐊᑕᐅᓯᕐᒧᑦ ᑲᑎᑎᑦᓯᔪᒫᕐᐳᑦ ᐄᑉᕉᑎᑐᑦ ᐊᕐᒪᒋᑕᓐᒥᒃ ᑍᔭᐅᔪᒧᑦ.

¹⁷ ᐂᖏᓖᓪᓗ 7ᖓᑦᑕ ᖃᓪᓗᑎᓂ ᑯᕕᒋᕚ ᓯᓚᑐᐃᓐᓇᕐᒧᑦ, ᑕᕝᕙ ᑐᒃᓯᐊᕐᕕᒡᔪᐊᒥᑦ ᓂᐱᖅᑯᕐᑐᔪᒥᒃ ᓂᓪᓕᕐᑐᖃᕐᐳᖅ, ᐃᒃᓯᕙᐅᑕᕐᔪᐊᒥᑦ, ᐅᖃᕐᓗᓂ, “ᐱᔭᕇᕐᐳᖅ!”

¹⁸ ᖃᐅᒻᒪᓪᓚᒃᑐᖃᕐᐳᕐᓗ ᓇᐅᒃᑯᑐᐃᓐᓇᖅ, ᐃᒃᑐᓚᐅᕐᑐᖃᕐᓗᓂᓗ, ᑲᓪᓕᕐᓗ ᑭᖑᓕᕇᒃᑕᕐᓗᓂ ᑐᓴᕐᓴᐅᕗᖅ, ᓄᓇᓗ ᓴᔪᒃᐱᓪᓚᒃᑐᐊᓘᕗᖅ ᑍᒫᒃ ᐊᖏᑎᒋᔪᒥᒃ ᓴᔪᒃᐱᓪᓚᒃᑐᖃᓚᐅᕐᓯᒪᓐᖏᓚᖅ ᓄᓇᕐᔪᐊᕐᒥ ᑍᒪᓐᖓᑦ ᐃᓄᖃᓕᓚᐅᕐᓂᕐᒪᑦ, ᓄᓇᐅᓪᓗ ᓴᔪᒃᐱᓪᓚᖕᓂᖓ ᐊᖏᓂᕐᐹᖑᕗᖅ.

¹⁹ ᐃᒡᓗᒐᓴᒡᔪᐊᓪᓗ ᐊᕕᒃᐳᑦ ᐱᖓᓲᓕᓪᓗᑎᒃ, ᐃᓅᖃᑎᒌᒡᔪᐊᓪᓗ ᐃᒡᓗᒐᓴᒡᔪᐊᖏᑦ ᓯᖁᑦᑎᕐᐳᑦ, ᒎᑎᐅᓪᓗ ᐃᖅᑲᐅᒪᕚ ᐹᐱᓘᓂ ᐊᖏᔪᕐᔪᐊᖅ, ᑕᕝᕙ ᐃᒤᕐᓯᑎᑉᐹ ᖃᓪᓗᑎᒥᒃ ᓂᓐᖓᖕᓂᕐᔪᐊᖓᓂᒃ ᐃᒪᓕᖕᒥᒃ.

²⁰ ᕿᑭᕐᑕᓕᒫᓪᓗ ᐊᓯᐅᕗᑦ, ᖃᖅᑳᓗᐃᑦᑕᐅᖅ ᐱᑕᖃᕈᓐᓃᕆᕗᑦ.

²¹ ᓇᑕᖅᑯᕐᓇᕐᔪᐊᓪᓗ ᐊᑐᓂᑦ ᐅᖁᒤᓐᓂᖃᕐᑐᑦ 100ᓂᒃ, ᐃᓄᖕᓄᑦ ᑲᑕᒐᕐᐳᑦ ᕿᓚᖕᒥᑦ, ᑕᕝᕙ ᐃᓄᐃᑦ ᒎᑎ ᐅᖃᕐᓂᕐᓗᒡᕕᒋᓕᕐᐹᑦ ᓇᑕᖅᑯᕐᓁᑦ ᐋᓐᓂᕐᓇᕐᑐᐊᓘᓂᖏᑦ ᐱᑦᔪᑎᒋᓪᓗᒋᑦ, ᑕᒪᓐᓇ ᐊᖏᔪᒥᒃ ᐋᓐᓂᐊᓇᕐᑐᕐᔪᐊᖑᖕᒪᑦ.